1999 азы Японийы горӕт Кобы къухӕйамонгӕ ӕвзагыл ӕмбырд базыдта иу къуырма нӕлгоймаг Хирофумийы тыххӕй. Не ’фсымӕр ӕм куы бацыд, цӕмӕй йемӕ аныхас кодтаид, уӕд ӕй йӕ мад нӕ бауагъта. Ӕфсымӕр ма сӕм цалдӕр хатты бацыд ӕмӕ Хирофумийы мадӕн балӕгъстӕ кодта ӕмӕ уый дӕр, ӕппынфӕстаг, йӕ  фырты дуары онг ракодта. Йӕ сӕрыхъуынтӕ ӕмӕ йӕ боцъотӕ уыдысты даргъ ӕмӕ пыхцыл. Ахӕм хуыз ын уыд, цыма дӕсгай азты дӕргъы ӕдзӕрӕг сакъадахыл фӕцард. Йӕ цӕсгомыл нӕдӕр цины ӕнкъарӕн уыд, нӕдӕр масты. Хирофуми ӕрмӕст къуырма нӕ уыд, фӕлӕ ма куырм дӕр. Ӕфсымӕр цавддурау фӕци, фӕлӕ йын йӕ къухтыл йӕ къухтӕ сӕвӕрдта ӕмӕ йын афтӕмӕй амонын райдыдта, куырм ӕмӕ къуырма чи у, уыдоны ӕвзагыл. Фӕлӕ уый змӕлгӕ дӕр нӕ фӕкодта. Дӕс азы размӕ, Хирофумийыл 31 азы куы цыд, уӕд бакуырм ӕмӕ уӕдӕй нырмӕ адӕмы ’хсӕнмӕ нал цыд ӕмӕ ныхас дӕр никӕимӕуал кодта.

Ӕфсымӕр та сӕм дыууӕ боны фӕстӕ бацыд. Хирофумийы мад тынг бадис кодта, уымӕн ӕмӕ йӕм афтӕ касти, ӕмӕ йын ӕфсымӕр йӕ фырты уавӕр куы фена, уӕд сӕм нал ӕрбацӕудзӕн. Ӕфсымӕр та мадӕн балӕгъстӕ кодта, цӕмӕй Хирофумийы федтаид, ӕмӕ та йӕ уый дӕр дуары цурмӕ ракодта. Иу мӕй сӕм фӕцыд, фӕлӕ-иу Хирофуми ӕнӕзмӕлгӕйӕ лӕууыд. Уӕд йӕ мад ӕфсымӕрӕн загъта, цӕмӕй йӕхи мауал тыхсын кӕна ӕмӕ сӕм мауал цӕуа. Фӕлӕ сӕм ӕфсымӕр уӕддӕр цыд. Йемӕ-иу адджинӕгтӕ дӕр ӕрбахаста, цӕмӕй равдыстаид, кӕй йыл тыхсы, уый. Фӕлӕ дыууӕ мӕйы фӕстӕ дӕр Хирофуми ницы «дзуапп лӕвӕрдта» ӕмӕ ӕфсымӕр ахъуыды кодта, дзӕгъӕлы йӕм кӕй цӕуы.

Не ’фсымӕр йӕхицӕн загъта, фӕстаг хатт ӕм кӕй бацӕудзӕн. Ацӕуыны размӕ Йегъовӕмӕ скуывта, цӕмӕй йын баххуыс кодтаид, Хирофумимӕ ма цӕуа ӕви нӕ, уый бамбарынӕн. Куы йӕм бацыд, уӕд ын йӕ къухтӕ райста ӕмӕ йын афтӕмӕй бамбарын кодта, Хуыцауы ном  Йегъовӕ кӕй у, ӕдзухдӕр ӕм уӕлӕрвтӕй кӕй кӕсы ӕмӕ йын йӕ зындзинӕдтӕ уый хуызӕн кӕй ничи ӕмбары, Йегъовӕ йыл кӕй тыхсы ӕмӕ йӕ кӕй фӕнды, цӕмӕй йӕ йӕ хъизӕмӕрттӕй фервӕзын кӕна ӕмӕ йӕм йӕ лӕггадгӕнӕджы дӕр уый тыххӕй кӕй ӕрбарвыста. Фыццаг Хирофумийы цӕсгомыл иу ӕнкъарӕн дӕр нӕ уыд. Фӕлӕ стӕй ӕфсымӕры къух райста ӕмӕ йын ӕй тынг нылхъывта ӕмӕ йӕ рустыл йӕ цӕстысыгтӕ ӕркалдысты. Ӕфсымӕрӕн дӕр йӕ зӕрдӕ суынгӕг ӕмӕ уый дӕр скуыдта. Уыйадыл райдыдтой Библи ахуыр кӕнын.

Хирофуми 11 азы дӕргъы ахуыр кодта Библи. Фыццаг цыд къухӕйамонгӕ ӕвзагыл ӕмбырдмӕ, фӕлӕ тынг дард кӕй уыди, уымӕ гӕсгӕ райдыдта бынӕттон ӕмбырдмӕ цӕуын. Уыцы ӕмбырды йемӕ къухты ӕххуысӕй ныхас кӕнын ничи зыдта. Фӕлӕ 22 ӕфсымӕры ӕмӕ хойы  иу аз ӕмӕ ӕрдӕгмӕ уыцы ӕвзаг сахуыр кодтой, цӕмӕй Хирофумийӕн ӕххуыс кодтаиккой. 2012 азы январы Хирофумийӕн Хуыцауы Ныхас хъусынгӕнджыты скъолайы уыди фыццаг хӕслӕвӕрд ӕмӕ йын ӕй иннӕтӕн тӕлмац кодтой. Уыцы аз ма октябры ӕнӕаргъуыд хъусынгӕнӕг дӕр сси.

Ӕфсымӕр Флорен у пионер, цӕры Филиппинты. Библи ахуыр кӕны иу-25 адӕймагимӕ, сӕ фылдӕр сты хъахъхъӕнджытӕ. Уыцы нӕлгоймӕгтӕ арӕх фӕкусынц изӕрыгӕтты, чидӕртӕ та ӕнӕхъӕн ӕхсӕв дӕр. Уымӕ гӕсгӕ Флорен фӕархайы уавӕртӕм гӕсгӕ. Хъахъхъӕнджытӕм куыстмӕ бацӕуы ӕмӕ семӕ фӕахуыр кӕны, улӕфгӕ куы фӕкӕнынц, уӕд кӕнӕ, сӕ куыст куыд нӕ бакъуылымпы уа, ахӕм рӕстӕг. Иуӕй-иутимӕ фӕахуыр кӕны изӕры авд сахатӕй ӕхсӕвы иуӕндӕс сахатмӕ, иннӕтимӕ та – райсомы фондз сахатӕй фараст сахатмӕ. Хатт сӕм бацӕуы, сӕ сменӕтӕ куы фӕивынц, уӕд. Афтӕмӕй йӕ бон вӕййы, кусын чи хъуамӕ райдайа, фыццаг уыимӕ сахуыр кӕнын, стӕй та – куыст чи фӕци, уыимӕ. Флорен загъта: «Уыйбӕрц адӕмимӕ Библи кӕй ахуыр кӕнын, уый мын цы циндзинад хӕссы, уыйас ницы». Ныр хъахъхъӕнджытӕй чидӕртӕ Паддзахады залмӕ ӕмбырдтӕм цӕуынц. Иу дзы донаргъуыд райста ӕмӕ ӕххӕстрӕстӕг пионерӕй лӕггад кӕны.

Сомихы иу къӕвда бон дыууӕ хойы уынджы федтой мад ӕмӕ чызджы, ӕмӕ сын буклет радтой. Мад хуынди Маруся, йӕ чызг та Евӕ. Хотӕ тынг бадис кодтой, мад сын куы загъта, ахӕм ӕвзӕр бон уынджы дыууӕ сахаты бӕрц кӕй лӕууыдысты, цӕмӕй Йегъовӕйы Ӕвдисӕнтыл фембӕлдаиккой. Цӕмӕн? Марусяйы ӕфсымӕр рӕстдзинад базыдта ахӕстоны. Йемӕ Библи ахуыр  кодтой, ӕфсадмӕ цӕуыныл чи нӕ разы кодта ӕмӕ уый тыххӕй ахӕстоны чи бадт, уыцы ӕфсымӕртӕ. Маруся ӕнхъӕл уыд, йе ’фсымӕр ахӕстонӕй куы рацӕуа, уӕд ӕгъатыр ӕмӕ мӕстыгӕр кӕй уыдзӕн. Фӕлӕ уый хиуылхӕцгӕдӕр ӕмӕ сабырдӕр сси. Йе ’фсымӕр дарддӕр дӕр Ӕвдисӕнтимӕ ахуыр кӕны ӕмӕ хуыздӕрырдӕм ивы. Фӕлӕ Маруся ӕмӕ йӕ чызг дис кодтой, уымӕн ӕмӕ-иу Йегъовӕйы Ӕвдисӕнты тыххӕй арӕх уыдтой мӕнг ныхӕстӕ горӕты плакаттыл ӕмӕ-иу телевизоры та сӕ фыдкой хъуыстой. Евӕ загъта: «Мӕ мадыфсымӕр диссаджы адӕймаг у. Уӕдӕ Йегъовӕйы Ӕвдисӕнты тыххӕй афтӕ бирӕ ӕвзӕр цыдӕртӕ цӕмӕн дзурынц?» Чызджы бафӕндыд уыцы фарстайӕн дзуапп базонын ӕмӕ йӕ мадӕн загъта: «Куы тӕрсӕм ӕмӕ ӕнцад куы бадӕм, уӕд нӕ базондзыстӕм, цавӕр адӕм сты, уый. Хъуамӕ абон Йегъовӕйы Ӕвдисӕнты ссарӕм, ӕмӕ мацӕуылуал дызӕрдыг кӕнӕм». Уыцы бон сыл нӕ хотӕ дӕр уый тыххӕй фембӕлдысты. Дыууӕ боны фӕстӕ мад ӕмӕ чызгимӕ Библи ахуыр кӕнын райдыдтой. Уыдон райдыдтой ӕмбырдтӕм цӕуын, ӕмӕ сӕ уырнындзинад афтӕ тагъд сфидар, ӕмӕ ныр сты ӕнӕаргъуыд хъусынгӕнджытӕ.

Турцийы горӕт Аданӕйы иу сылгоймагӕн уыйбӕрц зындзинӕдтӕ уыд, ӕмӕ йӕхи марынмӕ дӕр ӕрцыд. Фӕлӕ йӕ дуары цур дыууӕ журналы ссардта. Ӕвӕццӕгӕн сӕ сӕ сыхӕгты сывӕллӕттӕй чидӕр зӕххыл ссардта ӕмӕ ахъуыды кодта, уыцы сылгоймаджы кӕй сты, ӕмӕ йын сӕ йӕ дуары раз ныууагъта. Журналты цы биографитӕ бакаст, уыдон йӕ зӕрдӕмӕ афтӕ тынг фӕцыдысты, ӕмӕ йӕ бафӕндыд йӕ цард фӕивын. Журналтӕй иуыл фыст уыд телефоны номыр ӕмӕ йӕм сылгоймаг фӕдзырдта. Уыцы номыр уыд, ӕввахс ӕм чи цард, уыцы пионер-хойы, ӕмӕ йемӕ Библи ахуыр кӕнын райдыдта. Уыцы  сылгоймаг стыр аргъ кодта, Библийӕ цы базыдта, уымӕн, ӕмӕ хойӕн загъта, ӕмбырдтӕм цӕуын ӕй кӕй фӕнды. Куыд рабӕрӕг, афтӕмӕй йӕ хӕдзар Паддзахады залмӕ ӕввахс уыд. Сылгоймаг дӕр ӕвӕстиатӕй ӕмбырдтӕм цӕуын райдыдта ӕмӕ сӕ нӕ цух кӕны.

Непалы Бам куыста пъӕлицӕйы ӕмӕ аргъуанмӕ дӕр цыди. Иу бон уынджы куысты рӕстӕг фембӕлд сӕрмагонд пионертыл, лӕг ӕмӕ усыл. Тынг диссаг ӕм фӕкаст, йӕ алы фарстайӕн дӕр ын Библийӕ дзуапп кӕй лӕвӕрдтой. Бам сразы Библи ахуыр кӕныныл ӕмӕ тагъд рӕстӕджы ӕмбырдтӕм цӕуын дӕр райдыдта. Рӕстӕг куыд цыд, афтӕ йын йе ’фсарм ӕнцой нал лӕвӕрдта йӕ куысты тыххӕй. Йӕ хицаумӕ бацыд, цӕмӕй йӕ офисмӕ кусынмӕ раивтаид ӕмӕ йӕ хӕцӕнгарз хӕссын мауал хъуыдаид. Йӕ хицау дӕр сразы. Фӕлӕ Бам облӕстон конгресмӕ куы ацыд, уӕд та йын йе ’фсарм ногӕй ӕнцой нал лӕвӕрдта, ӕмӕ сфӕнд кодта пъӕлицӕйӕ бынтондӕр ацӕуын.

Бамы фӕнд йӕ бинойнаджы зӕрдӕмӕ нӕ фӕцыд, уымӕн ӕмӕ уыцы куыст ӕрмӕст кадджын нӕ уыд, фӕлӕ ма дзы хорз мызд, льготӕтӕ ӕмӕ хорз пенси дӕр уыд. Цӕмӕй Бам йӕ хъуыды аивтаид, уый тыххӕй йын загъта: «Пъӕлицӕйы дӕ куыст ма ныууадз, ӕмӕ ӕз дӕр Ӕвдисӕнтимӕ Библи ахуыр кӕнын райдайдзынӕн». Куы нӕ йын сразы, уӕд ус пъӕлицӕйы хицаумӕ ацыд ӕмӕ йын загъта, цӕмӕй Бамы ахӕстоны сбадын кӕна, зӕгъгӕ, кӕд йӕ хъуыды фӕивид. Дӕс боны фӕстӕ Бамы ахӕстонӕй рауагътой, фӕлӕ йӕ фӕнд нӕ фӕивта ӕмӕ ӕндӕр куыст агуырдта. Райдыдта велорикшӕйӕ кусын, ӕмӕ ныр хъуамӕ тӕвд хурмӕ фылдӕр рӕстӕг уыдаид. Кӕд ын ӕнцон нӕ уыд, уӕддӕр амондджын уыд. Йӕ уырнындзинад дарддӕр дӕр фидар кодта ӕмӕ хъусынгӕнӕг сси.  Рӕстӕг цыд, ӕмӕ йӕм йӕ бинойнаг дӕр ӕрфӕлмӕн. Сылгоймагмӕ ӕмбырды хотӕ ӕмӕ ӕфсымӕртӕ хорз цӕстӕй кӕй кастысты, уый фӕрцы Библи ахуыр кӕнын райдыдта. Бам йӕ бинонты дары ӕмӕ ӕхца исы, пъӕлицӕйы цас иста, уымӕй фылдӕр. 2013 азы февралы районон конгрессы донаргъуыд райста ӕмӕ ныр йӕ бинойнаг ӕмӕ йӕ лӕппу йемӕ ӕмбырдтӕм цӕуынц.

Корейы иу хо Мионг-хийыл дыууӕ азы куы цыд, уӕд ӕй паралич ныццавта ӕмӕ йӕ иу къах нал кусы. Тагъд бафӕллайы ӕмӕ хатт хаугӕ дӕр акӕны. Уымӕй уӕлдай ма ӕвиппайды тӕрсын райдайы ӕмӕ цы хостӕ нуазы, уыдоны тыххӕй дзы ноджы цыдӕртӕ фӕриссы. Мионг-хийӕн улӕфын зын у, ӕмӕ йӕ рыстыты тыххӕй тыхсын ӕмӕ мӕт кӕнын райдайы. Кӕд ахӕм зындзинӕдтӕ ӕвзары, уӕддӕр ӕй фӕндыд ӕххуысгӕнӕг пионерӕй лӕггад кӕнын. Ӕмӕ фӕстаг дыууӕ азы, зӕгъӕн ис, ӕмӕ алы мӕй дӕр лӕггад кодта. Йегъовӕйӕ бузныг у, хъарутӕ йын кӕй дӕтты, цӕмӕй йӕ бон лӕггад кӕнын уа.

Агнес миссионерӕй лӕггад кӕны Индонезийы. Базары-иу хъусын кодта, халсартӕ чи уӕй кодта, ахӕм ӕрыгон сылгоймагӕн. Уыцы сылгоймаг йӕхи бар нӕ уыд. Уарзта нын нӕ журналтӕ кӕсын ӕмӕ-иу ӕй куы ӕвдӕлд, уӕд Библийыл ныхас кӕнын дӕр. Иу бон ӕм Агнес базармӕ куы бацыд, уӕд уым нӕ разынд. Йӕ лӕг ын загъта, сывӕллон ын кӕй райгуырд. Агнес ӕй бабӕрӕг кодта. Сывӕллӕттӕн нӕм цы чиныг ис, уый рӕсугъд батыхта ӕмӕ йын ӕй ахаста. Сылгоймагӕн тынг ӕхсызгон уыд,  йӕ сывӕллоны бӕрӕг кӕнынмӕ йын кӕй ӕрбацыд, уый. Ноджы тынгдӕр та бадис кодта Агнесы лӕварыл. Лӕвар куы райхӕлдта ӕмӕ чиныг куы федта, уӕд йӕ цӕстытыл дӕр нӕ баууӕндыд, ӕмӕ загъта: «Кӕм дын уыди ацы чиныг? Ӕз ӕй 30 азы дӕргъы куы агурын! Чингуыты дуканитыл се ’ппӕтыл дӕр ӕрзылдтӕн, ӕмӕ кӕй нӕ бафарстон, ахӕм нал баззад. Фӕлӕ иу ран дӕр нӕ уыд ӕмӕ йӕ иу адӕймаг дӕр нӕ зыдта. Ахӕм хорз чиныг ӕндӕр нӕй». Ацы сылгоймаг гыццыл куы уыди, уӕд йӕ мады кӕстӕр ӕфсымӕрмӕ уыди ахӕм чиныг ӕмӕ йӕ гыццыл чызг уарзта кӕсын. Ныр уыцы чиныг сылгоймаг ногӕй кӕсы ӕмӕ йӕ йӕ хистӕр чызг дӕр уарзы кӕсын. Сӕ дыууӕимӕ дӕр райдыдтой Библи ахуыр кӕнын.