Umwanakashi umo uwafuma ku Somali uwikala ku Sweden balimwitile ku kulongana ku Ng’anda ya Bufumu kabili alisumine. Ilyo afikile tapali nangu umo uwamupokelele, bonse balemulolesha fye kabili ici calengele aumfwa ububi sana. Umo uwamumwene ukuti nalimo naumfwa ububi alimwipwishe ati, “Bushe namuluba?”

 Amwaswike ati, “Ee, kwati ninduba.” no kufuma afumapo.Ilyo uyu mwanakashi amonene na ba Nte abamwitile ukuya ku Ng’anda ya Bufumu, alikalipe sana ica kuti abebele ukuti takatale abwelelako na kabili. Balipapile sana pantu tabamumwenepo pa Ng’anda ya Bufumu. Ilyo batwalilile ukulanshanya, baishileiluka ukuti aile ku calici te ku Ng’anda ya Bufumu.

Ba Nte bamukoseleshe ukuya ku Ng’anda ya Bufumu na kabili. Alisumine ukuya lelo abebele ati nga ca kuti tabamupokelele bwino takekalepo na mamineti 10. Ilyo aingile mu Ng’anda ya Bufumu, bonse balimupokelele ne nsansa! Alyumfwile bwino sana ica kuti e walekelesheko  ukufuma pa Ng’anda ya Bufumu ilyo bapwishishe ukulongana. Ukutula lilya line alalongana lyonse kabili ino nshita ni kasabankanya uushabatishiwa.

Bushiku bumo, umulumendo Stergios, uwikala ku Greece, alefuma ku ncito alebwelelamo ku ng’anda kabili apitile inshila imbi ukucila iyo alepitamo lyonse. Ilyo aleya amwene akapepala ka kwitilapo abantu ku Cibukisho ca Mfwa ya kwa Yesu. Pali aka kapepala pali icipusho icaleti; “Finshi Mutontonkanya Pali Yesu?” Apo kwali abantu lwa mupepi, Stergios alyumfwile insoni ukutoola akapepala. Ilyo afikile ku ng’anda, atampile ukutontonkanya pali cilya cipusho kabili alefwaisha ukwishiba icasuko.

Stergios alefwaya ukunwena kofi pamo na banankwe mu nshita ya kasuba bulya bwine bushiku. Pa kuya ku banankwe, apitile inshila imo ine umo amwene akapepala, aleenekela ukuti alakasanga. Alikasangile, lelo abantu tabafuminepo, e co na kabili alyumfwile insoni ukukatoola. Ilyo banwene kofi Stergios alibwelelemo, kabili apitile inshila imo ine. Akapepala nako kali fye palya pene. Uno muku wena alitoolele no kubelenga. Ilyo apwishishe ukubelenga aliile ku Cibukisho.

Pa numa ya kulongana, Stergios alisumine ukulasambilila Baibolo. Alitampile ukulongana kabili alilundulwike sana ica kuti pa kulongana kwaibela ukwaliko mu March 2013 alibatishiwe.

Mu January 2010, Munyinefwe Finn uwikala ku Denmark, aile aleolola amolu kabili alisendeleko na magazini. Ilyo aleya mu kashila ka tondo, amwene shikulubantu aleisa. Ba Finn babuulile magazini ya  December 2009 umwali ifipande ifyalelanda pali Krisimasi no kupeela shikulubantu. Kabili ilyo fye uyu shikulubantu ayaswike, ba Finn balishibe ishiwi lyakwe. Kwali programu ya pa cilimba iyo aletungulula nga kuli ukulanshanya na bantu kabili aali uwasambilila sana. Ubushiku bwakonkelepo, ba Finn balekutika ku cilimba kabili balipapile ilyo baumfwile ulya shikulubantu alelondolola ukuti ubushiku bwafumineko alipokeleko magazini. Lyena, abelengele ifipande fimo pa mulabasa. Pa fipande ifyo abelengele pali ne calelanda pa “lutanda” lulya lwatungulwile abantu ukwafyalilwe Yesu kabili alisumine ukuti cine cine Satana Kaseebanya e walutumine.

Ba Finn balyumfwile bwino sana pali ici cacitike, e co balitumiine ulya shikulubantu foni. Ilyo balelanshanya, bamwipwishe nga kuti caba fye bwino ukutampa programu ya kulanshanya amalyashi ya mu Baibolo pa cilimba. Pa numa fye ya milungu ibili, balibasuminishe. Programu iya maawala yabili iyalelanda pa Nte sha kwa Yehova na pali Baibolo yalisabankanishiwe ukucila pa miku 30. Shikulubantu na ba Finn e balesala amalyashi ya kulanshanyapo kabili balyaswike amepusho ayengi ayo abalekutika ku cilimba baleipusha pa foni.

Umo pa balekutika alitumine inambala ya foni yakwe ku umubomfi wa ku mulabasa. Alefwaya ukulanshanya na bamunyinefwe. E fyo bamutumiine foni. Pa myaka iingi, uyu mwaume alyumfwile uko abanankwe na balupwa wakwe balelanda ifyabipa pali ba Nte, lelo ilyo akutike kuli ilya programu, alilekele ukupata ba Nte. Alitendeke ukusambilila Baibolo kabili mu 2013 alisangilwe ku Cibukisho na ku lyashi lyaibela. Alalongana lyonse pa Mulungu kabili alasukapo bwino sana pe Sambililo lya Ulupungu lwa kwa Kalinda. Abantu abengi  aba kuli iyi ncende balitampa ukusumina ukusambilila pa mulandu wa fyo baumfwile pali iyi programu.

Bwali bushiku bwa kulekeleshako ubwa kulongana kwa citungu mu Italy. Ilyo ba Lucio baleshalikapo ababwananyina, bamwene umwaume no mwina mwakwe baisa pe bumba. Ba Lucio baipwishe aba baupana icilonganino bafumineko. Bayaswike abati, “Tatufumine ku cilonganino icili conse.”

Ba Lucio babepwishe abati, “Bushe kwali abamwitile ku kulongana?”

Batile, “Awe, twaciisa fye fwe bene.”

Apo ba Lucio balefwaisha ukwishiba ifishinka, balikonkenyepo no kwipusha abati, “Bushe kuti mwanjebako icilengele ukuti mwise kuno?”

Batile: “Twasangile akapepala pa mwinshi, e co twatile, natukayesangwako.”

Ilyo aba baupana balangilile ba Lucio uko baleikalila, ba Ester abena mwabo bapundile abati: “Nine nashile kalya kapepala! Bwali bushiku bwa kulekeleshako ubwa kampeni, e co natile ukucila ukupoosa fye utupepala utwashelepo, kuti cawama ukutusha pa mayanda apo tushasangile abantu.” Ilyo aba baupana basangile akapepala, baile ku Cikuulwa ca Kulonganinamo Ukulongana Kukalamba ku kuyaumfwako kuli programu ya pa Mulungu. Pa numa ya kulanshanya pa kashita akanono, ba Lucio na bena mwabo ba Ester baitile aba baupana ku ca kulya ku ng’anda ku mwabo, kabili e ko bailetwalilila ukulanshanya. Aba baupana balisumine ukutendeka ukusambilila Baibolo. Lyonse balapekanya bwino isambililo lya Baibolo kabili pali ino nshita balalongana no kwasukapo.