Ba Freda, ni bankomamatwi. Balitemenwe sana ilyo baumfwile ukuti bena na nkashi uwalebasambilisha Baibolo baali no kukuukila ku cilonganino ca lulimi lwa bankomamatwi ku Papua New Guinea. Ici cilonganino capangilwe pa 1 March, 2013. Ba Freda balilwike ukuti baleumfwikisha sana ifyalelandwa pa kulongana nga tabalebelenga mu fitabo ilyo ilyashi lilelandwa lelo nga babikile fye amano ku fyo abali ku cisebele balelanda  mu lulimi lwa bankomamatwi. Balipapile sana ukuti ukucita ifi kwalibafwile ukukanaba ne nsoni kabili balitampile no kwasukapo imiku iingi pa kulongana. Mu April 2013, balifikilepo ukuba kasabankanya uushabatishiwa kabili ino nshita balakoselesha bankomamatwi na bambi ukuya nabo ku kulongana. Ilyo babepwishe ico balukushisha ifilamba nga bali pa kulongana, bayaswike abati, “Pantu nomba ndomfwikisha.”

Ilyo ba Barbara aba ku Australia baleya ku kukumana kwa mulimo wa mwi bala, baiminike motoka pa mbali ya musebo pa kuti bamone nga balisendele akatabo ako balelembamo amashina ya bantu balingile ukutandalila mu fipempu fya kubwelelamo. Bamwene fye iciibi ca motoka caisuka no mwanakashi aingila.

Ba Barbara bamwipwishe abati, “Bushe ni muli ino motoka mulingile ukunina?”

Umwanakashi ayaswike ati, “Munjeleleko mukwai, nacimona kwati ni mwe mwishile mu kunsenda.” Ilyo uyu mwanakashi amwene magazini ya Ulupungu lwa kwa Kalinda na Loleni! atile, “Kale nalebelenga sana iyi magazini, kwali abanakashi babili abalensambilisha Baibolo abalendetela.” Ilyo line fye ba Barbara bapeele umwanakashi magazini kabili balitampile ukusambilila nankwe Baibolo.

Ba Violet abali ne myaka 82 bekala mu Christchurch ku New Zealand kabili balalwalilila. Ilingi line balatuma amakalata ne mpapulo ku mayanda uko basungila abakoloci na bantu abalwalilila. Ba nasi abatwala amakalata ne mpapulo batile abakoloci balatemwa ukupokelela ifyo abene  batila amakalata ayafuma kuli Lesa. Bamo balaibelengela amakalata ne mpapulo e lyo nga bapwisha balapeelako abanabo pa kuti nabo babelengeko no kwishiba ifyo abanabo babalembele. Nomba abashimwenesha bena balababelengelako ku banabo. Banasi abasunga abakoloci batila balya ababelengako amakalata ne mpapulo balitekanya kabili tabacita ifikansa nga banabo abashibelengako. Ba Violet balandile pa fyo babombesha ukuti, “Imona ukuti Yehova acili alesambilisha abantu ukupitila muli ine. Ndatemwa sana ukusambilishako bambi icine.”

Cali ni Pa Cibelushi ilyo ba Bernie baleshiila abantu Ulupungu lwa kwa Kalinda pa fishi fya mu Saipan umwanakashi umo abebele ati, “Nalibelenga kale iyi magazini.” Tabaleenekela ukumfwa ici icasuko pantu magazini e lyo yafumine fye. Ba Bernie balipapile sana pa kumfwa ukuti Bernadette, umusambi wa pa koleji uo basangile pali iyi ng’anda alibelenga kale iyi magazini. E co babuulile magazini imbi mu cola no kumupeela. Na kabili Bernadette ayaswike ati, “Na iyi yine naliyibelenga.” Ba Bernie balipelenganishiwe, bamwipwishe abati, “Ni kwi wabelengele magazini yonse iyi? Bushe uli Nte, waisa fye mu kutandala kuno?” Bernadette alilondolwele ukuti taali ni Nte, lelo abelengele fye magazini pa Intaneti. Bushiku bumo ilyo Bernadette alefwaya ifyebo fimo pa maluba beta ukuti Rose flower pa Intaneti, asangile ifyebo mu cipande ca muli Awake! icaleti, “Alluring Roses From Africa” pa webu saiti iya Nte sha kwa Yehova. Bernadette aebele ba Bernie ukuti alitemenwe sana ifyebo abelengele muli ici cipande ica kuti alikonkenyepo ukufwaya ifyebo na fimbi pa webu saiti ya ba Nte. Pa kubalilapo, alebelenga fye ifyebo pa miti ne nama lelo pa numa alisangilepo ifyebo na fimbi ifisuma sana ifilanda pali Baibolo. Ilyo ba Bernie bamwene ukuti Bernadette alefwaisha ukusambilila, balimwebele ukutila kuti bamusambilisha Baibolo kabili ilyo babweleleko, balimutwaliile icitabo citila, Bushe Cinshi Baibolo Isambilisha? Ilyo ba Bernie babweleleko umuku walenga butatu, ninshi balitendeka kale ukusambilila mu cipandwa ca kubalilapo. Papitile fye nalimo umwaka umo, Bernadette alibatishiwe mu November 2012. Bernadette alilundulwike bwangu sana ica kuti na banankwe balipapile. Ifyo asambilile pa webu saiti e fyamwafwile ukulunduluka bwangu.