Si Jesus nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mat. 24:14) Ang jw.org nga Web site epektibo gid sa paglab-ot sa “tanan nga pungsod” sa nabilin nga malip-ot nga tion antes mag-abot ang katapusan.

Ang mag-asawa nga misyonero sa Solomon Islands nagabantala sa isa ka komunidad nga malapit sa dagat. Nakita nila ang apat ka may edad nga lalaki nga may dala nga mga cell phone. Sa ila pagpamangkot, natukiban sang mag-asawa nga makahibalo sila maggamit sing Internet. Gani ginpakita sa ila kon paano nila makadtuan ang  jw.org, pangitaon ang ila lenguahe, madownload ang mga magasin kag Biblia, kag gamiton ang mga seksion para sa pamilya kag kabataan. Sa pagbantala sining mga misyonero, nalipay sila sa pagpatan-aw sa mga bata sang video nga Pray Anytime. Pagkatapos nga matan-aw sang grupo sang kabataan ang video, nagdalagan sila sa kagulangan nga nagakanta, “Anytime, anywhere, I can pray . . . ”

Ang masunod pila lamang sa mga sulat sang pagpasalamat nga nabaton sang ulong talatapan sa New York:

“Kami sang akon bana nagsaylo sa Mexico, kag nagatuon kami sing Espanyol para mapanaksihan ang mga tawo diri. Kada magkadto ako sa jw.org nagapasalamat ako kay Jehova kay ginabuligan ako sini nga magpamati kag magtuon. Madamo sing matigayon diri—magasin, libro, musika, kag drama—sa lainlain nga lenguahe. Salamat gid sa tanan ninyo nga pagpangabudlay. Palangga ko gid kamo.”—D.H., Mexico.

“Harapon ako, gani nanamian gid ako sa inyo Web site bangod madamo ako sing mapamatian diri nga mga rekording. Kuntani padayon kamo nga maghimo sing MP3 format (audio files) sang mga libro, brosyur, kag iban pa nga naimprinta nga publikasyon nga mapamatian ko sa bug-os nga adlaw.”—K.G., Estados Unidos.

“Nanamian gid ako sa jw.org! Mahapos ini gamiton kag napalig-on ako sini nga mangin makugi pa gid sa akon personal nga pagtuon kag ministeryo. Setentay dos anyos na ako, 47 ka tuig nga bawtismado, kapin sa 30 ka tuig nga nagpayunir, may 9 ka bawtismado nga kabataan, 16 ka apo, kag 3 ka apo sa tuhod. May apat na ka henerasyon sang mga regular payunir sa amon pamilya.  Nagapasalamat gid ako kay Jehova sa sining espirituwal nga pagkaon sa husto nga tion.”—M.T., Estados Unidos.

“Alas kuatro sa aga subong samtang ginasulat ko ini. Pirme ako indi makatulog kon gab-i bangod sa multiple sclerosis kag iban pa nga kabudlayan, kaangay sang ginabatas man sang madamo naton nga kauturan sa bilog nga kalibutan. Pero wala kami ginapabay-an ni Jehova sa espirituwal, kag amo ini ang rason kon ngaa nagapasalamat ako sa inyo. Kon may laragway, mas madali ako makapamensar, gani daku gid ang nabulig sa akon sang Web site. Ginaapresyar ko gid ang mga graph, video, kag piktyur upod ang maathag nga mga komento sini.”—B.B., New Zealand.

“Nagsulat ako para pasalamatan kamo. Isa ako ka doktor sa malayo nga bahin sang Sri Lanka, kag indi makalab-ot diri ang mga magasin sa akon lenguahe. Pero salamat sa inyo Web site kay makadownload ako kag makabasa sini sa akon lenguahe. Ang inyo Web site isa sa pinakamaayo nga  regalo ni Jehova sa mga tawo kaangay sa akon.”—N.F., Sri Lanka.

“Salamat gid sa tanan ninyo nga pagpangabudlay para buligan ang mga tawo nga makatuon parte kay Jehova. Palihug padayuna ninyo ang paghimo sing mga video sa jw.org. Nakabulig ini sa mga problema ko kag sang amon pamilya. Pero ang nakabulig gid sa akon amo ang video nga Beat a Bully Without Using Your Fists. Sa liwat, salamat gid sa inyo kapisan.”—Y.S., 9 anyos, Estados Unidos.

“Salamat gid sa inyo kag kay Jehova sa espirituwal nga pagkaon nga amon natigayon. Nakabulig gid sa akon ang Web site nga jw.org, ilabi na ang seksion nga ‘Tin-edyer.’ Nanamian man ako sa serye nga Mangin Abyan ni Jehova. May tatlo ako ka magagmay nga manghod nga babayi, kag nakita ko nga positibo gid ang epekto sini sa ila. Bisan pa malayo kami sa inyo, nahiusa kita nga mga mag-ulutod bangod ginahigugma naton si Jehova. Salamat gid.”—A.B., Peru.