Ka Caleb, akalumendo ka muli vidio ya tukadoli iya kuti Beni Cibusa wa kwa Yehova, nomba nakeshibikwa isonde lyonse. Vidio ya kubalilapo iya kwa Caleb pali ino nshita yalipilibulwa mu ndimi 130, kabili abantu abengi balilemba amakalata ya kutasha pali aya mavidio.

Umwaice umo umukashana uwa myaka 11 na nkashi yakwe uwa myaka 8 balembele abati: “Tulefwaya ukusangwilako ku mulimo wa kushimikila mwi sonde lyonse. Pa kuti tukwate ishi ndalama twashitishe utwana twa ng’ombe tubili uto twatekele. Twatwinike amashina ya kuti Big Red na Earl. Twatuma ishi ndalama pa kuti mushibomfye ku kupangamo amavidio na yambi aya kuti  Beni Cibusa wa kwa Yehova. Kabili kuti cawama nga ca kuti Caleb akwata nkashi yakwe umwaice pa kuti bana Caleb bakabike sana amano kuli ena ukucila kuli Caleb. Twalitemwisha sana vidio ya kwa Caleb!”

Abaice abengi balisungila ku mutwe ifyaba muli iyi vidio, kumo no lwimbo e lyo na mashiwi ya kwa kashimika. Nkashi umo alembele ukuti mu cilonganino aba, mwaba bakasabankanya 100, e lyo 40 bana abashilakumanya imyaka 10. Uyu nkashi aikele mu mutande walenga butatu mu Ng’anda ya Bufumu ilyo baleimba ulwimbo namba 120 pa kusondolwelela ukulongana. Ifyo abana baimbile bwino ulu lwimbo fyalengele ifilamba ukulengelela mu menso ya kwa nkashi.

Nakulubantu umo atile ilyo umwishikulu wakwe atambile iyi vidio imiku ibili, atile: “Mfwile ukuwamya mu muputule wandi pa kuti utulubi tatuwishishe umuntu nangu umo no kuicena nga awa.” Alefwaisha ukuwamya mu muputule wakwe ilyo talalya.

Mu mushi umo uwa ku South Africa, abaice abengi baleya cila bushiku pa ng’anda imo iya kwa Nte. Abantu bamo balemona kwati ico abaice batemenwe ukuya pali iyi ng’anda nico baleya mu kushita switi. Lelo abaice e baleita abaice banabo ku kuya mu kutamba vidio ya kuti Muleba ne Cumfwila E lyo Mukapaalwa iya mu citundu cabo, iciXhosa. Bushiku bumo abaice abaile mu kutamba vidio bali 11, e lyo bonse balisungiile no lwimbo lwa muli vidio.

Ku Ecuador kwali abaice babili, Isaac uwa myaka 8 no mwaice wakwe Saul uwa myaka 5 abalanda iciQuichua abalebomfya indalama balebapeela isha kuliilamo ku  kushitamo utufuti, utumapanga no tulubi tumbi utwakwete ifyanso. Aba bana tabali bana baba Nte. Bushiku bumo nyinabo abebele ukuwamya mu muputule wabo no kubika utulubi twabo mu cibokoshi mwi fungu. Pa numa aba baice balibapeele vidio ya kuti Beni Cibusa wa kwa Yehova, kabili bonse balitambile. Pa numa ya mulungu umo ilyo nyinabo alepyanga mu ng’anda, asangile balifumyamo utulubi tonse, bashilemo fye ka motoka, e pa kubepusha ati, “Ni kwi mwatwala utulubi?” Bayaswike abati, “Yehova alipata tulya tulubi, e co twalitupoosa mu ng’ungulu.” Pali lelo, Isaac nga amona abanankwe baleangasha utulubi utulenga abaice batemwa ulubuli, alabeba ati, “Mwilayangasha ifya musango uyu, Yehova tafwaya!”