Mme owo ke ofụri ererimbot ẹnen̄ede ẹfiọk Kokoete, ekpri eyen oro ke vidio Di Ufan Jehovah emi odude ke jw.org. Ẹkakabade akpa ke otu mme vidio emi ke se ibede usem 130, ẹnyụn̄ ẹwet ata ediwak leta ekọm ẹban̄a vidio emi.

Eyen isua 11 ye ekpri eyeneka esie an̄wan emi edide isua 8 ẹkenọ leta emi: “Nnyịn inọ etịbe emi ẹda ẹnam utom ukwọrọikọ ofụri ererimbot. Ikenyene okụk emi ke ini ikanyamde enan̄ iba oro ikọbọkde. Enyịn̄ mmọ ẹkedi Akamba Ndatndat ye Eyenọbọn̄. Nnyịn inọ mbufo okụk emi ẹda ẹnam ediwak vidio Di Ufan Jehovah. Ikpama ndikụt nte Kokoete enyenede ekpri eyeneka an̄wan, ye nte  enye anamde n̄kpọ ke ini owo mînọhọ enye ntịn̄enyịn aba nte ẹkesinọde. Vidio Kokoete ke ima ikan!”

Ediwak nditọwọn̄ ẹkeme nditịn̄ kpukpru n̄kpọ ke vidio emi ke ibuot, esịnede ikwọ ye ikọ ọnọmbụk. Eyenete an̄wan kiet ekewet ete ke mme asuanetop 100 ẹdu ke esop mmimọ, ndien ke mmọ ẹnyene nditọwọn̄ 40, emi ediwak mîsịmke isua duop. Eyenete an̄wan oro eketie ke ọyọhọ udịm n̄kpọitie ita ke ini ẹkekwọde ọyọhọ ikwọ 120 ndida nsuana mbono esop. Mmọn̄eyet ama asiaha enye ke ini enye okokopde nte nditọwọn̄ ẹkwọde ikwọ emi mmọ ẹdade nte ikwọ mmọ mi ke ofụri esịt.

Owo kiet emi edide ekaeka ọdọhọ ke ini eyeyen imọ ekesede vidio emi ikaba, ke enye ama ọdọhọ ete: “Yak n̄kanam ubet mi asana mbak n̄kpọmbre mi edinam owo ọduọ ada unan.” Ama enen̄ede ọdọn̄ enye ndinam ubet esie asana tutu enye imaha ndidia udia ibọhọke ke ama akanam ubet esie asana.

Ke obio-in̄wan̄ kiet ke South Africa, esidi ediwak nditọwọn̄ ẹdodụk ẹwọwọrọ ke ufọk emi mme andidụn̄ ẹdide Mme Ntiense. Ndusụk owo ẹkekere ke Mme Ntiense oro ẹsinyam swid. Edi nditọwọn̄ emi ẹsidi ke ntak emi nditọwọn̄ ẹkotde mmọ ẹte ẹdise vidio Kop Nyụn̄ Nam, man Ediọn̄ Fi ke usem mmọ emi edide Xhosa. Enyene ini kiet emi nditọwọn̄ 11 ẹkesede vidio oro, ndien kpukpru mmọ ẹfiọk ndikwọ ikwọ vidio oro ke ibuot.

Odu nditọwọn̄ iba ke Ecuador emi mîdịghe Mme Ntiense—Isaac emi edide isua itiaita ye Saul ekpri udọeka esie emi edide isua ition ye ubak. Mmọ ẹsifam okụk udia uwemeyo mmọ ẹnịm ẹda ẹdep ikan̄ nditọwọn̄, akan̄kan̄,  ye mbiet mbon uko. Usen kiet eka mmọ ama ọdọhọ mmọ ẹtịm n̄kpọ ẹbon ke ubet mmọ ẹnyụn̄ ẹtan̄ kpukpru n̄kpọmbre ẹdọn̄ ke ekebe emi odude ke idak bed mmọ. Nte ini akakade, ẹma ẹnọ nditọ emi Di Ufan Jehovah ke DVD, mmọ ẹnyụn̄ ẹtie ọtọkiet ẹse. Urua kiet ke oro ebede, ke ini eka mmọ ọkọkpọride isọn̄, enye ama okụt ke moto mbre nditọwọn̄ kpọt ekesịne ke ekebe emi odude ke idak bed nditọ oro. Enye ama obụp nditọ oro ete, “N̄kpọmbre mbufo-o?” Mmọ ẹma ẹbọrọ ẹte, “Jehovah imaha mme n̄kpọmbre oro, ntre ima itomo mmọ iduọn̄ọ.” Idahaemi, nditọwọn̄ en̄wen ẹma ẹbre mbre ye mme n̄kpọ emi ẹkpepde owo afai, Isaac esidọhọ mmọ ete: “Ẹkûda n̄kpọ oro ẹbre mbre. Jehovah imaha!”