Kalebe, ku nga xifanyetana lexi nga eka tivhidiyo ta le ka jw.org ta ntlhandlamano lowu nga ni nhloko-mhaka leyi nge Vana Munghana Wa Yehovha, se xa tiveka emisaveni hinkwayo. Vhidiyo yo sungula ya xifanyetana lexi, lexi rhandzekaka se yi hundzuluxeriwe hi tindzimi to tlula 130 naswona ku kumiwe mapapila ya madzana lama vulavulaka hi ntlhandlamano wa tivhidiyo leti.

Papila leri landzelaka ri huma eka xinhwanyetana xa malembe ya 11 ni ndzisana ya xona ya xinhwanyetana lexi nga ni malembe ya nhungu, swi te: “Hi lava ku nyikela eka ntirho wo chumayela wa misava hinkwayo. Mali leyi hi yi kume hi ku fuwa swirhodyana swimbirhi kutani hi swi xavisa. Mavito ya swona a ku ri Big Red na Earl. Hi lava ku mi nyika mali leyi hikuva hi anakanya leswaku mi ta yi tirhisela ku endla tivhidiyo leti engetelekeke leti nge Vana Munghana  Wa Yehovha. Hi anakanya leswaku a swi ta tsakisa swinene loko Kalebe a va ni ndzisana leyitsongo leyi a yi ta endla leswaku a nga ha rhandziwi ku fana ni le ku sunguleni. Ha yi rhandza swinene vhidiyo ya Kalebe!”

Vana vo tala va nhlokohate vhidiyo leyi hinkwayo, ku katsa ni risimu kun’we ni marito ya muhlamuseri. Makwerhu un’wana wa xisati u tsale leswaku evandlheni ra ka vona ku ni vahuweleri va 100 ni vana va 40, lava vo tala va vona va nga ehansi ka malembe ya khume. Makwerhu loyi a a tshame elayinini ya vunharhu loko ku yimbeleriwa risimu 120 ro gimeta minhlangano. Loko a twa vana hinkwavo va yimbelela “risimu ra vona” hi ku hiseka, swi n’wi khumbile lerova a kala a rila.

Kokwana un’wana u hlamusela leswaku xitukulwana xakwe xa xinhwanyetana xi hlalele vhidiyo leyi kambirhi, kutani xi ku: “Ndzi fanele ndzi basisa kamara ra mina leswaku munhu a nga wisi hi tithoyi ta mina kutani a vaviseka.” A xi tiyimisele swinene lerova a xi lava ku basisa kamara ra xona emahlweni ko va xi dya.

Eximutanini xin’wana xa le Afrika Dzonga, vana vo tala a va ya siku ni siku ekaya ka Mbhoni yin’wana. Vanhu van’wana a va ehleketa leswaku a ku ri hikwalaho ka leswi endyangwini wolowo a ku xavisiwa malekere khale. Kambe vana va le ximutanini xexo a va rhambiwa hi vana van’wana leswaku va ta vona vhidiyo ya tiphophayi leyi nge Yingisa, Kutani U Katekisiwa hi ririmi ra vona ra Xixhosa. Ku te vana va 11 naswona hinkwavo ka vona se a va nhlokohate marito ya risimu rero.

Swifanyetana swimbirhi leswi nga riki Timbhoni leswi vulavulaka Xiquichua swa le Ecuador, ku nga Isaac, lexi nga ni malembe ya nhungu ni ndzisana ya xona Saul, lexi nga ni malembe ya ntlhanu, a swi hamba swi veka mali ya swona  ya siku ni siku yo xava malekere leswaku swi ta xava swibamu, mabanga ni tithoyi tin’wana ta nyimpi. Siku rin’wana mana wa swona u swi kombele leswaku swi basisa kamara ra swona ni leswaku swi veka tithoyi ta swona ebokisini ehansi ka mubedo. Endzhakunyana, swifanyetana sweswo swi nyikiwe DVD leyi nge Vana Munghana Wa Yehovha tanihi nyiko kutani swi yi hlalela swin’we. Endzhaku ka vhiki, loko mana wa swona a ri karhi a basisa yindlu, u kume leswaku bokisi leri a ri ri ni tithoyi to tala a ri lo sala ni thoyi yin’we ntsena ya ximovhana. U vutise swifanyetana swakwe a ku: “Mi ti veke kwihi tithoyi ta n’wina?” Swi te: “Yehovha a nga tirhandzi tithoyi leti, kutani hi ti cukumete laha ku cheriwaka thyaka.” Loko vana lava nga vaakelani va swona va tlanga hi tithoyi leti hlohlotelaka madzolonga, Isaac u va byela a ku: “Mi nga tlangi hi tithoyi teto. Yehovha wa ti venga!”