Sang Oktubre 2012, isa ka bag-o nga eksibit parte sa kasaysayan sang mga Saksi ni Jehova ang ginbuksan sa Brooklyn, New York. Ang mga bisita makalibot diri nga wala sing tour guide. Makita sa sini ang mga kabudlayan kag katalagman nga gin-atubang sang mga nagtinguha sa pagkabuhi subong Cristiano, kaangay sang gintudlo ni Jesus.

Sa una pa lang nga semana, kapin sa 4,200 ka bisita kag miembro sang pamilya Bethel ang nagtan-aw sa eksibit. Si Naomi, isa ka Saksi nga nagaistar sa malapit, nag-tour dayon pagbukas sini. “Ang time line nakabulig sa akon nga mahibaluan kon san-o kag ngaa natabo ang mga butang,” siling niya. “Madamo ako sing natun-an parte sa aton organisasyon kag sa moderno nga kasaysayan sini.”

 Ang tour nagasugod sang panahon sang mga Cristiano sang 33 C.E. asta sa presente. Ini nga eksibit may apat ka seksion, kada isa may tema halin sa Kasulatan, kag may malip-ot nga video sa Ingles, nga may subtitle sa pito ka lenguahe.

Ang una nga seksion nga, “Ginhigugma sang mga Tawo ang Kadudulman,” ginkuha sa pinamulong ni Jesus sa Juan 3:19. Gintagna sang Biblia nga pagkapatay sang mga apostoles, ang malaut nga mga tawo “magalutaw kag magahambal sang tiko nga mga butang.” (Binu. 20:30) Ang indi magdampig sa ila magaatubang sing mabug-at nga silot.

Sa kabaliskaran, ang masunod nga seksion, nga may tema nga “Magsilak ang Kapawa” base sa 2 Corinto 4:6, nag-umpisa sang ulihi nga bahin sang dekada 1800 sang gin-usisa liwat sang sinsero nga mga estudyante sang Biblia  ang Kasulatan. Ginsikway nila ang ila mga ginapatihan sadto nga wala sa Biblia kag maisog nga ginbantala ang masanag nga kamatuoran. Ini nga seksion nagasugid sang ila pagtubo sa ihibalo kag pagdamo antes sang Bug-os Kalibutan nga Inaway I.

Dayon, may isa ka hulot sa diin makita ang nahimo sang mga Saksi ni Jehova sadto nga bisan kita subong interesado gid. Sang 1914, ang mga Estudyante sang Biblia (kilala subong nga mga Saksi ni Jehova) nagpasalida sang “Photo-Drama of Creation.” Minilyon ang nakatan-aw sini nga produksion, nga kombinasyon sang mga piktyur kag pelikula nga ginadunganan sang musika. Makita sa eksibit ang pila ka butang pareho sang orihinal nga mga drowing, malip-ot nga video sang pila ka bahin sang introduksion sang programa, kag kapin sa 500 ka de-kolor nga slide.

 Ang masingki nga paghingabot sa mga sumulunod ni Jesus, nga ginlaragway sa Bugna 12:17, amo ang tema sang ikatlo nga seksion nga “Ang Dragon Naakig Gid.” Ginpadaku diri ang Cristianong neutralidad sa tion sang inaway. Magluwas sa dumaan nga mga butang kag mga laragway, ang malip-ot nga mga video nagapakita kon paano ginpilit ang indi magkompromiso, pareho kay Remigio Cuminetti sang Italya, nga nangindi sa pagsuksok sang uniporme sang militar ukon pag-entra sa Bug-os Kalibutan nga Inaway I. Sa isa pa ka video makita si Alois Moser sang Austria. Nangindi sia nga magsiling sing “Heil Hitler.” Gani, ginpahalin sia sa obra kag gintapok sa kampo konsentrasyon sa Dachau. Sa sini nga seksion may replika sang selda nga may mapiraw nga suga. Sa sulod sini may mga piktyur sang napriso nga mga Saksi ni Jehova sa Gresya, Japan, Poland, anay Yugoslavia, kag iban pa nga lugar bangod sa ila pagtuo.

Ang katapusan nga seksion nga, “Maayong Balita Para sa Tanan nga Pungsod,” base sa Bugna 14:6, nagapakita sang hilikuton sang mga Saksi ni Jehova sa sining ulihi nga mga dekada. Ang ila madasig nga pag-uswag, padayon nga pagbantala, kag utudnon nga gugma makita sa mga piktyur nga nagaraya sa mga dingding. Sa katapusan sang eksibit, may mga touch screen monitor nga puede makita ang sulod sang Bible House kag ang Brooklyn Tabernacle, mga lugar nga gingamit sang mga Saksi ni Jehova sang nagligad nga sobra 100 ka tuig.

Ini nga eksibit yara sa 25 Columbia Heights sa Brooklyn, New York. Bukas ini halin Lunes asta Biernes, 8:00 sa aga asta 5:00 sa hapon, kag wala ini sing bayad. Kon makabisita ka sa New York City, tilawi nga magkadto kag mag-tour para mahanduraw mo ang kahapon.