Hi October 2012 ku pfuriwe ndhawu leyintshwa laha vanhu va nga tivalangisaka hi voxe handle ko kongomisiwa eBrooklyn, le New York, leyi hlamuselaka matimu ya Timbhoni ta Yehovha. Ndhawu leyi yi hlamusela swiphiqo ni makhombo lawa vanhu lava a va lava ku hanya hi ndlela ya Vukreste leyi Yesu a va dyondziseke yona va langutaneke na wona.

Hi vhiki ro sungula ntsena ra ku pfuriwa ka ndhawu leyi, ku valange vaendzi vo tlula 4 200 ni swirho swa ndyangu wa Bethele. Naomi, loyi a nga Mbhoni leyi tshamaka ekusuhi ni ndhawu leyi, u nambe a valanga loko ya ha ku pfuriwa. U te: “Ndlela leyi swilo swi longoloxiweke ha yona hi ku ya hi minkarhi ya swona swi ndzi pfune ku twisisa leswaku swilo leswi swi endleke rini ni leswaku ha yini swi endleke hi ndlela yoleyo. Ndzi dyondze swo tala hi nhlengeletano ya hina swin’we ni matimu ya yona ya manguva lawa.”

Ku valanga ku sungule hi nguva ya Vukreste ya 33 C.E. ku ta fikela sweswi. Ndhawu leyi yi avanyisiwe hi swiyenge swa  mune. Xiyenge ha xin’we xi ni nhloko-mhaka leyi sekeriweke eMatsalweni naswona xi rhangeriwa hi vhidiyo yo koma ya Xinghezi, leyi nga ni tinhlamuselo leti humelelaka eka xikirini hi tindzimi ta nkombo.

Xiyenge xo sungula, xi ni nhloko-mhaka leyi nge “Vanhu Va Rhandze Munyama,” leyi tekiweke eka marito ya Yesu lama kumekaka eka Yohane 3:19. Bibele yi profete leswaku endzhaku ka loko vaapostola va file, ‘a ku ta humelela vanhu vo biha lava vulavulaka swilo leswi soholotiweke.’ (Mint. 20:30) Lava a va ala dyondzo yoleyo a va xanisiwa hi ndlela ya tihanyi.

Ku hambana ni sweswo, xiyenge lexi landzelaka xi ni nhloko-mhaka leyi nge “Ku Vonakala A Ku Voninge” leyi sekeriweke eka 2 Vakorinto 4:6, yi kombisa minkarhi leyi swilo a swi endleka ha yona eku heleni ka va-1800 loko Swichudeni swa Bibele leswi tinyiketeleke swi sungula ku kambisisa Matsalwa hi vuntshwa. Swi tshike tidyondzo leti ku nga khale swi pfumela eka tona leti nga sekeriwangiki eBibeleni naswona swi chumayele  ntiyiso lowu nga erivaleni hi xivindzi. Xiyenge lexi xi vulavula hi ndlela leyi vutivi bya swona byi engetelekeke ha yona ni nhlayo ya swona emahlweni ko va ku tlhekeka Nyimpi yo Sungula ya Misava.

Ku valanga loku yaka emahlweni ku kombisa ku hetiseka loku tsakisaka Timbhoni ta Yehovha ku ta fikela namuntlha. Hi 1914 Swichudeni swa Bibele (hilaha Timbhoni ta Yehovha a ti tiviwa hakona) swi sungule ku tlanga “Photo-Drama of Creation.” Vanhu va timiliyoni va vone filimi leyi, leyi katsaka swifaniso leswi nga tshuka-tshukiki ni leswi tshuka-tshukaka leswi nga ni vuyimbeleri lebyi rhekhodiweke. Swilo leswi nga eka filimi leyi swi katsa swilo swa khale leswi mpfampfarhutiweke, xingheniso xo koma lexi nga emasungulweni ni tisilayidi to tlula 500 ta mihlovo-hlovo.

Nxaniso wa Sathana lowu valandzeri va Kreste va langutaneke na wona, lowu hlamuseriweke eka Nhlavutelo 12:17, i xiyenge xa vunharhu lexi nga ni nhloko-mhaka leyi nge  ‘Dragona Yi Kariha.’ Xiyenge lexi xi kombisa ndlela leyi Vakreste va aleke ku katseka enyimpini ha yona hi nkarhi wa nyimpi. Ku kurisiwe swilo swa khale leswi endliweke hi mavoko ni swifaniso, vhidiyo yo koma leyi kombisaka ndlela leyi vamakwerhu lava aleke ku ya enyimpini hikwalaho ka ripfalo ra vona a va xanisiwa ha yona hi tihanyi, vo fana na Remigio Cuminetti wa le Italy, loyi a aleke ku ambala yunifomo ya vusocha kumbe ku lwa eka Nyimpi yo Sungula ya Misava. Xiphemu xin’wana xa vhidiyo xi vulavula hi Alois Moser wa le Austria. U ale ku vula a ku “Heil Hitler” kutani hikwalaho ka sweswo u heleriwe hi ntirho naswona u hetelele a yisiwe ekampeni ya nxaniso ya le Dachau. Ku va Timbhoni ta Yehovha ti yisiwe emakhotsweni i vumbhoni bya leswaku ti lwele ripfumelo ra tona eGreece, Japani, Poland, khale ka Yugoslavia ni le tindhawini tin’wana.

Xiyenge xo hetelela, xi ni nhloko-mhaka leyi nge “Mahungu Lamanene eMisaveni Hinkwayo” leyi sekeriweke eka Nhlavutelo 14:6, xi vulavula hi ntirho wo chumayela wa Timbhoni ta Yehovha eka makume ya malembe ya sweswinyana. Ku andza ka tona hi xihatla ni ku va ti phikelela ku chumayela ni ndlela leyi ti rhandzanaka ha yona ku kombisiwe eka swifaniso leswi nga emakhumbini. Xo hetelela, ku ni ndhawu leyi vaendzi va pfumeleriwaka ku ya valanga eka yona eka Yindlu ya Bibele ni Tabernakela ya le Brooklyn ku nga tindhawu leti a ti tirhisiwa hi Timbhoni ta Yehovha ku ringana malembe yo tlula 100 lama hundzeke.

Ndhawu leyi yi le 25 Columbia Heights eBrooklyn, le New York. Ku pfuriwa ku sukela hi Musumbhunuku ku fikela hi Ravuntlhanu, ku sukela hi 8:00 nimixo ku fikela hi 5:00 nimadyambu naswona ku ngheniwa mahala. Loko u ri eDorobeni ra New York, ha yini u nga ti u ta valanga?