Si apostol Pablo miawhag sa mga Kristohanon: “Hinumdomi silang mga binilanggo nga may mga talikala nga daw kamo tinalikalaan uban kanila.” (Heb. 13:3) Ingong alagad ni Jehova, atong hinumdoman kanunay ang matinumanon natong mga igsoon ug mag-ampo bahin “kanilang tanan nga anaa sa hataas nga katungdanan; aron kita magpadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang.”—1 Tim. 2:1, 2; Efe. 6:18.

Ania ang pipila ka legal nga isyu nga gisagubang sa mga Saksi ni Jehova sa miaging tuig:

Ang atong mga igsoon sa Russia “wala mohunong sa pagpanudlo ug sa pagpahayag sa maayong balita” bisan  pa sa kampanya sa Russian Orthodox Church ug sa mga opisyales sa gobyerno nga hunongon ang atong buluhaton. (Buh. 5:42) Ang Russia nagmugnag dili klarong balaod nga anti-extremism aron sumpoon ang terorismo, apan kini sayop nga gigamit batok sa atong publikasyon ug mga igsoon. Ingong resulta, mga 70 sa atong publikasyon ang gideklarar sa mga korte sa Russia nga naundan kunog ekstremistang mga pulong. Kini gidugang sa mga opisyales sa gobyerno sa ilang listahan sa publikasyon nga gidili sa nasod. Tungod niana, gironda sa pipila ka lokal nga awtoridad ang mga Kingdom Hall ug balay sa mga igsoon aron kompiskahon ang publikasyon. Daghang Saksi nga nagsangyaw gidala sa presinto, giletratohan, ug gikuhaag tamla sa mga polis ug sagad hulgaon sila.

 Sugod sa Mayo 2013, dihay 16 ka igsoon sa siyudad sa Taganrog ang gidala sa korte tungod sa pag-organisar, pagtambong, ug pagpakigbahin sa Kristohanong mga tigom ug pagsangyaw. Sukad mabungkag ang Soviet Union, kini ang unang higayon nga gikasohan ang mga Saksi tungod sa ilang pagtuo. Gihulhogan sab sa mga awtoridad sa ubang bahin sa Russia ang mga korte aron ideklarar nga “ekstremista” ang atong publikasyon ug kasohag pagdumot sa ubang relihiyon ang atong mga igsoon.

Wala gihapon mausab ang kahimtang sa atong kaigsoonan sa Eritrea. Pagka-Hulyo 2013, diha nay 52 nga napriso, apil ang walo ka brader nga nag-edad ug mga 70, ug may unom sab ka sister. Tulo ka brader, si Paulos Eyassu, Isaac Mogos, ug Negede Teklemariam, napriso sukad pa sa Septiyembre 24, 1994, kay dili mosundalo.

Halos katunga sa mga piniriso anaa sa Meiter nga kampong prisohan sa desyerto sa amihanang bahin sa kaulohan, ang Asmara. Gikan sa Oktubre 2011 hangtod Agosto 2012, gisilotan sa mga awtoridad ang 25 sa mga igsoon pinaagi sa pagsulod kanila sa gama sa sin nga bilding nga ang katunga gilubong sa yuta. Sa ting-init, pagawson sa mga guwardiya ang mga piniriso maadlaw aron sila makalingkawas sa grabeng kainit. Pero, kulang ang rasyon nilang pagkaon ug tubig, busa mihugo ang ilang lawas. Ikasubo nga tungod sa maong pagmaltratar, namatay ang duha ka brader nga si Yohannes Haile, 68 anyos, niadtong Agosto 2012, ug si Misghina Gebretinsae niadtong 2011.