Apostle Paul ama eteme mme Christian ete: “Ẹti mmọ emi ẹdude ke n̄kpọkọbi nte n̄kpọ eke ẹkọbide mbufo ye mmọ.” (Heb. 13:3) Sia idide mme asan̄autom Jehovah, nnyịn imesiti mme anam-akpanikọ nditọete nnyịn inyụn̄ ibọn̄ akam iban̄a “kpukpru mmọ emi ẹdude ke ikpọ itie; man nnyịn ikpaka iso idu uwem ifụre ye emem ye ọyọhọ uten̄e Abasi ye nsịnifịk.”—1 Tim. 2:1, 2; Eph. 6:18.

Se itienede emi ẹdi ndusụk ikpe oro Mme Ntiense Jehovah ẹkenyenede ke isua emi ekebede:

Nditọete nnyịn ke Russia ke ẹka iso “ye unana edikpa mba ndikpep nnyụn̄ ntan̄a eti mbụk,” okposụkedi emi Ufọkabasi Orthodox Russia ye ndusụk mbon ukara ẹkade-ka iso ẹdomo nditre utom nnyịn. (Utom 5:42) Mbon ukara Russia ẹka iso ndiyụrọde ibet oro mîn̄wan̄ake owo, emi  ẹkenamde man ẹmụm mbon edinam oyomonsia, ndọhọ ke mme n̄wed nnyịn ẹdi n̄wed mbon oro ẹsinamde n̄kpọ ẹbe ubọk n̄ko ke nditọete nnyịn iren ẹdi mbon oro ẹsinamde n̄kpọ ẹbe ubọk. Oro anam mme esopikpe ke Russia ẹdọhọ ke n̄kpọ nte n̄wed 70 ke otu n̄wed nnyịn ẹsịne mme ikọ emi ibet oro ẹkenamde ẹnọ mbon oro ẹsinamde n̄kpọ ẹbe ubọk akpande, ndien mbon ukara ẹtiene ẹsịn mme n̄wed emi ke otu n̄wed oro ẹkpande ke ofụri idụt oro nte n̄wed mbon oro ẹsinamde n̄kpọ ẹbe ubọk. Ke ntak oro mmọ ẹkerede ke nnyịn idi mbon edinam oyomonsia, ndusụk ikpọ owo ukara ẹsidụk mme Ufọkmbono Obio Ubọn̄ ye ufọk nditọete nnyịn ke unana idotenyịn ẹyom mme n̄wed emi. Mme bodisi ẹsimụm ediwak Ntiense ẹdọn̄ ke ufọk-n̄kpọkọbi, ẹsio ndise, ẹnyụn̄ ẹdọhọ mmọ ẹfịk nnuenubọk ke n̄wed ke ntak emi ẹnamde utom ukwọrọikọ. Mmọ ẹsiwak  ndisịn nditọete nnyịn ndịk ke idem ke ini ẹdade mmọ ẹka itieutom mme bodisi.

Ọtọn̄ọde ke May 2013, ẹma ẹkot nditọete 16 ikpe ke obio Taganrog ke ntak emi mmọ ẹkediomide, ẹkedụkde, ẹkenyụn̄ ẹtienede ẹbuana ke mbono esop ye utom ukwọrọikọ. Tọn̄ọ ukara Soviet Union ọkọduọ, emi edi akpa ini oro ẹkotde Mme Ntiense ikpe ẹte ke ẹbiat ibet ke ntak ido ukpono mmọ. Ke ebiet en̄wen ke Russia, mbon ukara ke ẹdomo ndinam esopikpe ẹdọhọ ke n̄wed nnyịn ẹdi n̄wed mbon emi ẹsinamde n̄kpọ ẹbe ubọk, n̄ko ke nditọete nnyịn ẹdi mme abiatibet emi ẹnamde mbon ido ukpono ẹsua kiet eken.

N̄kpọ ikpụhọkede ye nditọete nnyịn ke Eritrea. Ke July 2013, owo 52 ẹkedu ke ufọk-n̄kpọkọbi, esịnede nditọete iren itiaita emi ẹdide isua 70 ke nsụhọde n̄kaha, ye nditọete iban itiokiet. Nditọete iren ita emi, Paulos Eyassu, Isaac Mogos, ye Negede Teklemariam, ẹdu ke ufọk-n̄kpọkọbi toto ke September 24, 1994, ke ntak emi mmọ mîmaha ndinam utom ekọn̄.

Se ibede mbahade iba ke otu nditọete oro ẹkọbide mi ẹdu ke ufọk-n̄kpọkọbi Meiter ke desat ke edem edere Asmara emi edide ibuot obio. Ọtọn̄ọde ke October 2011 esịm August 2012, mbon ukara ẹnọ nditọete 25 ufen ke ndidọn̄ mmọ ke ufọk emi ẹdade tian ẹbọp, emi mbahade iba esịnede ke esịt isọn̄. Ke ini ndaeyo, mbon ukpeme ẹsision̄o mbon n̄kpọkọbi ke uwemeyo mbak ọkpọsọn̄ ufiop. Edi sia owo mîsinọhọ mmọ udia ye mmọn̄ oro ẹkemde, nditọete emi ẹsidọn̄ọ etieti. Edi n̄kpọ mbọm nditịn̄ ke Yohannes Haile, eyenete eren emi edide isua 68, ama akpa ke August 2012 ke ntak ufen emi, ukem nte Brọda Misghina Gebretinsae emi akakpade ke 2011.