Moapostola Paulo o kgothaleditše Bakriste gore: “Dulang le gopola ba ba lego ditlemong tša kgolego bjalo ka ge eka le golegilwe le bona.” (Baheb. 13:3) Ka ge re le bahlanka ba Jehofa, re dula re gopola bana babo rena le dikgaetšedi ba ba botegago le go rapelela “bohle bao ba lego maemong a godimo; e le gore re tšwele pele re phela bophelo bja khutšo le boiketlo ka boineelo bjo bo feletšego go Modimo le boitshwaro bjo bo swanelago ka botlalo.”—1 Tim. 2:1, 2; Baef. 6:18.

Ka mo tlase ke e mengwe ya melato ya kgorong ya tsheko yeo Dihlatse tša Jehofa di bego di dutše di e seka ngwagola:

Bana babo rena ba kua Russia ba tšwela pele “ba sa kgaotše ba ruta e bile ba tsebatša ditaba tše dibotse” go sa šetšwe masolo a sa kgaotšego a Kereke ya Russia ya Orthodox le balaodi ba bangwe ba mmušo a go kgaotša modiro wa  rena. (Dit. 5:42) Balaodi ba Russia ba tšwela pele go diriša dikgatišong tša rena le go bana babo rena molao o sa kwagalego gabotse wa go lwantšha bafišegelathoko woo mathomong o bego o hlametšwe go lwantšha botšhošetši. Ka baka leo, dikgoro tša tsheko tša Russia di boletše gore dikgatišo tša rena tše e ka bago tše 70 di na le dipolelwana tšeo di dirišwago ke bafišegelathoko, e bile balaodi ba tsentšhitše dikgatišo tše lelokelelong la dikgatišo tša bafišegelathoko tšeo mmušo o di thibetšego. Ka baka la ge ba nagana gore dikgatišo tše di kotsi, balaodi ba bangwe ba šwahlela Diholong tša Mmušo le magaeng a bana babo rena ba nyakana le tšona. Maphodisa a swara Dihlatse tše dintši, a di tšea diswantšho le go di gatiša menwana ka baka la ge di eya tšhemong. Gantši a tšhošetša bana babo rena ge a ba swere seteišeneng sa maphodisa.

 Go thoma ka May 2013, bana babo rena le dikgaetšedi ba lesometshela motseng wa Taganrog ba ile ba sekišetšwa go rulaganya diboka, go ba go tšona le go ya tšhemong. Le ke lekga la mathomo Dihlatse di latofatšwa ka ditumelo tša tšona ga e sa le pušo ya Soviet Union e wele. Balaodi ba bangwe kaekae kua Russia ba leka go dira gore dikgoro di bolele gore dikgatišo tša rena ke tša bafišegelathoko le go bona bana babo rena molato wa gore ba hloile madumedi a mangwe.

Maemo a bana babo rena le dikgaetšedi ba kua Eritrea ga se a kaonefala. Ka July 2013, go be go golegilwe bana babo rena ba 52, go akaretša bana babo rena ba nywaga e ka bago e 70, gotee le dikgaetšedi tše tshela. Ga e sa le bana babo rena ba bararo, e lego Paulos Eyassu, Isaac Mogos le Negede Teklemariam, ba golegwa ka September 24, 1994 ka baka la boemagare bja bona ditabeng tša ditirelo tša sešole.

Bana babo rena ba ka godimo ga seripagare ba kgolegong yeo e lego leganateng kua Meiter, ka leboa la motsemošate wa Asmara. Go tloga ka October 2011 go fihla ka August 2012, balaodi ba ile ba otla bana babo rena ba 25 ka go ba lahlela ka moagong wo o ruletšwego ka ditšhipi wo o nyakilego o sobelela mo mmung. Dikgweding tša selemo, bahlapetši ba dumelela bagolegwa go tšwela ka ntle mosegare gore ba se bolawe ke phišo e šoro ya ka moagong. Lega go le bjalo, ba newa dijo tše dinyenyane le meetsana, ka gona bana babo rena ba babja kudu. Ka maswabi, Yohannes Haile, e lego ngwanabo rena wa nywaga e 68, o ile a hwa ka August 2012 ka baka la tshwarompe ye, gomme gwa ba bjalo le ka Ngwanabo rena Misghina Gebretinsae ka 2011.