Sa Kutaisi, ang ikaduha sa pinakadaku nga siudad sa Republic of Georgia, 13 ka tuig na nga ginahiwat ang mga asembleya sa daan kag gubaon nga pabrika sang alak. Para indi matuluan ang tumalambong kon mag-ulan, ginabutangan ini sing malapad nga plastik malapit sa atop. Subong, ang mga utod may komportable na nga Kingdom Hall nga mapasangkad kon may mga asembleya kag kombension. Sang ginatukod ini, 50 ka boluntaryo ang nagadiskarga sang mga hallow block halin sa trak. May mga pulis nga naghapit para tan-awon ang nagakatabo. Nagdayaw gid sila sa masinadyahon kag mapisan  nga mga boluntaryo, gani nagbulig sila sa pagdiskarga. Ginsilingan nila ang mga utod nga kon may manggamo tawgan lang sila, kag nagpromisa sila nga matambong sa una nga kombension sa bag-o nga Assembly Hall.

Si Malachi isa ka gulang sa Burundi. Ang iya palangabuhian amo ang pagpanguma kag pagpangarga sing mga produkto sa iya bisikleta. Para makabulig sa pagtukod sang ila Kingdom Hall, namat-od sia nga magboluntaryo adlaw-adlaw. Pero kinahanglan niya sing kuarta sa sulod sang duha ka bulan nga konstruksion para isakdag sa iya pamilya. Gani ginbaligya niya ang iya bisikleta kag ginhatag ang bahin sang kuarta sa iya asawa para sa kinahanglanon sang ila pamilya, kag ang nabilin ginhulog niya sa kahon alamutan para ibulig sa pagtukod. Bangod sa iya pagboluntaryo, madamo sia sing natun-an sa mga construction servant. Gani sang matapos ang Kingdom Hall, nakaobra si Malachi sa konstruksion kay nakita sang mga tawo nga may abilidad sia sa pagpanukod. Sang ulihi, nakabakal liwat si Malachi sang bisikleta!

Indi mahapos ang pagpatindog sing mga Kingdom Hall sa naligwin nga mga lugar sa Malawi. Sang nagligad nga tuig sang pag-alagad, isa ka tilipunan ang gintukod sa lugar nga batsihon ang dalan. Ginkarga sang mga utod sa four-wheel drive nga mga salakyan ang mga materyales halin sa sanga pakadto sa patindugan nga lugar. Interesado gid ang bilog nga komunidad sa proyekto. Madamo nga indi Saksi ang luyag magbulig kag magtrabaho asta sa kagab-ihon para magdiskarga sing mga sin, semento, balas, kag bato. May mga tion pa gani nga mas madamo ang indi Saksi sangsa mga Saksi! Nagdayaw gid sila sa  panikasog sang mga Saksi ni Jehova nga magpatindog sing disente nga duog sang pagsimba sa ila naligwin nga lugar, gani napahulag sila nga magbulig.

Isa ka mag-asawa nga espesyal payunir sa Côte d’Ivoire ang nagatuon sa Biblia upod sa mag-asawa nga may napulo ka kabataan. Ginagamit nila ang lokal nga lenguahe nga Bete. Ang una nga asembleya sa Bete hiwaton sa banwa sang Daloa sa Mayo 2013, kag luyag sang bilog nga pamilya nga magtambong. Pero 800 CFA ($1.60 U.S.) ang plete sang kada tawo pakadto-pabalik, kag indi masarangan sang amay nga pletehan ang bilog nga pamilya. Bangod gusto gid nila makatambong tanan, nangita sia sing paagi. Ginhatagan niya ang ila subang nga babayi sing 300 CFA ($.60 U.S.) kag ginpabaligya ini sing dulse nga toffee. Ang iya ganansia bastante para sa iya plete. Amo man sini ang ginhimo sang amay sa iban pa nga kabataan, kag ang kada isa sa ila nakatipon sang ila inugplete. Sang ulihi, nakatambong sila sa asembleya upod sa iban nga kauturan. Nalipay gid sila nga makapamati sa programa sa ila lenguahe.