Ka October 20, 2012, Dihlatse tša Jehofa tša kua Korea di ile tša thaba ge meago ya lekala la tšona yeo e lokišitšwego le yeo e sa tšwago go agwa e be e neelwa go Jehofa. Tiragalo ye e be e le ya bohlokwa kudu ka gobane bana babo rena ba moo ba ile ba kgona go ikgopotša nywaga e 100 ya go hlankela ga bona Jehofa ka potego. Go feta moo, ka 2012, palo ya bagoeledi e ile ya feta 100 000 ka lekga la mathomo. Baithaopi ba moo ba 1 200 le bahlanka ba ditšhabatšhaba ba 239 gotee le baithaopi bao ba tšwago dinageng tše senyane ba ile ba aga moago o mofsa wa bodulo, moago wa go gatiša, lefelo la go rekhota mananeo a go theetšwa le dibidio gotee le lefelo la go lokišetša dikoloi. Go oketša moo, meago e mentši yeo e bego e dutše e le gona e ile ya lokišwa ka mo go feletšego.

Anthony Morris wa Sehlopha se Bušago o ile a nea bana  babo rena le dikgaetšedi ba 3 037 bao ba bego ba le gona polelo e kgothatšago ya go neelwa ga moago. Letšatšing le le latelago, go ile gwa swarwa seboka se se kgethegilego ka holong e kgolo gomme diphuthego tša ka godimo ga tše 1 300 tša Korea di be di kgokagantšwe ka Inthanete. Dihlatse tša Jehofa le batho ba thabelago ba 115 782 ba thabetše lenaneo leo le kgahlišago la moya.

Letšatši la March 9, 2013, le tla dula le gopolwa e le la tiragalo ya bohlokwa kudu historing ya barapedi ba Jehofa kua Liberia. Baeng bao ba tšwago dinageng tše 11 ba ile ba bokana go tlo thabela go neelwa ga meago yeo e sa tšwago go lokišwa le ofisi ya lekala yeo e katološitšwego. Bohle ba ile ba thabela go kwa polelo ya go neelwa ga lekala yeo e bego e newa ke Guy Pierce wa Sehlopha se Bušago. Ka morago ga gore ntwa ya selegae e diegiše go rulaganywa le go agwa ga lekala ka nywaga ya ka godimo ga e lesome, lekala le ile la katološwa gore le akaretše setsha sa kgauswi seo marabele a bego a khuta go sona e bile e le kampa ya bafaladi. Ditho tše 51 tša lapa la Bethele di thabela go diriša lefelo la bodulo la diphapoši tše  35, diofisi tše di lokišitšwego, lefelo le lefsa la go bolokela dikgatišo, meago e mefsa ya go lokišetša ditlabakelo, khitšhi gotee le lefelo le lefsa la go jela.

Repabliking ya Georgia go dula batho ba botho bao ba ratago dilo tša moya. Ka morago ga go wa ga Soviet Union, go ile gwa ba le nako ya koketšego e kgolo kudu ka diphuthegong yeo e ilego ya latelwa ke tlaišo e šoro kudu. Ga bjale tlaišo yeo e fokotšegile gomme go ile gwa fihlelelwa selo sa bohlokwa kudu historing ya Dihlatse tša Jehofa kua Georgia ka Mokibelo, April 6, 2013, ge David Splane wa Sehlopha se Bušago a be a nea polelo ya go neelwa ga meago ya lekala yeo e lokišitšwego le go katološwa, Holo ya Kopano le moago o mofsa wa sekolo sa Beibele woo go wona go tlago go swarelwa Sekolo sa Baebangedi ba Mmušo le Sekolo sa Balebeledi ba Basepedi le Basadi ba Bona. Baeng ba 338 go tšwa dinageng tše 24 ba ile ba bokana gotee le Dihlatse tša kua Georgia tša ka godimo ga tše 800 bakeng sa lenaneo la go neelwa ga meago.

Letšatšing le le latelago, batho ba 15 200 ba ile ba thabela polelo e kgethegilego ya Ngwanabo rena Splane ge ba be ba kgokagantšwe ka Inthanete mafelong a bona a go swarela diboka tša phuthego nageng ka moka ya Georgia. Tiragalo ye e bile e kgomago pelo go ba bantši. Ngwanabo rena yo mongwe wa mofsa o itše: “Ga bjale ke a tseba gore lefaseng le lefsa go tlo ba bjang.”

Ka June 29, 2013, go ile gwa neelwa moago o mofsa wa diofisi wa mabato a mararo kua Bethele ya Yangon, Myanmar. Guy Pierce wa Sehlopha se Bušago o ile a nea polelo ya go neelwa ga meago go batheetši ba 1 013 bao ba bego ba akaretša baeng bao ba tšwago dinageng tše 11. Monna yo mongwe yo a tšwago nageng yeo modiro wa Dihlatse tša Jehofa o thibetšwego, o ile a ya go sehlopha sa bana babo rena le dikgaetšedi ba Myanmar bao ba bego ba abetšwe go amogela baeng Boemafofaneng bja Ditšhabatšhaba bja Yangon. O ile a šupa maswao ao a rego “Le a Amogelwa Lena Dihlatse tša Jehofa”  ao Dihlatse tšeo di bego di a swere ke moka a botšiša gore: “Na le amogela dihlatse tšeo di tlilego kgorong ya tsheko?” Bana babo rena ba ile ba araba ka gore: “Aowa, re amogela bagwera ba rena.” Ke moka monna yoo a botšiša gore: “Bjale Jehofa ke mang?” Bana babo rena le dikgaetšedi ba ile ba mo nea bohlatse bjo bobotse. Letšatši ka morago ga go neelwa ga meago, go ile gwa swarwa seboka se se kgethegilego kua Myanmar Convention Center, moo Ngwanabo rena Pierce a ilego a nea polelo yeo e nago le sehlogo se se rego, “Hlankela Jehofa ka Pelo e Nago le Kwešišo.” Lenaneo leo le be le kgokagantšwe ka mogala mafelong a mangwe a tshelelago nageng ka moka ya Myanmar, seo sa dira gore batho ba 2 963 ba kwe boitsebišo bjo bo lego nakong. Yo mongwe wa baotledi ba dipese yo a ilego a iša sehlopha sa bana babo rena le dikgaetšedi sebokeng se seo se kgethegilego kua Yangon o itše: “Ke lemogile gore lena le tloga le fapane le batho ba madumedi a mangwe. Le itshwara gabotse, le apara gabotse e bile le botho kudu. Ke be ke dutše ke sepediša batho ka nywaga e mentši, eupša ga se ka ka ka bona batho ba go itshwara gabotse bjalo ka lena!”

 Bahlanka ba Jehofa bao ba botegago kua Moldova ba ile ba ba le lebaka le le kwagalago la go thaba ka Laboraro, July 3, 2013, ge Stephen Lett wa Sehlopha se Bušago a be a nea polelo ya go neelwa ga meago yeo e bego e sa tšwa go katološwa. Meago yeo e be e akaretša moago wa mabato a mararo wo o nago le bogorogelo bja dikgatišo, diphapoši tše lesome tša bodulo gotee le Holo ya Mmušo ya mabato a mabedi yeo e dirišwago ke diphuthego tše šupago. Ditho tše 33 tša lapa la Bethele ya Moldova di ile tša thabela go amogela baeng ba go tšwa Jeremane, Ireland, Netherlands, Romania, Russia, Ukraine le United States. Go be go tlile le bana babo rena le dikgaetšedi ba mmalwa bao ba hlanketšego Jehofa ka potego ge modiro o be o thibetšwe, bao ba bangwe ba bona ka nako yeo ba ilego ba thuša ka go kopiša dikgatišo le go di sepediša. Gare ga bao ba bego ba le gona go be go na le ba bantši bao ba kilego ba išwa Siberia le batswadi ba bona nakong ya masolo a fapafapanego a go lwantšha Dihlatse tša Jehofa mehleng ya Soviet Union. Ka Sontaga, Ngwanabo rena Lett o ile a nea polelo e kgothatšago kudu yeo e ilego ya fetolelwa ka Seromania le Serussia go batheetši ba 14 705—e lego pokano e kgolokgolo ya Dihlatse tša Jehofa yeo e kilego ya ba gona kua Moldova.

Jesu o gateletše gore re swanetše go ‘rapela gomme re se ke ra lapa.’ (Luka 18:1) Ge o rapela, o matlafatša kholofelo ya gago. Ka baka leo, ‘rapelang ka mehla,’ ee, “phegelelang thapelong.” (1 Bathes. 5:17; Baroma 12:12) Ge le dutše le dira bjalo, “eka Modimo wa khutšo . . . a ka le hlama ka dilo tšohle tše dibotse gore le dire thato ya gagwe, a dira go [lena] ka Jesu Kriste seo se kgahlišago kudu mahlong a gagwe.”—Baheb. 13:20, 21.