Ka la 20 October, 2012, Lipaki Tsa Jehova tsa Korea li ile tsa thaba ha ho neheloa mehaho ea lekala e mecha le e nchafalitsoeng. E ne e le ketsahalo ea bohlokoa bo ikhethang hobane barab’abo rōna ba ne ba hopola lilemo tse 100 tse fetileng tseo ba ileng ba sebeletsa Jehova ka botšepehi ka tsona. Ho feta moo, selemong sa 2012 e bile lekhetlo la pele leo ka lona palo ea bahoeletsi e ileng ea feta 100 000. Baithaopi ba sebakeng seo ba ka bang 1 200, basebeletsi ba machaba ba 239 le baithaopi ba tsoang linaheng tse robong ba ile ba haha sebaka se secha sa bolulo, sa ho rekota livideo le likhatiso tse mameloang, sa ho lokisa likoloi le setsi sa khatiso. Ho phaella moo, boholo ba mehaho e ntseng e sebelisoa e ile ea nchafatsoa ka ho feletseng.

 Mor’abo rōna Anthony Morris oa Sehlopha se Busang, o ile a fana ka puo ea ho nehela mehaho ’me e ile ea khothatsa bara le barali babo rōna ba 3 037. Letsatsing le latelang ho ile ha tšoaroa seboka se khethehileng holong e khōlō ea lipontšuoa, ’me liphutheho tsa Korea tse fetang 1 300 li ile tsa hasetsoa lenaneo leo ka Inthanete. Barab’abo rōna le batho ba thahasellang bao kaofela ha bona ba neng ba le 115 782 ba ile ba thabela lenaneo lena le matlafatsang.

Le ka mohla Lipaki Tsa Jehova tsa Liberia li ke ke tsa lebala letsatsi la la 9 March, 2013. Baeti ba tsoang linaheng tse 11 ba ile ba bokana moo ha ho neheloa ofisi ea lekala e nchafalitsoeng le ho atolosoa. Bohle ba ile ba thaba ha ba utloa Guy Pierce oa Sehlopha se Busang a fana ka puo ea ho nehela mehaho ena. Ka mor’a lilemo tse fetang leshome tsa ntoa ea lehae le ho liehisoa ha lipolane le kaho, setša sa lekala se ile sa kopanngoa le se haufi, seo marabele a neng a ipata ho sona le moo e neng e le kampo ea baphaphathehi. Litho tse 51 tsa lelapa la Bethele li sebelisa likamore  tsa bolulo tse 35, mohaho o nchafalitsoeng oa liofisi, lefapha le lecha la thomello ea thepa, mohaho o mocha oa lefapha le hlokomelang mehaho, kichine e ncha le holo ea ho jela.

Batho ba Rephabliki ea Georgia ba rata batho le litaba tsa Molimo. Ka mor’a hore Soviet Union e oe, mosebetsi oa barapeli ba Jehova o ile oa hatela pele haholo empa ho ile ha latela mahloriso a matla. Khanyetso e khōlō e fokotsehile ’me ka Moqebelo oa la 6 April, 2013, ho ile ha e-ba le ketsahalo ea bohlokoa historing ea Lipaki Tsa Jehova tsa Georgia, ha Mor’abo rōna David Splane oa Sehlopha se Busang a fana ka puo ea ho nehela mehaho e nchafalitsoeng le e atolositsoeng ea ofisi ea lekala, Holo ea Kopano le mohaho o mocha oa Sekolo sa Baevangeli ba ’Muso le Sekolo sa Balebeli ba Potoloho le ba Setereke Hammoho le Basali ba Bona. Batho ba 338 ba tsoang linaheng tse 24 hammoho le Lipaki tsa Georgia tse fetang 800 ba ile ba thabela lenaneo lena la ho nehela mehaho.

Letsatsing le latelang, batho ba 15 200 ba ile ba thabela puo e khethehileng eo Mor’abo rōna Splane a ileng a fana ka eona ’me ea hasoa ka video libakeng tseo liboka li tšoareloang ho tsona. Ketsahalo ena ea machaba e ile ea ama ba bangata. Mocha e mong o ile a re, “Joale kea utloisisa hore na ho tla ba joang lefatšeng le lecha.”

Ka la 29 June, 2013, Bethele ea Yangon, Myanmar, ho ile ha neheloa ofisi e ncha ea mekato e meraro. Mor’abo rōna Guy Pierce oa Sehlopha se Busang o ile a fana ka puo e neng e mametsoe ke batho ba 1 013 ba neng ba akarelletsa baeti ba tsoang linaheng tse ling tse 11. Sehlopha sa bara le barali babo rōna ba Myanmar ba neng ba abetsoe ho amohela baeti Boema-fofaneng ba Machaba ba Yangon se ile sa atameloa ke monna ea tsoang naheng eo mosebetsi oa Lipaki Tsa Jehova o thibetsoeng. O ile a supa matšoao ao li neng li a tšoere a reng: “Lea Amoheloa  Lipaki Tsa Jehova” eaba o re, “Le amohela lipaki tse tlileng nyeoeng?” Ba re “Che, re amohela metsoalle ea rōna.” Eaba o re, “Hantle-ntle Jehova eo ke mang?” Ha ho pelaelo hore bara le barali babo rōna ba ile ba mo pakela ka ho phethahetseng. Letsatsing le latelang, ho ile ha tšoaroa seboka se khethehileng Setsing sa Liboka sa Myanmar, moo Mor’abo rōna Pierce a ileng a fana ka puo ea sehlooho se reng “Sebeletsa Jehova ka Pelo e Nang le Kutloisiso.” Lenaneo lena le ile la hasoa libakeng tse ling tse tšeletseng tsa Myanmar, e leng se ileng sa etsa hore batho ba 2 963 ba le mamele. Mokhanni e mong oa bese e neng e nkile bara le barali babo rōna ha ba e-ea sebokeng sena se khethehileng Yangon o ile a re: “Kea bona hore ha le tšoane le batho ba likereke tse ling. Le itšoere hantle, le apara hantle ebile le mosa haholo. E se e le lilemo tse ngata ke khannela batho ba tsamaeang ka lihlopha, empa ha ho mohla nkileng ka bona batho hlomphehang hakana!”

Bahlanka ba tšepahalang ba Jehova ba Moldova ba bile le lebaka le letle la ho thaba ka Laboraro la la 3 July, 2013,  ha Stephen Lett oa Sehlopha se Busang a fana ka puo ea ho nehela mehaho ea lekala e neng e qeta ho atolosoa. Mehaho e mecha e akarelletsa oa mekato e meraro o nang le depo ea lingoliloeng le likamore tsa ho robala tse leshome, hammoho le Holo ea ’Muso e mekato e ’meli, e sebelisoang ke liphutheho tse supileng. Litho tse 33 tsa lelapa la Bethele la Moldova li ile tsa amohela baeti ba tsoang Jeremane, Ireland, Netherlands, Romania, Russia, Ukraine le United States. Ba bang ba neng ba le teng e ne e le bara le barali babo rōna ba sebelelitseng Jehova ka botšepehi ha mosebetsi o ntse o thibetsoe, ’me ba bang ba bona ba ne ba thusa ho kopitsa le ho aba lingoliloeng nakong eo. Ba bangata ba neng ba le teng ke ba neng ba isitsoe botlamuoeng Siberia le batsoali ba bona nakong ea matšolo a fapa-fapaneng a neng a etsoa khahlanong le Lipaki Tsa Jehova Soviet Union ea mehleng. Ka Sontaha, Mor’abo rōna Lett o ile a fana ka puo e susumetsang e ileng ea fetoleloa ka Seromania le Serussia bakeng sa bamameli ba 14 705—e leng seboka se seholo ka ho fetisisa sa Lipaki Tsa Jehova se kileng sa tšoareloa Moldova.

Jesu o ile a bontša bohlokoa ba hore re ‘rapele ’me re se ke ra tela.’ (Luka 18:1) Ha re rapela, re matlafatsa tšepo ea rōna. Kahoo, ‘a re rapeleng re sa phetse,’ ’me ‘re phehelle thapelong.’ (1 Bathes. 5:17; Bar. 12:12) Ha re ntse re etsa joalo, ‘e se eka Molimo oa khotso . . . a ka re hlomella ka ntho e ’ngoe le e ’ngoe e molemo e le hore re etse thato ea hae, ha ka Jesu Kreste a etsa ho rōna se khahlisang haholo mahlong a hae.’—Baheb. 13:20, 21.