Ka Diphalane 20, 2012, Basupi ba ga Jehofa kwa Korea ba ne ba itumela fa dikago tsa bone tse di ntšhafaditsweng le tse di sa tswang go agiwa tsa lekala di ne di neelwa Jehofa. Tiragalo eno e ne e kgethegile ka gonne bakaulengwe ba ne ba kgona go sekaseka tiro e ba e dirileng ka boikanyegi mo dingwageng di le 100 tse di fetileng. Mo godimo ga moo, ka 2012, palo ya baboledi e ne ya feta 100 000 e le lekgetlo la ntlha. Baithaopi ba mo nageng eo ba ka nna 1 200 le ba bangwe ba le 239 ba e leng batlhanka ba ba direlang kwa dinageng di sele le baithaopi ba ba tswang kwa dinageng di le robongwe ba ne ba dira ka natla go aga kago e ntšha ya bonno, kago ya bogatisetso, ditedio tsa go rekota le karatšhe ya go baakanya dikoloi. Mo godimo ga moo, bontsi jwa dikago tse di neng di ntse di le gone di ne tsa ntšhafadiwa gotlhelele.

Anthony Morris wa Setlhopha se se Laolang o ne a neela bakaulengwe le bokgaitsadi ba le 3 037 ba ba neng ba le gone  puo e e kgothatsang ya kgakolo. Mo letsatsing le le latelang go ne ga tshwarwa pokano e e kgethegileng kwa holong e kgolo ya dipontsho mme diphuthego di feta 1 300 tsa kwa Korea di ne di golagantswe le pokano eno ka Internet. Palogotlhe ya Basupi ba ga Jehofa le batho ba ba kgatlhegang ba le 115 782 ba ne ba itumelela thulaganyo eo e e itumedisang ya semoya.

Mopitlwe 9, 2013, e tla gopolwa ka lobaka lo loleele e le letsatsi la phitlhelelo e kgolo mo hisitoring ya baobamedi ba ga Jehofa kwa Liberia. Baeng ba ba tswang kwa dinageng di le 11 ba ne ba phuthega mo pokanong ya go kgakola ofisi ya lekala e e neng e sa tswa go ntšhafadiwa le go atolosiwa. Botlhe ba ne ba itumelela go utlwa puo ya go kgakola e e neng e neelwa ke Guy Pierce, leloko la Setlhopha se se Laolang. Morago ga gore ntwa ya selegae e diegise go rulaganngwa le go atolosiwa ga lekala ka dingwaga di feta lesome, lekala le ne la atolosiwa gore le akaretse setsha se se fa gaufi se pele se neng se dirisiwa ke batsuolodi e le lefelo le ba iphitlhang mo go lone gape e le kampa ya batshabi. Maloko a le 51 a lelapa la Bethele a itumelela go dirisa kago ya bonno ya diphaposi tse 35, kago ya diofisi e e ntšhafaditsweng, bobolokelo jo bosha jwa dikgatiso, kago e  ntšha ya go tlhokomela kago le lefelo le lesha la boapeelo le la bojelo.

Republic of Georgia ke naga ya batho ba ba lorato le ba ba ratang dilo tsa semoya. Fa Soviet Union e sena go kgaogana, go ne ga latela nako ya koketsego e kgolo mo dilong tse di direlwang Bogosi, mme morago ga latela nako ya pogiso e e setlhogo. Kganetso e fokotsegile fela thata, mme go ne ga nna le phitlhelelo e kgolo mo hisitoring ya Basupi ba ga Jehofa kwa Georgia ka Matlhatso, Moranang 6, 2013, fa David Splane wa Setlhopha se se Laolang a ne a neela puo ya go kgakola kago e e ntšhafaditsweng le e e atolositsweng ya lekala, Holo ya Dikopano le kago e ntšha ya sekolo sa Baebele e e tla dirisediwang Sekolo sa Baboledi ba Bogosi mmogo le Sekolo sa Balebedi ba ba Etang le Basadi ba Bone. Palogotlhe ya baeng ba le 338 go tswa kwa dinageng tse 24 ba ne ba kopana le Basupi ba kwa Georgia ba feta 800 go tla go reetsa thulaganyo ya kgakolo.

Mo letsatsing le le latelang, batho ba le 15 200 ba ne ba itumelela puo e e kgethegileng ya ga Mokaulengwe Splane e e neng e lebeletswe e bile e reeditswe ka bidio mo mafelong a diphuthego di kopanelang mo go one go ralala Georgia. Tiragalo eno ya boditšhabatšhaba e ne ya ama batho ba le bantsi maikutlo. Mokaulengwe mongwe wa mosha o ne a re: “Jaanong ke a itse gore go tla bo go ntse jang kwa lefatsheng le lesha.”

Ka Seetebosigo 29, 2013, go ne ga kgakolwa kago e ntšha ya diofisi ya matlhatlaganyane a le mararo kwa Bethele e e kwa Yangon, Myanmar. Guy Pierce wa Setlhopha se se Laolang o ne a neela puo ya go kgakola e e neng e reeditswe ke batho ba le 1 013 ba ba neng ba akaretsa baeng ba ba tswang kwa dinageng tse dingwe di le 11. Monna mongwe yo o tswang kwa nageng e kwa go yone tiro ya Basupi ba ga Jehofa e thibetsweng o ne a tla fa setlhopheng sa bakaulengwe le bokgaitsadi ba kwa Myanmar ba ba neng ba abetswe go amogela baeng bano kwa Yangon International Airport. O ne a supa matshwao a ba neng ba a tshotse a “Basupi ba ga Jehofa lo a Amogelwa” mme a ba botsa a re, “A lo amogela basupi ba ba tlileng kgetsing  nngwe ya kgotlatshekelo?” Ba ne ba araba ba re: “Nnyaa, re amogela ditsala tsa rona.” Monna yono o ne a botsa jaana: “Jaanong Jehofa yo ke mang?” Mme bakaulengwe le bokgaitsadi ba rona ba ne ba mo neela bosupi jo bo molemo. Letsatsi morago ga thulaganyo ya kgakolo, go ne ga tshwarwa pokano e e kgethegileng kwa Myanmar Convention Center, kwa Mokaulengwe Pierce a neng a neela puo ya setlhogo se se reng “Direla Jehofa ka Pelo e e Tlhaloganyang.” Mafelo a mangwe a le marataro go ralala Myanmar a ne a golagantswe ka founo gore palogotlhe ya batho ba le 2 963 ba utlwe tshedimosetso eno e e tshwanelang. Mongwe wa bakgweetsi ba dibese ba ba neng ba isa setlhopha sa bakaulengwe le bokgaitsadi ba mo lefelong leno kwa kopanong e e kgethegileng kwa Yangon o ne a re: “Ke lemogile gore lona lo farologane gotlhelele le madumedi a mangwe. Lo itshwara sentle, lo apara sentle e bile lo pelontle. Ke na le dingwaga di le dintsi ke kgweetsa ditlhopha tsa batho ka bese, mme ga ke ise ke tsamaye ke bone batho ba ba seriti jaaka lona!”

Batlhanka ba ba ikanyegang ba ga Jehofa kwa Moldova ba ne ba nna le lebaka le le utlwalang la go itumela ka Laboraro,  Phukwi 3, 2013, fa Stephen Lett wa Setlhopha se se Laolang a ne a neela puo ya go kgakola dikago tsa lekala tse di sa tswang go atolosiwa. Dikago tseno tse di atolositsweng di akaretsa kago ya matlhatlaganyane a le mabedi e e nang le depo ya dikgatiso le diphaposi di le lesome tsa bonno mmogo le Holo ya Bogosi ya matlhatlaganyane a le mabedi e e dirisiwang ke diphuthego di le supa. Maloko a le 33 a lelapa la Bethele la kwa Moldova a ne a itumelela go amogela baeng go tswa Jeremane, Ireland, Netherlands, Romania, Russia, Ukraine le United States. Ba bangwe ba ba neng ba le gone e ne e le bakaulengwe le bokgaitsadi ba le mmalwa ba ba neng ba direla Jehofa ka boikanyegi fa tiro e ne e thibetswe, mme bangwe ba bone ba ne ba thusa go kopolola le go anamisa dikgatiso ka nako eo. Bangwe ba ba neng ba le gone e ne e le ba bantsi ba ba neng ba fuduseditswe kwa Siberia le batsadi ba bone ka nako ya matsholo a a farologaneng kgatlhanong le Basupi ba ga Jehofa kwa nageng ya se pele e neng e le Soviet Union. Ka Sontaga, Mokaulengwe Lett o ne a neela bareetsi ba le 14 705 puo e e kgothatsang e e neng e tolokelwa mo puong ya Se-Romania le Se-Russia—e le pokano e kgolo go gaisa tsotlhe tse di kileng tsa tshwarwa ke Basupi ba ga Jehofa kwa Moldova.

Jesu o ne a gatelela gore re tshwanetse go ‘rapela re sa lese.’ (Luke 18:1) Fa o ntsha maikutlo a gago ka thapelo, o nonotsha tsholofelo ya gago. Ka jalo, “rapelang lo sa kgaotse,” ee, “nnelang ruri mo thapelong.” (1 Bathes. 5:17; Bar. 12:12) Fa lo ntse lo dira jalo, “e kete Modimo wa kagiso . . . a ka lo tlhomelela ka selo sengwe le sengwe se se molemo gore lo dire thato ya gagwe, a dira mo go [lona] ka Jesu Keresete se se itumedisang thata mo ponong ya gagwe.”—Baheb. 13:20, 21.