Yehova alipaalile ababomfi bakwe abalebombesha mu Dominican Republic. Mu 1994, bakasabankanya ba Bufumu bafikile 16,354 mu filonganino 259. Apo kwali uku ukulunduluka, baeluda na babomfi batumikila abafikapo balefwaikwa sana. Muli ulya wine mwaka, Ibumba Litungulula lyalisuminishe ukuti mu Dominican Republic muleba Isukulu lya Kukansha Ilya Butumikishi, ilyo nomba bapyanikishapo na Isukulu lya Bakabila ba Mbila Nsuma iya Bufumu.

 Ilyo calefika mu October 2011, amakalasi 25 aya ili isukulu yalitungulwilwe muli ici calo kabili abakanshiwe balifikile kuli 600. Pali ino nshita, ukucila pali hafu ya bapwisha ili sukulu balebomba mu mulimo wa nshita yonse, kabili 71 ni bapainiya baibela, e lyo basano ni bakangalila ba muputule. Amakalasi 10 aya kubalilapo yabelele pa musambo, lelo ukutampila pa lyalenga 11, amakalasi yabela pa cikuulwa icaba mu Villa González.

Pa 22 September, mu 1998, mu Dominican Republic mwalipitile icikuuku ca mwela ico baleita abati Hurricane Georges icalebutuka amakilomita 190 pe awala limo, kabili calyonawile ifintu ifingi. Abantu abengi bashele ukwabula amayanda, e lyo ukucila pali 300 balifwile. Komiti Iyafwilisha Abasanshilwe yalipangilwe pa Ng’anda ya Bufumu mu La Romana kabili Komiti ya Makuule e yalebafwilisha.  Ababomfi ba kuitemenwa nalimo 300 na ba Nte abafumine mu fyalo 16 bali-itemenwe ukwafwilishako muli uyu mulimo.

Amayanda ya Bufumu 23 na mayanda ya ba bwananyina ukucila pali 800 baliyakuulile cipya cipya nelyo ukuyawamya fye. Ku ca kumwenako, ba Carmen, bapainiya abakoloci baali no bulanda sana ilyo ing’anda yabo iyo baikelemo pa myaka 38 yaonawilwe. Lelo, ilyo bamunyinefwe 15 baile mu kupanga umufula wa kukuulapo ing’anda yabo, balitemenwe nga nshi. Batile, “Lyonse fye, Yehova tatulaba kabili alatusakamana. Moneni ing’anda ubusuma iyo aba bwananyina balenkuulila. Abena mupalamano bandi batile: ‘Inte sha kwa Yehova balasakamana abo bapepa nabo; cine cine balitemwana.’” Ifi fine e fyo na bantu abengi mu calo balelanda ilyo ababomfi ba kuitemenwa baleyafwilisha bamunyinabo abaponenwe no busanso.

Nangu ca kuti icikuuku ca Hurricane Georges calengele kwaba amafya sana, ukutemwa uko abantu ba kwa Yehova balelanga kwalengele bamunyinefwe abaponenwe no busanso basansamuke kabili batwalilile ukuba abakosa mu fya kwa Lesa. Ne cacililepo ukuwama ca kuti ifyo aba ababomfi ba kuitemenwe balebombesha, fyalengele Yehova intulo ya cisansamushi conse alumbanishiwe.

Apo impendwa ya basambi abapya yalekulilako, Amayanda ya Bufumu ayengi yalefwaikwa. E ico, mu November 2000, aba bwananyina balitendeke ukukuula Amayanda ya Bufumu mu Dominican Republic ukupitila muli programu ya kukuula Amayanda ya Bufumu mu fyalo ifipiina. Ici calenga ukuti icilonganino nomba cilekuula Ing’anda ya Bufumu iisuma mu milungu fye nalimo 8. Ilyo calefika mu September 2011, ninshi amabumba yabili  aya ba makuule yalikuula nelyo ukuwamya amayanda ya Bufumu 145.

Ababomfi ba makuule pamo ne fikuulwa ifyo bakuula filashimika sana ubunte pali Yehova. Ku ca kumwenako, mu musumba umo uunono uwabela lwa ku kapinda ka ku kuso aka ici calo, bamunyinefwe balifwaile impanga iyalingile ukukuulapo Ing’anda ya Bufumu. Munyinefwe umo, painiya waibela, aipwishe umwine wa iyi mpanga nga kuti atemwa ukuishitisha. Umwine wa mpanga atile, “Mwilaipoosela inshita, te kuti imushitishe iyi mpanga maka maka ifi mulefwaya ukukuulapo icalici.”

Papitile fye inshita iinono, uyu umwine wa mpanga aliile ku Puerto Plata ku kutandalila abakalamba bakwe abaume abaali ni ba Nte. Ilyo afikile, asangile ukuti ulupwa lumo ulwa ba Nte lwalikuushishe abakalamba bakwe ku ng’anda yabo ku kubasakamana. Aba ba Nte banabo e balebatwala kuli dokota, kabili baleya nabo mu kulongana na mu kushimikila. Uyu mwaume aipwishe abakalamba bakwe indalama isho balipiile ba Nte pali fyonse ifyo balebacitila. Bamwaswike abati, “Nshalipilapo nangu shimo, pantu aba ni bamunyinane.”

Uyu mwaume alipapile sana pa cikuuku ca balya ba Nte ica kuti aebele painiya waibela, ulya wamwipwishe nga kuti ashitisha ba Nte impanga ukuti nomba alefwaya abashitishe. Bamunyinefwe balishitile ilya mpanga, e fyo batendeke no kukuula Ing’anda ya Bufumu. Kale, abakashi ba uyu mwaume nabo tabatemenwe Inte sha kwa Yehova. Lelo, ilyo bamwene ifyo aba bwananyina balebombela pamo pa makuule, batile, “Ala nshatala monapo abantu abaikatana kabili aba cikuuku nga aba!”