Ginpakamaayo ni Jehova ang mga panikasog sang iya mga alagad sa Dominican Republic. Sang 1994, may aberids nga 16,354 ka manugbantala sang Ginharian sa 259 ka kongregasyon. Bangod sa sini nga pag-uswag, kinahanglan ang madamo nga kalipikado nga gulang kag ministeryal nga alagad. Sa sina man nga tuig, gin-aprobahan sang Nagadumala nga Hubon nga hiwaton sa Dominican Republic ang Ministerial Training School,  nga ginbuslan karon sang School for Kingdom Evangelizers.

Sang Oktubre 2011, mga 600 na ka estudyante ang naggradwar sa 25 ka klase nga ginhiwat sa pungsod. Karon, sobra katunga sang naggradwar ang nagaalagad sa pila ka sahi sang bug-os tion nga pag-alagad, 71 ang naasayn subong espesyal payunir, kag 5 ang naasayn nga manugtatap sang sirkito. Ginhiwat sa sanga ang nauna nga 10 ka klase, pero sugod sang ika-11 nga klase, ginhiwat na ini sa kaugalingon nga pasilidad sa Villa González.

Sang Septiembre 22, 1998, nagsalakay ang Bagyo Georges sa Dominican Republic nga may kabaskugon nga 190 kilometros kada oras. Daku gid ang halit sini. Linibo ang nagub-an sang balay, kag sobra 300 ang napatay. Sa bulig sang Regional Building Committee, nag-organisar  ang Disaster Relief Committee sang relief center sa lote sang Kingdom Hall sa La Romana. Mga 300 ang nagbulig, lakip ang mga Saksi halin sa 16 ka pungsod.

Sa kabug-usan, 23 ka Kingdom Hall kag sobra 800 ka balay sang aton mga kauturan ang kinahanglan kay-uhon ukon patindugon liwat. Halimbawa, si Carmen, nga may edad na nga regular payunir, nasubuan gid sang naguba ang iya balay nga 38 ka tuig na niya nga ginaistaran. Pero, daku gid ang iya kalipay sang nag-abot ang 15 ka utod para umpisahan ang pagtukod sang iya bag-o nga balay. “Wala gid kami ginapabay-an ni Jehova,” siling ni Carmen, “kag pirme niya kami ginabuligan. Tan-awa n’yo bala ining matahom nga balay nga ginapatindog sang akon mga kauturan para sa akon. Nagsiling ang akon mga kaingod: ‘Ginabuligan sang mga Saksi ni Jehova ang ila mga kauturan; ginahigugma gid nila ang isa kag isa.’” Amo man sini nga mga komento ang mabatian sa bilog nga pungsod samtang ginabuligan sang mga boluntaryo ang ila mga kauturan nga nahalitan.

Bisan pa grabe ang halit sang Bagyo Georges, ang mahigugmaon nga bulig sang katawhan sang Dios naghatag sing pisikal kag espirituwal nga paumpaw sa aton mga kauturan nga nahalitan sang bagyo. Labaw sa tanan, ang pagsakripisyo sang mga boluntaryo naghatag sing kadayawan kay Jehova, ang tuburan sang matuod nga paumpaw.

Bangod sa madasig nga pagdamo sang mga disipulo, kinahanglan man ang dugang nga mga Kingdom Hall. Gani sang Nobiembre 2000, ang mga kauturan sa Dominican Republic nagsugod sa pagpatindog sang mga Kingdom Hall sa bulig sang programa para sa imol nga mga lugar. Subong resulta, makapatindog ang kongregasyon sang komportable kag matahom nga Kingdom Hall sa sulod lang sang mga walo ka semana. Pagka-Septiembre  2011, mga 145 ka Kingdom Hall na ang napatindog ukon nakay-o sang duha ka grupo sang konstruksion.

Ining mga Kingdom Hall kag ang mga boluntaryo sa konstruksion nakahatag sing daku nga panaksi. Halimbawa, sa isa ka gamay nga banwa sa aminhan-katundan sang pungsod, nakakita ang mga kauturan sang isa ka lote nga puede patindugan sang Kingdom Hall. Ginsilingan sang isa ka espesyal payunir ang tag-iya nga baklon ang lote. “Nagauyang ka lang sang tion,” sabat sang tag-iya, “indi ko ini pag-ibaligya sa inyo, ilabi na kon patindugan n’yo ini sang simbahan.”

Wala madugay sa tapos sina nga pag-istoryahanay, nagkadto ang tag-iya sa Puerto Plata para bisitahan ang iya magulang nga lalaki nga isa ka Saksi ni Jehova. Pag-abot niya didto, nahibaluan niya nga gindala sang pamilya nga Saksi sa ila balay ang iya nagamasakit nga magulang para atipanon ini. Gindala man sang pamilya ang iya magulang sa doktor, kag ginaupod sa mga miting kag sa pagbantala. Ginpamangkot niya ang iya magulang kon pila ang iya ginbayad sa pamilya nga nag-atipan sa iya. “Wala ako sing ginbayaran,” sabat sang iya magulang. “Mga kauturan ko sila.”

Natandog gid ang tag-iya sang lote sa kaayo sang mga Saksi. Gani gintawgan niya ang espesyal payunir nga naistorya niya sadto kag ginsilingan nga nagbag-o na ang iya pensar kag ibaligya na niya ang lote. Ginbakal sang mga kauturan ang lote kag ginsugdan ang pagpatindog sang Kingdom Hall. Sang una, negatibo ang pagtamod sang asawa sang tag-iya sa mga Saksi ni Jehova. Pero sang nakita niya ang mga kauturan nga nagabuligay sa pagpatindog, nagsiling sia, “Sila ang pinakamaayo nga grupo sang tawo nga nakita ko kag nahiusa gid sila.”