Ifishi ifingi ifya Micronesia tafyashimikilwamo sana, e ico bakasabankanya aba pa fishi fya Marshall Islands balipekenye ubulendo bwa milungu ibili ukuya no bwato mu kushimikila kuli ifi fishi. Batendekele ubulendo pa cishi ca Majuro, e lyo baile na pa cishi ca Wotje ne ca Ormed mu Wotje Atoll.

Pa kuti bayeshimikila ku bantu abengi, bakasabankanya batalile  balongela limo impapulo mu tubokoshi ilyo bashilaima. Mu kabokoshi kamo na kamo balelongamo magazini ine na mabroshuwa yabili. Apo bakasabankanya tabaishibe ilyo bali no kubwelela kuli ifi fishi, balipeeleko abalefwaya ukusambilila akabokoshi kamo pa kuti nabo bakapeeleko ba lupwa lwabo ne fibusa. Mu milungu ibili, balipeele abantu amabroshuwa 531, magazini 756, e lyo ne fitabo 7.

Mu February 2014, ba Nte 6 aba ku Papua New Guinea, baliimine ubulendo bwa nshiku 10 ubwa kuya mu kushimikila mu mishi iyaba pa cishi ca Karkar apaba ne mpili ishipuulika. Basangile abantu abengi abalefwaya ukusambilila kabili balibapeele impapulo 1,064. Nkashi Relvie atile: “Ubushiku bwa kubalilapo, twalishimikile mpaka 15:00 hrs. Pali iyi nshita ninshi amenshi ayo twasendele pa bulendo nayapwa, imibango ya kanwa yalekalipa, mu kanwa namo mwalyumine pantu twalishimikile pa nshita iitali. Ilyo nalelanda no mukashana, nalefwaya ukumubelengelako ilembo lelo nalifililwe pantu nali ne cilaka sana. Apo pene alimpeeleko amenshi.”

Ilyo kwashele ubushiku bumo ukuti tufume mu mushi umo, abantu abengi balilongene ukubikako fye ne ntungulushi sha mapepo. Ba Relvie batile, “Naumfwile kwati ni filya cali kuli Stefani ilyo aiminine pa ntanshi ya cilye ca Sanhedrini pa kucingilila icine, icawemeko fye ca kuti abo twaleshimikila baali aba bucibusa.” Ilyo bakasabankanya 6 balekele ukulanda, umukalamba wa Sunday school ya baLutheran aliminine no kutasha banyina mukalamba, pa kutwala icine kuli iyi ncende. Atile, “Mwacita fye nga filya fine fyacitile umwanakashi umwina Samaria uwaileshimikila ba lupwa lwakwe ifisuma ifyo aumfwile kuli Yesu. Twatootela nga nshi pa kukaanatulaba.”

Ubushiku bumo ulucelo, Teariki umulumendo uwali ne myaka 7 uwaleikala pa cishi ca Tarawa mu Kiribati aleshimikila na bawishi ba Tueti. Ilyo babengishe mu ng’anda, basangilemo abantu nalimo 10 abaume na banakashi abali ne myaka ya muli ba 20. Ba Tueti balilanshenye na aba bantu pa Bufumu kabili umo pali aba aebele ba Tueti ukuti: “Natumona ukuti bonse muleshimikila na bana benu abanono. Cinshi mubasendela mu kushimikila? Baice sana, te kuti baleshimikila pali Lesa.”

Bamwaswike abati: “Bushe mulefwaya mushininkishe ukutila kuti ashimikila? Nalimo nafumina pa nse pa kuti mushale mwalanshanya nankwe.” Bonse mwi bumba bayaswike abati, “Ee, tulefwaya tumone nga kuti ashimikila.”

Ilyo ba Tueti bafumine pa nse, Teariki abepwishe ukuti, “Bushe mwalishiba ishina lya kwa Lesa?”

Umo atile, ni “Yesu.” Umbi atile, ni “Lesa.” Umbi na o atile ni “Shikulu.”

Teariki abaswike ukuti: “Natumone ifyo Baibolo yalandapo. Natukupukule pali Esaya 42:5, kabili mukutike ilyo ndebelenga.” Pa numa ya kubelenga, abepwishe ukuti, “Nani ili ilembo lilelandapo?”

Umulumendo umo atile, “Lilelanda pali Lesa.” Lyena Teariki abebele ukuti, “Mwalungika, lilelanda pali Lesa wa cine. Nga twatwalilila ukubelenga pa cikomo 8, cinshi Lesa wa cine aletweba? ‘Nine Yehova. Ilyo e shina lyandi; nshakapeele ubukata bwandi kuli umbi.’ Bushe mwaumfwa ishina lya kwa Lesa?”

Bonse batile, “Ni Yehova.”

Apo nomba bonse balekutikisha, Teariki abepwishe ukuti: “Cinshi cawamina ukubomfya ishina lya kwa Lesa ilya kuti Yehova? Natubelenge Baibolo pa Imilimo 2:21 pa kuti tusange icasuko. Patila: ‘onse uwalilila kwi shina lya kwa  Yehova akapusuka.’ Cinshi cawamina ukubomfya ishina lya kwa Lesa?”

Umukashana mwi bumba ayaswike ati, “Pa kuti tukapusuke.”

Pali iyi nshita bawishi ba kwa Teariki balibwelele mu ng’anda. Lyena baipwishe ibumba ukuti: “Aleni bane, muletipo shani? Bushe abana besu abanono kuti bashimikila? Bushe caliba fye bwino ifi tubasenda mu kushimikila?” Bonse mwi bumba balisumine, batile ca cine kuti bashimikila kabili caliba fye bwino ukulabasenda mu kushimikila. Bawishi Tueti baebele ibumba ukuti: “Na imwe bene kuti mwashimikila nge fi fine Teariki acilashimikila, nga mwasambilila Baibolo.”

Mu November 2013, ba Jean-Pierre ababombela pa maofeshi ya bakapilibula ku Port-Vila mu Vanuatu, baile ne ndeke ku cishi ca ku mwabo ku kulongana kwa muputule. Ilyo bafikile pa cibansa ca ndeke, ibumba lya bantu abafumine ku masamba ya ici cishi abalefwaya ukusambilila Baibolo, lyalombele ba Jean-Pierre impapulo ishilanda pali Baibolo. Balibapeele nalimo magazini yonse iyo bakwete. Pa numa, shimapepo na o alilombele impapulo kuli ba Jean-Pierre. Uyu shimapepo aebele ba Jean-Pierre ukuti: “Ala tuli ne nsala ya kusambilila ifya kwa Lesa. Bushe te kuti mwise ku mushi ku mwesu no kutwafwilishako ukusanga ifyasuko ku mepusho ayo twakwata?” Ilyo papitile ubushiku bumo pa numa ya kulongana, ba Jean-Pierre balimine lucelocelo, ukuninika ulupili ulutali nga nshi. Basukile bafika na pa muulu wa lupili apali uyu mushi. Balibapokelele ku bekala mushi, kabili ba Jean-Pierre balilanshenye nabo ifyaba muli trakiti ya Imbila ya Bufumu Na. 38 iyakwata umutwe uutila “Bushe Cine Cine Abafwa Kuti Baba aba Mweo na Kabili?” Baebele abantu bonse abali 30 ukulakonkamo ilyo balebelenga Baibolo. Balilanshenye nalimo pa maawala 7. Cine cine abekala mushi bali ne nsala ya kusambilila ifya kwa Lesa! Shikulubantu umo uwa myaka 70 atile, “Ukutula apo nafyalilwa, nshatala ng’umfwapo ubulondoloshi ubwaumfwika bwino nga ubu, pa fyo abafwa baba!”

Ba Jean-Pierre tababwelelemo ku ng’anda bulya bushiku. Balele mu muputule umo wine na pasta. Ilyo ba Jean-Pierre babukile, basangile pasta alebelenga magazini yesu. Lyena bamwipwishe ifyo alebelengapo, kabili abaswike ukuti alebelenga pa Bufumu bwa kwa Lesa ninshi no kumwentula alemwentula. Alisumine ukuti Ubufumu bwa kwa Lesa tabwali mu mitima ya baFarise abo Yesu asuushishe pali Luka 17:21. Na kabili umwine aliilandile fye ukuti Ubufumu  bwa kwa Lesa te kuti bube mu mutima wa muntu, nga fintu balesambilila ku calici ku mwabo. Ilyo ba Jean-Pierre babwelele ku mushi ku mwabo ku Port-Vila, balitwalilile ukulanshanya na bantu abalefwaya ukusambilila Baibolo ukubomfya foni. Bamunyinefwe batatu abafumine ku cilonganino icali mupepi baliipeeleshe ukuya kuli ulya mushi ku kulongana Icibukisho ca mfwa ya kwa Yesu, kabili abantu 109 e basangilweko!