Owo isiwakke ndika n̄kọkwọrọ ikọ ke mme isuo emi ẹdude ke Micronesia. Ntem nditọete ifan̄ ẹma ẹduak ndito Marshall Islands n̄wat ke nsụn̄ikan̄ n̄ka do n̄kọkwọrọ ikọ urua iba. Mmọ ẹketọn̄ọ ke isuo Majuro ẹwat ẹkesịm isuo Wotje ye Ormed ke Wotje Atoll.

Nditọete oro ẹma ẹdọn̄ mme n̄wed ke efọk mbemiso ẹdahade man ẹkeme ndikwọrọ ikọ nnọ ata ediwak owo. Magazine inan̄ ye ndiye  n̄kpri n̄wed iba ke ẹkesịn ke efọk kiet kiet. Sia mme asuanetop oro mîkọdiọn̄ọke ini emi mmọ ẹdifiakde idi mme isuo emi, mmọ ẹma ẹyak mme n̄wed oro ẹnọ mbon emi ẹkemade ndikpan̄ utọn̄ ẹnyụn̄ ẹdọhọ mmọ ẹkedeme ẹnọ mbonufọk ye mme ufan mmọ n̄ko. Nditọete emi ẹma ẹnịm ndiye n̄kpri n̄wed 531, magazine 756, ye n̄wed 7 ke isan̄ urua iba emi mmọ ẹkekade mi.

Ke February 2014, Ntiense itiokiet ẹma ẹto Papua New Guinea ẹka ndikwọrọ ikọ usen duop ke mme obio emi ẹdude ke Karkar Island. Obot nsụn̄ikan̄ odu ke mme obio emi. Mme Ntiense oro ẹma ẹkụt ediwak owo emi ẹmade ndikop ikọ Abasi ẹnyụn̄ ẹnịm n̄wed 1,064. Eyenete an̄wan kiet emi ekerede Relvie ọkọdọhọ ete: “Akpa usen emi ikọtọn̄ọde ndikwọrọ ikọ, ima ikwọrọ tutu esịm n̄kanika ita uwemeyo. Mmọn̄ emi ikakamade ama okụre ini oro, itọn̄ onyụn̄ asat nnyịn etieti ke ntak emi iketịn̄de ikọ ye ediwak owo. N̄kosụk nneme nneme ye ekpri eyenan̄wan kiet, edi uyo ama esịre mi ke ini n̄koyomde ndikot Bible nnọ enye sia itọn̄ akasatde mi. Eyen oro ama ọnọ mi mmọn̄ n̄n̄wọn̄.”

Okoneyo oro ekesierede usen emi mmọ ẹkeyomde ndinyọn̄ ke obio kiet, mbon obio oro ye mme etubom ufọkabasi emi ẹkedude do ẹma ẹdi ẹdisobo ye mmọ. Relvie ọdọhọ ete: “Eketie mi nte ndi Stephen emi ọkọkwọrọde ikọ ọnọ mbon Sanhedrin. N̄kukụre se ikokpụhọrede edi ke mbon emi n̄ketịn̄de ikọ nnọ ikayatke esịt nte mbon emi Stephen eketịn̄de ikọ ọnọ.” Ke Ntiense itiokiet oro ẹma ẹketịn̄ ikọ ẹma, owo emi esikpepde nditọ Lutheran n̄kpọ ke Sunday ke ufọkabasi mmọ ama adaha ada ọkọm eyeneka eka esie emi akadade Mme Ntiense eken edi. Enye ama ọdọhọ ke enye  anam etieti ndida mmọ ndi man ẹdikpep ikọt mmimọ akpanikọ. Enye ama ọdọhọ ete: “Afo etie nte n̄wan Samaria emi akakade eketịn̄ nti n̄kpọ emi enye okokopde ke inua Jesus ọnọ mbonufọk esie. Amanam etieti nte mûfreke nnyịn.”

Usenubọk usen kiet, Teariki emi edide isua itiaba onyụn̄ odụn̄de ke isuo Tarawa ke Kiribati akasan̄a ye Tueti ete esie ọkwọrọ ikọ. Mmọ ẹma ẹkụt n̄kpọ nte iban ye irenowo duop, emi ẹkedide n̄kpọ nte isua 20 esịm 30, ke ufọk kiet. Ke ete Teariki ama ọkọkwọrọ ikọ ama ọnọ mmọ, owo mmọ kiet ama ọdọhọ enye ete: “Imesiwak ndikụt kpukpru mbufo ẹsan̄ade ye n̄kpri nditọ mbufo ẹkwọrọ ikọ. Ntak emi ẹsimende mmọ ẹsan̄a? Mmọ ẹkpri ẹkaha ndikwọrọ ikọ Abasi.”

Tueti ama ọdọhọ ete: “Ndi akpama ndise m̀mê eyen mi ekeme ndikwọrọ ikọ? Mmekeme ndiwọrọ nda ke an̄wa mbet enye ọkwọrọ ikọ ọnọ mbufo.” Kpukpru mmọ ẹma ẹnyịme.

Ke Tueti ama ọkọwọrọ, Teariki ama obụp mmọ ete, “Ndi mbufo ẹmediọn̄ọ enyịn̄ Abasi?”

Owo mmọ kiet ama ọbọrọ ete: “Ih. Abasi ekere Jesus.” Owo en̄wen ọdọhọ, “Abasi.” Ndien akpatre owo ọdọhọ ke ekere “Ọbọn̄.”

Teariki ama ọdọhọ mmọ ete: “Ẹyak ise se Bible ọdọhọde. Yak ikụbọde ika n̄wed Isaiah 42:5 ikokot se Bible etịn̄de do.” Ke enye ama okokot itien̄wed oro, enye ama obụp ete: “Itien̄wed emi etịn̄ aban̄a anie?”

N̄kaiferi kiet ama ọbọrọ ete: “Abasi.” Teariki ama ọdọhọ ete: “Ih, ata Abasi ke etịn̄ aban̄a. Yak ikot ufan̄ikọ itiaita ise man ikop se ata Abasi ọdọhọde nnyịn. ‘Ami ndi Jehovah. Enyịn̄ mi edi oro; ndinọhọ baba owo kiet ubọn̄ mi.’ Itie emi ọdọhọ ke Abasi ekere didie?”

 Mmọ ẹma ẹbọrọ ẹte, “Jehovah.”

Ke kpukpru mmọ ẹma ẹketọn̄ọ ndikpan̄ utọn̄, Teariki ama obụp mmọ ete: “Ntak emi anade ikot Jehovah Abasi ke enyịn̄? Yak ikụbọde ika Utom 2:21 ikese se idude do. Itie oro ọdọhọ ete: ‘Ẹyenyan̄a kpukpru owo eke ẹsemede ẹkot enyịn̄ Jehovah.’ Ntak emi anade ikot Abasi ke enyịn̄?”

Ekpri eyenan̄wan kiet ke otu oro ama ọbọrọ ete, “Man ẹkpenyan̄a nnyịn.”

Ini emi ndien ke ete Teariki okodụk edi esịtufọk oro. Enye ama obụp mmọ ete: “Mbufo ẹkere didie idahaemi? Ndi n̄kpri nditọ nnyịn ẹkeme ndikwọrọ ikọ? Ndi esifọn isan̄a ye mmọ ika ukwọrọikọ?” Kpukpru mmọ ẹma ẹnyịme ke  nditọwọn̄ ẹkeme ndikwọrọ ikọ ye nte ke esifọn ẹsan̄a ye mmọ ẹka ukwọrọikọ. Ekem Tueti ọdọhọ ete: “Mbufo n̄ko ẹmekeme nditịn̄ se idude ke Bible nte Teariki anamde edieke ẹkpepde Bible.”

Ke November 2013, Jean-Pierre emi anamde utom ke itie ukabade n̄wed oro odude ke Port-Vila ke Vanuatu, ama odụk ubomofụm aka obio mmọ emi edide isuo man okodụk mbono circuit. Ke ini Jean-Pierre esịmde isuo oro, ediwak owo emi ẹtode edem usụk isuo oro ẹma ẹdidọhọ enye ọnọ mmimọ n̄wed ikọ Abasi. Kpukpru magazine oro enye akakamade ama ekpere ndikụre. Ekem pastọ ufọkabasi kiet ama edidọhọ Jean-Pierre etiene ọnọ imọ n̄wed. Ete emi ama ekpe enye ubọk ete edi obio mmimọ, onyụn̄ ọdọhọ ete: “Itọn̄ ikọ Abasi asat nnyịn etieti. Mbọk di obio nnyịn man edibọrọ ediwak mbụme emi mbon obio nnyịn ẹnyenede.” Ke mbono oro ama akasuana, Jean-Pierre ama adaha tụhi-tụhi usenubọk asan̄a anyan usụn̄ ọdọk obot oro. Ekem enye ama ekesịm ekpri obio oro odude ke enyọn̄ obot oro. Ke mbon obio oro ẹma ẹkekọm enye, enye ama ọtọn̄ọ ndineme se idude ke Mbụk Obio Ubọn̄ Ọyọhọ 38 emi ọdọhọde “Ndi Mme Akpan̄kpa Ẹkeme Ndifiak Ndu Uwem?” Enye ama ọdọhọ n̄kpọ nte owo 30 oro ẹkedude do ete ẹtiene ẹse Bible mmọ ke ini imọ ikotde. Nneme emi ama ebịghi esịm hour itiaba. Itọn̄ ikọ Abasi ama asat mbon obio oro ke akpanikọ! Ete kiet emi edide isua 70 ama ọdọhọ ete: “Tọn̄ọ n̄kamana n̄kopke ẹnamde se itịbede inọ owo emi akpade an̄wan̄a mi ntem!”

Jean-Pierre akana ke obio oro tutu eyo esiere. Enye akana ubet kiet ye pastọ oro. Ke ini enye edemerede idap ke ndan̄nsiere, enye ama okụt pastọ oro okotde magazine nnyịn kiet. Jean-Pierre ama obụp enye se enye okotde, enye etịn̄ ye inemesịt ete ke isụk ikot iban̄a Obio Ubọn̄ Abasi. Enye ama  okụt ke Obio Ubọn̄ Abasi ikodụhe ke esịt mme Pharisee emi Jesus okobiomde ikpe, nte Jesus eketịn̄de ke Luke 17:21. Enye ama edikụt n̄ko ke Obio Ubọn̄ Abasi idụhe owo ke esịt nte ẹsikpepde ke ufọkabasi mmọ. Ke Jean-Pierre ama akafiak ọnyọn̄ Port-Vila, enye ama aka iso okot mbon obio oro ke fon eneme ikọ Abasi ye mmọ. Nditọete irenowo ita ẹma ẹto esop kiet ke mbọhọ oro ẹka obio oro ẹkenịm Editi, ndien owo 109 ẹkedụk!