Adu nga isla ti Micronesia ti manmano a madanon ti naimbag a damag, isu nga implano ti maysa a grupo dagiti kakabsat iti Marshall Islands ti agbangka a mapan kadagita nga isla iti dua a lawas. Nagluasda iti isla ti Majuro a napan kadagiti isla ti Wotje ken Ormed iti Wotje Atoll.

Tapno ad-adu ti makasabaanda, nagisagana ti grupo kadagiti  naisupot a literatura sakbay a nagluasda. Uppat a magasin ken dua a broshur ti nagyan ti kada supot. Gapu ta dida ammo no kaanoda nga agsubli kadagiti isla, imbatianda dagiti interesado iti saggaysa a supot ken imparegtada nga ipabasadanto met dagita iti pamilia ken gagayyemda. Iti dua-lawas a panangasabada, nakaipaima dagiti kakabsat iti 531 a broshur, 756 a magasin, ken 7 a libro.

Idi Pebrero 2014, innem a Saksi iti Papua New Guinea ti napan nangasaba iti sangapulo nga aldaw kadagiti purok iti Karkar Island, a maysa a bulkaniko nga isla. Adu ti dimngeg kadakuada ken nakaipaimada iti 1,064 a publikasion. Kinuna ti maysa a sister a ni Relvie: “Iti umuna nga aldaw, alas tres ti malemen ngem mangaskasabakami pay laeng. Naibusen dagiti balonmi a danum, nabannogkamin nga agsasao, ken namagaanen ti karabukobmi. Kasarsaritak ti maysa nga ubing a babai ket mangibasaak koma iti teksto ngem makain-inumak unayen. Imbag laengen ta inikkannak iti danum.”

Iti rabii sakbay ti ipapanawmi iti maysa a purok, adda naangay a dakkel a taripnong dagiti umili a karaman dagiti lider ti relihion. Malagip ni Relvie: “Kaslaak la idi ken Esteban a simmango iti Sanhedrin tapno idepensa ti kinapudno, ti laeng nagdumaanna ket mannakigayyem dagiti kasaritami.” Idi nalpasen a nagsao ti innem a kakabsat, timmakder ti koordineytor ti Sunday school ti Lutheran ket nagyaman iti antina, a maysa kadagiti kakabsat, gapu iti panangidanonna iti kinapudno kadagiti pasurotna. “Ti nagsayaat nga ulidanyo,” kinunana, “ket  kas iti Samaritana a napan iti pamiliana tapno ibagana dagiti nagsayaat a bambanag a nangngegna ken Jesus. Pagyamanan ta silalagipkayo kadakami.”

Agtawen ni Teariki iti pito ken agnanaedda iti isla ti Tarawa a paset ti Kiribati. Maysa nga agsapa bayat a mangaskasabada ken ni Tueti a tatangna, simrekda iti maysa a balay ket naam-ammoda ti agarup sangapulo a lallaki ken babbai nga agtawen iti nasurok a 20. Kalpasan a nairanud ni Tueti ti mensahe ti Pagarian, nagsaludsod ti maysa kadakuada: “Madlawmi a kanayon nga ikuykuyogyo dagiti annakyo no mangasabakayo. Apay nga itugtugotyo ida? Ubbingda pay unay tapno mangasaba maipapan iti Dios.”

Imbaga ni Tueti: “Kayatyo a makita no kabaelanen ti barok ti mangasaba? Rummuarak no kua tapno mangngegyo ti ibagana.” Simmungbatda, “Wen, kayatmi a mangngeg ti ibagana.”

Idi nakaruaren ni Tueti, nagsaludsod ni Teariki, “Ammoyo kadi ti nagan ti Dios?”

“Wen. Jesus!” kinuna ti maysa. “Dios,” kuna met ti sabali. Adda pay nagkuna iti “Apo.”

Kinuna ni Teariki: “Kitaentayo no ania ti kuna ti Biblia. Basaentayo amin ti Isaias 42:5.” Kalpasan ti panangbasada, kinunana, “Asino ti ibagbaga ti teksto?”

Maysa nga agtutubo a babai ti simmungbat, “Dios.” Kinuna ni Teariki, “Wen, ti pudno a Dios. No basaentayo ti bersikulo otso, ania ti kuna ti Dios kadatayo? ‘Siak ni Jehova. Dayta ti naganko; ket iti asinoman a sabali saanko nga ited ti bukodko a dayag.’ Ania kano ti nagan ti Dios?”

Simmungbat ti grupo, “Jehova.”

 Ita ta dumdumngegen ti amin, insaludsod ni Teariki: “Ania ngata ti magunggonatayo no usarentayo ti nagan ti Dios a Jehova? Basaentayo ti Aramid 2:21. ‘Ket tunggal maysa nga umawag iti nagan ni Jehova maisalakanto.’ Ania ti magunggonatayo no usarentayo ti nagan ti Dios?”

Simmungbat ti maysa a babai, “Maisalakantayo.”

Ita, simreken ti tatang ni Teariki. Dinamagna iti grupo: “Okey, ania ti makunayo? Kabaelan kadi dagiti ubbing ti mangasaba? Mayat kadi no itugotmi ida?” Immanamong ti intero a grupo a talaga a kabaelan dagiti ubbing ti mangasaba ken umiso laeng dayta. Kinuna ngarud ni Tueti: “Uray dakayo mabalinyo met nga iranud ti  kinapudno iti Biblia a kas iti inaramid ni Teariki no adalenyo ti linaonna.”

Ni Jean-Pierre ket agtrabtrabaho iti remote translation office iti Port-Vila idiay Vanuatu. Idi Nobiembre 2013, nageroplano a napan iti naggapuanna nga isla tapno agatender iti asamblea sirkito. Apagsangpetna, immasideg kenkuana ti maysa a grupo dagiti interesado a naggapu iti makin-abagatan a paset ti isla tapno agkiddawda iti literatura. Dandani naipaimana amin a magasin nga intugotna. Immasideg pay ti maysa a pastor ken nagkiddaw met iti literatura. Impapilitna a sumurot ni Jean-Pierre iti purokda, a kunkunana: “Mabisbisinkami iti naespirituan. Masapul nga umayka iti purokmi ket sungbatam ti amin a saludsodmi.” Iti agsapa kalpasan ti asamblea, adayo ti pinagna ni Jean-Pierre a sumang-at iti nangato a bantay. Nadanonna met laeng idi agangay ti tuktok ti bantay nga ayan ti naiputputong a purok. Kalpasan ti nabara a panangpasangbayda kenkuana, inlawlawag ni Jean-Pierre ti Kingdom News No. 38 a napauluan “Agbiagto Kadi Manen Dagiti Natay?” Imbagana iti agarup 30 a dumdumngeg a sumurotda iti pannakaibasa dagiti teksto iti mismo a Bibliada. Nagpaut ti saritaan iti agarup pito nga oras. Talaga a mabisbisinda! Kinuna ti maysa a lakay nga agtawen iti 70, “Iti intero a panagbiagko, diak pay pulos nakangngeg iti kasta kasayaat a panangilawlawag maipapan kadagiti natay!”

Naturog ni Jean-Pierre iti purok, ken nakikuarto iti pastor. Idi makariing iti bigat, basbasaen ti pastor ti maysa kadagiti magasintayo. Dinamag ni Jean-Pierre no ania ti basbasaenna, ket sigagagar nga imbaga ti pastor a maipapan dayta iti Pagarian ti Dios. Immanamong a ti Pagarian ti Dios ket awan iti puso dagiti Fariseo, a kinondenar ni  Jesus iti Lucas 17:21. Kinunana pay a ti Pagarian ti Dios ket saan a mabalin nga adda iti puso ti maysa a tao, a kas iti isursuro ti simbaan. Idi nagsublin iti Port-Vila, intultuloy ni Jean-Pierre a surnadan ti interes dagiti nasarakanna iti purok babaen ti telepono. Tallo a brother iti kabangibang a kongregasion ti nagboluntario a mapan iti purok para iti Memorial, ket 109 ti timmabuno!