Pa makuji avula a Micronesia kechi basapwilapo mambo awama ne. Onkao mambo, jibumba ja basapwishi mu Marshall Islands banengezhe lwendo lwa kuya na kusapwila pa milungu ibiji. Byo bafumine pa jikuji ja Majuro, bayile ku makuji a Wotje ne a Ormed ku Wotje Atoll.

Pa kuba’mba basapwile ku bantu bavula, jibumba janengezhanga mabuku saka bakyangye  kuya. Pa mulumba umo paikalanga magazini ana ne mabuloshuwa abiji. Basapwishi bashilanga bantu batangako muchima ano magazini avula o baabenya jimo mambo kechi bayukanga kimye kyo bakabwela ku ano makuji ne. Mu milungu ibiji yo bajinga kuno, basapwishi bashile mabuloshuwa 531, magazini 756 ne mabuku atanu na asatu.

Mu February mu 2014, Bakamonyi batanu na umo bafumine mu Papua New Guinea ne kuya moba jikumi na kusapwila pa jikuji ja Karkar kwatemwa kutubika mitumba. Bataine bantu bavula bateleko bingi muchima kabiji bashile mabuku 1,064. Nyenga wa jizhina ja Relvie waambile’mba: “Juba jitanshi twakotokele mu mwingilo 3 koloko wa mabanga. Mema apwile mu mitumwa yo twasendele, mibanga yaumine ne mukanwa shau na kwambila mukoyo. Byo nesambilenga na kashimbi, nakebelenga kutanga kinembelo pano bino nakankelwe mambo nafwile bingi kilaka. Ponkapotu wampele mema a kutoma.”

Juba jimo bufuku saka tukyangye kufuma mu muzhi umo, ba mu kimasamasa baishile kabiji pa jino jibumba pajinga ne bakulumpe ba mu chechi. Ba Relvie bavuluka’mba, “Byo nazhikijilenga bukine, naumvwinetu byonka byaumvwine Setepena byo bamutwajile ku kije kya Saniedilini, kyawaminekotu bano bantu bawamine bingi.” Basapwishi batanu na umo byo bapwishishe kwamba, mwanamukazhi Mufunjishi wa mu Chechi wa Lutheran wafunjishanga pa Mulungu waimene ne kusanchila bashanji nkazhi, nabo basapwishi ba bufumu pa kuletela bukine bantu. Uno mwanamukazhi waambile’mba: “Kyo mwauba kyawama bingi, mwaubatu nobe mwanamukazhi mwina Samaliya wayile na kubula  balongo banji bintu byawama byo aumvwine kwi Yesu. Twasanta bingi pa kubula kwitulubako.”

Juba jimo lukelo, Teariki kalombwana uji na myaka itanu na ibiji wikala pa jikuji ja Tawara mu kyalo kya Kiribati, waingijilenga ne bashanji ba Tueti mu mwingilo wa kusapwila. Pa muzhi umo batainepo jibumba ja banabalume ne banabakazhi baji na myaka kukila pa 20. Bashanji Teariki byo bapwishishe kwisamba nabo byambo bya Bufumu, umo pa jino jibumba waipwizhe ba Tueti amba: “Twimumona anweba bavula muya na kusapwila na baana benu bacheche. Mambo ka o mwibasendela? Bakiji banyike kechi bafwainwa kusapwila pe Lesa ne.”

Ba Tueti bakumbwile’mba: “Mwakonsha kutemwa kumvwako byo asapwila nyi? Kampe ndupuke pangye mumvwe byo asakwamba.” Bonse mu jibumba bakumbwile amba: “Ee, tukeba tumvwe byo asakwamba.”

Ba Tueti byo balupukile, Teariki waipwizhe jibumba’mba, “Nanchi mwijiyuka jizhina ja Lesa nyi?”

Umo wakumbwile amba “Ee, twijiyuka Yesu.” Mukwabo amba jizhina janji “Lesa.” Wabusatu wakumbwile’mba, “Nkambo.”

Teariki waambile’mba: “Twayai tumone byaamba Baibolo. Pa Isaya 42:5. Twayai tutangepo bonse.” Pa kupwisha kutanga kinembelo, wibepwizhe’mba: “Akye kinembelo kibena kwamba pe ñanyi?”

Mwanyike umo wakumbwile’mba, “Lesa.” Teariki waambile’mba: “Ibyo, kyaamba pe Lesa wa kine. Inge twatanga kyepelo kya butanu na tusatu, Lesa wa kine witubula amba ka? Waamba’mba: ‘Amiwa yami Yehoba. Jino jo jizhina jami. Kechi mpana lukumo lwami ku muntu nangwa umo ne.’ Nanchi mwijimona jizhina ja Lesa nyi?”

Jino jibumba jakumbwile’mba, “Yehoba.”

Na mambo a kuba’mba bonse bateleko bingi muchima,  wibepwizhe amba: “Ñanyi bintu byawama bifuma mu kwingijisha jizhina ja Lesa ja Yehoba? Twayai tuzhikule pa Byubilo 2:21 tutane mukumbu. Patangwa bino amba: ‘Yense wita pa jizhina ja Yehoba ukapuluka.’ Ñanyi bintu bifuma mu kwingijisha jizhina ja Lesa?”

Mwanyike umo mu jino jibumba wakumbwile’mba: “Kupuluka.”

Pano po pabwelejile bashanji Teariki mu kibamba. Kepo baipwizhe jibumba amba: “Mwalangulukapo amba ka? Nanchi banyike nabo bafwainwa kusapwila nyi? Nanchi kyatama kwibasenda nyi?” Bonse mu jibumba baswile’mba banyike nabo bakonsha kusapwila kabiji kijitu bulongo nabo kwingilangako mwingilo wa busapwishi. Kepo ba Tueti baambile’mba: “Ne anweba inge mwafunda  biji mu Baibolo, mwakonsha kusapwila bakwenu pa bukine bwa mu Baibolo byonkatu byaji kuba Teariki.”

Mu November mu 2013, ba Jean-Pierre bengijila pa ofweshi wa bantuntuluzhi mu Port-Vila ku Vanuatu, babwelele na ndeke ku jikuji ko baikalanga na kutanwa ku kubuñana kwa mwanzo. Ndeke yajingamo ba Jean Pierre byo yafikile, jibumba ja bantu bateleko muchima ku bukine ba ku kabeta ka bulenge baishile na kwibalomba mabuku alumbulula Baibolo. Bapele bantu magazini onse o bajinga nao. Kepo mwanamulume umo ntangi wa bupopweshi naye asolomokele ba Jean-Pierre nakulomba mabuku. Uno mwanamulume wibambijile kuba’mba bakaye ku muzhi ko afumine. Waambile’mba: “Tuji na nzala ya ku mupashi. Mwafwainwa kwiya ku muzhi kwetu mambo tuji na mepuzho avula bingi.” Juba jalondejilepo panyuma ya kubuñana kwa mwanzo, ba Jean-Pierre baimene lukelo ne kwenda museke walepa bingi kutuntuka mutumba mukatampe. Kyapeleleko bafikile peulu pajinga uno muzhi. Byo bebatambwijile bulongo, ba Jean-Pierre batendekele kwisamba nabo byambo bya mu Mbila ya Bufumu Nambala 38 iji na mutwe wa kuba’mba: “Umvwe Muntu Wafwa, Wakonsha Kwikala Mumi Jibiji Nyi?” Baambijile bantu 30 bo besambilenga nabo kulondelamo na ma Baibolo abo. Uno mwisambo wapwishishe nobe maola atanu na abiji. Ne kya kine, bano bantu bajinga na nzala ya ku mupashi. Mwanamulume umo uji na myaka 70 waambile’mba: “Monka nsemekelwa nkyangye kumvwapo byambo bya uno mutundu pa bafwa!”

Ba Jean-Pierre balajile pa uno muzhi. Balajile mu kibamba kimo na pashita. Byo babukile lukelo, bataine pashita saka a bena kutanga magazini. Bamwipwizhe pa byo atangilenga, wakumbwile na lusekelo amba ubena kutanga pa Bufumu bwa Lesa. Waswile kuba’mba Bufumu bwa  Lesa kechi bwajinga mu michima ya Bafaliseo Yesu bo aambijilenga pa Luka 17:21 ne. Uno pashita wapwishishe kuba’mba Bufumu bwa Lesa kechi buji mu muchima wa muntu byonka byo bafunjisha ku chechi ne. Byo babwelele ku Port-Vila, ba Jean-Pierre batuminanga foni ba ku uno muzhi pa kuba’mba bayuke inge batwajijila kutako muchima. Balongo basatu ba mu kipwilo kyajinga pepi bepaine kuya ku uno muzhi na kunengezha Kivuluko kabiji kwatainwe bantu 109.