KA LEBAKA la khōlo e potlakileng ka har’a mokhatlo oa Jehova, ho na le tlhokahalo e eketsehileng ea Liholo Tsa ’Muso, Liholo Tsa Kopano, litsi tsa likolo tsa puso ea Molimo, liofisi tsa phetolelo hammoho le mehaho ea makala linaheng tse sa tšoaneng. Ka hona, ka October 2013, Sehlopha se Busang se ile sa theha lefapha le lecha e le hore mosebetsi oa meralo, ho haha, ho nchafatsa le ho hlokomela mehaho o ka etsoa ka potlako le ka tsela e baballang chelete. Lefapha lena le bitsoang Lefapha la Meralo/Kaho la Lefatše ka Bophara, le sebeletsa ntlo-khōlō e Brooklyn, New York, ’me le sebetsa tlas’a tataiso ea Komiti ea Khatiso ea Sehlopha se Busang.

 Lefapha la Meralo/Kaho la Lefatše ka Bophara le hlokomela Mafapha a Meralo/Kaho a Mabatooa, a sebeletsang liofising tsa lekala tse Afrika Boroa, Australia, Jeremane le United States. Mafapha ana a hokahanya mosebetsi oa meralo, ho haha le ho hlokomela mehaho linaheng tse sa tšoaneng. Sepheo sa lona ke ho potlakisa kaho ea Liholo Tsa ’Muso. Nakong e fetileng liphutheho li ne li thusoa ke Likomiti Tsa Kaho Tsa Lebatooa kapa lenaneo la ho thusa linaha tse futsanehileng ho haha Liholo Tsa ’Muso. Litokisetso tsena li kopantsoe e le hore ho ka potlakisoa mosebetsi oa kaho.

Liofisi tsa lekala lefatšeng ka bophara li ile tsa theha Lefapha la Meralo/Kaho e le ho hokahanya mosebetsi ona oa motonanahali oa ho haha Liholo Tsa ’Muso le Liholo Tsa Kopano. Lefapha lena le ikarabella Komiting ea Lekala ea habo lona. Ntho e thabisang ka phetoho ena ke hore makala a ka romela bahlanka ba kaho ho thusa barab’abo rōna ho ikahela Liholo Tsa ’Muso kapa Liholo Tsa Kopano.

Ka April 2014, ho ne ho e-na le liprojeke tse khōlō tse 270 tse lokelang ho etsoa ho akarelletsa liofisi tsa phetolelo tse 90, Liholo Tsa Kopano tse 35 hammoho le liprojeke tse 130 makaleng. Ho phaella moo, ho na le tlhokahalo e potlakileng ea hore ho hahuoe kapa ho nchafatsoe Liholo Tsa ’Muso tse fetang 14 000.

Ruri ho matlafatsa tumelo ho bona batho ba Jehova ba momahaneng ba linaha, litso le lipuo tse sa tšoaneng ba haha mehaho e isang thoriso lebitsong la hae le halalelang! Dan Molchan ea sebetsang Ofising ea Komiti ea Basebetsi e ntlo-khōlō o re: “Ho na le mosebetsi oa motonanahali o sa ntseng o lokela ho etsoa, kahoo re ananela  lithapelo tsa bara le barali babo rōna hammoho le menehelo ea bona. Empa re leboha haholo bara le barali babo rōna ba ithaopelang ho re thusa ka mosebetsi ona.”