PA KIBELUSHI pa 5 October mu 2013, bantu 257,294 ba mu byalo 21 batainwe ku kupwila kwa mwaka kwa nambala 129 kwa Watch Tower Bible and Tract Society of Pennsylvania. Bamo bebakwatankenye kwingijisha biñambañamba bino bakwabo bajinga mu luonde. Ku mpelo ya yenkawa mulungu, mabumba a Bakamonyi bakwabo batambile uno mutanchi ye bakopele. Bonse batainweko bajinga 1,413,676 ba mu byalo 31. Kuno ko kupwila kukatampe kutanshi kwa Bakamonyi ba kwa Yehoba kwatainwe bantu bavula bibye.

Kutendeka mu myaka ya mu ma 1920, Bakamonyi ba kwa Yehoba bakwatankanya kushonkena kwa mu byalo kwingijisha mafoni nangwa mawaileshi. Luno Intaneti  yalengela bantu baji mu mapunzha a mwalepa kumvwa ne kumona ponkapotu bibena kumweka nangwa byo bakopa.

Bengijila pa maofweshi a misampi avula baingijile kukila pa mwaka umo pa ku­ba’mba banengezhe kutambila kupwila pa Intaneti. Ku mpelo ya mulungu ko batambishenga kuno kupwila pa Intaneti, balongo bengijilako ku Brooklyn, mu New York bakishishe bufuku bonse na kwingila mambo kwajinga batambilenga pa bimye 15 byapusana pusana.