1, 2. Ukiumi 33-mi piinsip ulluani Jehova qanoq allannguiva, kikkullu Jehovap innuttaanut nutaanut ilaalerpat? (Allaaserisap aallaqqaataani assiliaq takuuk).

UKIUMI 33-mi piinsip ulluani Jehova allannguilluinnarpoq. Inuiaat nutaat ‘Israeli Guutip pigisaanik’, imaluunniit anersaakkut Israelimik, taaneqartartut pilersippai. (Gal 6:16) Jehovap inuit ataasiakkaat inuiannut ilaasussat anersaani illernartoq atorlugu toqqarpai. Paulusi allappoq inuiaat nutaat taakku Aaperaap kinguaavisut kipineqartariaqanngitsut. Anersaamilli illernartumit ‘uummatimikkut kipineqartarput’. — Rom 2:29.

² Apustilit Kristusillu ajoqersugai 100-nit amerlanerusut Jerusalemimi inimi qullermi najuuttut Guutip innuttaanut nutaanut siulliullutik ilaalerput. (ApS 1:12-15) Guutip anersaamik illernartumik tunigamigit ernerilerpai. (Rom 8:15, 16; 2 Kor 1:21) Tamanna Jehovap Kristusip pilliutaanik iluarinninneranut Inatsisillu tunngavigalugit angerutsip angerusisaamik taarserneqarneranut uppernarsaataavoq. (Luk 22:20; Hebræerit 9:15 atuaruk). Ajoqersukkat tanitat taakku Jehovap innuttaanut nutaanut ilaalerput.  Anersaamit illernartumit allamiut oqaasii atorlugit oqalussinnaalersinneqarlutillu “Guutip tupinnangaartuliai” pillugit ilinniartitsisinnaanngortinneqarput. — ApS 2:1-11.

3-5. (a) Piinsip ulluani Petrusip juutit qanoq oqarfigai? (b) Inuiaat nutaat qanoq amerliartulerpat?

³ Jehovap apustili Petrusi aqqutigalugu juutit juutillu upperisaannut ilanngussimasut innuttaminut nutaanut, kristumiut tanitat ilagiivinut, ilaaleqqullugit qaaqquai. Piinsip ulluani Petrusip nakimaalluni juutit oqarfigai Jiisusi toqussimasartik ‘Naalakkatut Kristusitullu’ akuerisariaqaraat. Inuppassuit qanoq iliornissaminnik aperimmanni Petrusip ima akivai: ‘Allamik isumataaritsi, Jiisusillu Kristusip aqqani tamassi kuisigitsi ajortissi isumakkeerneqaatissaannik, taava anersaaq illernartoq tunissutisiarissavarsi.’ (ApS 2:22, 23, 36-38) Ulloq taanna inuit 3000-t missaat inuiannut anersaakkut Israelikkunnut ilaalerput. (ApS 2:41) Tamatuma kingorna apustilit aallussilluarlutik oqaluussiuarmata inuit suli amerlanerusut sallusuissummik paasinnipput. (ApS 6:7) Inuiaat nutaat amerliartorput.

⁴ Taava Jiisusip ajoqersugai Samariamiunut oqaluussisalerput. Samariamiut amerlasuut sallusuissummik paasinnipput, ilaalli anersaaq illernartoq piginngilaat. Jerusalemimi siulersuisoqatigiit Petrusi Johannesilu Samariami qatanngutitaatik tikeraaqqullugit aallartippaat. Samariamiut apustilinit ‘anersaamik  illernartumik’ tunineqarput. (ApS 8:5, 6, 14-17) Taamaalillutik tanitanngorlutillu anersaakkut Israelimut ilaalerput.

⁵ Ukiumi 36-mi Guutip Petrusi aqqutigalugu eqimattat allat innuttaminut nutaanut anersaakkut Israelikkunnut ilaaleqqullugit qaaqquai. Romamiut sakkutuuisa naalagaat Corneliusi taassumalu ilaqutai ikinngutaalu Petrusip oqaluussiffigigamigit tamanna pivoq. (ApS 10:22, 24, 34, 35) Biibilimi allassimavoq Petrusi oqalutsillugu anersaaq illernartoq tusarnaartunut juutiunngitsunut tunniunneqartoq. ‘Uppertut juutinik naggueqartut Petrusi ilagalugu tassunnarsimasut tupigusuutigaat anersaap illernartup tunissutigisaa Guutimik nalusunuttaaq kuineqarmat.’ (ApS 10:44, 45) Taamanimiilli juutiunngitsut kipineqanngitsut anersaakkut Israelimut ilaalernissamut qaaqquneqartalerput.

6, 7. Inuiannut nutaanut ilaasut Jehovap atia pillugu qanoq iliuuseqarpat?

⁶ Ukiumi 49-mi siulersuisoqatigiit ataatsimiinneranni ajoqersugaq Jaaku ima oqarpoq: “Simmiuut [Petrusi] oqaluttuarpoq qanoq ililluni Guuti Guutimik nalusunik aterminut innuttassarsereersimasoq.” (ApS 15:14) Juutit kristumiullu juutiunngitsut Guutimit inuiattut ataatsitut pilersinneqartut ‘atianut innuttaasunut’ taakkununnga ilaapput. (Rom 11:25, 26a) Kingusinnerusukkut Petrusi ima allappoq: ‘Ilissi siornagut innuttarineqanngilasi, maannali Guutimut innuttaavusi.’ Petrusip inuiannut nutaanut siunertarineqartoq ima allalluni nassuiarpaa: “Ilissili tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.” (1 Petr 2:9, 10) Sapiillutik Jehova nalunaajaassutigalugulu Kisimi Oqartussaasutut kikkut tamarmik takkuanni unnersiutigaat.

⁷ Jehovap anersaakkut Israelikkut innuttarileramigit ‘inuiattut piliarisamisut nersorneqaatissaminik nalunaajaatiginnittussatut’ taasinnaalerpai. (Es 43:21) Anersaakkut Israelikkut Jehovap Guutiunera ilumoortoq guutillu allat ilumoortuunnginnerat inunnut sapiillutik oqaluussissutigaat. (1 Th 1:9) Jehova Jiisusilu “Jerusalemimi Judæamilu tamarmi Samariamilu nunarsuullu isua tikillugu allaat” nalunaajaatigaat. — ApS 1:8; Kol 1:23.

8. Apustilip Paulusip Guutip innuttai qanoq mianersoqquai?

⁸ Paulusip sapiilluni Jehova nalunaajaatigaa allaallu isumaliutersortartunut silamiunut taassuma Guutiunera ilumoortoq sapiilluni oqaluussissutigalugu. Jehovap ‘silarsuarmik taassumaniittunillu tamanik pinngortitsisuunera aamma qilammut nunamullu naalagaanera’ nassuiarpaa. (ApS 17:18, 23-25) Paulusip ilagiit aamma ima mianersoqquai: “Nalunngilara peerukkuma amaqqut qaasuttut ilissinnut tikiukkumaartut savaatinillu asattuussissanngitsut. Allaammi ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.” (ApS 20:29, 30) Apustilit suli toqunngitsut tunussisut amerlereersimapput. — 1 Joh 2:18, 19.

9. Apustilit toqunerisa kingorna Guutip innuttai suppat?

 ⁹ Apustilit toqunerisa kingorna tunussisut ilagiinnut siaruaapput kristumiuunerartullu oqaluffiinik pilersitsillutik. Kristumiuunerartut taakku Jehovap atianut innuttaajunnaarlutillu Biibilimik nutsikkaminni amerlasuuni Guutip atianik atuisarunnaarput. Aamma arlalitsigut Guutip aqqanik kanngunarsaapput. Silamiutut ileqqulersuuteqalerlutillu Biibilimik tunngaveqanngitsumik ajoqersuisalerput. Illernartumik sorsunnerartarlutillu Guuti pillugu sorsunnerartalerput. Aamma peqquserluttalerput kinguaassiuutitigullu inuunerluttalerlutik. Tunussinerup kingorna ukiut hundredillit qaangiummata nunarsuarmi Jehovamik pallorfiginnittut ilumoortut ikittuinnaallutillu ‘atianut innuttaasunik’ aaqqissuussaasumik peqatigiissortaqanngilaq.

10, 11. (a) Jiisusip ‘qajuusiassat naasupiluillu’ pillugit assersuusiamini suna siulittuutigaa? (b) 1914-ip kingorna Jiisusip assersuusiaa qanoq eqquutitinneqarpa?

¹⁰ Jiisusip qajuusiassani naasupilunnik assersuut atorlugu tunussineq pissutigalugu anersaakkut taarsiortoqarumaarnera siulittuutigaa. Oqarpoq ‘inuit sinitsillugit’ Diaavulu Inuup Ernerata narsaataani naasupilussanik siaruarteriumaartoq. Qajuusiassat naasupiluillu ‘pissutsit aaqqissuussaanerata naggataatungaanut’ (NW) naajartoqatigiissanerarpai. Aamma ‘naatsiiassat pitsaasut’ tassaanerarpai “Naalagaaffiup qitornai” ‘naasupiluillu’ tassaanerarlugit “Ajortup qitornai”. Naggatissap nalaani qajuusiassat naasupilunnit immikkoortikkumallugit Inuup Ernerata inngilini aallartissavai. Taakkulu Naalagaaffiup qitornaanik katersuisussaapput. (Matt 13:24-30, 36-43) Tamannali qanoq piva? Tamanna Guutip nunarsuarmi eqimattanik aaqqissuussaasunik pallorfiginnitseqaleqqinnissaanut qanoq periarfissiiva?

¹¹ “Pissutsit aaqqissuussaanerata naggataatungaa” (NW) 1914-imi aallartippoq. Taamani nunarsuarmi 5000-t missaannaannik kristumiunik tanitaqarpoq. Ukiumi tamatumani sorsunnermi aallartittumi “Naalagaaffiup qitornai” tanitat Babylonersuarmi suli parnaarussaaqqapput. 1919-imili Jehovap aniguisimmagit kristumiut ilumoortut kristumiuunerartullu assigiinngissutaat ersarissivoq. Esajap siulittuineratut “Naalagaaffiup qitornai” inuiattut aaqqissuussaatikkumallugit katersorpai: “Nuna ullormi ataasiinnarmi pinngortitaasimanerpa? Inuiaat tassuuguinnaq pilersitaasarnerpat? Massami Zioni nallisitsiliinnarluni qitornartaareerpoq.”  (Es 66:8) Allassimaffimmi matumani Zioni tassaavoq Jehovap inngilinik peqatigiissortai. Nunarsuarmi inuiannik tanitaqalermat Zioni qitornartaarpoq.

12. Tanitat Jehovap ‘atianut qanoq innuttaappat’?

¹² Kristumiut siulliit assigalugit “Naalagaaffiup qitornai” tanitat ullumikkut Jehovamik nalunaajaasuupput. (Esaja 43:1, 10, 11 atuakkit). Kristumiutut pissuseqarnertik Naalagaaffillu pillugu nutaarsiassap nuannersup “inuiannut tamanut nalujunnaarsillugu” oqaluussissutiginera pissutigalugit kristumiuunerartunit allaanerupput. (Matt 24:14; Fil 2:15) Taamaalillutik inuit millionillit Jehovamut attaveqarluaqqullugit ikiorpaat. — Danieli 12:3 atuaruk.

13, 14. Tanitaanngitsut Jehovamit iluarisaasumik pallorfiginnikkumallutik susariaqarpat, tamannalu Biibilimi qanoq siulittuutigineqarpa?

¹³ Jehovap Israelikkuunngitsut innuttaminik pallorfiginneqatiginnittut iluarisarai allaaserisap siuliani ersersinneqarpoq. (1 Kng 8:41-43) Ullumikkut tanitaanngitsut tanitat peqatigalugit Jehovamik pallorfiginnittussaapput.

¹⁴ Itsaq pruffiitip naggatissap nalaani inuppassuit Jehovap innuttaanik pallorfiginneqatiginnikkumaarnerat siulittuutigaa. Esaja ima siulittuivoq: “[Inuiappassuit] tassunga ingerlaartut oqassapput: ‘Qaa, majuarta Naalakkap qaqqaanut, Jaakup Guutiata illuanukarluta; aqqutigeqqusaminik ajoqersussavaatigut, aqqusininnguisigullu ingerlajumaarpugut. Tassami piumaarpoq Zionimit Guutip ajoqersuussutiginiagaa, Jerusalemimillu Naalakkap oqaasia.’” (Es 2:2, 3) Zakaria ima siulittuivoq: “Inuiappassuit inuiaqatigiillu pissaasut aggerumaarput Katersaarsuit Naalagaat ujarniarlugu Jerusalemimi, Naalagarlu saammarsariartorlugu.” Eqimattat taakku ‘inuiannit tamanit assigiinngitsuneersuussapput’. Anersaakkut Israelikkut peqatigalugit Guuti pallorfigissavaat imalu oqarlutik: “Ingerlaqatigissavassi tusaratsigu Guutip najoraasi.” — Zak 8:20-23.

15. ‘Savat allat’ anersaakkut Israelimik ‘ingerlaqateqarnerat’ qanoq paasisariaqarpa?

¹⁵ ‘Savat allat’ Naalagaaffik pillugu nutaarsiassamik nuannersumik oqaluussissutiginninnermikkut anersaakkut Israeli ‘ingerlaqatigaat’. (Mark 13:10) Guutip innuttaanut ilanngussapput. Taakku tanitallu ‘katersaapput ataatsit paarsisumit ajunngitsumit’, Kristusimit Jiisusimit, siulersorneqartut. — Johannesi 10:14-16 atuakkit.

16. ‘Naalliunnartoqangaarnerup’ immikkoortua kingulleq Jehovap qanoq aallarnissavaa?

¹⁶ Babylonersuup suujunnaarsinneqarnerata kingorna Guutip innuttai saassunneqarluinnassapput. Aniguiumalluta Jehovamit illersorneqartariaqarpugut. Jehovap piffissarititani nalliuppat nunarsuarmi pissutsit aqulissavai, tamannalu innuttaanut saassussinermik kinguneqassallunilu ‘naalliunnartoqangaarnerup’  immikkoortuanut kingullermut, Harmagedonimut, aallarniutaassaaq. (Matt 24:21; Ez 38:2-4) Taamaattumik Gogi ‘inuiannik katersugaasunik’ saassussissaaq. (Ez 38:10-12) Taama pisoqarpat Jehova innuttani aniguisinniarlugit ingerlaannaq akuliutissallunilu Gogimut sakkutuuinullu sorsulissaaq. Jehovap kisimi oqartussaanini ersersissallugulu atini naalannarsisissavaa. Ima oqarpoq: “Taamatut takutissavakka angingaassusera naalannassuseralu ilisaritillungalu inuiaqatigiippassuit takkuanni. Taava paasissavaat uanga tassaasunga Naalagaq [Jehova, NW].” — Ez 38:18-23.

17, 18. (a) Jehovap innuttani Gogimit saassunneqalerpata qanoq ilitsersussavai? (b) Jehovamit illersorneqarumalluta susariaqarpugut?

¹⁷ Gogi saassussilerpat Jehovap kiffani ima oqarfigissavai: “Innuttakka, ininnguassinnut toqqoritsi matuilu matullugit; toqqorsimalaarniarallaritsi Naalakkap kamannera qaangiutserlugu.” (Es 26:20) Taamanikkussamut Jehovap qanoq illersorneqarnissatsinnik ilitsersorumaarpaatigut. ‘Ininnguit’ illoqarfigisatsinni ilagiinnut attuumassuteqarunarput.

¹⁸ Annikilliornartussarsuarmi illersorneqarusukkutta Guutip ullumikkut nunarsuarmi innuttaqarnera innuttaminillu ilagiinnut aaqqissuussaatitsinera akuerisariaqarpavut. Jehovap innuttaasa akornanniittariaqarlutalu ilagiinniittunut qanittumik attaveqartariaqarpugut. Qanortoq tussiaasiortutut qamannga pisumik ima nalunaarisa: “Annassut Naalakkamit pivoq. Innuttatit pilluaqqukkit, Naalagaq.” — Tuss 3:9.