၁၊ ၂။ အေဒီ ၃၃၊ ပင်တေကုတ္တေပွဲနေ့မှာ ဘယ်အပြောင်းအလဲကို ယေဟောဝါ ပြုလုပ်ခဲ့သလဲ။ ဘယ်သူတွေက ယေဟောဝါရဲ့လူမျိုးသစ်အဝင် ဖြစ်လာသလဲ။ (ဆောင်းပါးအစမှာပါတဲ့ ရုပ်ပုံကိုကြည့်ပါ။)

ယေဟောဝါက အေဒီ ၃၃၊ ပင်တေကုတ္တေပွဲနေ့မှာ သမိုင်းတွင်မယ့် အပြောင်းအလဲတစ်ခု ပြုလုပ်ခဲ့တယ်။ “ဘုရားသခင်၏ အစ္စရေးလူမျိုး၊” တစ်နည်းအားဖြင့် ပုံဆောင်အစ္စရေးလူမျိုးဆိုတဲ့ လူမျိုးသစ်ကို ဖြစ်ပေါ်စေခဲ့တယ်။ (ဂလ. ၆:၁၆) ဒီလူမျိုးအဝင်ဖြစ်မယ့်သူတွေကို သန့်ရှင်းသောစွမ်းအားတော်နဲ့ ရွေးချယ်တယ်။ ဒီလူမျိုးသစ်မှာပါဝင်သူတွေဟာ အာဗြဟံရဲ့သားမြေးတွေလို ပကတိသဘောအရ အရေဖျားလှီးဖို့မလိုဘူး။ အဲဒီအစား သူတို့ရဲ့ ‘အရေဖျားလှီးခြင်းဟာ စွမ်းအားတော်အားဖြင့် စိတ်နှလုံးနဲ့စပ်ဆိုင်တယ်’ လို့ ပေါလုပြောတယ်။—ရော. ၂:၂၉။

^၂ ဘုရားသခင့်လူမျိုးသစ်ရဲ့ ဦးဆုံးအဖွဲ့ဝင်တွေကတော့ ဂျေရုဆလင်မြို့ အထက်ခန်းမမှာ စုရုံးခဲ့ကြတဲ့ တမန်တော်တွေနဲ့ တခြားတပည့် တစ်ရာကျော်တို့ ဖြစ်တယ်။ (တ. ၁:၁၂-၁၅) သူတို့ဟာ ဘုရားသခင့်သန့်ရှင်းသောစွမ်းအားတော် ရရှိတဲ့အခါ ဘုရားသခင့်သားတွေ ဖြစ်လာတယ်။ (ရော. ၈:၁၅၊ ၁၆; ၂ ကော. ၁:၂၁) ဒါက ခရစ်တော်ရဲ့ယဇ်ပူဇော်သကာကို ယေဟောဝါလက်ခံပြီး ပညတ်ပဋိညာဉ်ကို ပဋိညာဉ်သစ်နဲ့ အစားထိုးလိုက်တယ်ဆိုတဲ့သက်သေပဲ။ (လု. ၂၂:၂၀; ဟေဗြဲ ၉:၁၅ ကိုဖတ်ပါ။) ဒီဘိသိက်ခံတပည့်တွေဟာ ယေဟောဝါရဲ့လူမျိုးသစ်အဝင် ဖြစ်လာတယ်။ သန့်ရှင်းသောစွမ်းအားတော်ကြောင့် ဘာသာစကားများစွာကို ပြောဆိုနိုင် စွမ်း၊ နားလည်နိုင်စွမ်း၊ “ဘုရားသခင်၏ အံ့ဖွယ်အမှုများအကြောင်း” သင်ပေးနိုင်စွမ်းတွေ ရရှိလာတယ်။—တ. ၂:၁-၁၁။

၃–၅။ (က) ပင်တေကုတ္တေပွဲနေ့မှာ ဂျူးတွေကို ပေတရု ဘာပြောခဲ့သလဲ။ (ခ) အစောပိုင်းနှစ်တွေအတွင်း လူမျိုးသစ် ဘယ်လိုတိုးများလာသလဲ။

^၃ ယေဟောဝါဟာ သူ့လူမျိုးသစ်ဖြစ်တဲ့ ဘိသိက်ခံခရစ်ယာန်အသင်းတော် အဖွဲ့ဝင်တွေအဖြစ် ဂျူးနဲ့ ဘာသာပြောင်းဝင်လာသူတွေကို ဖိတ်ခေါ်ဖို့ တမန်တော်ပေတရုကို အသုံးပြုခဲ့တယ်။ ပင်တေကုတ္တေပွဲနေ့မှာ ပေတရုက ဂျူးတွေဟာ ယေရှုကိုသတ်ပစ်ခဲ့တဲ့အကြောင်း၊ အခု ယေရှုကို သူတို့ရဲ့ ‘သခင်နဲ့ ခရစ်တော်’ အဖြစ် လက်ခံဖို့လိုတယ်ဆိုတဲ့အကြောင်း သတ္တိရှိရှိ ပြောခဲ့တယ်။ လူအုပ်က ဘာလုပ်ရမလဲလို့ မေးတဲ့အခါ “နောင်တရကြလော့။ သင်တို့အပြစ်များ ခွင့်လွှတ်ခံရရန် ယေရှုခရစ်၏နာမ၌ လူတိုင်း နှစ်ခြင်းခံကြလော့။ သို့ပြုလျှင် သန့်ရှင်းသော စွမ်းအားတော်တည်းဟူသော ဆုကျေးဇူးကို ရရှိကြမည်” လို့ ပေတရု ပြန်ဖြေတယ်။ (တ. ၂:၂၂၊ ၂၃၊ ၃၆-၃၈) အဲဒီနေ့မှာ လူ ၃,၀၀၀ လောက်ဟာ ပုံဆောင်အစ္စရေးလူမျိုးသစ်ရဲ့ အဖွဲ့ဝင်တွေဖြစ်လာတယ်။ (တ. ၂:၄၁) အဲဒီနောက် တမန်တော်တွေ ဇွဲရှိရှိဆက်ဟောတဲ့အခါ နောက်ထပ်လူအများကြီး အမှန်တရားကို လက်ခံလာတယ်။ (တ. ၆:၇) ဒီလူမျိုးသစ် တိုးများလာနေတယ်။

^၄ နောက်ပိုင်းမှာ ယေရှုရဲ့တပည့်တွေက ရှမာရိလူတွေကို စတင်ဟောပြောခဲ့တယ်။ သူတို့ထဲက လူများစွာလည်း အမှန်တရားကိုလက်ခံပြီး နှစ်ခြင်းခံလာကြတယ်။ ဒါပေမဲ့ သန့်ရှင်းသောစွမ်းအားတော် ချက်ချင်း မရရှိကြဘူး။ ဒါနဲ့ ဂျေရုဆလင်မှာရှိတဲ့ အုပ်ချုပ်ရေးအဖွဲ့က ဒီရှမာရိညီအစ်ကိုညီအစ်မတွေဆီ လည်ပတ်ဖို့ ပေတရုနဲ့ ယောဟန်ကို စေလွှတ်ခဲ့တယ်။ သူတို့အပေါ်ကို ဒီတမန် တော်နှစ်ယောက် လက်တင်တဲ့အခါ “သန့်ရှင်းသောစွမ်းအားတော်ကို ရရှိကြ” တယ်။ (တ. ၈:၅၊ ၆၊ ၁၄-၁၇) ဒီနည်းနဲ့ ရှမာရိညီအစ်ကိုညီအစ်မတွေဟာ ဘိသိက်ပေးခံရပြီး ပုံဆောင်အစ္စရေးလူမျိုး အဖွဲ့ဝင်တွေဖြစ်လာတယ်။

^၅ အေဒီ ၃၆ မှာ ဘုရားသခင်က ပုံဆောင်အစ္စရေးလူမျိုးသစ်ရဲ့ အဖွဲ့ဝင်တွေအဖြစ် နောက်အုပ်စုတစ်စုကို ဖိတ်ခေါ်ဖို့ ပေတရုကို အသုံးပြုခဲ့တယ်။ ရောမတပ်မှူး ကော်နေလိနဲ့ သူ့ဆွေမျိုးသားချင်းတွေ၊ မိတ်ဆွေတွေကို ပေတရု ဟောပြောချိန်မှာ အဲဒီလိုဖြစ်ပျက်ခဲ့တယ်။ (တ. ၁၀:၂၂၊ ၂၄၊ ၃၄၊ ၃၅) “ပေတရုမြွက်ဆိုနေစဉ်ပင် တရားစကားတော်ကို ကြားနာသူအပေါင်းတို့အပေါ်သို့ သန့်ရှင်းသောစွမ်းအားတော် သက်ရောက်လေ၏။ လူမျိုးခြားတို့အပေါ်သို့လည်း သန့်ရှင်းသောစွမ်းအားတော်တည်းဟူသော ဆုကျေးဇူးကို သွန်းလောင်းသောကြောင့် ပေတရုနှင့်အတူ လိုက်လာကြသော အရေဖျားလှီးခြင်းကိုခံရသည့် သစ္စာရှိသူတို့သည် အံ့သြကြ၏” လို့ ကျမ်းစာမှာဖော်ပြထားတယ်။ (တ. ၁၀:၄၄၊ ၄၅) အဲဒီအချိန်ကစပြီး အရေဖျားမလှီးတဲ့ လူမျိုးခြားတွေဟာ ပုံဆောင်အစ္စရေးလူမျိုးအဝင် ဖြစ်လာတယ်။

၆၊ ၇။ လူမျိုးသစ်ရဲ့အဖွဲ့ဝင်တွေဟာ ယေဟောဝါရဲ့နာမည်အတွက် လူမျိုးတစ်မျိုးအနေနဲ့ ဘာလုပ်ဆောင်ခဲ့ကြသလဲ။

^၆ အေဒီ ၄၉၊ အုပ်ချုပ်ရေးအဖွဲ့အစည်းအဝေးမှာ တပည့်တော်ယာကုပ် အခုလိုပြောတယ်– “ဘုရားသခင်သည် မိမိ၏နာမတော်အတွက် လူမျိုးခြားတို့ထဲမှ လူတစ်မျိုးကို နုတ်ယူရန် ထိုသူတို့ထံ ဦးဆုံးအကြိမ် အာရုံလှည့်လာတော်မူကြောင်း ရှုမောင် [ပေတရု] အသေးစိတ် ပြောပြခဲ့ပြီ။” (တ. ၁၅:၁၄) ‘မိမိနာမတော်အတွက် လူမျိုး’ သစ်ထဲမှာ ဂျူးခရစ်ယာန်နဲ့ လူမျိုးခြားခရစ်ယာန်တွေ ပါဝင်တယ်။ (ရော. ၁၁:၂၅၊ ၂၆) နောက်ပိုင်းမှာ ပေတရုက “သင်တို့သည် တစ်ချိန်က ထိုလူစုအဝင် မဟုတ်။ ယခုမူကား ဘုရားသခင်၏လူမျိုးဖြစ်ကြ၏” လို့ ရေးခဲ့တယ်။ ဒီလူမျိုးသစ်ရဲ့ ရည်ရွယ်ချက်ကိုလည်း အခုလိုရှင်းပြတယ်– “သင်တို့မူကား မှောင်မိုက်မှ အံ့ဖွယ်အလင်းသို့ ခေါ်တော်မူသောအရှင်၏ ‘မွန်မြတ်သောဂုဏ်ရည်တော်များကို အနှံ့အပြားဟောပြောရန် ရွေးချယ်ခံရသောအမျိုး၊ တော်ဝင်ယဇ်ပုရောဟိတ်အဖွဲ့၊ သန့်ရှင်းသောလူမျိုး၊ အထူးပိုင်ဆိုင်ရာလူစု ဖြစ်ကြ၏။’” (၁ ပေ. ၂:၉၊ ၁၀) သူတို့က ယေဟောဝါအကြောင်း သတ္တိရှိရှိသက်သေခံရမယ်၊ ကိုယ်တော့်ကို စကြဝဠာအချုပ်အခြာအာဏာရှင်အဖြစ် လူသိရှင်ကြား ချီးမွမ်းရမယ်။

^၇ အခု ယေဟောဝါက ပုံဆောင်အစ္စရေးလူမျိုးသစ်ကို အသုံးပြုနိုင်ပြီ၊ ‘ငါ့ကိုချီးမွမ်းနိုင်ဖို့ ငါပုံသွင်းခဲ့သူတွေဖြစ်တယ်’ လို့ ပြောနိုင်ပြီ။ (ဟေရှာ. ၄၃:၂၁၊ ကဘ) သူတို့က ယေဟောဝါဟာ တစ်ဆူတည်းသောဘုရားမှန်ဖြစ်ပြီး တခြားဘုရားအားလုံး မှားတယ်ဆိုတာ လူတွေကို သတ္တိရှိရှိပြောပြကြတယ်။ (၁ သက်. ၁:၉) “ဂျေရုဆလင်မြို့၊ ယုဒပြည်တစ်ဝန်းလုံး၊ ရှမာရိပြည်၊ မြေကြီးစွန်းတိုင်အောင်” ယေဟောဝါနဲ့ ယေရှုအကြောင်း သက်သေခံကြတယ်။—တ. ၁:၈; ကော. ၁:၂၃။

၈။ ပထမရာစုမှာရှိတဲ့ ဘုရားသခင့်လူမျိုးကို တမန်တော်ပေါလု ဘယ်လိုသတိပေးခဲ့သလဲ။

^၈ ယေဟောဝါအကြောင်း ရဲရဲရင့်ရင့်သက်သေခံခဲ့သူ နောက်တစ်ယောက်ကတော့ တမန်တော်ပေါလုပဲ။ အယူမှားအတွေးအခေါ်ပညာရှင်တွေနဲ့ စကားပြောချိန်မှာတောင် ကိုယ်တော့်ကို တစ်ဆူတည်းသောဘုရားမှန်အဖြစ် ထောက်ခံပြောဆိုခဲ့တယ်။ ယေဟောဝါဟာ “လောကနှင့် လောက၌ရှိသမျှကို ဖန်ဆင်း” တဲ့အရှင်၊ “ကောင်းကင်နှင့်မြေကြီး ပိုင်သရှင်” ဖြစ်တယ်ဆိုပြီး ပေါလု ပြောတယ်။ (တ. ၁၇:၁၈၊ ၂၃-၂၅) တတိယသာသနာပြုခရီးစဉ် အဆုံးပိုင်းမှာ အသင်းတော်ကို ပေါလု အခုလိုသတိပေးတယ်– “ငါမရှိသည့်နောက် ကြမ်းကြုတ်သော ဝံပုလွေများသည် သင်တို့ထံလာ၍ သိုးများအား မညှာမတာ ပြုမူဆက်ဆံမည်ကို ငါသိ၏။ တပည့်တော်တို့ကို မိမိတို့နောက် ဆွဲဆောင်ရန် မှားယွင်းသော သွန်သင်ချက်များကို ဟောပြောသူများလည်း သင်တို့အထဲမှ ပေါ်လာလိမ့်မည်။” (တ. ၂၀:၂၉၊ ၃၀) ကြိုဟောထားတဲ့အတိုင်း ပထမရာစုအဆုံးပိုင်းမှာ အယူဖောက်ပြန်မှု ပေါ်ပေါက်လာတယ်။—၁ ယော. ၂:၁၈၊ ၁၉။

၉။ တမန်တော်တွေ သေဆုံးပြီးနောက် ဘုရားသခင့်လူတွေ ဘယ်လိုဖြစ်သွားသလဲ။

 ^၉ တမန်တော်တွေ သေဆုံးပြီးနောက် အယူဖောက်ပြန်မှု ပေါ်ပေါက်လာပြီး ခရစ်ယာန်ဘောင်ချာ့ခ်ျ ဖြစ်ပေါ်လာတယ်။ ဒီမှားယွင်းတဲ့ခရစ်ယာန်တွေဟာ ယေဟောဝါရဲ့နာမည်အတွက် လူမျိုးတစ်မျိုးဖြစ်မယ့်အစား ဘုရားသခင့်နာမည်ကို ဘာသာပြန်ကျမ်းတွေထဲကနေ ထုတ်ပစ်ကြတယ်။ တခြားနည်းလမ်းများစွာနဲ့လည်း ဘုရားသခင်ကို ရှုတ်ချကြတယ်။ အယူမှားထုံးစံတွေနောက်လိုက်ပြီး ကျမ်းစာမှာမပါတဲ့ အယူဝါဒတွေကို သွန်သင်ပေးကြတယ်။ သန့်ရှင်းတဲ့စစ်ပွဲလို့ခေါ်တဲ့ စစ်ပွဲတွေဆင်နွှဲပြီး ဘုရားသခင်အတွက် တိုက်ခိုက်နေတယ်လို့တောင် ကြွေးကြော်ကြတယ်။ လိင်အကျင့်ယိုယွင်းကြတယ်။ အယူဖောက်ပြန်မှုဖြစ်ပေါ်ပြီးနောက် နှစ်ပေါင်းရာနဲ့ချီအတွင်း မြေကြီးပေါ်မှာ ယေဟောဝါကို သစ္စာရှိရှိဝတ်ပြုသူ အနည်းငယ်ပဲ ရှိခဲ့တယ်။ ‘မိမိနာမတော်အတွက်’ စနစ်တကျဖွဲ့စည်းထားတဲ့လူမျိုး မရှိဘူး။

၁၀၊ ၁၁။ (က) ဂျုံစပါးနဲ့ ပေါင်းပင်အကြောင်း ယေရှု ဘာကြိုဟောခဲ့သလဲ။ (ခ) ၁၉၁၄ မှာ ယေရှုရဲ့ပုံဥပမာ ဘယ်လိုပြည့်စုံခဲ့သလဲ။

^၁၀ အယူဖောက်ပြန်မှုကြောင့် စစ်မှန်တဲ့ဘာသာကို ခွဲခြားရခက်မယ်ဆိုတာ ကြိုဟောဖို့ ဂျုံစပါးနဲ့ ပေါင်းပင်ပုံဥပမာကို ယေရှု ပြောခဲ့တယ်။ မာရ်နတ်က ‘လူတွေအိပ်ပျော်နေတုန်း’ လူသားကြဲထားတဲ့ ဂျုံစပါးခင်းထဲမှာ ပေါင်းမျိုးစေ့တွေ ကြဲသွားတယ်။ ဂျုံနဲ့ ပေါင်းပင်တွေဟာ “လောကစနစ်နိဂုံးပိုင်း” အထိ အတူကြီးထွားလာတယ်။ “ကောင်းသောမျိုးစေ့” ဟာ “နိုင်ငံတော်သားများ” ဖြစ်ပြီး “ပေါင်းမျိုးစေ့” ဟာ “ဆိုးညစ်သူ၏သားများ” ဖြစ်တယ်လို့ ယေရှု ရှင်းပြတယ်။ ဆုံးခန်းကာလအတွင်း လူသားဟာ ကောင်းကင်တမန်တွေကို လွှတ်ပြီး ဂျုံပင်နဲ့ပေါင်းပင်တွေကို ခွဲခြားလိမ့်မယ်။ အဲဒီနောက် ကောင်းကင်တမန်တွေက နိုင်ငံတော်သားတွေကို စုသိမ်းလိမ့်မယ်။ (မ. ၁၃:၂၄-၃၀၊ ၃၆-၄၃) အဲဒါဘယ်လိုဖြစ်ခဲ့သလဲ။ အဲဒါက မြေကြီးပေါ်မှာ စနစ်တကျဖွဲ့စည်းထားတဲ့ ဝတ်ပြုသူအုပ်စုတစ်စု ပြန်ရှိလာဖို့ ဘယ်လိုကူညီပေးခဲ့သလဲ။

^၁၁ ၁၉၁၄ မှာ “လောကစနစ်နိဂုံးပိုင်း” အစပြုတယ်။ အဲဒီတုန်းက မြေကြီးပေါ်မှာ ဘိသိက်ခံခရစ်ယာန် ထောင်ဂဏန်းလောက်ပဲ ရှိတယ်။ အဲဒီနှစ်မှာစတင်တဲ့ စစ်ပွဲအတွင်း “နိုင်ငံတော်သား” တွေဖြစ်တဲ့ ဒီဘိသိက်ခံတွေဟာ မဟာဗာဗုလုန်ရဲ့ ချုပ်နှောင်မှုအောက်မှာ ရှိနေတုန်းပဲ။ ၁၉၁၉ မှာတော့ အဲဒီချုပ်နှောင်မှုအောက်ကနေ သူတို့ကို ယေဟောဝါ လွတ်မြောက်စေခဲ့ပြီး ဒီခရစ်ယာန်စစ်တွေနဲ့ ခရစ်ယာန်အတုအယောင်တွေရဲ့ ကွာခြားမှု သိပ်ထင်ရှားလာတယ်။ ဘုရားသခင်က “နိုင်ငံတော်သား” တွေကို စနစ်တကျဖွဲ့စည်းထားတဲ့ လူမျိုးအဖြစ် စုသိမ်းခဲ့တယ်။ အဲဒါကို ပရောဖက်ဟေရှာယ အခုလိုကြိုဟောထားတယ်– ‘တိုင်းပြည်တစ်ပြည်ကို တစ်နေ့တည်းမှာ မွေးဖွားနိုင်သလား။ လူမျိုးတစ်မျိုးကိုလည်း တစ်ပြိုင်နက် မွေးဖွားနိုင်သလား။ ဒါပေမဲ့ ဇိအုန်ကတော့ သားဖွားဝေဒနာခံရတာနဲ့တစ်ပြိုင်နက် သားတွေကို မွေးဖွားလိုက်ပြီ။’ (ဟေရှာ. ၆၆:၈၊ ကဘ) အဲဒီကျမ်းချက်မှာပါတဲ့ ဇိအုန်ဟာ နာမ်ဝိညာဉ်ပုဂ္ဂိုလ်တွေနဲ့ ဖွဲ့စည်းထားတဲ့ ယေဟောဝါရဲ့အဖွဲ့အစည်းဖြစ်တယ်။ ဇိအုန်က မြေကြီးပေါ်မှာ ဘိသိက်ခံသားတွေကို မွေးဖွားပြီး လူမျိုးတစ်မျိုးအဖြစ် ဖွဲ့စည်းခဲ့တယ်။

၁၂။ ဘိသိက်ခံတွေဟာ ဘယ်နည်းနဲ့ ယေဟောဝါရဲ့နာမည်အတွက် လူမျိုးတစ်မျိုးဖြစ်သလဲ။

 ^၁၂ ပထမရာစုခရစ်ယာန်တွေလိုပဲ “နိုင်ငံတော်သား” တွေဖြစ်တဲ့ ဒီနေ့ခေတ် ဘိသိက်ခံတွေဟာလည်း ယေဟောဝါရဲ့သက်သေတွေဖြစ်တယ်။ (ဟေရှာယ ၄၃:၁၊ ၁၀၊ ၁၁ ကိုဖတ်ပါ။) သူတို့ဟာ ခရစ်ယာန်အမူအကျင့်ကောင်းကြောင့်၊ “လူမျိုးအပေါင်းတို့အတွက် သက်သေ” အဖြစ် နိုင်ငံတော်သတင်းကောင်း ဟောပြောတဲ့အတွက်ကြောင့် တခြားသူတွေနဲ့ ကွာခြားတယ်ဆိုတာ သိပ်ထင်ရှားတယ်။ (မ. ၂၄:၁၄; ဖိ. ၂:၁၅) ဒီနည်းနဲ့ လူသန်းပေါင်းများစွာကို ယေဟောဝါနဲ့ ဆက်ဆံရေးကောင်းရှိလာအောင် ကူညီပေးနေကြတယ်။—ဒံယေလ ၁၂:၃ ကိုဖတ်ပါ။

၁၃၊ ၁၄။ ဘိသိက်ခံမဟုတ်သူတွေဟာ သူတို့ရဲ့ဝတ်ပြုရေးကို ယေဟောဝါ လက်ခံနိုင်ဖို့ ဘာလုပ်ရမလဲ။ ဒါကို ကျမ်းစာမှာ ဘယ်လိုကြိုဟောထားသလဲ။

^၁၃ ရှေးအစ္စရေးခေတ်တုန်းက လူမျိုးခြားတွေ ယေဟောဝါရဲ့လူမျိုးနဲ့ ပူးပေါင်းပြီး ဝတ်ပြုတဲ့အခါ ကိုယ်တော်လက်ခံတယ်ဆိုတာ ရှေ့ဆောင်းပါးမှာ သိခဲ့ရတယ်။ (၃ ရာ. ၈:၄၁-၄၃) ဒီနေ့ခေတ်မှာလည်း ဘိသိက်ခံမဟုတ်သူတွေဟာ သူတို့ရဲ့ဝတ်ပြုရေးကို ယေဟောဝါ လက်ခံနိုင်ဖို့ ဘိသိက်ခံတွေနဲ့ ပူးပေါင်းရမယ်။

^၁၄ ဒီဆုံးခန်းကာလမှာ လူများစွာဟာ ယေဟောဝါရဲ့လူမျိုးနဲ့အတူ ကိုယ်တော့်ကိုဝတ်ပြုမယ်လို့ ရှေးကတည်းက ပရောဖက်တွေ ကြိုဟောထားတယ်။ ဟေရှာယ အခုလိုကြိုဟောတယ်– ‘လူအများက “လာကြ။ ယေဟောဝါရဲ့တောင်ပေါ်ကို၊ ယာကုပ်ရဲ့ဘုရားသခင့်အိမ်တော်ကို တက်သွားကြစို့။ ကိုယ်တော်က သူ့နည်းလမ်းတွေအကြောင်း ငါတို့ကို သွန်သင်ပေးလိမ့်မယ်။ ကိုယ်တော့်လမ်းစဉ်တွေအတိုင်း ငါတို့လျှောက်လှမ်းကြမယ်” လို့ လမ်းသွားရင်းပြောကြလိမ့်မယ်။ ပညတ်တရားက ဇိအုန်ကနေ၊ ယေဟောဝါရဲ့စကားက ဂျေရုဆလင်ကနေ ထွက်လာလိမ့်မယ်။’ (ဟေရှာ. ၂:၂၊ ၃၊ ကဘ) ဇာခရိကလည်း ‘လူအမြောက်အမြားနဲ့ အားကြီးတဲ့လူမျိုးတွေဟာ ဗိုလ်ခြေတို့ရဲ့အရှင်ယေဟောဝါကိုရှာဖို့၊ ယေဟောဝါရဲ့မျက်နှာသာကို တောင်းခံဖို့ ဂျေရုဆလင်ကို လာကြလိမ့်မယ်’ လို့ ကြိုဟောတယ်။ အဲဒီအုပ်စုဟာ ‘ဘာသာစကားအသီးသီးကိုပြောတဲ့ လူမျိုးတွေထဲက’ ထွက်လာမှာဖြစ်တယ်။ သူတို့ဟာ ပုံဆောင်အစ္စရေးလူမျိုးနဲ့အတူ ဘုရားသခင်ကိုဝတ်ပြုပြီး ‘ခင်ဗျားနဲ့အတူ ဘုရားသခင်ရှိတယ်လို့ ကြားတဲ့အတွက် ခင်ဗျားနဲ့အတူ ကျွန်တော်တို့လည်း လိုက်ချင်ပါတယ်’ လို့ ပြောကြတယ်။—ဇာ. ၈:၂၀-၂၃၊ ကဘ။

၁၅။ “အခြားသိုး” တွေ ပုံဆောင်အစ္စရေးတွေနဲ့အတူ လိုက်တယ်ဆိုတာ ဘာကိုဆိုလိုသလဲ။

^၁၅ “အခြားသိုး” တွေဟာ နိုင်ငံတော်သတင်းကောင်း ဟောပြောခြင်းအားဖြင့် ပုံဆောင်အစ္စရေးတွေနဲ့အတူ ‘လိုက်’ ကြတယ်။ (မာ. ၁၃:၁၀) ဘုရားသခင့်လူမျိုးအဝင် ဖြစ်လာကြတယ်။ သူတို့နဲ့ ဘိသိက်ခံတွေဟာ “သိုးထိန်းကောင်း” ယေရှုခရစ် လက်အောက်မှာရှိတဲ့ “သိုးအုပ်တစ်အုပ်” ဖြစ်လာတယ်။—ယောဟန် ၁၀:၁၄–၁၆ ကိုဖတ်ပါ။

၁၆။ အာမဂေဒုန်ကိုဦးတည်စေမယ့် ဘယ်အရာကို ယေဟောဝါ လုပ်ဆောင်မလဲ။

^၁၆ မဟာဗာဗုလုန် ဖျက်ဆီးခံရပြီးနောက် ဘုရားသခင့်လူမျိုးဟာ မီးကုန်ယမ်းကုန် တိုက်ခိုက်ခံရလိမ့်မယ်။ ဒီတိုက်ခိုက်မှုက “ကြီးစွာသောဒုက္ခ” ရဲ့နောက်ဆုံးပိုင်းဖြစ်တဲ့ အာမဂေဒုန်ကို အစပျိုးပေးလိမ့်မယ်။ အဲဒီလိုဖြစ်လာအောင် ယေဟောဝါဟာ ကိစ္စရပ်တွေကို သတ် မှတ်ထားတဲ့အချိန်မှာ ညွှန်ကြားမှာဖြစ်တယ်။ အဲဒီအချိန်မှာ ကျွန်တော်တို့ဟာ ယေဟောဝါရဲ့ကာကွယ်မှုအောက် ရှိနေဖို့လိုတယ်။ (မ. ၂၄:၂၁; ယေဇ. ၃၈:၂-၄) ဂေါဂက ‘လူမျိုးတွေထဲကနေ ပြန်စုသိမ်းခံရသူတွေကို’ တိုက်ခိုက်ပါလိမ့်မယ်။ (ယေဇ. ၃၈:၁၀-၁၂၊ ကဘ) အဲဒီလိုဖြစ်လာချိန်မှာ ယေဟောဝါက သူ့လူတွေကို ကယ်တင်ဖို့၊ ဂေါဂနဲ့ သူ့စစ်တပ်ကို တိုက်ခိုက်ဖို့ ချက်ချင်းလုပ်ဆောင်ပါလိမ့်မယ်။ မိမိရဲ့အချုပ်အခြာအာဏာကို ထင်ရှားစေပြီး နာမည်ကို သန့်ရှင်းမြင့်မြတ်စေပါလိမ့်မယ်။ ‘ငါက လူမျိုးအများကြီးရှေ့မှာ ငါ့ကိုယ်ငါချီးမြှောက်မယ်။ ငါ့ကိုယ်ငါသန့်ရှင်းမြင့်မြတ်စေပြီး ငါ့အကြောင်းကို သိစေမယ်။ ငါဟာ ယေဟောဝါဖြစ်တယ်ဆိုတာ သူတို့သိရလိမ့်မယ်’ လို့ ကိုယ်တော်ပြောတယ်။—ယေဇ. ၃၈:၁၈-၂၃၊ ကဘ။

၁၇၊ ၁၈။ (က) ယေဟောဝါရဲ့လူမျိုးကို ဂေါဂတိုက်ခိုက်ချိန်မှာ ယေဟောဝါ ဘယ်ညွှန်ကြားချက်တွေ ပေးမလဲ။ (ခ) ယေဟောဝါရဲ့ကာကွယ်မှုရချင်ရင် ဘာလုပ်ရမလဲ။

^၁၇ ဂေါဂ စတင်တိုက်ခိုက်ချိန်မှာ မိမိလူမျိုးကို ယေဟောဝါ ဒီလိုပြောလိမ့်မယ်– ‘ငါ့လူတို့၊ သွားပါ။ အတွင်းခန်းတွေထဲ ဝင်ပြီး တံခါးကိုပိတ်ထားကြပါ။ ဒေါသပြေသွားချိန်အထိ ခဏလေး ပုန်းရှောင်နေကြပါ။’ (ဟေရှာ. ၂၆:၂၀၊ ကဘ) အဲဒီအချိန်အတွင်းမှာ ကာကွယ်ခံရဖို့ ဘာလုပ်ရမယ်ဆိုတဲ့ ညွှန်ကြားချက်တွေကို ယေဟောဝါပေးလိမ့်မယ်။ ‘အတွင်းခန်းတွေ’ ဟာ ဒေသခံအသင်းတော်တွေနဲ့ ဆက်စပ်မှုရှိနိုင်တယ်။

^၁၈ ကြီးစွာသောဒုက္ခအတွင်း ကာကွယ်မှုရချင်တယ်ဆိုရင် မြေကြီးပေါ်မှာ ဘုရားသခင့်လူမျိုးတစ်မျိုးရှိပြီး အဲဒီလူမျိုးကို အသင်းတော်တွေအဖြစ် ဖွဲ့စည်းထားတယ်ဆိုတာ အသိအမှတ်ပြုလက်ခံရမယ်။ ယေဟောဝါရဲ့လူမျိုးဘက်မှာ ဆက်ရပ်တည်ပြီး ဒေသခံအသင်းတော်နဲ့ နီးနီးကပ်ကပ် ပူးပေါင်းရမယ်။ ‘ကယ်တင်ခြင်းကို ယေဟောဝါပိုင်တယ်။ ကိုယ်တော့်လူတွေအပေါ် ကိုယ်တော့်ကောင်းချီး သက်ရောက်နေတယ်’ လို့ သီဆိုခဲ့တဲ့ ဆာလံဆရာလို ကျွန်တော်တို့အားလုံး စိတ်နှလုံးအကြွင်းမဲ့ ပြောနိုင်ကြပါစေ။—ဆာ. ၃:၈၊ ကဘ။