1. Jesuh cu zeicah “Thiang Thlarau nih lawmhnak in a khahter”? (A hramthawknak hmanthlak zoh.)

“JESUH cu Thiang Thlarau nih lawmhnak in a khahter” lioah zeitindah a um lai khi na mitthlam ah cuanter hmanh. A mithmai a panh tuk lai i a lung a tho tuk lai. Zeicah? Mah hlan deuhte ah a zultu 70 * kha Pathian Pennak kong thawngṭha chim awkah a thlah hna. Thawngṭha a ralchanhmi, nawl a ngeimi ral tampi an um caah a zultu hna nih an rian zeitindah an ṭuan lai ti kha Jesuh nih hngalh a duh tuk. Mah ral hna lakah fimthiamnak a ngeimi phungbia cawnpiaktu le Farasi mi an i tel. Annih nih Jesuh cu lehtama men a si i a zultu hna cu “fimthiamnak zeihmanh a ngei lomi, mi sawhsawh menmen” an si tiah mi kha ruahter an duh hna. (Lam. 4:13; Mar. 6:3) Asinain zultu hna cu phungchimnak in lunglawm thanuam ngaiin an rak kir. Annih cu khuachia ralchanhnak le a dang ralchanhnak an tong ko nain phung an chim. Lunglawm tein le ralṭha tein zeicah an um khawh peng?—Luka 10:1, 17-21 rel.

2. (a) Jesuh zultu hna cu zeitindah ngakchia bantuk an si? (b) A thukmi Baibal biatak hngalhthiam awkah Jesuh zultu hna kha zeinihdah a bawmh hna?

 ² Jesuh nih Jehovah kha hitin a ti: ‘Van le vawlei Uktu a simi ka Pa, mah kong hi mifim le mithiam hna sinin na thuh nain ngakchia sinah na langhter caah nangmah cu kaan thangṭhat. A si, ka Pa, mah cu na duhmi a si.’ (Matt. 11:25, 26, NW) Jesuh nih a zultu hna kha zeicah ngakchia tiah a auh hna? Fimnak ṭha tein a cawng i anmahle anmah mifim tiah aa ruatmi phungbia cawnpiaktu le Farasi mi hna he i lo loin Jesuh zultu hna cu ngakchia bantukin cawnpiak an duh caah a si. Annih nih aa porhlawmi si loin aa toidormi si awkah an cawn. (Matt. 18:1-4) An i toidor caah Jehovah nih a thukmi Baibal biatak hngalhthiam awkah thiang thlarau in a bawmh hna. Aa porhlawmi Judah biaknaklei hruaitu hna tu cu Satan le an i porhlawtnak nih an lungmit a cawtter hna.

3. Hi capar ah zei kong dah kan i ruah hna lai?

³ Jesuh aa lawmh tukmi cu khuaruahhar awk a si lo. An fimthiamnak cu zeitin a si hmanhah aa toidormi hna kha a thukmi Baibal biatak hngalhthiam awkah Jehovah nih a bawmh hna caah Jesuh cu aa lawm. A fiangmi le hngalh a fawimi lam in cawnpiak kha Pathian nih a duh. Pathian cu aa thleng bal lomi a si. Cutin cawnpiak a duh rih kha zeitindah a langhter? Tuchan ah Jehovah nih aa toidormi hna kha a thukmi Baibal biatak hngalhthiam awkah a bawmh hna ning kha hi capar ah kan i ruah hna lai.

4. Hngalh a fawimi Vennak Innsang cu zeiti lam in dah laksawng a si?

⁴ Nai kum hrawngah Pathian bupi nih a fiangmi le hngalh a fawimi lam in cawnpiak a biapit kha an langhter khun. Tahchunhnak pathum i ruah hna u sih. Pakhatnak, hngalh a fawimi Vennak Innsang cauk chuah a si. * Mah cu carel aa harhmi asiloah hngalhthiam aa harhmi hna telin mi tampi caah laksawng a si. Hngalh a fawimi cauk thawngin an fale nih Vennak Innsang ṭha deuh in an hngalhthiam kha nulepa tampi nih an hmuh. Mi tampi nih lawmhnak ca an ṭial. Unaunu pakhat nih Vennak Innsang Cawnnak ah a phi pek kha ka rak ṭih nain atu cu ka ṭih ti lo tiah a ti. Hitin ca a ṭial: “Atu ah cun ṭihnak ka ngei ti lo i voikhatnak tam a phi ka pek khawh cang. Jehovah le nan cungah kaa lawm tuk.”

5. Remh ṭhanmi Vawlei Thar Lehnak Baibal in hmuhmi ṭhathnemhnak cheukhat cu zeidah an si?

⁵ Pahnihnak, 2013, October 5 ah tuahmi rian kong meeting ah remh ṭhanmi Vawlei Thar Lehnak Baibal kha Mirang holh in chuah a si. * Mah Baibal ah cacang  tampi cu cafang tlawm deuh in ṭial a si, asinain a sullam cu aa thleng lo i hngalhthiam awkah a fawi deuh. Tahchunhnak ah, Job 10:1 ah cafang 27 a rak um nain atu cu 19 lawng a um cang. Phungthlukbia 8:6 ah cafang 20 a rak um nain atu cu 13 lawng a um cang. Cun mah cacang pahnih cu hngalhthiam awk zongah a fawi deuh. Kum tampi chung Jehovah cungah zumhfek tein a ummi chiti thuhmi unaupa pakhat nih hitin a chim: “Atu lawngah Job cauk kha a voikhatnak ka hngalhthiam tiah ka ruah.” A dang unau tampi zong nih cu bantuk bia an chim ve.

6. Matthai 24:45-47 kan hngalhthiam ning thlenmi he aa tlaiin zeitindah na um?

⁶ Pathumnak, nai ah Baibal cacang cheukhat kan hngalhthiam ning thlenmi kha ruathmanh. Tahchunhnak ah, 2013, July 15, Vennak Innsang ah “zumhawk a tlakmi le a fimmi sal” he aa tlaiin kan hngalhthiam ning thlenmi kong aa ṭial. (Matt. 24:45-47) Mah capar nih zumhawktlak sal cu Uktu Bu a si tiah a fianter. “Sal hawi” cu zumhawktlak sal nih rawl a pekmi chiti thuhmi le “tuudang” an si tiah a fianter. (Johan 10:16) Mah kong kan hngalh caah kan i lawm i midang zong lunglawm tein kan cawnpiak hna. Jehovah nih a fiangmi le hngalh a fawimi lam in cawnpiak a duh kha zeitindah a langhter rih?

7, 8. Hmailei ah a um hngami a ngan deuhmi thil a aiawhmi Baibal tuanbia cheukhat cu zeidah an si?

⁷ Kum tampi chung Jehovah a bia cangmi na si ahcun kan cauk pawl nih Baibal tuanbia cheukhat an fianter ning aa thlenmi kha na hmuh ko lai. Hlanah cun Baibal tuanbia cheukhat nih hmailei ah a cang hngami a ngan deuhmi thil kha a aiawh tiah a fianter lengmang. Cutin Baibal tuanbia fianter awk a sinak a ruang ṭha a um maw? A um ko. Tahchunhnak ah, Jesuh nih “profet Jonah khuaruahharnak” kong a rak chim. (Matthai 12:39, 40 rel.) Ngapi paw chungah Jonah a um caan nih thlan chungah a um lai caan kha a aiawh tiah Jesuh nih a fianter.

⁸ Hmailei ah a um hngami a ngan deuhmi thil a aiawhmi a dang Baibal tuanbia pawl a um rih. Mah lak i tampi kha lamkaltu Paul nih a rak chim. Tahchunhnak ah, Abraham le Hagar an i pehtlaihnak nih Jehovah le Israel miphun an i pehtlaihnak kha a aiawh. Abraham le Sarah an i pehtlaihnak nih Jehovah le vancung Pathian bupi an i pehtlaihnak kha a aiawh. (Gal. 4:22-26) Cu bantukin puan thlam, biakinn, Remnak Ni, tlangbawi ngan le Nawlbia chung i a dangdang hna cu “a ra dingmi thil ṭha muithlam ceo a rak si.” (Heb. 9:23-25; 10:1) Mah Baibal tuanbia hna le an aiawhmi kong kan hlathlai tikah kan zumhnak a fek chin. Asinain mah cu Baibal ah ṭialmi mi kip, thil sining kip le thil kip nih mi pakhatkhat asiloah thil  pakhatkhat kha an aiawh peng tinak a si maw?

9. Hlanah Naboth kong Baibal tuanbia cu zeitindah fianter a si?

⁹ Hlanah cun Baibal tuanbia cheukhat chung i mi kip, thil sining kip le thil kip nih mi pakhatkhat asiloah thil pakhatkhat kha an aiawh tiah kan cauk pawl nih a fianter lengmang. Tahchunhnak ah, Siangpahrang nu ṭhalo Jezebel nih Naboth kha a thahter hna, mah cu a vapa Ahab nih Naboth mitsur dum a lak khawh nakhnga caah a si. (1 Si. 21:1-16) 1932, Vennak Innsang nih Ahab le Jezebel nih Satan le a bupi kha a aiawh, Naboth nih Jesuh kha a aiawh, Naboth thah a simi nih Jesuh thah a simi kha a aiawh tiah a fianter. Asinain 1961 ah chuahmi “Na Min Cu Thianter Si Ko Seh” timi cauk nih Naboth nih chiti thuhmi kha a aiawh hna i Jezebel nih Khrihfaram kha a aiawh hna tiah a fianter. Cun Jezebel nih Naboth a hremmi nih donghnak caan ah chiti thuhmi pawl hrem an simi kha a aiawh tiah a fianter chap. Mah fianternak hna nih kum tampi chung Pathian miphun kha an zumhnak a fehter hna. Cu a si ah atu ah mah Baibal tuanbia fianter ning cu zeicah aa dan?

10. (a) Zumhawktlak sal nih Baibal tuanbia cheukhat an fianter tikah zeitindah an i ralrin? (b) Atu ah kan cauk hna nih zei kong dah a bikin a fianter?

¹⁰ Jehovah nih “zumhawk a tlakmi le a fimmi sal” kha fim chinchin awkah a bawmh hna. Zeiti lam in dah? Atu ah  cun zumhawktlak sal nih Baibal tuanbia pakhat nih a ngan deuhmi thil a aiawh timi a fiangmi Baibal a ruang a um tik lawngah cutin fianter awkah an i ralring. Hlanlio fianternak cheukhat cu hngalhthiam awk, cinken awk le zulh awkah a har. A poi bikmi cu, Baibal tuanbia hna nih zeidah an aiawh khawh men timi kha biapi tuk ah kan chiah tikah kan i cawn khawhmi le fimnak kan i lak khawhmi kong cu a tlau. Cucaah atu ah cun kan cauk hna nih Baibal tuanbia in kan cawn khawhmi zumhnak, inkhawhnak, lungthin dihlak in Pathian biaknak le a dang sining ṭha hna tu kha hngalh a fawimi lam in a bikin an fianter cang. *

11. (a) Atu ah Naboth kong kha zeitindah kan hngalhthiam, Naboth kong nih zeitindah a kan bawmh? (b) Nai kum hrawngah kan cauk hna nih Baibal tuanbia pakhat nih hmailei ah a um hngami a ngan deuhmi thil a aiawh tiah zeicah a chim setsai ti lo? (Hi cauk chung i “Careltu Hna Sinin Biahalnak” timi kha zoh.)

¹¹ Atu ah cun Naboth kong kha fiang tein kan hngalhthiam cang. Naboth cu Jesuh asiloah chiti thuhmi kha a aiawh hna caah a thihmi a si lo. Pathian cung zumhawktlak tein um awk bia a khiah ca tu ah a thihmi a si. A ṭhawngmi uktu i a fakmi hremnak a tong ko nain Jehovah Nawlbia kha a zulh peng. (Nam. 36:7; 1 Si. 21:3) Anih cu cu bantuk hremnak a tong vemi tuchan Pathian salle dihlak caah zohchunhawk ṭha taktak a si. (2 Timote 3:12 rel.) Khrihfa dihlak nih zumhnak a fehtermi mah fianternak kha an hngalhthiam khawh, an i cinken khawh i an zulh khawh.

12. (a) Baibal tuanbia hna he aa tlaiin zeitindah kan ti awk a si lo? (b) A thukmi kong hmanh kha fiang tein zeicah kan hngalh khawh? (A tanglei fianternak zoh.)

¹² Baibal tuanbia ah kan i cawn khawhmi lawng a um i mah cu a dang sullam a ngei ti lo tiah ti awk a si maw? A si lo. Asinain atu ah cun kan cauk pawl nih Baibal tuanbia cheukhat nih zeidah an aiawh timi kong fianter loin Baibal tuanbia pakhat le pakhat an i pehtlaih ning tu kha a bikin a fianter cang. Tahchunhnak ah, hremnak le thihnak a ton buin Naboth zumhfek tein a ummi nih Khrih le chiti thuhmi hna i an zumhfehnak kha a kan hngalhter ṭhan. Mah lengah “tuudang” lak i mi tampi an zumhfehnak zong a kan hngalhter ṭhan. Jehovah nih hngalh a fawimi lam in a kan cawnpiak ti cu a fiang ko. *

13. Atu ah Jesuh chimmi bianabia cheukhat kha a fiangmi le hngalh a fawimi lam in fianter a si cang ti kha zei tahchunhnak hna nih dah a langhter?

¹³ Jesuh Khrih cu a nung balmi lakah a lianngan bikmi Cawnpiaktu a si. Cawnpiaknak ah bianabia asiloah tahchunhnak hman a duh. (Matt. 13:34) Bianabia nih hngalh awkah a harmi kong kha hngalh a fawimi lam in a fianter, mah nih khua a kan ruahter khawh i kan lung a suk khawh caah hmual a ngei tuk. Nai kum hrawngah kan cauk hna nih Jesuh chimmi bianabia pawl kha a fiangmi le hngalh a fawimi lam in a fianter. Tahchunhnak ah, 2008, July 15, Vennak Innsang nih Jesuh chimmi thilnu, anṭam ci le sur bianabia hna kha fiang deuh in hngalhthiam awkah a kan bawmh. Atu ah cun mah bianabia hna nih Pathian Pennak a aiawh ti kha kan hngalh cang. Mah nih mi tampi kha hi vawlei ṭhalo kaltak in Khrih zultu si awkah a bawmh hna.

14. (a) Samaria mipa bianabia kha hlanah zeitindah kan rak fianter? (b) Jesuh chimmi mah bianabia kha atu ah zeitindah kan hngalhthiam?

¹⁴ Jesuh nih a dikthliar deuh in a chimmi tuanbia asiloah tahchunhnak hna tah zeitindah kan hngalhthiam khawh? A chimmi tuanbia cheukhat cu langhternak bia asiloah chimchungbia an si. A dang tu cu fimnak petu an si. Zei bantuk tuanbia dah langhternak bia an si i zei bantuk dah an si lo ti kha zeitindah kan hngalh khawh? A luancia kum hna ah a phi cu a hung fiang chin. Tahchunhnak ah, Jesuh chimmi Samaria mipa bianabia kan rak fianter ning kha ruathmanh. (Luka 10:30-37) Samaria mipa nih Jesuh a aiawh i Jerusalem in Jeriko leiah a ṭummi lam nih Eden i ralchanhnak a chuah hnuin minung sining a chiat chinmi kha a aiawh tiah 1924, Vennak Innsang nih a fianter. Mah lengah lam i mifir hna nih bu nganpipi le a hak a kaumi chawlettu hna kha an aiawh hna, cun tlangbawi le Levi mi nih Khrihfaram kha an aiawh hna tiah a fianter chap. Asinain atu ah cun kan cauk hna nih mah bianabia kha Khrihfa a simi cu mi thleidan awk a si lo ti fianternak ah a hman cang. A herhmi paoh kha kan bawmh hna awk a si, a hleiin Pathian kong biatak cawnpiaknak in kan bawmh hna awk a si. Jehovah nih biatak fiang tein hngalhthiam awk a kan bawmh caah kan i lawm tuk.

15. A hnu capar ah zei kong dah kan i ruah hna lai?

¹⁵ A hnu capar ah Jesuh chimmi ngaknu pahra bianabia kong kan i ruah hna lai. (Matt. 25:1-13) Mah bianabia kha donghnak caan ah a nungmi a zultu hna nih zeitin hngalthiam hna seh tiah dah Jesuh nih a duh? Mah bianabia chung i mi kip, thil kip le thil sining kip nih hmailei ah a um hngami a ngan deuhmi mi pakhatkhat asiloah thil pakhatkhat kha a aiawh maw? Asiloah donghnak caan chungah a kan bawm hngami fimnak pek a kan duhmi dah a si? Mah kong cu a hnu capar ah kan i ruah hna lai.