1. Saide meke Yesesi „be e piisii gaan piisii” di den disipel be daai kon baka? (Luku a fowtow na a bigin.)

PUUBEI fu si fa Yesesi „be e piisii gaan piisii. Santa yeye be kon neen tapu tu.” Kande neen hii fesi i be poi si fa ai piisii. Saide a be e piisii so? A be sende 70 disipel fi en fu go paati a bun nyunsu fu Gadu Kownukondee. Ma fu di tyaipi sama á be lobi a bun nyunsu, meke a be wani sabi fa sani waka di a sende den go peleiki. Den sama di á be lobi a bun nyunsu a be den leliman fu a Dyu weiti anga den Faliseiman. Den man ya be kisi bunbun sikoo leli. Den be wani sama si Yesesi enke wan sama di sabi du tembeewooko wawan. Den be wani sama si den disipel fi en enke sama di „á be go a hei sikoo” (Toli 4:13; Malikisi 6:3). Tokuso ná pikin piisii den disipel be e piisii di den daai kon baka. Den be du a peleikiwooko, winsi fa den sama anga den ogii yeye be e tapu pasi gi den. San be yeepi den fu abi deki-ati? San be yeepi den fu piisii gaan piisii?​—Leisi Lukasi 10:1, 17-21.

2. (a) Fu saide u sa taki den disipel fu Yesesi be de enke pikinengee? (b) San be yeepi den disipel fu Yesesi fu fusutan den dipi toli fu Beibel?

² Yesesi be taigi Yehofa taki: „Mi Tata! Masaa fu hemel  anga goontapu. Mi e gafa i a sama ini, fu di i kibii den sani ya gi den koniman anga den leliman fu a goontapu ya, fu den á poi sabi den. Ma i meke sama di de enke pikinengee kon sabi den. Ai baa, mi Tata! Bika a so i wani sani waka” (Mateyesi 11:25, 26). Saide meke Yesesi be kai den disipel fi en pikinengee? A fu di den á be de enke den leliman fu a Dyu weiti anga den Faliseiman di be si enke den koni moo ala taa sama fu di den kisi bunbun sikoo leli. Ma den be wani sama leli den sani, leti enke fa pikinengee e wani leli sani. Den á be e fii denseefi, ma den be leli fu abi sakafasi (Mateyesi 18:1-4). Fu di den be abi sakafasi, meke Yehofa be gi den a santa yeye fi en fu den be sa fusutan den dipi toli fu Beibel. Ma den fesiman fu a Dyu biibi á be poi fusutan san den leli ya wani taki, bika den be e fii denseefi anga ala Saatan be e koli den.

3. Sowtu toli wi o luku aini a artikel ya?

³ A sani ya e meke u fusutan saide Yesesi be e piisii gaan piisii! A be e piisii fu si fa Yehofa be e meke sama di abi sakafasi fusutan den dipi toli fu Beibel, winsi fa den á kisi bunbun sikoo leli. Gadu be e fende en bun taki den disipel fu Yesesi be e kisi leli a wan fasi di á taanga fu fusutan. Gadu á kengi. Fa u du sabi taki aini a ten ya ai bun gi en taki sama e kisi leli a wan fasi di makiliki fu fusutan? Aini a artikel ya, wi o luku fa Yehofa e meke sama di abi sakafasi aini a ten ya fusutan den dipi toli fu Beibel.

4. Fa a sutudi-Wakititolen di e taki sani a wan moo makiliki fasi yeepi somen sama?

⁴ A fasi fa a olikanisâsi fu Gadu e gi leli kon moo bun aini den bakabaka yali ya. Den e gi leli a wan moo makiliki fasi. Kon u luku 3 sani di e soi saide u sa taki a sani ya. A fosi sani a taki den baala meke wan taa sutudi-Wakititolen di e taki sani a wan moo makiliki fasi. * (Luku san sikiifi a ondoose.) A Wakititolen ya yeepi omen sama. A yeepi den sama tu di á kaba sabi fa fu leisi efuso taki wan tongo bunbun. Somen sama taki den pikin fu den e fusutan A Wakititolen moo bun, fu di ai taki sani a wan moo makiliki fasi. A omen fu den sikiifi biifi gi den baala di e tii a wooko fu u a hii goontapu fu gi den daa. Wan sisa di be e feele fosi fu gi piki na a Wakititolen-sutudi, taki nownow a nái feele moo. Baka di a bigin koboloiki A Wakititolen ya, neen a sikiifi wan biifi gi den baala taki: „Nownow mi e gi moo piki. Mi nái feele moo! Mi e gi u anga Yehofa daa.”

5. San a wantu wini di a Ingiisi Nyun-Grontapuvertaling abi?

 ⁵ Du fu tu sani na a Nyun-Grontapuvertaling aini Ingiisitongo. Den kengi son sani aini a Beibel ya di meke a kon moo makiliki fu fusutan. A Beibel ya be kon a doo na a komakandaa di den baala gwenti holi ala yali. Den be holi a komakandaa ya na a 5 oktober 2013. * (Luku san sikiifi a ondoose.) A omen tekisi kon abi moo mendii wowtu, tokuso den sani di den tekisi e leli u á kengi. Den kon moo makiliki fu fusutan. Aini a Ingiisi Beibel di be de fosi, a tekisi fu Yopu 10: 1 be abi 27 wowtu. Ma nownow a 19 wowtu a abi. Odo 8: 6 be abi 20 wowtu fosi. Ma now a 13 wowtu namo a abi. Winsi fa den tekisi ya abi moo weiniki wowtu, tokuso den moo makiliki fu fusutan. Wan salufu baala di e dini Yehofa omen yali kaba e taki: „A gei enke a fosi toon de mi fusutan a buku fu Yopu di mi leisi en aini a nyun Beibel ya.” A omen sama taki a aseefi sani ya tu.

6. Fa yu e fii baka di i kon fusutan Mateyesi 24:45-47 moo bun?

⁶ Du fu dii sani, na a fusutan di u kon e fusutan son tekisi moo bun. Enke fa A Waktitoren fu 15 yuli 2013 tyai kon a kiin, da den baala kon fusutan moo bun sama na „a koni saafu di u sa fitoow” (Mateyesi 24:45-47). A artikel de be tyai kon a kiin taki a koni saafu a den baala di e tii a wooko fu u a hii goontapu. Den „futuboi” a den salufuwan anga den „taa sikapu”. Ala den e kisi nyanyan fu a koni saafu (Yohanisi 10:16). Wi e piisii di u kon sabi den toli ya. Wi e piisii fu leli taa sama den toli ya tu. Sowtu taa sani e soi taki Yehofa e fende en bun taki sama e kisi leli di makiliki fu fusutan?

7, 8. San a wantu fu den toli aini Beibel di e soi go a wan moo gaan sani di be mu pasa?

⁷ Efu yu e dini Yehofa omen yali kaba, da kande i si taki a fasi fa wi e tyai son Beibel toli kon a kiin kengi. Fosi u be abi a gwenti fu teke wan Beibel toli gei anga wan moo gaan sani di mu pasa ete. A bun fu tyai den toli fu Beibel kon a kiin na a fasi ya? Eeye. Bika wan leisi Yesesi be e soi go na „a maiki fu a polofeiti Yona”. (Leisi Mateyesi 12:39, 40.) Yesesi be tyai kon a kiin taki a ten di Yona be de aini a fisi bee be e soi go na a ten di a be o de aini geebi.

⁸ Moo toli de aini Beibel di e soi go a wan moo gaan sani di mu pasa. A apostel Pawlesi be taki fu wantu fu den. Wan fu den toli ya na a toli fu Abalaham. A fasi fa Abalaham be libi anga Sala anga Hagar, e soi go na a fasi  fa Yehofa be o libi anga den Islayelisama anga a pisi fu a olikanisâsi fi en di de a hemel (Galasiyasama 4:22-26). A tabernakel, a tempel, a dei di den Islayelisama be e kisi paadon fu den sondu, a hei pilisite anga wantu taa sani fu a Weiti be de wan „kaaka fu den bun sani di mu kon ete” (Hebrewsama 9:23-25; 10:1). A biibi fu u o taanga te wi o ondoosuku den toli ya luku san den wani taki. Ma a sani ya wani taki na ala sama, efuso na ala sani di sikiifi aini Beibel abi fu du anga wan moo gaan sani di mu pasa?

9. Fa u be e fusutan a toli fu Naabot fosi?

⁹ Aini a ten di pasa, u be e si enke ala den toli fu Beibel be wani taki wan sani. Wan fu den toli ya na a toli fu Naabot. A ogii-ati Iseibel be kii Naabot, fu di a man fi en di den e kai Kownu Akab, be wani a doloifigoon fu Naabot. Di a dede neen Akab teke a doloifigoon fi en (1 Kownu 21:1-16). Aini a yali 1932, A Wakititolen be tyai kon a kiin taki Akab anga Iseibel be e soi go a Saatan anga den bakaman fi en. Naabot be e soi go a Yesesi. A dede fi en be wani taki a dede di Yesesi be o dede. Ma aini 1961, neen a buku di den e kai „Let Your Name Be Sanctified” (I nen mu santa) be sikiifi taki Naabot a den salufu Kelesten. Iseibel a den falisi Kelesten keliki. A kii di den kii  Naabot na a pina di den be o pina den salufu Kelesten aini den lasiti dei. A omen yali den toli ya be e taanga a biibi fu a foluku fu Gadu. Da fu saide meke u nái teke ala den toli aini Beibel gei moo anga wan moo gaan sani di mu pasa ete?

10. (a) Fa a koni saafu e tyai son Beibel toli kon a kiin nownow? (b) Sowtu sani den buku fu u e leli sama nownow?

¹⁰ Aini a ten di pasa, Yehofa yeepi „a koni saafu di u sa fitoow” fu kon moo koni. A yeepi den tu fu fusutan sani moo kiin. Nownow a koni saafu nái taki moo taki ala toli di de aini Beibel e soi go a wan sani di mu pasa ete, boiti efu a sikiifi aini wan tekisi fu Beibel. A fasi fa den be e si son toli fu Beibel fosi be taanga fu fusutan efuso fu holi a ede. A be taanga tu fu sabi fa fu wooko anga den leli de. Te den be e du a sani ya, da sama á be e kaba fusutan san den be sa leli fu a toli de. Neen meke aini a ten ya, den buku fu u e poti moo pakisei a den sani di u sa leli fu den toli di de aini Beibel. Den e soi u fa u sa abi biibi, fa u sa holidoo, fa fu dini Gadu anga u hii ati anga somen taa sani ete. *​—Luku san sikiifi a ondoose.

11. (a) Fa wi e fusutan a toli fu Naabot nownow? Fa a toli ya e yeepi u? (b) Saide meke den buku fu u nái taki moo taki ala den pisi fu Beibel e soi go a wan sani di mu pasa ete? (Luku a artikel „Sani di leisiman akisi” aini a Wakititolen ya.)

¹¹ Nownow wi e fusutan a toli fu Naabot moo bun. Naabot á dede fu di a be e soi go a Yesesi efuso den salufuwan. A dede fu di a be wani tan dini Gadu. Winsi fa wan tiiman be wani du ogii anga Naabot, tokuso a tan aliki Yehofa (Numeri 36:7; 1 Kownu 21:3). Ala den sama di e miti anga denseefi polobelema ya sa waka a Naabot baka. (Leisi 2 Timotiyesi 3:12.) A makiliki gi ala Kelesten fu si taki na a sani ya a toli fu Naabot e leli u. Den poi holi en a ede tu. Den sa wooko anga en fu taanga a biibi fu den.

12. (a) San wi á mu taki fu den toli di sikiifi aini Beibel? (b) Fu saide meke wi e fusutan den dipi toli fu Beibel moo bun nownow? (Luku san sikiifi a ondoose.)

¹² Enke fa u si, da u sa leli wan sani fu ala den toli di de aini Beibel. Ma a sani ya á wani taki toli á de seefiseefi aini Beibel di e soi go a wan moo gaan sani di mu pasa ete. Nownow den buku fu u e poti moo pakisei a den sani di u sa leli fu den toli di de aini Beibel. Den nái sikiifi moo taki ala toli di de aini Beibel e soi go a wan moo gaan sani di mu pasa ete. A fasi fa Naabot tan aliki Gadu anga ala fa sama du ogii anga en te enke den kii  en, e meke u denki a fasi fa Yesesi anga den salufuwan tan dini Gadu. Ai meke u denki a fasi fa den „taa sikapu” e tan dini Gadu tu. Wi e si kiin taki Yehofa e gi u leli a wan moo makiliki fasi. *​—Luku san sikiifi a ondoose.

13. Sowtu sani e soi taki nownow wi e fusutan den ageisitoli fu Yesesi moo bun?

¹³ Yesesi Kelestesi be de a moo bun leliman di be de a goontapu. A be e koboloiki ageisitoli te a be wani leli sama wan sani (Mateyesi 13:34). Ageisitoli bun fu leli sama sani, bika den e meke i fusutan wan dipi toli moo makiliki. A so a leli e doo wi ati. Aini den ten di pasa, den buku fu u meke u fusutan den ageisitoli fu Yesesi moo bun. A Waktitoren fu 15 yuli 2008 yeepi u fu fusutan den ageisitoli fu a sowda, a sii fu a mosterd bon anga a seepi moo bun. Now wi e fusutan taki den ageisitoli ya abi fu du anga a Kownukondee fu Gadu. Na a Kownukondee ya yeepi omen sama fu daai baka gi a ogii goontapu ya. A yeepi den tu fu toon wan bakaman fu Kelestesi.

14. (a) Fa u be e fusutan a ageisitoli fu a Samaliyaman di be libi bun anga a Dyu fosi? (b) Fa wi e fusutan a ageisitoli ya nownow?

¹⁴ Fa u mu si den ageisitoli di Yesesi be gi? Son wan fu den na polofeititoli di e soi go a wan moo gaan sani di mu pasa ete. Taawan e soi u fa u mu tyai useefi. Ma fa wi o man sabi on ten wan ageisitoli e soi go a wan moo gaan sani di mu pasa ete? Aini den yali di pasa, u kon fusutan on ten u sa taki a sani ya. Pakisei fa u be e si a toli fu a Samaliyaman di be libi bun anga a Dyu (Lukasi 10:30-37). Aini 1924, The Watch Tower (A Wakititolen) be taki a Samaliyaman e soi go a Yesesi. A pasi di be e komoto a Yelusalem doo Yerikow, be e soi go na a fasi fa a libi fu sama be e kon moo ogii fanafu a ten di Adan anga Efa taangayesi Gadu. Den fufuuman di be de a pasi be e soi go a den gaan bigi bodeleifi anga den giili sama di e du bisnis. A pilisite anga Leifisama be e soi go a den falisi Kelesten keliki. Ma aini a ten ya, u kon fusutan taki a ageisitoli ya e soi u taki wi á mu si a wan nasi sama bun moo a taawan, ma u mu yeepi ala sama di de a nowtu. U mu yeepi den fu kon sabi sama a Gadu. Wi e piisii taki Yehofa e yeepi u fu fusutan den leli fu Beibel moo bun.

15. Fu sowtu toli wi o taki aini a taa artikel?

¹⁵ Aini a taa artikel, wi o taki fu a ageisitoli di Yesesi be gi fu den tin uman di á didon anga man ete (Mateyesi 25:1-13). Fa Yesesi be wani den bakaman fi en di be o libi aini den lasiti dei fusutan a ageisitoli ya? Na ala sani fiya aini a ageisitoli e soi go a wan moo gaan sani di mu pasa ete? Efuso a leli Yesesi be wani leli u wantu sani di be o yeepi u fu holidoo aini den lasiti dei ya? Meke u go luku.