1. Сәва чь Иса «бь рʹӧһʹе пироз ша бу»? (Бьньһерʹә шькьле әʹԝльн.)

 ТӦ ДЬКАРИ бьди бәр чʹәʹве хԝә ԝе дәме чахе Иса Мәсиһ «бь рʹӧһʹе пироз ша бу»? Дьбәкә ньһа тә да бәр чʹәʹве хԝә бәшәра Исайә хԝәш, у чаԝа чʹәʹве ԝи дьчʹурьсин жь шабуне. Ле гәло чьрʹа Иса ӧса ша бу? Әԝи 70 шагьртед хԝә шандьбу кӧ даннасин кьн мьзгинийа хере дәрһәԛа Пʹадшатийа Хԝәде. a (Бьньһерʹә спартьн.) Иса гәләк дьхԝәст пебьһʹәсийа һәла шагьртед ԝи ԝе чаԝа әԝи шьхӧли пек биньн. Чьмки ԝи чахи нәйаре мьзгинийа хере гәләк бун у ԛәԝи бун жи, мәсәлә ԛанунзанед хԝәнди у ӧса жи Ферьси. Ԝана ӧса дькьр ԝәки мәрьв ль сәр Иса бьньһерʹьн чаԝа сәр п’ешәкʹарәки, у сәр шагьртед ԝи жи чаԝа сәр «мәрьвед нәхԝәнди у нәзан» (Кʹаред Шандийа 4:13; Марԛос 6:3). Ле йәкә шагьрт бь әшԛ у ша вәгәрʹийан. Һәла һе щьн жи мьԛабьли ԝана дәркʹәтьн, ле йәкә ԝана даннасин кьр! Ле бь сайа чь ԝана шабун у мерхасийа хԝә хԝәй кьрьн? (Бьхунә Луԛа 10:1, 17-21.)

2. а) Чь йәкеда шагьртед Иса мина зарʹа бун? б) Бь сайа чь шагьртед Иса фәʹм дькьрьн рʹастийед кʹур жь Кʹьтеба Пироз?

² Иса Мәсиһ ӧса готә Йаһоԝа: «Шькьр наве тә бә Баво, Хӧдане әʹрд у әʹзман, кӧ тә әв тьшт жь зана у билана вәшартьн у ль бәр зарʹа вәкьрьн. Бәле Баво, чьмки аһа ль тә хԝәш һат» (Мәтта 11:25, 26). Чьрʹа Иса шагьртед хԝә бәрамбәри зарʹа кьр? Чьмки әԝана нәмина Ферьси у кʹьтебзана бун. Ферьси у кʹьтебзана, хԝә гәләк аԛьл һʹәсаб дькьрьн, ле шагьртед Иса һазьр бун һин бьн,  у ԝе йәкеда әԝана мина зарʹа бун. Әԝана һин бун кӧ мьлук бьн нә кӧ ԛӧрʹә (Мәтта 18:1-4). Шагьртед Иса мьлук бун, ләма жи Йаһоԝа рʹӧһʹе хԝәйи пироз да хәбате, сәва кӧ али ԝан бькә фәʹм бькьн рʹастийед кʹур жь Кʹьтеба Пироз. Ле сәркʹаред дине Щьһуйа бь Шәйтʹан у жь бо ԛӧрʹәбуна хԝә, ча кор ман.

3. Әме чь пебьһʹәсьн дь ве готареда?

³ Ньһа бьдьн һʹәсабе, кӧ Иса Мәсиһ чьԛас ша бу чахе дит кӧ Йаһоԝа рʹастийед кʹур жь Кʹьтеба Пироз мәрийед мьлукрʹа вәкьр, у нәньһерʹи кӧ әԝана нәхԝәнди нә. Йаһоԝа нәһатийә гӧһастьн, Әԝ диса ӧса һин дькә мәрийед мьлук. Әԝ йәк жь чь те кʹьфше? Дь ве готареда әме пебьһʹәсьн, кӧ чаԝа рʹожа иройин Йаһоԝа рʹастийед кʹур жь Кʹьтеба Пироз бона мәрийед мьлук вәдькә.

4. Чьда «Бьрща Ԛәрәԝьлийе» йа һесакьри пʹешкʹеш ә?

⁴ Ԝан пашԝәхтийа тʹәшкиләта Хԝәде гәләк фәрз һʹәсаб кьрьн, ԝәки һинкьрьн гәрәке дьһа фәʹмдари у һеса бә. Ԝәрә әм дина хԝә бьдьн се тьшта. Йа пешьн, «Бьрща Ԛәрәԝьлийе» йа һесакьри. b (Бьньһерʹә спартьн.) Әԝ бь рʹастийе жи пʹешкʹеш ә кӧ али гәләка кьрийә, ӧса жи йед кӧ йан хԝәндьне йан жи зьман рʹьнд ньзаньн. Һьнә малбәта тʹәхмин кьрьнә, кӧ бь сайа дәрхьстьна һесакьри, зарʹарʹа һе һеса йә «Бьрща Ԛәрәԝьлийе» фәʹм бькьн. Гәләка нәʹмед рʹазибуне Кʹома Рʹебәрийерʹа ньвисин. Хушкәке гот кӧ тʹьме дьтьрсийа ԝәʹде һинбуна «Бьрща Ԛәрәԝьлийе» щаба хԝә бьдә. Ле ньһа ида на! Чахе әԝе дәстпекьр бьдә хәбате «Бьрща Ԛәрәԝьлийе» йа һесакьри, әԝе нәʹмеда ӧса ньвиси: «Әз ньһа щабәке зедәтьр дьдьм, у тьрса мьн ида тʹӧнә! Әз жь Йаһоԝа у жь ԝә рʹази мә».

5. Чь кʹар һәйә жь Кʹьтеба Пирозә ԝәлгәрʹандьна «Дьнйа Тʹәзә» йа тʹәзәкьри?

⁵ Йа дӧда, әԝ һәйә Кʹьтеба Пирозә ԝәлгәрʹандьна «Дьнйа Тʹәзә» йа тʹәзәкьри, йа кӧ сәр щьвата һәрсали 5 Щотмәһе сала 2013 дәркʹәт. c (Бьньһерʹә спартьн.) Дь ве Кʹьтеба Пирозда дь гәләк рʹезада һе һьндьк хәбәр тенә хәбьтандьне, ле нәта рʹеза нәһатийә гӧһастьн, дәԝсе һе һеса те фәʹмкьрьн. Мәсәлә Ибо 10:1-да 27 хәбәр бун, ле ньһа 19 нә, у Мәтʹәлок 8:6-да 20 хәбәр бун у ньһа буйә 13. Һәр дӧ рʹез жи рʹаст у фәʹмдари нә. Бьраки рʹункьри, йе кӧ ида гәләк сал бь амьни Хԝәдерʹа ԛӧльх дькә, ӧса гот: «Мьн чахе кʹьтеба Ибо хԝәнд, мьн хԝә ӧса тʹәхмин кьр те бежи мьн әв кʹьтеб щара пешьн фәʹм кьр!» Диса гәләка мина ԝи бьрайи готьн.

6. Тӧ чь дьфькьри дәрһәԛа зәлалкьрьна Мәтта 24:45-47?

⁶ Йа сьсийа, дьшьрмиш бә дәрһәԛа пешдачуйина фәʹмкьрьна мә һьндава һьнә рʹезед конкрет жь Кʹьтеба Пироз. Мәсәлә дь «Бьрща Ԛәрәԝьлийеда» йа 15 Тирмәһе, сала 2013 һатә зәлалкьрьне кӧ «хӧламе амьн у сәрԝахт» кʹе йә (Мәтта 24:45-47). Әԝе готаре мәрʹа шьровәкьр кӧ хӧламе амьн әԝ һәйә Кʹома Рʹебәрийе. Ле «хӧламе мала» ԝи, әԝ һәнә әԝед рʹункьри у «пәзед дьн», йед кӧ жь хӧламе амьн хԝарьне дьстиньн (Йуһʹәнна 10:16). Мә  хԝәш һатьн әԝ рʹастийед жь Кʹьтеба Пироз, у әм бь шабуне дьхԝазьн мәрийарʹа бона ԝе йәке гьли кьн! Диса ча Йаһоԝа нишан дькә кӧ әԝ ԛәбул дькә һинкьрьна һеса у фәʹмдари?

7, 8. Кʹижан ԛәԝьмандьнед жь Кʹьтеба Пироз һәнә, йед кӧ дьдьнә кʹьфше тьштәки һе гринг ль ахьрийе?

⁷ Һәрге тӧ ида гәләк сал Йаһоԝарʹа ԛӧльх дьки, дьбәк тә дина хԝә дайе кӧ ньһа дь әʹдәбйәтед мәда һьнә сәрһати у ԛәԝьмандьн ида бь щурʹәки майин тенә шьровәкьрьне. Бәре әʹдәбйәтада гәләк щар дьһатә ньвисаре, кӧ һьнә ԛәԝьмандьнед жь Кʹьтеба Пироз, бь симболик чаԝа сийа йан сурәте ԝе йәке нә чь кӧ ль ахьрийе ԝе бьԛәԝьмийа. Мәсәлә һьнә тьшт йан кәс бь симболик дьдьнә кʹьфше тьшт йан кәсәки һе гьринг, йе кӧ ль ахьрийе ԝе һәбуйа. Ле гәло әԝ йәк рʹаст ә кӧ ԛәԝьмандьнед Кʹьтеба Пироз, бь симболик бәрамбәри ԛәԝьмандьнәкә дьн бькьн у һʹәсаб кьн ча пʹехәмбәрти? Бәле рʹаст ә. Мәсәлә Иса Мәсиһ шьровәкьр «нишана Уньс пʹехәмбәр». (Бьхунә Мәтта 12:39, 40.) Бь готьна Иса әԝ ԝәʹдә, кʹижан кӧ Уньс зьке мәʹсида дәрбаз кьр, бь симболик те һʹәсабе әԝ ԝәʹде кӧ Иса тʹьрбеда бу.

⁸ Кʹьтеба Пирозда ԛәԝьмандьнед дьн жи һәнә, йед кӧ дьдьнә кʹьфше тьштед һе гьринг ль ахьрийе. Һьнәк жь ԝан ԛәԝьмандьна Паԝлосе шанди шьровәкьр. Мәсәлә әԝи гот дәрһәԛа һәләԛәтийа Бьраһим тʹәви Һащәре у Сәрайе, йе кӧ бь симболик дьдә кʹьфше һәләԛәтийа Йаһоԝа тʹәви щьмәʹта Исраел у пʹарәкә тʹәшкиләта Хԝәде йа ль әʹзмана (Галати 4:22-26). Диса ӧса, кон, пʹарьстгәһ, Рʹожа Рʹожийа, сәрәккʹаһин у тьштед дьн йе Ԛануне, тенә һʹәсабе «сийа ԝан тьштед ԛәнщ . . . , кʹижанә кӧ тен» (Ибрани 9:23-25; 10:1). Чахе әм педьһʹәсьн кӧ ԛәԝьмандьнед жь Кʹьтеба Пироз сийа чь нә у бь симболик чь дьдьнә кʹьфше, баԝәрийа мә ԛәԝи дьбә. Ле гәло рʹаст ә кӧ һʹәсаб кьн, ԝәки һәр ԛәԝьмандьн, тьшт йан кәс, сийа тьштәки йан кәсәки нә?

9. Сәрһатийа дәрһәԛа Набот бәре ча дьһатә шьровәкьрьне?

⁹ Бәре дь әʹдәбйәтед мәда дьһатә шьровәкьрьне кӧ һәр тьшт, кәс йан жи ԛәԝьмандьн, дьданә кʹьфше тьштәки йан кәсәки һе гринг ль ахьрийе. Мәсәлә жьна Аһаб пʹадша, Изабела зӧлм, ӧса кьр кӧ Набот бе кӧштьне, сәва кӧ Аһаб бькарьбә бахчед тьрийед Набот хԝәрʹа һьлдә (1 Пʹадшати 21:1-16). «Бьрща Ԛәрәԝьлийе» йа сала 1932-да, һатьбу шьровәкьрьне кӧ Аһаб у Изабел дьдьнә кʹьфше Шәйтʹан у тʹәшкиләта ԝи. Набот бь симболик те һʹәсабе Иса, у кӧштьна Набот те һʹәсабе кӧштьна Иса. Ле сала 1961-да, дь ԝе кʹьтебеда наве кʹижане йә «Бьра Наве Тә Пироз Бә», һатә готьне кӧ Набот бь симболик дьдә кʹьфше мәсиһийед рʹункьри, ле Изабел дьдә кʹьфше мәсиһийед ԝе дьнйайе. Ӧса жи, зерандьна Набот бь дәсте Изабеле те һʹәсабе зерандьна мәсиһийед рʹункьри ԝәʹде рʹожед ахьрийе. Әԝ шьровәкьрьна һана, гәләк сала баԝәрийа щьмәʹта Хԝәде ԛәԝи дькьр. Ԝәки ӧса нә, чьрʹа әм ԛәԝьмандьнед ӧса ньһа бь щурʹәки майин шьровәдькьн?

10. а) Чьда хӧламе амьн у сәрԝахт һе фәсал бу? б) Иро әʹдәбйәтед мә һе зедә дина мә дьдьн сәр чь?

¹⁰ Бь сала Йаһоԝа али «хӧламе амьн  у сәрԝахт» дькьр ԝәки әԝана һе сәрԝахт у фәсал бьн. Ле гәло чь щурʹәйи? Ньһа хӧламе амьн тʹәне ԝи чахи дьбежә кӧ ԛәԝьмандьнәк жь Кʹьтеба Пироз бь симболик тьштәк те һʹәсабе, чахе ве йәке хԝәха Кʹьтеба Пироз әʹйан дькә. Һьнә ԛәԝьмандьн, кәс у тьшт, чахе бәре дьһатьнә шьровәкьрьне, чәтьн бу мәрийа фәʹм кьра у бира хԝәда хԝәй кьра, кӧ һәр кәс у һәр тьшт бь симболик чь тенә һʹәсабе, у ӧса жи чәтьн бу бьдьнә хәбате. Ле һе хьраб әԝ бу, чахе дина мәрийа дьчу сәр фәʹмкьрьна тьштед у кәсед бь симболик жь ԛәԝьмандьна Кʹьтеба Пироз, һьнге чәтьн дьбу мәри кʹаре йан ширәте бьвинә дь ԝе ԛәԝьмандьнеда. Ләма жи иро әʹдәбйәтед мә, дина мә дьдьнә ль сәр ширәт у дәрса, мәсәлә мә һин дькьн дәрһәԛа баԝәрийе, сәбьркьрьне, амьнийе, у диса гәләк һʹӧнӧред дьн, йед кӧ әм дькарьн һин бьн жь ԛәԝьмандьнед Кʹьтеба Пироз. d (Бьньһерʹә спартьн.)

11. а) Ча әм ньһа фәʹм дькьн сәрһатийа дәрһәԛа Набот у ча мәсәла ԝи али мә дькә? б) Чьрʹа ԝан пашԝәхтийа дь әʹдәбйәтед мәда ида һьнәк щар те готьне дәрһәԛа фәʹмкьрьна бь симболик? (Бьньһерʹә «Пьрсед Хԝәндәвана» дь ве дәрхьстьнеда.)

¹¹ Ньһа фәʹмкьрьна мә дәрһәԛа сәрһатийа Набот, һе зелал ә у һе һеса йә. Дина мә ида начә сәр ве йәке, кӧ Набот мьр чьмки әԝ бь симболик те һʹәсабе Иса Мәсиһ йан Мәсиһийед рʹункьри. Набот мьр, чьмки әԝ һʹәта хьлазийе Хԝәдерʹа амьн ма. Рʹаст ә әԝ һатә щерʹьбандьне алийе сәрԝерәки зӧлмда, ле әԝ амьн ма һьндава ԛанунед Йаһоԝа (Жьмар 36:7; 1 Пʹадшати 21:3). Әԝ чьԛас мәсәләкә баш ә бона ԝан ԛӧльхкʹаред Йаһоԝа, йед мина Набот тенә щерʹьбандьне. (Бьхунә 2 Тимотʹейо 3:12.) Һʹәму Мәсиһи дькарьн фәʹм бькьн әԝе ширәте, бира хԝәда хԝәй кьн, ӧса жи бьдьн хәбате у баԝәрийа хԝә ԛәԝи кьн.

12. а) Гәло рʹаст ә кӧ сәрһатийед жь Кʹьтеба Пироз тʹәне дәрсе мәрʹа дьдьн? б) Бь сайа чь әм дькарьн һәла фькьред чәтьн жи жь Кʹьтеба Пироз фәʹм бькьн? (Бьньһерʹә спартьн.)

¹² Ле әԝ йәк найе һʹәсабе кӧ сәрһатийед жь Кʹьтеба Пироз тʹәне дәрсе мәрʹа дьдьн у зедә бона тʹӧ тьшти ниньн. Ньһа дь әʹдәбйәтед мәда дәԝса кӧ һур бь һур бе шьровәкьрьне мәʹна бь симболик ль ахьрийе, те шьровәкьрьне кӧ ча ԛәԝьмандьнәк гьредайи йә тʹәви  ԛәԝьмандьнәкә дьн. Мәсәлә амьнийа Набот дь щерʹьбандьнада у мьрьна ԝи, тинә бира мә амьнийа Иса Мәсиһ у мәсиһийед рʹункьри. Әм ӧса жи тиньн бира хԝә амьнийа гәләк хушк у бьра жь «пәзед дьн». Әм бь рʹастийе жи дьвиньн кӧ Йаһоԝа чаԝа һеса мә һин дькә. e (Бьньһерʹә спартьн.)

13. Кʹижан мәсәлә дьдьнә кʹьфше кӧ ньһа әм дьһа һеса у фәʹмдари шьровәдькьн мәсәлед Иса?

¹³ Ль дьнйайе Иса дәрсдаре лапи мәзьн бу. Әԝи һʹьз дькьр бь мәсәла йан бь мәтʹәлока һин кә (Мәтта 13:34). Һинкьрьна бь мәсәла гәләк керһати йә, чьмки ӧса дькари фькьре чәтьн жи һеса шьровәки, у әв йәк дькарә мәрийа һелан кә кӧ бьфькьрьн у бьгьһижә дьле ԝан. Ида гәләк сал ә кӧ дь әʹдәбйәтед мәда мәсәлед Иса Мәсиһ дьһа һеса у фәʹмдари тенә шьровәкьрьне. Мәсәлә, «Бьрща Ԛәрәԝьлийе» йа сала 2008, 15 Тирмәһе, али мә дькә кӧ дьһа рʹьнд фәʹм бькьн мәсәлед Иса дәрһәԛа һәвиртьрʹшк, тʹохьме хәрдале, у тʹорʹ. Ньһа әм фәʹм дькьн кӧ әԝ мәсәлә дәрһәԛа Пʹадшатийа Хԝәде нә, йед кӧ али гәләк мәрийа кьрьнә кӧ жь дьнйа хьраб дур бьн у бьбьнә шагьртед Иса Мәсиһ.

14. а) Мә бәре ча шьровәдькьр мәтʹәлока Иса дәрһәԛа мәрьве самәри? б) Ньһа әм ча фәʹм дькьн мәтʹәлока Иса?

¹⁴ Әм чаԝа дькарьн фәʹм бькьн сәрһатийед бь һургьли у мәтʹәлокед Иса? Нета һьнә жь ԝан сәрһатийа бь симболик ә йан пʹехәмбәрти йә. Һьнәк жи бона ширәткьрьне нә. Ле әм ча дькарьн бьзаньбьн жь ԝана кʹижан бь симболик ьн у кʹижан на? Щаба ве пьрсе нава салада һе фәʹмдари у фәʹмдари дьбу. Ԝәрә әм дьшьрмиш бьн чаԝа ньһа те шьровәкьрьне мәсәла Иса дәрһәԛа мәрьвәки самәри (Луԛа 10:30-37). «Бьрща Ԛәрәԝьлийе» йа сала 1924-да, ньвисар ә кӧ мәрьве самәри бь симболик те һʹәсабе Иса, ле әԝ рʹейа жь Оршәлиме һʹәта Әриһайе те һʹәсабе һʹале инсанәтейә хьраб, дәстпекьри жь мьԛабьлийа Адәнеда. У әԝ ԛачахед сәр рʹе бь симболик тенә һʹәсабе корпорасийе мәзьн у бизнесменед тьма. Кʹаһин у леԝи тенә һʹәсабе мәсиһийед ве дьнйайе. Ле иро әʹдәбйәтед мәда әԝ мәсәлә те хәбьтандьне сәва кӧ биньнә бира һʹәму мәсиһийа кӧ фьрԛийе нәкьнә ортʹа мәрьва. Әм гәрәке али һʹәму мәрьва бькьн, илаһи бь ве йәке кӧ ԝана рʹастийе һин кьн дәрһәԛа Хԝәде. Чахе әм дьвиньн кӧ чаԝа Йаһоԝа рʹастийе һе фәʹмдари дькә, әм бе һʹәсаб ша дьбьн.

15. Дь готара дьнда әме чь пебьһʹәсьн?

¹⁵ Дь готара дьнда әме шьровәкьн мәтʹәлока Иса дәрһәԛа дәһ ԛизед бькʹьр (Мәтта 25:1-13). Иса Мәсиһ дьхԝәст ԝәки шагьртед ԝи әԝе мәсәла ԛәԝи ча фәʹм бькьн? Гәло һәр тьшт, кәс, йан ԛәԝьмандьн дь ве мәтʹәлокеда тенә һʹәсабе бь симболик тьштәки ль ахьрийе? Йан дьбәкә Иса дьхԝәст ширәтәкә керһати бьдә мә, сәва кӧ али мә бькә дь рʹожед ахьрийеда? Ԝәрә әм пебьһʹәсьн.