‘I Wau Oyangalelanga’
“Wasweka mambu mama kw’akwa ngangu y’alungaladi, wasengomwena mo ayingyana-ngyana.”—LUKA 10:21.
1. Ekuma Yesu ‘kayangalela muna mwand’avelela?’ (Tala fwaniswa ova ntandu.)
YINDULA una wakala e ndose a Yesu vava ‘kayangalela muna mwand’avelela.’ Nanga e meso mandi masonganga vo mu kiese kikilu kakala. Ekuma? Yesu ke kolo ko katuma 70 lwa alongoki andi mu kwenda samuna e nsangu zambote za Kintinu kia Nzambi. Wau vo atantu ayingi ankuma batelamenanga e nsangu zambote, wavava zaya una alongoki andi belungisila kiyekwa kabavana. Akaka muna atantu awaya i asoneki ye afarisi ana batoma longwa. Bazolanga vo wantu babadikila Yesu nze mpasi mvadi a nti yo badikila alongoki andi nze wantu ‘balembi longwa ye minkondwa mfunu.’ (Mavangu 4:13; Maku 6:3) Kana una vo i wau, vava alongoki bavutuka, kiese kiayingi bakala kiau. Basila umbangi kana una vo basiwa e kitantu kwa wantu ayingi ye kwa nkuya nkutu. Ekuma bakadila ye kiese yo unkabu?—Tanga Luka 10:1, 17-21.
Nkangu a Nzambi betomesanga e mpil’au ya longela yo kitula malongi mau maleboka ye matoma kiá
2. (a) Aweyi alongoki a Yesu bakadila nze yingyanangyana? (b) Adieyi diasadisa alongoki a Yesu mu bakula malongi masina ma Nkand’a Nzambi?
2 Yesu wavovesa Yave vo: “Itondele, e Tata, Mfumu ezulu ye nza, wau wasweka mambu mama kw’akwa ngangu y’alungaladi, wasengomwena mo e yingyanangyana: elo, e Tata, kadi wau i wete oku wina.” (Matai 11:25, 26) Ekuma Yesu kayikila alongoki andi vo yingyanangyana? E kuma kadi, nswaswani ye asoneki ye afarisi ana batoma longwa ye bayimwenanga vo akwa ngangu, alongoki a Yesu bazolanga longwa nze yingyanangyana. Balongoka songa lulembamu, ke lulendo ko. (Matai 18:1-4) Wau vo alembami bakala, Yave wasadila mwand’andi avelela mu kubasadisa mu bakula malongi masina ma Nkand’a Nzambi. Kansi afidi a nsambil’a Kiyuda bafukwang’o meso kwa Satana ye kwa lulendo lwau.
3. Adieyi tubadika mu longi diadi?
3 Ka lukitikisu ko vo Yesu wayangalala kikilu. Wakala ye kiese mu mona una Yave kasengomwena malongi masina ma Nkand’a Nzambi kwa alembami kana una vo babadikilwanga nze wantu ke batoma longwa ko. E mpila yayi ya longela i yau keyangalelanga o Nzambi. O Nzambi kasoba ko. Aweyi kesongelanga vo wakinu yangalela e mpila yayi ya longela? Mu longi diadi, tulongoka una Yave kesengomwenanga malongi masina ma Nkand’a Nzambi kwa alembami o unu.
SASILA MALONGI MASINA KWA WANTU AWONSO
4. Eyingidilu dialeboka ekuma dinina se lukau lwampwena?
4 Mu lumbu yeto, e nkubik’a Nzambi isonganga o mfunu wa longela mu mpil’a yaleboka ye yatoma kiá. Yambula twabadika nona tatu. Kiantete, owau vena ye Eyingidilu dialeboka. * Lukau lwampwena kikilu kadi lusadisanga wantu ayingi, kumosi y’awana ke bazeye toma tanga ko yovo ke betoma bakulanga ko e ndinga isadilwanga muna nkutakani. Esi nzo bemonanga vo mu kuma kia Eyingidilu dialeboka, o wana betoma bakulanga malongi mevaikiswanga muna Eyingidilu. Ayingi besonekanga e nkanda mu vutula matondo. Mpangi mosi ankento wavova vo entete nsoni kamonanga za vana e mvutu muna Longi dia Eyingidilu. Kansi, owau ke monanga diaka nsoni ko. Vava kayantika sadila Eyingidilu dialeboka, wasoneka vo: “Owau nkumbu miayingi ivananga e mvutu. E nsoni zafokoka! Ivutulanga kikilu matondo kwa Yave ye kwa yeno ampangi.”
5. E nsekola yampa ya Tradução do Novo Mundo das Escrituras Sagradas nkia nluta yatwese?
5 Kiazole, vena ye Tradução do Novo Mundo das Escrituras Sagradas revisada yavaikiswa muna Kingelezo muna lukutakanu lwavangama kina kia 5 kia Okutoba, 2013. * Sono yayingi yakufikilu, kansi e nsasa ke yasobele ko. Owau, se diasazu mu bakula sono yayi. Kasikil’owu, entete e sono kia Yobi 10:1 kiakala ye mvovo 27, owau kina ye mvovo 19. E sono kia Ngana 8:6 kiakala ye mvovo 20, owau kiakufikilu mu mvovo 13. E sono yole yayi yatomene kieseswa mu nsekola yayi. Mpangi mosi wakuswa muna mwanda osadilanga Yave ye kwikizi kiawonso se mvu miayingi, wavova vo: “Vava yatangidi nkand’a Yobi mu nsekola yampa, yamwene nze vika sia vo yayi i nkumbu antete yabakwidi wo.” Ayingi bevovanga diau dimosi.
6. Aweyi omonanga mu kuma kia umbakuzi weto wampa wa sono kia Matai 24:45-47?
6 Kiatatu, badika e mpila yatoma kieseselwa umbakuzi weto muna yaka sono ya Nkand’a Nzambi. Kasikil’owu, umbakuzi wampa wa mvovo “ntaudi akwikizi yo lulungalalu” wavaikiswa muna Eyingidilu dia 15 Yuli 2013. (Matai 24:45-47) Longi diadi diasasila vo ntaudi akwikizi i Buka kia Selo Yambuta. ‘Esi nzo’ i akuswa ye “mameme makaka” ana bedikilwanga kwa ntaudi akwikizi. (Yoane 10:16) Kieleka, tuyangalelanga longoka malongi mama ye tuna ye kiese kia longa mo kw’akaka! Nkia mpila zankaka Yave kesongelanga vo oyangalelanga malongi maleboka ye makiá?
NSASA YATOMA KIÁ YA TUSANSU TWA NKAND’A NZAMBI
7, 8. Nkia nona ya Nkand’a Nzambi isunzulanga diambu dianene divangama kuna sentu?
7 Avo se mvu miayingi osadilanga Yave, nanga wamwene e nsobani mu mpila ina e nkanda mieto misasilanga tusansu twankaka twa Nkand’a Nzambi. Mu mvu miavioka, diatoma vovwanga vo tusansu twankaka tuna se kini kia diambu dianene divangama kuna sentu. Nga vena ye kuma yasikila mu sasila tusansu twa Nkand’a Nzambi mu mpila yayi? Elo. Kasikil’owu, Yesu wayika “sinsu kia Yona wa ngunza.” (Tanga Matai 12:39, 40.) Yesu wasasila vo e kolo kina Yona kakala muna vumu kia mbizi kisunzulanga e kolo kina Yesu kadi kala muna ziami.
Lukwikilu lweto lukumamanga vava tulongokanga tusansu twa Nkand’a Nzambi ye mana tusunzulanga
8 Vena ye tusansu twankaka twa Nkand’a Nzambi tusunzulanga diambu dianene divangama kuna sentu. Paulu wa ntumwa tusansu twayingi kayika. Muna bong’e nona, e ngwizani yakala vana vena Abarayama yo Anga yo Sara isunzulanga e ngwizani vana vena Yave ye zula kia Isaele ye nkubik’a Nzambi kuna zulu. (Ngalatia 4:22-26) Diau dimosi mpe, e saba, tempelo, Lumbu kia Lubakanisu, ngang’ambuta, ye mambu mankaka ma Nsiku makala se “kini kia mambu mambote mekwiza.” (Ayibere 9:23-25; 10:1) Lukwikilu lweto lukumamanga vava tulongokanga tusansu twatu twa Nkand’a Nzambi ye dina tusunzulanga. Kansi, nga disongele vo konso muntu, diambu yovo lekwa kiyikwanga muna Nkand’a Nzambi muntu yovo diambu diankaka kisunzulanga?
9. Muna mvu miavioka, nkia nsasa yavewanga muna lusansu lwa Nkand’a Nzambi mu kuma kia Nabote?
9 Muna mvu miavioka, e nkanda mieto nkumbu miayingi miasasilanga vo konso muntu, diambu yovo lekwa kiyikwanga mu tusansu twa Nkand’a Nzambi, muntu yovo lekwa kiankaka kiasunzulanga. Kasikil’owu, Izebele wa ntinu ambi ankento wavondesa Nabote kimana nkaz’andi Akabi kabaka e mpatu a vinyu ya Nabote. (1 Ntinu 21:1-16) Muna mvu wa 1932, Eyingidilu diasasila vo Akabi yo Izebele basunzulanga Satana ye nkubik’andi, o Nabote wasunzulanga Yesu, vo i lufwa lwa Nabote lwasunzulanga lufwa lwa Yesu. Kansi, muna mvu wa 1961, o nkanda “Santificado Seja o Teu Nome” wavova vo Nabote wasunzulanga Akristu akuswa, vo i Izabele, Kikristu kia Kimpangila kasunzulanga. Vana ntandu, lubangamu lwa Nabote vana moko ma Izebele, lubangamu lwa Akristu akuswa lusunzulanga mu lumbu yambaninu. Mu mvu miayingi, umbakuzi wau wakumikanga lukwikilu lwa nkangu a Nzambi. Ozevo, ekuma twasobela e nsas’a tusansu twatu?
10. (a) Aweyi ntaudi akwikizi kesongelanga lulungalalu vava kesasilanga tusansu twankaka twa Nkand’a Nzambi? (b) Mu nkia diambu nkanda mieto misianga e sungididi o unu?
10 Tuka kolo, Yave osadisanga “ntaudi akwikizi yo lulungalalu” mu toma kala walungalala. Mu nkia mpila? Owau, o ntaudi akwikizi osonganga lulungalalu mu lembi vova vo lusansu kingandi lwa Nkand’a Nzambi diambu dianene lusunzulanga, nanga vo vena ye sono kia Nkand’a Nzambi kisonganga e ziku kia diambu diadi. Mayingi muna mambu mama masasilwanga mampasi makala mu bakula, sungamena yo sadila. Edi disundidi o mfunu, vava twasianga sungididi kiasaka mu vava nsasa zayingi za tusansu twa Nkand’a Nzambi, twavilakananga malongi tulenda longoka mu tusansu twatu. Muna kuma kiaki, o unu e nkanda mieto misianga e sungididi muna malongi tulenda longoka mu kuma kia lukwikilu, luzindalalu, vumi wa Nzambi ye fu yankaka basonga wantu beyikwanga muna tusansu twa Nkand’a Nzambi. *
E mbandu a Nabote diambu diamfunu ikutulonganga (Tala tini kia 11)
11. (a) Aweyi tubakulwilanga lusansu lwa Nabote o unu? Aweyi e mbandu andi ikutusadisilanga? (b) Ekuma nkanda mieto ke mitoma vovelanga diaka ko vo tusansu twankaka twa Nkand’a Nzambi diambu dianene divangama kuna sentu tusunzulanga? (Tala Yuvu Y’atangi, mun’Eyingidilu diadi.)
11 Owau, o umbakuzi weto wa lusansu lwa Nabote watomene kieseswa. O Nabote kafwa mu kuma kia sia ko vo Yesu kasunzulanga yovo Akristu akuswa. Kansi, wafwa kadi wakala ye tima dia sikila ye kwikizi muna Nzambi. Wakwamanana lemvokela Nsiku a Yave kana una vo wabangikwanga kwa nyadi wakala ye wisa kiayingi. (Ntalu 36:7; 1 Ntinu 21:3) Eyayi mbandu ambote kwa selo yawonso ya Nzambi ana bebangikwanga o unu. (Tanga 2 Timoteo 3:12.) Akristu awonso balenda bakula, sungamena yo sadila longi diadi yo kumika lukwikilu lwau.
12. (a) Adieyi ke tufwete yindula ko mu kuma kia tusansu twa Nkand’a Nzambi? (b) Nki kikutusadisanga mu bakula malongi masina? (Tala mvovo va yand’a lukaya.)
12 Nga diadi difwete kutufila mu yindula vo tusansu twa Nkand’a Nzambi longi kaka tuvananga ye ke tuna diaka ye nsasa yakaka ko? Ve. Vana fulu kia sasila vo tusansu twankaka twa Nkand’a Nzambi diambu divangamana kuna sentu tusunzulanga, owau e nkanda mieto misianga e sungididi muna ngwizani ina vana vena tusansu twatu. Kasikil’owu, o lufwa ye kwikizi kasonga Nabote kana una vo wabangikwanga kikutusungamesanga e kwikizi kia Kristu ye akuswa. Kansi, kikutusungamesanga mpe kwikizi kia ayingi muna “mameme makaka.” Kieleka, Tulenda mona una Yave kekutulongelanga mu mpila yaleboka. *
NSASA YATOMA KIÁ YA YINGANA YA YESU
13. Nkia nona isonganga vo owau tusasilanga yingana ya Yesu mu mpila yaleboka ye yatoma kiá?
13 Yesu Kristu i Nlongi anene wazinga kala ova ntoto. Wazolanga sadila yingana yovo nona vava kalonganga. (Matai 13:34) O sadila yingana i mpila yambote ya longela kadi isasilanga mambu mampasi mu mpila yaleboka ilenda kutufila mu yindula yo simba ntima mieto. Tuka kolo, nkanda mieto misasilanga yingana ya Yesu mu mpila yaleboka ye yatoma kiá. Muna bong’e nona, Eyingidilu dia 15 Yuli, 2008, dikutusadisanga mu toma bakula kingana kia Yesu kia mfuna, kia disu dia lulungu ye kia konde. Owau tulenda bakula vo yingana yayi Kintinu kia Nzambi iyikanga, eki kisadisanga wantu ayingi mu bembola e nza yayi yambi yo kituka alongoki a Kristu.
O sadila yingana i mpila yambote ya longela kadi isasilanga mambu mampasi mu mpila yaleboka ilenda kutufila mu yindula yo simba ntima mieto
14. (a) Aweyi twasasilanga kingana kia Nsamaria? (b) Aweyi tubakulwilanga kingana kiaki kia Yesu o unu?
14 Aweyi tulenda bakulwila yingana ya Yesu? Yakaka muna yingana yayi diambu diankaka isunzulanga yovo ungunza. Eyaka malongi mamfunu ikutulonganga. Kansi, aweyi tulenda zayila kana nkia kingana kisunzulanga diambu diankaka? Ekolo mvu miviokanga, e mvutu zitoma kieseswanga. Kasikil’owu, yindula una twasasilanga kingana kia Yesu kia Nsamaria wa nkwa nkenda. (Luka 10:30-37) Muna mvu wa 1924, Eyingidilu diavova vo Nsamaria ndioyo Yesu kasunzulanga, e nzila yatuka kuna Yerusaleme yo kwenda kuna Yeriko isunzulanga zingu kiampasi kia wantu tuka ukolami muna Edene. Vana ntandu, e mivi miakala muna nzila misunzulanga akwa kinkita bazala ye loko, vo i nganga yo Nlevi, Kikristu kia Kimpangilanga besunzulanga. Kansi o unu, e nkanda mieto misadilanga kingana kiaki mu sungamesa Akristu awonso mu lembi sianga mpambula. Tufwete sadisanga awonso bena mu mpasi, musungula kubasadisa balongoka e ludi mu kuma kia Nzambi. Kiese kiayingi dikututwasilanga mu mona vo Yave otoma kiesesanga e ludi.
15. Adieyi tulongoka muna longi dilanda?
15 Muna longi dilanda, tubadika kingana kia Yesu kia ndumba kumi. (Matai 25:1-13) Aweyi Yesu kazolele alandi andi bafwete bakulwila kingana kiaki mu lumbu yayi yambaninu? Nga konso muntu, lekwa yovo diambu diyikwanga muna kingana kiaki muntu yovo diambu diankaka divangama kuna sentu diyikanga? Yovo ozolele vo twalongoka mambu mamfunu malenda kutusadisa mu lumbu yayi yambaninu? Tubak’e mvutu za yuvu yayi.
^ tini. 4 Eyingidilu dialeboka entete diavaikiswa muna Kingelezo muna ngonde a Yuli ya mvu wa 2011. Tuka wauna, Eyingidilu dialeboka divaikiswanga mpe mu ndinga zankaka.
^ tini. 5 E nsekola yayi yampa ivaikiswa mpe mu ndinga zankaka.
^ tini. 10 Muna bong’e nona, o nkanda Tanginina Lukwikilu Lwau uvovelanga lusansu lwa wantu 14 beyikwanga mu Nkand’a Nzambi. O nkanda wau usianga sungididi mu mana tulenda longoka mu tusansu twatu, ke mu mana tusunzulanga ko.
^ tini. 12 Diambu dia Nzambi divwidi mpe mambu mayingi malenda moneka vo ‘mampasi mu bakula’ kumosi ye maka mambu mena muna nkanda mia Paulu. Kansi, asoneki awonso a Nkand’a Nzambi bavumunwinwa kwa mwand’avelela. O mwand’a Nzambi usadisanga Akristu akieleka o unu mu bakula Nkand’a Nzambi, kumosi “y’oma masina ma Nzambi.”—2 Petelo 3:16, 17; 1 Korinto 2:10.
