1. Ánni nga kʼoatsosíni je Biblia nga nʼio tsjoa koanle je Jesús. (Chótsenlai sén xi faʼaitʼa ibi.)

ÑANDIA kʼianga jankan kao te chjotale kisikasén je Jesús nga kikakóyason tʼatsʼe Chjotaxále Niná. Tonga je chjotale nʼio nkjín chjotakontra kisʼele. Tobʼelañá, je chjotatítjonle relijión judío. Chjota jebi nʼio chjine koan kʼoa skuelangʼa kiskotʼaya. Kui xi koanmele chjota xokjoan nga to chjineyá sʼin katabekon chjota je Jesús (Marcos 6:3). Kʼoati kui xi koanmele nga toxkia chjota sʼin katabekon chjota je chjotale Jesús nga tsín jme xo̱n koanle (Hechos 4:13). Kʼianga kisikasén chjotale ñaki jemele skoe̱ josʼin kichotsjoá xále. Kʼianga jaʼaini nʼio tsjoa tjíole. Kitsoyason ninga chjota tsakatiochjoale, kʼoa ninga saʼnda tsakatiochjoale je na̱i xi ndajin. Je Biblia kʼoatso nga “nʼio koantsjoale” je Jesús. Ánni nga nʼiojin koansíni je chjotale Jesús kʼoa nga nʼio tsjoa kisatiosínile (tʼexkiai Lucas 10:1, 17-21).

2. 1) Ánni nga kʼoakitsosíni je Jesús nga ya mangóson xtiʼndí je chjotale. 2) Jméni xi tsakinyakao je chjotale Jesús nga koanjinle jmeni xi ñʼai tíjna xi faʼaitʼa Biblia.

² Je Jesús i kitsole je Jeobá: “Tsjoale kjoanda, Nʼai, Nai xi tsi ngʼajmi, xi tsi sonʼnde, nga ji tsakʼejnaʼmalai je kjoabi chjotachjine kao xi machoyale, kʼoa tsakakosontsenlai xi [xtiʼndí]” (Mateo 11:25, 26). Ánni nga kʼoakitsosíni Jesús nga ya mangósonkao xtiʼndí je chjotale.  Kuinga tsín ngʼakon koan chjotale nga tosa nangitokon koan. Je chjotatítjonle relijión judío tse xo̱n kiskotʼaya kʼoa tsakʼasjengʼa yaole. Tonga je chjotale Jesús kitsjoaʼnde nga tsakʼinyale tojo sʼín tsa xtiʼndí (Mateo 18:1-4). Kʼianga nangitokon koan, je Jeobá kitsjoale je nganʼiotsjele nga koanjinle jmeni xi ñʼai tíjna xi faʼaitʼa Biblia. Tonga je chjotatítjonle relijión judío jé Na̱i tsakʼéchjoangi xko̱n kʼoa kui kjoangʼakonle xokisikao nga tsín koanjinnile jmeni xi bakóya je Niná.

3. Jméni xi jchaa i̱ kjoaʼmiya jebi.

³ Je Jesús nʼio tsjoa koanle josʼin tsakasenkao Jeobá je chjota xi tjínle kjoanangitokon nga katamajinle jmeni xi ñʼai tíjna xi faʼaitʼa Biblia. A tojo kʼoatísʼín nichxin xi tiyoaa ndʼaibi. A tojo kʼoasʼin títsoyale chjota xi tjínle kjoanangitokon nga katamajinle je énle. Jaon, je Niná alikui tíbʼantjaiya. Jósʼin ʼyañá. Kui chótʼayá i̱ kjoaʼmiya jebi. Kataʼyala josʼin basenkao ndʼaibi Jeobá je chjota xi tjínle kjoanangitokon nga katamachoyale jmeni xi ñʼai tíjna xi faʼaitʼa Biblia.

4. Ánni nga kʼoabixónsíñá nga jngoní kjoatjao je Xo̱n xi Bájinkonná je xi sasa majinniná én xi faʼaitʼa.

⁴ Je nó xi sʼa tibitjatoá, ngisa kjimajinná josʼin títsoya je naxinandále Niná kʼoa choa ñʼai tíjna josʼin títsoya. Janla koya choa̱ kataʼyaa. Xi títjon, je naxinandále Jeobá kui tsakʼasje Xo̱n xi Bájinkonná je xi sasa majinniná én xi faʼaitʼa. * (Tʼexkiai nota.) Rebista jebi jngoo kjoatjao xi nʼio nda tjíobinyakao je xi ñʼai male nga bʼéxkia kʼoa kao xi tsín nanda majinle je én xi faʼaitʼa. Xi ijngosani, je xi xijchá ma tjíobe nga ngisa nda majinle ʼndíxtile jmeni xi faʼaitʼa rebista jebi. Nʼio nkjín familia xi tjíosíkasén xo̱n nga tjíotsjoá kjoanda. Jngo tichjaa xi kʼoatso nga tsín mjénngʼa ntsja ngasʼa nga tsjoá énle, tonga nga kitjo rebista jebi alikui titsokjónni. Kʼoa saʼnda nkjín kʼa mjénngʼa ntsja kʼianga tsjoá énle.

5. Jósʼin tjíobinyakao ndsʼee je Traducción del Nuevo Mundo xi sʼa kitjo chjotse kʼianga én inglés.

⁵ Xi majaoni, je naxinandále Niná kisichjotseyaa je Biblia Traducción del Nuevo Mundo kʼianga én inglés kʼoa kʼiaa nga 5 sá octubre nó 2013 kitjo. * (Tʼexkiai nota.) Nʼio nkjín bersíkulole Biblia jebi xi jetochoa én síchjén tonga tikʼoasʼin tsoyanile. Ngisa sasa majinniná jmeni xi tso. Tobʼelañá, ya Job 10:1 kanñato én faʼaitʼa tsakai tonga ndʼaibi to xjaʼaonñosa faʼaitʼa. Kʼoa ya Proverbios 8:6 kan én faʼaitʼa tsakai tonga ndʼaibi to tejansa faʼaitʼa. Nga jao bersíkulo jebi ngisa nda majinná ndʼaibi. Jngo ndsʼee xi ya ngʼajmi tjínle kjoachoya, xi jenʼio nkjín nó tísíxále je Jeobá, kʼoakitso nga joxi tokʼia koanjin títjonle jmeni xi tso je libro xi tsʼe Job kʼianga tsakʼéxkia Biblia chjotse jebi. Nʼio nkjín ndsʼee xi kʼoati tso jotso ndsʼee jebi.

6. Jósʼin nikjaʼaitsjain ji jmeni xi sʼa tsakakóya chjotse je naxinandále Niná tʼatsʼe Mateo 24:45-47.

⁶ Xi majanni, je nó xi tífaʼato, je naxinandále Jeobá ngisa kjimajinle josʼin tjíotsoya kʼa je bersíkulole Biblia. Tobʼelañá, je Xo̱n xi Bájinkonná xi tsʼe 1 sá julio nó 2013 ngisa nda kitsoyaná josʼin tsoyanile je én xi faʼaitʼa ya Mateo 24:45-47. Kʼoakitso nga “je choʼnda xi nʼiotʼakon, xi nda be xá” jéní Cuerpo Gobernante je xi tíbándiaale je testigole Jeobá. Kʼoati kitso nga je “xikʼa choʼndale”  Jesús jéní xi ya koai ngʼajmi kʼoa kao je “xi kjaʼaí barré”. Kʼoa jéní xi bʼaile je kjoankjíntokon xi tsʼe Niná xi tjíobʼénda je Cuerpo Gobernante (Juan 10:16). Nʼio tsjoa sʼe tokoán nga ʼyaa xi tʼatsʼe jebi kʼoa nga ʼmiyalee xi kjaʼaí chjota. Kataʼyalasa kʼaa nga nʼio choa ñʼai tíjna josʼin bakóya je Jeobá.

7, 8. Tatiola kʼai choa̱ tʼatsʼe xi bʼéyanajmí je Biblia xi tjín xi kitsoyanile.

⁷ Jokji nga tífaʼato nó, je naxinandále Niná tísíkʼantjaiyaa josʼin títsoya jme xi bʼéyanajmí je Biblia. Nichxin kjoatse kʼoasʼin kitsoya nga je xi bʼéyanajmí je Biblia kui kitsoyanile jmeni xi koa̱n. A kixi tíjna nga kʼoasʼin sa̱kóya jmeni xi bʼéyanajmí je Biblia. Jaon, saʼnda je Jesús kʼoatisʼin kitsoya. Tobʼelañá, kʼoakitso nga jotjín nichxin tsakʼejnaya tsʼoa̱ jti̱ je Jonás kui kitsoyanile jotjín nichxin koájnaya tsjó je Jesús (tʼexkiai Mateo 12:39, 40).

⁸ Tonga ali tsa tokuijin choa̱ jebi xi tsakʼéjna Jesús xi tjín xi tsoyanile. Tobʼelañá, je pastro Pablo kʼoakitso nga je Abrahán kao Agar kʼoa kao Sara nga kui kitsoyanile josʼin tjío ngixko̱n Jeobá je naxinandá Israel kao je jtínle Niná xi tíjna ya ngʼajmi (Gálatas 4:22-26). Je Pablo kʼoati kitso kʼianga je kjoatéxoma xi tsakʼaile naxinandá Israel nga kʼoati nkjín koya jme xi tsoyanile xi koan nga koanskanni. Tobʼelañá, je ndʼianajño, je yo̱ngo̱, nichxin nga koantsje je jéele chjota israelita kʼoa kao je naʼmi tjín xi kitsoyanile (Hebreos 9:23-25; 10:1). Kʼianga chotʼayá xi tʼatsʼe jebi kʼoa ʼyaa josʼin tsoyanile, ngisa matajasa je kjoamakjainná. Tonga a kui xi tsonile kʼianga ngatsʼi chjota xi síkʼaxki̱ ya Biblia kʼoa jmesani xi síkʼaxki̱ nga tjín xi tsoyanile.

9. Jósʼin tsakakóya ngasʼa je naxinandále Niná xi tʼatsʼe Nabot.

 ⁹ Nichxin kjoatse, je xo̱n xi bʼasje naxinandále Niná kjitʼa kʼoatso nga je chjota xi síkʼaxki̱ kʼoa tsa jmeni xi bʼéyanajmí je Biblia nga tjín xi tsoyanile. Tosi̱kjaʼaitsjenla je xi bʼéyanajmí ya 1 Reyes 21:1-16, jñani síkʼaxki̱ je rey Acab kao reina Jezabel. Je chjoón jebi je tsakʼéxá nga jngo chjota israelita katanikʼien xi Nabot tsakʼin kʼianga tsʼe Acab koa̱n je ʼnde jña kjile xka̱totsee. Kʼianga nó 1932, rebista jebi kʼoakitso kʼianga je Acab kao Jezabel nga je kitsoyanile je Na̱i kao jtín xi tsʼe. Kʼoati kitso nga je Nabot je kitsoyanile je Jesús kʼoa nga kʼoasʼin kinikʼien je Nabot kui tsoyanile nga kinikʼien je Jesús. Tonga kʼianga nó 1961, je libro “Santificado sea tu nombre”, xi én inglés kitjo kʼoakitso nga je Nabot je tsoyanile je chjotale Cristo xi koai ngʼajmi kʼoa nga Jezabel je tsoyanile je relijión ndiso xi chjotale Cristo tsole yaole. (Libro jebi kʼiaa nga nó 1964 kitjo nga én kastía.) Kʼoa nga kʼoasʼin koanjticha je Nabot kui kitsoyanile nga nichxin fetʼa xi tiyoaa ndʼaibi, koaitjenngike chjota je chjotale Cristo xi ya koai ngʼajmi. Nʼio nkjín nó nga kʼoasʼin kitsoya je naxinandále Niná kʼoa kisitaja kjoamakjainná. Tonga nichxin xi tiyoaa ndʼaibi jekjaʼaísʼin tsoya. Ánni.

10. 1) Jósʼin bakó ndʼaibi je choʼnda xi nʼiotʼakon, xi nda be xá nga ngisa tísínkjínle kon josʼin bʼéyanajmí jmeni xi tso Biblia. 2) Jméni xi ngisa bakóya ndʼaibi je xo̱n xi nichjén.

¹⁰ Josʼin kisakoya ngasʼa jmeni xi bʼéyanajmí je Biblia sakʼoa ñʼai koanjinná, alikui kisʼeya jkoaa, kʼoa ñʼai koanná nga kʼoakinʼia jmeni xi tso. Xi ijngosani, kʼianga kui ngisa kitsoya je xo̱n xi nichjén josʼin tsoyanile jmeni xi bʼéyanajmí je Biblia sakʼoa likuini kitsoya josʼin koa̱nchjénná jmeni xi faʼaitʼa. Kuinga jokji tífaʼato nó, je Jeobá tíbasenkao “je choʼnda xi nʼiotʼakon, xi nda be xá” nga ngisasa tísínkjínle kon jotísʼín. Jméni xi tísʼín choʼnda jebi nichxin xi tiyoaa ndʼaibi. Tokʼiakjoán kʼoatso nga tjín xi tsoyanile jmeni xi bʼéyanajmí Biblia kʼianga ñaki be nga tjín xi tínchja̱ni. Xi ijngosani, je xo̱n xi nichjén ndʼaibi tosa kui kʼoatso josʼin koa̱nchjénná jme xi bʼéyanajmí je Biblia. Nchjani xi tʼatsʼe kjoamakjain, kjoaka, nga koa̱ntsjoachaa Niná kʼoa xi kjaʼaísanile xi koasenkaoná. * (Tʼexkiai nota.)

11. 1) Jósʼin ʼmiyaa ndʼaibi je xi tʼatsʼe Nabot. 2) Jméni xi bakóyaná je choa̱le Nabot.

¹¹ Si̱kʼaxki̱la ijngokʼangáñá xi tʼatsʼe Nabot. Jósʼin ʼmiyaa ndʼaibi. Ngisa choa ñʼai sʼin ʼmiyaa. Ali tsa tikui kʼoabixónñá nga kui xá kinikʼienni je Nabot nga je tsoyanile je Jesús kʼoa tsa je chjotale xi ya koai ngʼajmi. Tosa kui kʼoabixoán, nga kuinga kinikʼienni je Nabot nga ñaki kixi koanle je Jeobá. Ninga xá tjínle je chjota xi kitjenngike, je Nabot kisitjoson je kjoatéxomale Niná (Números 36:7; 1 Reyes 21:3). Jméni xi bakóyaná. Kʼiatsa ʼyani xi kʼoasikaoná jokinikao je Nabot, kʼoati kixi katamaa (tʼexkiai 2 Timoteo 3:12). Kʼianga kʼoasʼin ʼmiyaná ndʼaibi, ngisa majinná, sʼeya jkoaa kʼoa ʼyañá josʼin si̱chjén jme xi bʼéyanajmí Biblia. Je choa̱le Nabot ñaki sítajaa kjoamakjainná.

12. 1) Ánni nga tsín koa̱n kjaʼaísʼin si̱kjaʼaitsjensíñá tʼatsʼe xi bʼéyanajmí je Biblia. 2) Jméni xi basenkao je chjotale Cristo nga majinle ninga xi ñʼai tíjna xi faʼaitʼa Biblia. (Chótsenlai nota.)

¹² Tonga kʼoati tsín koa̱n kʼoasʼin si̱kjaʼaitsjeen nga tsín jme xi tsoyanile xi bʼéyanajmí je Biblia, nga tokui tsoyaná josʼin koa̱n si̱chjén.  Nga̱ tjíoní xi kʼoati nʼio machjén nga jchaa jme xi tsoyanile. Ninga kʼoalani, je xo̱n xi nichjén ali tsa tikui nʼio kʼoatsoni jmeni xi tsoyanile je xi bʼéyanajmí je Biblia. Tosa kui ngisa tsoya josʼin tínchja̱ni jngo testo kao xi kjaʼaí testo kʼoa josʼin si̱chjén. Tobʼelañá, kʼianga ʼyaa nga ñaki kixi koan je Nabot saʼnda nga kinikʼien, kui síkjaʼaitsjenjinná nga ñaki kixi koan je Cristo saʼnda nga kinikʼien kʼoa nga kʼoati ñaki kixi kjima tsanda je chjotale Cristo xi ya koai ngʼajmi. Kʼoati tsoyaná nga nʼio nkjín xi i̱ koatio sonʼnde xi kixi kjima saʼnda nga tjíobiya. Tiʼyañá kʼianga ñaki to choa ñʼai sʼin tíbakóyaná je Jeobá. * (Tʼexkiai nota.)

13. Jméni choa̱ xi tsakatío Jesús xi ngisa choa ñʼai sʼin ʼmiyaa ndʼaibi.

¹³ Kʼianga choa̱ satíoná nʼio basenkaoná. Ánni. Kuinga ngisa ngotjo majinniná jmeni xi ñʼai tjío. Xi ijngosani, síkjaʼaitsjenjinná kʼoa tsaojin ni̱ma̱ná. Je Jesucristo jéní xi ngisa nʼio nda kitsoya, kʼoa nʼio koantsjoake nga choa̱ kisikatío (Mateo 13:34). Je nó xi tífaʼato, je xo̱n xi nichjén ngisa choa ñʼai sʼin títsoya je choa̱ xi tsakatío Jesús. Tobʼelañá, je rebista La Atalaya xi tsʼe 15 de julio de 2008 tsakasenkaoná nga ngisa nda koanjinná jme xi tsoyanile je naʼyo̱san, na̱xi̱n xi tsʼe mostaza kao je naʼya xi je kji. Kao choa̱ jebi ngisa nda majinná jmeni xi tísʼín je Chjotaxále Niná nga nʼio nkjín chjota xi choʼndale Niná kjima.

14. 1) Jósʼin ʼmiyaná ngasʼa je choa̱ xi tsakʼéjna Jesús tʼatsʼe chjota samaritano. 2) Kʼoa jósʼin ʼmiyaná ndʼaibi choa̱ jebi.

¹⁴ Je choa̱ xi tsakatío Jesús nʼio tse jme xi tínchja̱ni. Jmeni xi kitso tjínkʼa xi skan kitjoson kʼoa xi sʼa kuitjoson. Kʼoa tjínkʼa xi to tjín xi bakóyaná. Tonga jósʼin jchañá jñánile je én xi skan kitjoson kʼoa xi sʼa kuitjoson kʼoa jñánile xi mai. Jokji nga tífi nó sa nda sa nda kjimajinná. Tobʼelañá, tokuila si̱kjaʼaitsjenjiaan josʼin ʼmiyaa ngasʼa je choa̱ xi tsakʼéjna Jesús tʼatsʼe chjota samaritano (Lucas 10:30-37). Kʼianga nó 1924, rebista jebi kʼoakitso nga je Jesús tsoyanile je chjota samaritano. Kʼoa kʼoakitso nga je ndiaa xi fijen Jerusalén saʼnda Jericó jé tsoyanile josʼin tjío chjotasonʼnde saʼnda nga yátsʼi̱n tsakinyále Niná je Adán kao Eva. Kʼoati kitso kʼianga je ché xi kitsoa chjota samaritano jé tsoyanile negosioyʼai xi nkjín nai tjínle kao chjota xi negosio sʼín. Kʼoa je naʼmi kao chjota levita jé tsoyanile je relijión ndiso xi chjotale Cristo tsole yaole. Tonga ndʼaibi je xo̱n xi nichjén kʼoatsoná nga choa̱ jebi kui bakóyaná nga tsín koa̱n chja̱ʼajiaan chjota xi xin naxinandále, jokjoan yaole kʼoa tsa jme kostumbre tjínle kʼoa nga kuinyakoaa nga katabe je Jeobá. Nʼio tsjoa sʼe tokoán kʼianga sa tíbʼéjnatsen sa tíbʼéjnatsen Jeobá je xi kixi tíjna.

15. Jméni xi chótʼayá kjoaʼmiya xi ijngo.

¹⁵ Je kjoaʼmiya xi ijngo kui kuitsoyaná je choa̱ xi tsakʼéjna Jesús xi tʼatsʼe te yánchjínxo̱ngó (Mateo 25:1-13). Jósʼin koanmele Jesús nga katamajinná choa̱ jebi je nichxin fetʼa xi tiyoaa ndʼaibi. A tjín xi tsoyanile nga jngó jngó chjota xi síkʼaxki̱ kʼoa jmeni xi síkʼaxki̱. Axo tokui bakóyaná josʼin koa̱nchjénná nichxin xi tiyoaa ndʼaibi. Kataʼyala.