1. ¿Keyej kijtoua Biblia ke Jesús “moyolpaktij”? (Xikonita taixkopin ipeujyan tamachtilis.)

JESÚS kintitanik 70 imomachtijkauan maj kitetapouitij iTekiuajyo Dios. Sayoj ke akin kintauelitayaj uan okachi kipiayaj chikaualis kinixnamikiskiaj. Kemej neskayot, moajsiaj taixyekananij judíos itech taneltokalis, akin kipiayaj tamatilis uan kiselijkaj ueyi nemachtil. Yejuan kinekiaj maj taltikpakneminij kiitanij Jesús kemej sayoj se koujxijxinkej (Mar. 6:3). Uan kinekiaj maj kinitanij imomachtijkauan kemej takamej akin “amo keman momachtijke” uan “sayo milaj tekitini” (Hech. 4:13). Yejua ika Jesús kiyolnejnekia maj imomachtijkauan mokepanij uan maj kitapouianij ox uelik kichiujkej tekit tein kinmakak. Keman mokepkej, Jesús kiitak ke yejuan semi yolpakiaj. Maski hasta amokuali ejekamej kinixnamikkej, yejuan kichiujkej tein Jesús kinnauatijka. Yejua ika Biblia kijtoua ke ijkuak Jesús kinitak “moyolpaktij”. Tikyekmatij ke yejua ixuetskatoya uan itech iixtololouan moitaya ke semi yolpakia. Sayoj ke ¿keniuj imomachtijkauan uelik kinextijkej yolchikaualis uan kisentokayaj yolpakiaj? (Xikonixtajtolti Lucas 10:1, 17-21.)

2. 1) ¿Keyej kijtoj Jesús ke imomachtijkauan katkaj kemej konemej? 2) ¿Toni kinpaleuij imomachtijkauan Jesús maj kiajsikamatinij tamachtilis tein ouij tein kitemaka Biblia?

 ² Jesús kiluij Jiova: “Nimitsonueyimouistilia, Notajtsin Dios, tion Tekotsin den eluiyaktsinko uan den nikan taltikpak. Porin Tejuatsin tikintatilij ya nijin taixmatilis [...] in taixmatini uan in tamachilejke. Uan Tejuatsin tikinnextilij ya in yek taixmatilis de nijin moyankuikataneltokakauan ten yoltanemilijtinemij keme koneme”. Uan satepan kijtoj ke Dios kiuelita ijkon tamachtis (Mat. 11:25, 26). ¿Keyej kijtoj Jesús ke imomachtijkauan katkaj kemej “koneme”? Porin yejuan amo moueyichiuayaj, ta katkaj yolyemankej. Taixyekananij judíos itech taneltokalis kiselijkaj ueyi nemachtil uan kinemiliayaj ke katkaj tamatinij, sayoj ke imomachtijkauan Jesús mokauayaj maj kinmachtiani, ijkon kemej kichiuaj konemej (Mat. 18:1-4). Kemej katkaj yolyemankej, Jiova ika iespíritu kinpaleuij maj kiajsikamatikan tamachtilis tein ouij tein kitemaka Biblia. Sayoj ke tayekananij judíos akin moueyichiuayaj mokaujkej maj Satanás kinixyekanani, uan yejua ika amo uelik kiajsikamatkej tein Dios tamachtia.

3. ¿Toni tikitaskej itech nejin tamachtilis?

³ Jesús semi yolpakik keman kiitak keniuj Jiova kinpaleuia akin yolyemankej maj kiajsikamatikan tamachtilis tein ouij tein kitemaka Biblia. ¿Uan axkan? ¿Kisentoka kiuelita Jiova kinmachtis akin yolyemankej kemej uelis kiajsikamatiskej tein tamachtia? Kemaj, yejuatsin amo mopata. ¿Keniuj tikmatij nejon? Itech nejin tamachtilis tikitaskej keniuj Dios kinpaleuia axkan akin yolyemankej maj kiajsikamatikan tamachtilis tein ouij tein kitemaka Biblia.

4. ¿Keyej ueli tikijtouaj ke semi tapaleuia amaix Tanejmachtijkej tein kikui tajtolmej tein amo ojouij?

⁴ Itech xiujmej tein panouanij, inechikol Dios kiyeknextiani ke motelneki maj motamachti kemej amo tepojpolos uan amo ouij se kiajsikamatis. ¿Keniuj? Maj tikitakan eyi neskayomej. Yekinika, peuak mokixtia amaix Tanejmachtijkej ika tajtolmej tein amo ojouij. * Nejin amaix kinpaleuijtok tel miakej taltikpakneminij, kemej akin tepitsin kinouijmaka taixtajtoltiskej oso kiajsikamatiskej tajtol. Uan no, tetatmej kiitaj ke nejin amaix kintelpaleuia ininkoneuan maj okachi kuali kiajsikamatikan tamachtilis. Uan miakej kalyetouanij kititanij amat kampa kitasojkamatij maj mokixti nejin amaix. Se tokniuj siuat kijtoua ke ika okse amaix Tanejmachtijkej kiouijmakaya tanankilis itech nechikolmej, sayoj ke axkan ika nejin amaix tein kikui tajtolmej tein amo ojouij amo kimouiliaok tanankilis. Axkan miakpa tanankilia.

5. ¿Toni taman tein kuali kipia Traducción del Nuevo Mundo itech tajtol inglés tein oksepa kiyekitakej?

 ⁵ Ojpatika, itech inechikol Dios oksepa kiyekitakej Traducción del Nuevo Mundo itech tajtol inglés uan kikixtijkej itech tonal 5 metsti octubre xiuit 2013. * Itech nejin Biblia, miak versículos axkan amo kipiaok miak tajtolmej, sayoj ke amo mopata tein kijtosneki. Uan no, amo teouijmaka se kiajsikamatis. Kemej neskayot, Job 10:1 achto kipiaya 27 tajtolmej, sayoj ke axkan kipia 19. Uan Proverbios 8:6 achto kipiaya 20 tajtolmej, sayoj ke axkan kipia 13. Nejin ome versículos axkan okachi kuali se kiajsikamati. Se tokniuj takat taixpejpenal akin miak xiujmejya kitekitilijtok Jiova kiixtajtoltij amatajkuilol Job itech nejin Biblia tein oksepa kiyekitakej uan kijtoj ke kimachiliaya kemej yeskia yekinika kiajsikamatik. Miakej tokniuan no kijtouanij kemej nejon.

6. ¿Keniuj tikonita tejuatsin ijkon kemej momelaua axkan Mateo 24:45-47?

⁶ Expatika, itech xiujmej tein panouanij, inechikol Dios okachi kuali kiajsikamatini tein kijtosneki seki versículos. Kemej neskayot, itech amaix Tanejmachtijkej 1 metsti julio xiuit 2013 okachi kuali momelauak Mateo 24:45-47. Ompa momelauak ke takeual takuaujtamach uan tamatkej yejuan tokniuan Oloch Taojtokaltianij, oso akin kinixyekanaj itaixpantijkauan Jiova. No momelauak ke “oksekin takeualme” yejuan tokniuan taixpejpenalmej uan ‘okseki ichkamej’, porin nochin yejuan kiseliaj tamachtilis tein kitemaka takeual (Juan 10:16). ¿Melauj ke techyolpaktia tikajsikamatiskej nejin uan tikinmatiltiskej oksekin? Axkan maj tikitakan okseki taman kemej Jiova kinextia ke kiuelita tamachtis kemej amo ouij se kiajsikamatis.

7, 8. Xikonijto seki tanojnotsmej tein moajsij itech Biblia tein kiixnextiaj aksa oso teisa tein okachi moneki tein mochiuaskia satepan.

⁷ Ijkon kemej panouanij xiujmej, inechikol Dios kipatatiyani kemej kimelauani seki tanojnotsmej tein moajsij itech Biblia. Ne uejkauj moijtouaya ke miak tanojnotsmej kiixnextiayaj teisa tein okachi monekia tein mochiuaskia satepan. ¿Onkak keyej ijkon se kimelauas seki tanojnotsmej tein moajsij itech Biblia? Kemaj. Tein melauj, Jesús ijkon kimelauak seki tanojnotsmej. Kemej neskayot, yejua kijtoj ke tonalmej tein Jonás moajsia iijtik ueyi amichij kiixnextiaya tonalmej tein Cristo moajsiskia itech taltekoch (xikonixtajtolti Mateo 12:39, 40).

⁸ Sayoj ke no moajsij okseki tanojnotsmej itech Biblia tein no kiixnextiaj aksa oso teisa tein okachi moneki. Kemej neskayot, tatitanil Pablo kimelauak ke ijkon kemej nemik Abrahán iuan Agar uan Sara kiixnextiaya ijkon kemej mouikak Jiova iuan xolal Israel uan inechikol Dios tein moajsi ne iluikak (Gál. 4:22-26). Pablo no kimelauak ke Tanauatil tein Dios kimakak Israel ika tajtouaya miak taman tein kiixnextiaya aksa oso teisa tein mochiuaskia satepan. Seki nejon taman katka tabernáculo, templo, Tonal keman Kintapojpoluiayaj ininTajtakoluan uan tayekankatiopixkat (Heb. 9:23-25; 10:1). Keman timomachtiaj nejin tanojnotsmej uan tikmatij toni kijtosneki, okachi mochikaua totakuaujtamatilis. Sayoj ke ¿kijtosneki nejin ke nochin akin ininka motajtoua uan nochi tein ika motajtoua itech Biblia kiixnextiaj aksa oso teisa?

9. ¿Keniuj achto momelauaya tanojnots kampa ika motajtoua Nabot?

⁹ Achto, toamaixuan miakpa kimelauayaj  ke nochin taltikpakneminij uan tein ika motajtoua itech seki tanojnotsmej tein moajsij itech Biblia kiixnextiayaj aksa oso teisa tein mochiuaskia satepan. Maj tiknemilikan tein kijtoua 1 Reyes 21:1-16, kampa techtapouia tein kichiujkej tekiuaj Acab uan Jezabel, akin katka inamik. Jezabel kichiuak maj kimiktianij se israelita akin monotsaya Nabot uan ijkon Acab ueliskia moaxkatilis iuvajtal. Itech xiuit 1932, nejin amaix kimelauak ke Acab uan Jezabel kiixnextiayaj Satanás uan akin kipaleuiaj. No kimelauak ke Nabot kiixnextiaya Jesús uan ke imikilis Nabot kiixnextiaya imikilis Jesús. Sayoj ke itech xiuit 1961, amatajkuilol “Santificado sea tu nombre” itech tajtol inglés kimelauak ke Nabot kinixnextiaya tokniuan taixpejpenalmej uan ke Jezabel kinixnextiaya taneltokalismej tein amo melaujkej kampa kijtouaj kichiuaj kemej Cristo. (Nejin amatajkuilol mokixtij itech tajtol español itech xiuit 1964.) No kimelauak ke ijkuak Nabot kitajyouiltijkej kiixnextiaya keniuj kintajyouiltiskiaj tokniuan taixpejpenalmej itech itamian tonalmej. Itech miak xiujmej, semi kichikauak inintakuaujtamatilis itekitikauan Dios keman ijkon momelauaya nejin tanojnotsmej tein moajsij itech Biblia. Sayoj ke axkan taman kemej momelaua. ¿Keyej?

10. 1) ¿Keniuj kinextia takeual ke axkan okachi tamatkej keman kimelaua tanojnotsmej tein moajsij itech Biblia? 2) ¿Toni okachi kitayekanaltiaj axkan itech toamaixuan?

¹⁰ Kemej achto momelauaya ke xa kiixnextia seki tanojnotsmej tein moajsij itech  Biblia, teouijmakaya se kiajsikamatis, se kielnamikis uan se kichiuas tein techmachtia. Uan no, kemej itech amaixmej kitelmelauayaj nejon, amo moitayaok keniuj techpaleuia itech tonemilis. Yejua ika, ijkon kemej panouanij xiujmej, Jiova kipaleuiani takeual takuaujtamach uan tamatkej maj kinexti okachi tamatilis. ¿Keniuj axkan takeual kinextia ke okachi tamatkej? Axkan sayoj kijtoua ke se tanojnots kiixnextia teisa tein okachi moneki keman Biblia kiyeknextia nejon. Uan no, axkan toamaixuan okachi techmachtiaj kemej amo ouij se kiajsikamatis uan tein techpaleuia maj okachi titakuaujtamatikan, titaxikokan, maj tiktasojtakan Dios uan maj tikpiakan okseki kualneskayomej tein motelnekij ijkon kemej techmachtia sejse tanojnots tein moajsi itech Biblia. *

11. 1) ¿Keniuj tikmelauaj axkan tanojnots kampa ika motajtoua Nabot? 2) ¿Toni techmachtia kuali neskayot tein kikauak Nabot? 3) Itech xiujmej tein panouanij, ¿keyej toamaixuan amo semi ika tajtouajok toni kiixnextiaj tanojnotsmej tein moajsij itech Biblia? (Xikonita tamachtilis “Tein tajtanij akin taixtajtoltiaj” itech nejin amaix.)

¹¹ Maj oksepa tikitakan tanojnots kampa ika motajtoua Nabot. ¿Keniuj tikmelauaj axkan? Momelaua kemej amo tepojpolos uan amo ouij se kiajsikamatis. Amo tikijtouajok ke Nabot momikilij porin kiixnextiaya Jesús oso tokniuan taixpejpenalmej. Nabot momikilij porin amo kinekik kikauas Jiova. Maski se tekiuaj akin kipiaya ueyi chikaualis kiixnamikik, yejua kitakamatik tanauatilmej tein Dios kitemakaka (Núm. 36:7; 1 Rey. 21:3). ¿Toni techmachtia? Komo techtajyouiltiaj ijkon kemej Nabot, moneki amo tikauaskej Dios ijkon kemej yejua kichiuak (xikonixtajtolti 2 Timoteo 3:12). Nejin tein techmachtia, tinochin akin tikchiuaj kemej Cristo ueli tikajsikamatij, tikelnamikij uan tikchiuaj. Tein melauj, tanojnots kampa ika motajtoua Nabot kichikaua totakuaujtamatilis.

12. 1) ¿Toni moneki amo tiknemiliskej ke panoua ika tanojnotsmej tein moajsij itech Biblia? 2) ¿Toni kinpaleuia tokniuan maj kiajsikamatikan hasta tein ouij? (Xikonita nota.)

¹² Sayoj ke moneki amo tiknemiliskej ke tanojnotsmej tein moajsij itech Biblia sayoj tamachtiaj keniuj techpaleuia itech tonemilis uan amo teyi kiixnextia. Seki tanojnotsmej kemaj kiixnextiaj seki taman tein motelneki. Maski ijkon, axkan toamaixuan amo semi kimelauaj toni kiixnextia se tanojnots. Okachi kitayekanaltiaj kimelauaskej keniuj mouika se tanojnots iuan okse uan kimelauaj toni techmachtia. Kemej neskayot, keman tikixtajtoltiaj ke Nabot amo keman kikauak Jiova hasta ijkuak momikilij, nejon techelnamiktia ke Cristo amo keman kikauak Dios hasta keman momikilij uan ke tokniuan taixpejpenalmej no ijkon kichiuaj. Uan no, techelnamiktia ke  miakej akin pouij iniuan ‘okseki ichkamej’ amo keman kikauanij Dios hasta ijkuak momikilianij. Nejin techpaleuia maj tikyekitakan ke Jiova techmachtia kemej amo techouijmakas tikajsikamatiskej. *

13. ¿Toni neskayomej tein Jesús kijtoj axkan momelaua kemej amo tepojpolos uan kemej amo ouij se kiajsikamatis?

¹³ Neskayomej tel tapaleuiaj porin ueli se kimelaua tanemililmej tein ouijkej kemej uelis se kiajsikamatis. Uan no, techtanemililtia uan ajsi itech toyolo. Jesucristo katka okachi kuali tamachtijkej uan kiuelitaya kijtos neskayomej keman tamachtiaya (Mat. 13:34). Itech seki xiujmej tein panouanij, toamaixuan kimelauanij kemej amo ouij se kiajsikamatis neskayomej tein kijtoj Jesús. Kemej neskayot, itech amaix La Atalaya 15 de julio de 2008 techpaleuij maj okachi kuali tikajsikamatikan toni kijtosneki tein kiposonaltia pantixti, mostazajtet uan matat tein ika amichkitskiaj. Axkan okachi ueli tikitaj ke nejon neskayomej kijtosneki ke iTekiuajyo Dios tapaleuiani maj miakej taltikpakneminij peuakan kitekitilikan yejuatsin.

14. 1) ¿Keniuj achto tikmelauayaj tanojnots kampa ika motajtoua samaritano akin yolkuali? 2) ¿Keniuj tikmelauaj axkan nejin tanojnots?

¹⁴ Kemansa, Jesús kitetapouiaya neskayomej oso tanojnotsmej kampa kijtouaya miak taman. Seki nejon tanojnotsmej tein melauj kinextiayaj toni panoskia satepan, uan okseki sayoj kinextiayaj keniuj tapaleuia itech se inemilis. ¿Keniuj ueli tikmatij katiyejua tanojnotsmej kinextiayaj toni panoskia satepan uan katiyejua amo? Ijkon kemej panouanij xiujmej okachi tikyekitanij nejon. Kemej neskayot, maj tiknemilikan keniuj achto tikmelauayaj tanojnots kampa ika motajtoua samaritano akin yolkuali (Luc. 10:30-37). Itech xiuit 1924, nejin amaix kimelauak ke samaritano kiixnextiaya Jesús. Kemej ojti tein eujteuaya Jerusalén uan ajsia Jericó temouaya, momelauak ke kinixnextiaya taltikpakneminij, porin ijkuak Adán uan Eva taixnamikkej peuak okachi mochiua tein amo kuali. No moijtoj ke tachtekinij kinixnextiayaj kampa kiixyekanaj uejueyi tanamakaloyamej uan tanamakanij, uan ke tiopixkat uan levita kinixnextiayaj taneltokalismej tein amo melaujkej kampa kijtouaj kichiuaj kemej Cristo. Sayoj ke ¿keniuj tikmelauaj axkan nejin tanojnots? Itech toamaixuan, ika nejin neskayot techmachtiaj ke moneki amo tikinchikoitaskej taltikpakneminij porin okseko kayomej, taman ixtamatij oso taman tein momattokej kichiuaskej, uan ke moneki tikinpaleuiskej maj kiixmatikan Jiova. Semi techyolpaktia tikitaskej keniuj Jiova kichiua maj okachi tikajsikamatikan tamachtilis tein melauak.

15. ¿Toni ika titajtoskej itech okse tamachtilis?

¹⁵ Itech okse tamachtilis tikitaskej tanojnots kampa ininka motajtoua majtakti ichpochmej (Mat. 25:1-13). ¿Keniuj kinekia Jesús maj tikajsikamatikan nejin tanojnots itech itamian tonalmej? ¿Yekmelauj kiixnextia teisa sejse taltikpaknenkej uan sejse taman tein moijtoua itech nejon tanojnots? ¿Oso sayoj se tanojnots tein techmachtia seki taman tein motelneki tein techpaleuis itech totonaluan? Maj tikitakan.