1. Faandi mbei „di santa jeje u Gadu mbei Jesosi ko wai tee na soni?” (Luku di peentje a bigi u di woto.)

POOBA u si fa a bi dë di „di Akaa [santa jeje, NW] u Gadu mbei Jesosi ko wai tee na soni”. Kandë a bi ta lafu mukii seei, nöö a bi dë u si taa a ta piizii. Wë faandi mbei? A bi manda 70 u dee bakama fëën go paaja di bunu buka u di Könuköndë u Gadu. Sömëni makiti sëmbë bi dë di an bi lobi di bunu buka, nöö fëën mbei Jesosi bi kë sabi seei unfa dee bakama fëën bi du di wooko di a bi manda de u de go du. Dee Sabima u Wëti ku dee Faliseima di bi dë köniköni sëmbë di bi go a siköö, bi dë a dendu u dee sëmbë dee bi dë felantima u de. De bi kë taa sëmbë bi musu si Jesosi kuma wan tëmbëma nöö, söseei u de si dee bakama fëën kuma ’sösö sinkii sëmbë di an go a siköö wan bëtë’ (Tjabukama 4:13; Maikusi 6:3). Tökuseei di dee bakama u Jesosi toona ko baka di de du di wooko u de, de bi wai seei. De bi peleiki hii fa sëmbë bi pooba u tapa de, te kisi dee taku jeje seei! Andi bi heepi de u dë waiwai, söseei u de bi sa abi degihati?​—Lesi Lukasi 10:1, 17-21.

2. (a) Na un fasi dee bakama u Jesosi bi dë kuma piki mii? (b) Andi bi heepi dee bakama u Jesosi u ko fusutan dee fundufundu woto u Bëibel?

 ² Jesosi bi begi Jehovah, hën a piki ën taa: „Taata o, i wë da Masa u liba ala ku goon aki tuu. Nöö mi gafa i o, fu di fa i ta wooko. Biga i ta hoi dee soni fii tjubitjubi da dee könima u di goonliba aki ku dee sëmbë dee ta mbei taa de sabi soni poi, nöö hën i ta mbei dee lagilagi sëmbë [piki mii, NW] ko sabi de. Aai Taata, a bigi o, biga wë sö i feni ën bunu fii du.” (Mateosi 11:25, 26). Faandi mbei Jesosi bi kai dee bakama fëën piki mii? Wë u di dee bakama fëën bi dë kabakaba u lei soni kumafa piki mii ta kë lei soni. De an bi dë kuma dee Sabima u Wëti ku dee Faliseima di bi kisi hei siköö, nöö di bi ta pakisei taa de köni. De bi lei u dë sëmbë di abi sakafasi, ma na u abi gaanfasi (Mateosi 18:1-4). U di de bi abi sakafasi, mbei Jehovah bi mbei di santa jeje fëën heepi de u ko fusutan dee fundufundu woto u Bëibel. Ma Saatan ku di gaanfasi di dee hedima u dee Dju bi abi, bi mbei taa de bi fika a dungu.

3. Andi woo luku a di woto aki?

³ An ta foondo u taa Jesosi bi ta wai sö! A bi ta wai u si fa Jehovah bi mbei sakafasi sëmbë ko fusutan dee fundufundu woto u Bëibel, hii fa de an bi go a siköö wan bëtë seei. Di fasi u lei sëmbë soni gbelingbelin, a wan fasi di na taanga u fusutan, hën Gadu feni bunu, nöö Gadu an tooka. Unfa a ta lei taa a lobi di fasi u lei sëmbë soni aki jeti? A di woto aki woo luku unfa Jehovah mbei dee sakafasi sëmbë ko sabi dee fundufundu woto u Bëibel a di ten aki.

4. Na un fasi Di Hei Wakitimawosu di an taanga u fusutan bi dë kuma wan kado?

⁴ A dee jaa dee pasa, di ölganisaasi u Gadu lei u taa a dë fanöudu u lei sëmbë soni a wan fasi di dë gbelingbelin u fusutan. Boo taki u dii soni di ta lei taa sö a dë tuu. Di fosu soni, da Di Hei Wakitimawosu di de sikifi a wan fasi di an taanga u fusutan. * (Luku di pisi a basu.) A dë wan kado di heepi sömëni sëmbë, te kisi dee sëmbë dee na sa’ u lesi bunu, nasö dee na sa’ u fan wan töngö bunu. Dee sëmbë dee abi mii feni taa dee mii u de ta fusutan Di Hei Wakitimawosu möön bunu u di de sikifi ën a wan fasi di an taanga u fusutan. Sömëni sëmbë bi sikifi biifi manda go da di Tii Kulupu u dëën tangi. Wan sisa bi taki taa a bi ta fëëë u da piki te u ta hoi di Hei Wakitimawosu lei. Ma nöunöu an ta fëëë möön! Baka di a lei soni a Di Hei Wakitimawosu di an ta taanga u fusutan, hën a bi sikifi taa: „Nöunöu mi ta da piki möön leki wan pasi, nöö ma ta fëëë möön! Mi ta da unu ku Jehovah tangi.”

5. Andi da wan tu u dee bunu soni di di Nyun-Grontapuvertaling tja ko?

 ⁵ Di u tu soni, da di Nyun-Grontapuvertaling di de mbei baka, di de tja ko a döö a Ingisitöngö a di jaa komakandi di de bi hoi a 5 u tinimu-liba u di jaa 2013. * (Luku di pisi a basu.) De puu wan tu wöutu a sömëni u dee Bëibel tëkisi, ma de an tooka dee soni dee tëkisi dë kë taki, sö taa de an taanga u fusutan möön. Di tëkisi Jöpu 10:1 bi abi 27 wöutu, ma nöunöu a abi 19 wöutu, nöö Nöngö 8:6 bi abi 20 wöutu, ma nöunöu a abi 13 wöutu nöö. Dee tu Bëibel tëkisi aki dë möön gbelingbelin u fusutan a di njunjun Bëibel aki. Wan salufu baaa di ta dini Jehovah sömëni jaa longi kaa bi taki taa: „Baka di mi lesi di buku Jöpu a di njunjun Bëibel aki, nöö mi ko si kuma awa ufö mi lesi ën di fosu pasi!” Sömëni sëmbë bi taki di wan seei soni.

6. Unfa i feni di möön bunu fasi fa u ko ta fusutan Mateosi 24:45-47?

⁶ Luku di u dii soni. Pakisei wan u dee njunjun fasi fa u ko fusutan so u dee Bëibel tëkisi möön bunu. Di fasi fa u ko fusutan möön bunu ambë da „di köni saafu di dë u futoou”, bi sikifi a di Waktitoren u 15 u baimatu-liba u di jaa 2013 (Mateosi 24:45-47). Di woto bi lei taa di saafu di dë u futoou da di Tii Kulupu. Nöö „dee futuboi” da dee salufuwan ku dee „oto sikafu” di di saafu di dë u futoou ta da njanjan (Johanisi 10:16). U ta wai seei u ko sabi dee tuutuu woto aki, söseei u lei woto sëmbë dee woto aki! Na un woto fasi Jehovah lei taa a lobi te wan lei dë gbelingbelin u fusutan?

7, 8. Andi da wan tu woto u Bëibel di ta lei u wan möön gaan soni di o pasa bakaten?

⁷ Ee i ta dini Jehovah sömëni jaa kaa, nöö a sa dë taa i si taa di fasi fa dee buku fuu ta taki u so u dee woto u Bëibel, ko tooka. Fosufosu u bi lo’ u taki taa so u dee woto u Bëibel ta lei taa wan gaan soni o pasa a di ten di ta ko. A bi dë wan bunu soni taa u bi ta du ën a sö wan fasi ö? Aai. Jesosi bi taki soni u ’di maaka u di tjabukama u Gadu de kai Jona’, u lei u wan soni di bi o pasa (Lesi Mateosi 12:39, 40). Jesosi bi taki taa di ten di Jona bi dë a di fisi bëë dendu, bi ta lei u taa di wan seei ten Jesosi bi o dë a geebi.

⁸ Bëibel woto dë jeti di bi ta lei wan möön gaan soni di bi o pasa a di ten di ta ko. Apösutu Paulosu ta taki u sömëni u de. Di fasi fa Abahamu bi ta libi ku Hagali ku Sala bi ta lei fa Jehovah bi o libi ku dee Isaëli sëmbë, söseei ku di pisi u di ölganisaasi u Gadu di dë a liba ala (Galasia 4:22-26). A di wan seei fasi soni kuma di tenti u Gadu, di Wosu u Gadu, di daka di dee Dju bi musu hakisi paadon u dee zöndu u de, di gaan mindima, ku dee woto soni u di Wëti bi kë lei u woto soni tu. De „bi dë soni u luku ku wojo nöö, fu sëmbë sa sabi fa dee möön  bunu soni dee bi o ko a bakaten aki o dë” (Hebelejën 9:23-25; 10:1). Di biibi fuu ta ko möön taanga te u ta lei soni u dee Bëibel woto aki, ku dee soni di dee woto dë ta lei u. Ma di soni dë kë taki taa hiniwan sëmbë nasö hiniwan soni di sikifi a Bëibel, kë lei u wan soni di o pasa bakaten u?

9. A di ten di pasa, unfa de bi puu di woto u Nabotu?

⁹ A di ten di pasa, u bi lo’ u sikifi a dee buku fuu taki taa hiniwan sëmbë nasö hiniwan soni di sikifi a Bëibel, bi kë lei u wan soni u wan woto sëmbë nasö u wan woto soni. Di hogihati mujëë Könu Iseibëli bi mbei de kii Nabotu sö taa hën manu Akab, bi sa tei di doloifi goon u Nabotu (1 Könu 21:1-16). A di jaa 1932, Di Hei Wakitimawosu bi lei u taa Akab ku Iseibëli bi dë Saatan ku di ölganisaasi fëën, söseei taa di fasi fa Nabotu bi dë, bi ta lei u fa Jesosi bi o dë, nöö di dëdë u Nabotu bi ta lei taa sëmbë bi o kii Jesosi tu. Ma a di jaa 1961, di buku „Let Your Name Be Sanctified” (Be di në fii ko santa), bi taki taa di fasi fa Nabotu bi dë, bi ta lei fa dee salufuwan bi o dë, nöö di fasi fa Iseibëli bi dë, bi ta lei fa dee sëmbë u hii dee poipoi keiki dee ta kai deseei Keesitu sëmbë, bi o dë. Söseei di buku bi taki taa di kii di Iseibëli mbei de kii Nabotu bi ta lei u fa sëmbë bi o du hogi ku dee salufuwan a dee lasiti daka. Sömëni jaa longi dee soni dee sëmbë u  Gadu bi lei dë, bi mbei di biibi u de ko möön taanga. Ma nöunöu faandi mbei u ko ta lei dee soni aki woto fasi?

10. (a) Na un fasi di saafu di dë u futoou ta luku bunu te a ta puu wan Bëibel woto a dee buku fuu? (b) Fu un pei soni dee buku fuu ta taki möön gaanfa a di ten aki?

¹⁰ Möön dee jaa ta pasa, möön Jehovah ta heepi „di köni saafu di dë u futoou” u du soni a wan möön köni fasi. Na un fasi? Nöunöu di saafu di dë u futoou ta luku bunu ufö a taki taa wan Bëibel woto ta lei u wan möön gaan soni di o pasa a di ten di ta ko. A ta du ën te di Bëibel seei taki gbelingbelin taa sö a dë. So u dee fasi fa a bi puu dee woto aki bi taanga poi u fusutan, a bi taanga u hoi de a pakisei, söseei a bi taanga u si fa de nama ku u. Te u bi ta buta pakisei pasa maaka a wan soni di wan Bëibel woto sa kë taki, nöö u bi ta lasi di möön fanöudu soni di u bi musu lei u di woto dë. A di ten aki, dee buku fuu ta taki möön gaanfa u dee möön fanöudu soni dee u sa lei u dee Bëibel woto dë, di an taanga u fusutan. U sa lei soni di sa taanga di biibi fuu, di sa heepi u fuu hoi dou, di sa heepi u dini Gadu fajafaja nasö woto soni di sa heepi u a di dini di u ta dini Gadu. *​—Luku di pisi a basu.

11. (a) Unfa u ko ta fusutan di woto u Nabotu nöunöu, nöö unfa di woto dë sa heepi u? (b) Faandi mbei dee buku fuu an ko ta taki sö möön taa so u dee Bëibel woto ta lei u wan möön gaan soni di bi o pasa bakaten? (Luku „Soni di dee lesima hakisi” a di buku aki.)

¹¹ U ko fusutan di woto u Nabotu möön gbelingbelin. Di dëdë u Nabotu an bi nama ku Jesosi nasö ku dee salufuwan. Ma di dëdë fëën ta lei taa a bi dë kabakaba u hoi ënseei a Gadu. A bi hoi ënseei a dee wëti u Jehovah, hii fa di makiti sëmbë di bi ta tii bi ta du ku ën (Nöbu 36:7; 1 Könu 21:3). Hii dee dinima u Jehovah a di ten aki sa lei wan soni u Nabotu te sëmbë ta du hogi ku de (Lesi 2 Timoteo 3:12). Hii Keesitu sëmbë sa fusutan di woto u Nabotu aki, de sa ta mëni ën, de sa si fa di woto aki nama ku de, söseei fa a sa taanga di biibi u de.

12. (a) Andi wa musu taki u dee Bëibel woto? (b) Faandi mbei u sa fusutan dee Bëibel woto te kisi dee fundufundu woto u Bëibel seei? (Luku di pisi a basu.)

¹² U sa taki taa soni nöö dee Bëibel woto ta lei u ö? De an kë taki na wan woto soni möönsö u? Wë nönö. Wa ta sikifi a dee buku fuu sö möön taa dee Bëibel woto ta lei u wan möön gaan soni di bi o pasa bakaten, ma a di ten aki u ta möön taki u di fasi fa dee Bëibel woto nama ku deseei. Di hoi di Nabotu hoi ënseei a Gadu tefa a dëdë, hii fa de bi ta du ku ën, ta mbei u ta mëni di hoi di Keesitu ku dee salufuwan hoi deseei a Gadu.  Ma a ta mbei u mëni di hoi di dee sömëni „oto sikafu” ta hoi deseei a Gadu tu. U sa si gbelingbelin unfa Jehovah ta lei u soni a wan fasi di an taanga u fusutan. *​—Luku di pisi a basu.

13. Andi ta lei taa u ko ta taki u so u dee woto u Jesosi a wan fasi di an taanga u fusutan?

¹³ Jesosi Keesitu bi dë di möön gaan Mësitë di bi libi a goonliba. A bi lo’ u konda woto u lei sëmbë soni (Mateosi 13:34). A dë wan bunu soni u konda woto u lei sëmbë soni, biga di soni dë ta heepi u u lei de a wan fasi di an taanga u fusutan. A sö wan fasi a ta mbei u pakisei u di woto, nöö a sa dou u hati. A dee jaa dee pasa, u ko ta sikifi soni u dee woto u Jesosi a dee buku fuu a wan fasi di an taanga u fusutan. Di Waktitoren u 15 u baimatu-liba u di jaa 2008, heepi u u ko fusutan gbelingbelin di woto u Jesosi u di sooda, u di sii u di pau de kai mutaadi, söseei u di nëti di sëmbë ta kisi fisi. Nöunöu u sa si taa dee woto dë nama ku di Könuköndë u Gadu, di heepi sömëni sëmbë u kumutu disa di hogi goonliba aki, ko toon bakama u Keesitu.

14. (a) Unfa u bi ta puu di woto di nama ku di bunuhati Samalia womi? (b) Unfa u ko ta fusutan di woto dë nöunöu?

¹⁴ Unfa u sa ko fusutan dee woto u Jesosi dee a bi ta konda u lei sëmbë soni? A bi taki so u dee woto aki u lei u wan soni, nasö u lei wan soni di bi musu pasa bakaten. Boiti di dë, a so u dee woto aki u ta lei wan bunu soni tu. Ma unfa u sa ko sabi un woto ku un woto a bi konda u lei u wan soni? Möön dee jaa ta pasa, möön u ko fusutan di soni aki möön bunu. Pakisei fa u bi guwenti u puu di woto u Jesosi di nama ku di bunuhati Samalia womi (Lukasi 10:30-37). A di jaa 1924, The Watch Tower bi taki taa di Samalia womi da Jesosi, söseei taa di pasi di kumutu a Jelusalen ta bazia nango a Jelikou dë kuma di fasi fa soni ta ko möön hogi da libisëmbë sensi di de pasa Gadu buka a di djai u Eden. Söseei u bi taki taa dee fufuuma da dee gaan feleniki ku dee sëmbë dee giii u wooko möni, nöö di begima ku di bakamii u Leifi da dee sëmbë u dee keiki dee ta kai deseei Keesitu sëmbë. Ma nöunöu u ta sikifi soni u di woto aki a dee buku fuu u mëni hii Keesitu sëmbë taa de an musu ta luku fesi kuutu wotowan. U musu heepi hii dee sëmbë dee abi heepi fanöudu, möönmöön u de ko sabi dee tuutuu woto di nama ku Gadu. A ta da u piizii seei u si fa Jehovah ta mbei u ko fusutan di tuutuu lei gbelingbelin.

15. Fu un pei soni woo taki a di woto di ta ko?

¹⁵ A di woto di ta ko, woo taki u di woto u Jesosi di nama ku dee teni wëndjë mujëë mii (Mateosi 25:1-13). Unfa Jesosi kë u dee bakama fëën dee ta libi a dee lasiti daka aki fusutan di woto aki? A dë sö taa hiniwan sëmbë nasö hiniwan soni di a bi taki a di woto dë, kë lei u wan woto sëmbë nasö u wan möön gaan soni di o pasa bakaten u? Naa a bi kë lei u wan soni di o heepi u a dee lasiti daka aki? Wë boo go luku.