Jehová lakgati masiya chuna la ni tuwa akgatekgskan
«Matsekgnikgo yuma [...] nti akgskgalalan, na wata wa masiyunikgota wa nti kaj xachunata.» (LUC. 10:21)
1. ¿Tuku xlakata Biblia wan pi Jesús lu «lipaxuwalh»? (Kaʼakxilhti xapulana dibujo.)
JESÚS kamalakgachalh 70 kstalaninanin xlakata xʼankgolh lichuwinankgo xTamapakgsin Dios. Pero umakgolh stalaninanin xʼamakgolh kgalhikgo lhuwa lakgtliwakga talamakgasitsin. Akgtum liʼakxilhtit, xwilakgo judíos tiku xpulalinkgo takanajla, tiku lu lakgskgalalan xwankgonit chu lhuwa xkgalhtawakgakgonit. Xlakan xlakaskinkgo pi latamanin xʼakxilhkgolh Jesús la kaj chatum xwakna (Mar. 6:3). Chu xlakaskinkgo pi latamanin xlakpuwankgolh pi kstalaninanin Jesús kaj nitu xlitaxtukgo chu nitu xkgalhtawakgakgonit (Hech. 4:13). Wa xlakata Jesús lu xlakaskin pi kstalaninanin xtaspitkgolha xlakata xkatsilh la xkakitaxtuninit. Akxni kitaspitkgolh, Jesús akxilhli pi lu xpaxuwamakgo. Maski asta demonios xkatlawaniputunkgo tuku nitlan, xlakan xmakgantaxtikgonit tuku Jesús xkalimapakgsinit. Wa xlakata Biblia wan pi akxni Jesús kaʼakxilhli lu «lipaxuwalh». Xlikana pi max xlakalitsinit chu xlakgastapu xlakgskgo xlakata lu xpaxuwama. Pero ¿la tlawakgolh kstalaninanin xlakata ni xpekuankgolh chu chuntiya xpaxuwakgolh? (Kalikgalhtawakga Lucas 10:1, 17-21.)
Xkachikin Jehová tlakg tlan la masiya, chuna la ni tuwa chu liwana nataʼakgatekgsa
2. 1) ¿Tuku xlakata Jesús lichuwinalh pi kstalaninanin xlitaxtukgo la laktsu kamanan? 2) ¿Tuku kamakgtayalh kstalaninanin Jesús naʼakgatekgskgo tamasiy xalak Biblia nema tlakg tuwa?
2 Jesús wanilh Jehová: «Kmaxkiyan mpaxkatsinit Tataj xmalana akgapun chu nkatiyatna, mpi matsekgnikgonita yuma nkatuwa [...] akgskgalalan, na wata wa masiyunikgonita wa nti nkajku kaman». Chu alistalh wa pi Dios lakgati chuna masiya (Mat. 11:25, 26). ¿Tuku xlakata Jesús lichuwinalh pi kstalaninanin xlitaxtukgo la laktsu «kaman»? Xlakata kstalaninanin ni tlankajwa xwankgonit, wata xtataktujukgo. Xpulalinanin takanajla lhuwa xkgalhtawakgakgonit chu lu lakgskgalalan xkamakgkatsikan, pero kstalaninanin Jesús xmastakgo talakaskin xkamasiyanika chuna la tlawakgo kamanan (Mat. 18:1-4). Xlakata ni tlankajwa xwankgonit, Jehová limaklakaskilh xʼespíritu xlakata xkamakgtayalh naʼakgatekgskgo tamasiy xalak Biblia nema tlakg tuwa. Pero judíos tiku xpulalinkgo takanajla laktlankajwa xwankgonit chu mastakgolh talakaskin pi Satanás xkapulalilh chu wa xlakata nila akgatekgskgolh xtamasiy Dios.
3. ¿Tuku naʼakxilhaw kʼuma artículo?
3 Jesús lu paxuwalh akxni akxilhli la Jehová kamakgtaya latamanin tiku ni laktlankajwa naʼakgatekgskgo tamasiy xalak Biblia nema tlakg tuwa. ¿Chu la uku? ¿Chuntiya lakgati Jehová masiya chuna la ni tuwa naʼakgatekgsnikgo tiku taktujukgo? Chuna, xla nitu talakgpalima. ¿Tuku likatsiyaw? Kʼuma artículo naʼakxilhaw la Jehová kamakgtaya la uku tiku taktujukgo xlakata naʼakgatekgskgo tamasiy xalak Biblia nema tlakg tuwa.
PULAKTUM LA MASIYAKAN CHUNA LA NI TUWA AKGATEKGSKAN
4. ¿Tuku xlakata wanaw pi La Atalaya nema ni tuwa akgatekgskan, akgtum tamaskiwin?
4 Xaʼawatiya kata nema titaxtunit, xkachikin Jehová wan pi tlakg xlakaskinka namasiyakan chuna la ni tuwa chu liwana nataʼakgatekgsa. ¿La tlawa? Kalichuwinaw akgtutu liʼakxilhtit. Pulana, xkachikin Jehová tlawanit La Atalaya nema ni tuwa akgatekgskan. * (Kalikgalhtawakga nota.) Uma revista akgtum tamaskiwin nema kamakgtayama lhuwa tiku nila liwana kgalhtawakgakgo o ni liwana chuwinankgo akgtum tachuwin. Nachuna, natlatni akxilhkgo pi uma revista kamakgtaya xkamanan tlakg naʼakgatekgskgo tamasiy. Chu lhuwa familias malakgachakgonit cartas xlakata napaxtikatsininankgo. Chatum tala puskat wan pi akxni nina xtlawakan revista nema ni tuwa akgatekgskan ni xmasta xtakgalhtin ktamakxtumit, pero xlakata maklakaskin uma revista nialh pekuan. La uku makglhuwa masta xtakgalhtin ktamakxtumit.
5. ¿Tuku lu tlan limin xasasti Traducción del Nuevo Mundo xaʼinglés?
5 Xlipulaktiy, 5 xla octubre kata 2013, xkachikin Jehová tlawalh xasasti Traducción del Nuevo Mundo kxaʼinglés. * (Kalikgalhtawakga nota.) Kʼuma Biblia xaʼinglés, lhuwa versículos nialh lhuwa tachuwin maklakaskin, pero watiya tuku wamputun. Nachuna, tlakg ni tuwa akgatekgskan. Akgtum liʼakxilhtit, Job 10:1 pulana xkgalhi 27 tachuwin, pero la uku kaj kgalhi 19. Chu Proverbios 8:6 xapulana xkgalhi 20 tachuwin, pero la uku kaj kgalhi 13. Umakgolh akgtiy versículos tlakg tlan taʼakgatekgsa. Chatum tala tiku laksakkanit naʼan kʼakgapun chu lhuwa kata skujnanima Jehová, likgalhtawakgalh libro xla Job kxasasti Biblia chu wa pi makgkatsilh xtachuna la aku xlimakgtumku xʼakgatekgsnima. Lhuwa natalan nachuna wankgonit.
6. ¿Tuku lakpuwana xlakata xasasti taʼakgatekgsni nema talichuwinan kMateo 24:45-47?
6 Xlipulaktutu, xaʼawatiya kata nema titaxtulh, xkachikin Jehová tlakg liwana akgatekgsnit makgapitsi versículos. Akgtum liʼakxilhtit, krevista Makatsinina 15 xla julio kata 2013 tlakg liwana lichuwinanka xlakata tuku wan Mateo 24:45-47, TNM. Lichuwinanka pi «skujni xalipaw chu xaskgalala», wa Lakgkgolotsin tiku Pulalinkgo xTatayananin Jehová. Na lichuwinanka pi «amakgapitsi skujnin», wa tiku naʼankgo kʼakgapun chu amakgapitsi borregos, xlakata putum umakgolh makglhtinankgo taway xla takanajla nema masta skujni xalipaw (Juan 10:16). Xlikana pi lu lakgatiyaw katsiniyaw putum uma tamasiy chu na kamasiyaniyaw amakgapitsin. Kaʼakxilhwi atanu la Jehová limasiya pi lakgati kinkamasiyaniyan chuna la ni tuwa naʼakgatekgsaw.
TUKU TALICHUWINAN KBIBLIA PI LANIT, NI TUWA LA LICHUWINANKAN
7, 8. Kalichuwinanti makgapitsi liʼakxilhtit nema Biblia lichuwinan pi lanit chu wi tiku o wi tuku kilhchanima nema tlakg xlakaskinka.
7 Chu la titaxtutilhanit kata, xkachikin Jehová lakgpalinit chuna la lichuwinan makgapitsi tuku Biblia wan pi lanit. Makgasa xwankan pi lhuwa tuku kBiblia talichuwinan pi lanit, wi tuku xkilhchanima nema tlakg xlakaskinka xʼama kgantaxtu alistalh. ¿Tlan chuna nalichuwinanaw makgapitsi tuku Biblia lichuwinan pi lanit? Tlan. Asta Jesús chuna kalichuwinalh makgapitsi tuku talichuwinan kBiblia pi lanit. Akgtum liʼakxilhtit, Jesús wa pi kilhtamaku nema Jonás xtatakgsa kxpan skiti, xkilhchanima kilhtamaku nema Cristo xʼama tawila kputaknun o ktawaxni (kalikgalhtawakga Mateo 12:39, 40).
8 Pero uma tuku lichuwinawa ni kajwatiya tuku Biblia wan pi lanit nema wi tiku o wi tuku kilhchanima nema tlakg xlakaskinka. Akgtum liʼakxilhtit, apóstol Pablo lichuwinalh pi chuna la Abrahán xlatalalin Agar chu Sara xkilhchanima la Jehová xtalalin kachikin Israel chu xkachikin Dios xalak akgapun (Gál. 4:22-26). Pablo na lichuwinalh pi kxLimapakgsin Israel lhuwa xʼanan nema wi tiku o wi tuku xkilhchanima kilhtamaku nema aku xmima. Makgapitsi nema wi tuku xkilhchanima wa tabernáculo, templo, Kilhtamaku akxni kXapakan Talakgalhin chu xapuxku sacerdote (Heb. 9:23-25; 10:1). Akxni likgalhtawakgayaw tuku Biblia lichuwinan pi lanit chu katsiniyaw tuku kilhchanima, kintakanajlakan tlakg tatliwakglha. Pero ¿wamputun uma pi putum latamanin chu tuku lichuwinan Biblia wi tiku o wi tuku kilhchanima?
9. Makgasa, ¿tuku xwankan xlakata Nabot?
9 Makgasa, kilikgalhtawakgakan xlichuwinan pi putum latamanin chu makgapitsi tuku Biblia lichuwinan pi lanit wi tiku o tuku xkilhchanima kilhtamaku nema aku xmima. Kalilakpuwaw tuku talichuwinan 1 Reyes 21:1-16, niku talichuwinan mapakgsina Jezabel chu Acab. Jezabel mamakgnininalh chatum israelita tiku xwanikan Nabot xlakata Acab xʼakgchipalh xviña. Kkata 1932, uma revista lichuwinalh pi Acab chu Jezabel xkilhchanima Satanás chu tiku tatapakgsikgo. Na lichuwinalh pi Nabot xkilhchanima Jesús chu xlinin Nabot xkilhchanima akxni xnilh Jesús. Pero kkata 1961, libro “Santificado sea tu nombre” kxaʼinglés lichuwinalh pi Nabot xkilhchanima tiku naʼankgo kʼakgapun chu Jezabel xkilhchanima nixaxlikana takanajla nema xwankgo pi kstalaninanin Cristo. (Uma libro tlawaka kxaʼespañol kkata 1964.) Na lichuwinalh pi xlakata putsastalanika Nabot xkilhchanima tuku xʼamakgo titaxtukgo tiku naʼankgo kʼakgapun xaʼawatiya kilhtamaku. Lhuwa kata, xkachikin Jehová limatliwakglhnit kintakanajlakan akxni chuna lichuwinanit tuku Biblia wan pi lanit. Pero la uku tanu la kinkalitachuwinanan. ¿Tuku xlakata?
10. 1) ¿La limasiya skujni pi la uku tlakg skgalala akxni lichuwinan tuku Biblia wan pi lanit? 2) ¿Tuku tlakg lichuwinankgo la uku kilikgalhtawakgakan?
10 Chuna la makgasa xlichuwinankan tuku xkilhchanima makgapitsi tuku Biblia wan pi lanit, lu tuwa xʼakgatekgskan, tuwa xlakapastakkan chu nalilatamakan. Nachuna, xlakata tlakg xlichuwinankan tuku xkilhchanima, nialh xlakaskinka xʼakxilhkan tuku xkinkamasiyaniyan. Wa xlakata, chuna la titaxtutilhanit kata, Jehová kamakgtayanit «skujni xalipaw chu xaskgalala» xlakata tlakg skgalala nawan, uma wamputun ni kaj akglakgwa tuku namasiya. ¿La limasiya skujni pi tlakg skgalala? La uku lichuwinan pi pulaktum tuku Biblia wan pi lanit wi tuku kilhchanima komo Biblia liwana masiya pi chuna. Nachuna, la uku kilikgalhtawakgakan tlakg ni tuwa masiya la nalitamakgtayayaw tuku Biblia wan chu nalitatliwakglha kintakanajlakan, natayaniyaw, tlakg napaxkiyaw Dios chu atanu lakwan tayat nema kinkamasiyaniyan. * (Kalikgalhtawakga nota.)
Tuku talichuwinan xlakata Nabot wi tuku lu xlakaskinka kinkamasiyaniyan (Kaʼakxilhti párrafo 11)
11. 1) ¿La kmasiyayaw la uku tuku Biblia wan xlakata Nabot? 2) ¿Tuku kinkamasiyaniyan xatlan xliʼakxilhtit Nabot? 3) Kata nema aku titaxtukgonit, ¿tuku xlakata kilikgalhtawakgakan nialh lu wan tuku kilhchanima tuku Biblia wan pi lanit? (Kaʼakxilhti sección «Tuku katsiputunkgo tiku likgalhtawakgakgo» xla uma revista.)
11 Kalichuwinamparaw tuku wan Biblia xlakata Nabot. ¿La litachuwinan la uku? Chuna la liwana chu ni tuwa naʼakgatekgskan. Nialh wanaw pi Nabot nilh xlakata xkilhchanima Jesús o tiku naʼankgo kʼakgapun. Nabot nilh xlakata ni xmakgatsankgananiputun Jehová. Maski tlawanilh tuku nitlan chatum tliwakga mapakgsina, xla kgalhakgaxmatli xlimapakgsin Dios (Núm. 36:7; 1 Rey. 21:3). ¿Tuku kinkamasiyaniyan uma? Komo natitaxtuyaw tuku Nabot titaxtulh, ni namakgatsankgananiyaw Dios (kalikgalhtawakga 2 Timoteo 3:12). Putum tlan akgatekgsaw tuku kinkamasiyaniyan, ni tuwa lakapastakaw chu nalilatamayaw. Tuku talichuwinan xlakata Nabot matliwakglha kintakanajlakan.
12. 1) ¿Tuku ni kililakpuwanatkan xlakata tuku Biblia wan pi lanit? 2) ¿Tuku kinkamakgtayayan kstalaninanin Cristo naʼakgatekgsaw asta wantuku tlakg tuwa? (Kalikgalhtawakga nota.)
12 Pero ni nalakpuwanaw pi tuku Biblia wan pi lanit kajwatiya wi tuku kinkamasiyaniyan chu nituku kilhchanima. Makgapitsi tuku Biblia wan pi lanit wi tuku kilhchanima nema tlakg xlakaskinka. Pero maski chuna, kilikgalhtawakgakan ni lu lichuwinan tuku kilhchanima. Wata lichuwinan la na watiya kilhchanima tuku lanit kʼatanu kilhtamaku chu wan tuku kinkamasiyaniyan. Akgtum liʼakxilhtit, akxni likgalhtawakgayaw pi Nabot ni makgatsankgananilh Dios asta akxni nilh, uma kinkamalakapastakayan pi Cristo ni makgatsankgananilh Dios asta akxni nilh chu tiku naʼankgo kʼakgapun na ni makgatsankgananikgo Dios. Pero ni kajwatiya uma. Na kinkamalakapastakayan pi lhuwa amakgapitsi xlakskujnin Dios ni makgatsankgananikgonit maski kamakgnikanit. Uma liwana kinkamaʼakxilhniyan pi Jehová kinkamasiyaniyan chuna la ni tuwa naʼakgatekgsaw. * (Kalikgalhtawakga nota.)
XTAMASIY JESÚS TLAKG NI TUWA LA LICHUWINANKAN
13. ¿Tuku liʼakxilhtit nema Jesús lichuwinalh tlakg taʼakgatekgsa la kmasiyayaw la uku?
13 Liʼakxilhtit chu akxni wi tuku tamalakxtuminankan lu kinkamakgtayayan naʼakgatekgsaw tuku tuwa. Na kinkamalakpuwaniyan chu lakgchan kinakujkan. Jesucristo wa tiku tlakg xatlan makgalhtawakgena xwanit, chu xlakgati xwili liʼakxilhtit chu wi tuku xtamalakxtumi tuku xlichuwinan (Mat. 13:34). Kata nema aku titaxtukgonit, kilikgalhtawakgakan lichuwinanit chuna la ni tuwa akgatekgskan liʼakxilhtit nema lichuwinalh Jesús. Akgtum liʼakxilhtit, La Atalaya 15 xla julio kata 2008 kinkamakgtayan tlakg liwana naʼakgatekgsaw tuku kilhchanima levadura, xtalhtsi mostaza chu tsalh o tuku lichipakan skiti. La uku, liwana akxilhaw pi umakgolh liʼakxilhtit kilhchanima pi xTamapakgsin Dios tlawanit pi lhuwa latamanin kskujnin Jehová nawankgo.
Liʼakxilhtit chu akxni wi tuku tamalakxtuminankan lu kinkamakgtayayan naʼakgatekgsaw tuku tuwa, kinkamalakpuwaniyan chu lakgchan kinakujkan
14. 1) ¿Tuku xakmasiyayaw makgasa xlakata xatlan samaritano? 2) ¿Tuku kmasiyayaw la uku xlakata uma?
14 Xmin kilhtamaku Jesús xwan putum tuku xlatilhanit akxni wi tuku xlichuwinan. Makgapitsi tuku xlichuwinan wi tuku xkilhchanima, pero makgapitsi kaj wi tuku xmasiya xlakata xlilatamaka. ¿La nalikatsiyaw pi tuku lichuwinalh Jesús wi tuku xkilhchanima chu tuku nitu xkilhchanima? Chuna la titaxtutilhanit kata tlakg liwana kkatsinitaw. Akgtum liʼakxilhtit, kalilakpuwaw tuku xakmasiyayaw makgasa xlakata xatlan samaritano (Luc. 10:30-37). Kkata 1924, uma revista wa pi samaritano xkilhchanima Jesús. Xlakata tiji xalak Jerusalén asta kJericó lakgakgalhu xʼan, lichuwinanka pi uma tiji xkakilhchanima latamanin, xlakata lata lakgalhinankgolh Adán chu Eva tlakg nitlan likatsikgo. Na wa pi kgalhananin xkakilhchanima compañías chu stananin, chu sacerdote chu levita xkakilhchanima nixaxlikana takanajla nema wankgo pi kstalaninanin Cristo. Pero la uku kilikgalhtawakgakan lichuwinan uma xlakata nakinkamasiyaniyan pi nitlan lakapala nalakpuwanaw pi nitlan likatsikgo latamanin kaj xlakata tanu xkachikinkan, tanu la tasiyakgo o tanu xtalismaninkan, chu talakaskin nakamakgtayayaw nalakgapaskgo Jehová. Lu lipaxuwayaw akxni akxilhaw la Jehová tlawa pi chali chali tlakg liwana kataʼakgatekgsli xaxlikana tamasiy.
15. ¿Tuku nalichuwinanaw kʼartículo nema aku mima?
15 Artículo nema aku mima nalichuwinanaw xlakata kgalhakaw laktsuman (Mat. 25:1-13). ¿La xlakaskin Jesús xʼakgatekgswi tuku lichuwinalh kʼuma xaʼawatiya kilhtamaku? ¿Xlikana pi chatunu tiku talichuwinan chu tuku talichuwinan wi tuku kilhchanima? ¿O kaj wi tuku kinkamasiyaniyan xlakata nalilatamayaw kʼuma kilhtamaku? Kaʼakxilhwi.
^ par. 4 Revista nema ni tuwa akgatekgskan tsukulh taxtu xaʼinglés julio kata 2011. La uku naskina atanu tachuwin, la xaʼespañol.
^ par. 5 Xasasti Traducción del Nuevo Mundo na natlawakan kʼatanu tachuwin alistalh.
^ par. 10 Akgtum liʼakxilhtit, libro Tlan liʼakxilhtit xtakanajlakan, lichuwinan xliʼakxilhtit 14 latamanin tiku kalichuwinan Biblia. Pero ni lichuwinan tuku kilhchanima pulakatunu tuku Biblia wan pi lanit, wata lichuwinan tuku kinkamasiyaniyan.
^ par. 12 Xlikana pi kBiblia anan lhuwa tuku max laktuwa tasiya naʼakgatekgskan. Pero wa Jehová limaklakaskilh xʼespíritu xlakata xkatsokgka kBiblia. La uku, Jehová na limaklakaskin xʼespíritu xlakata nakamakgtaya xaxlikana kstalaninanin Cristo naʼakgatekgskgo tuku wan Biblia, asta «wantu tuwa xtalakapastakna Dios» (1 Cor. 2:10; 2 Ped. 3:16, 17).
