1, 2. (a) Yisinke ga tente Jesus ngayi horoka pomazuva gopouhura? (b) Mapuro musinke natu ka zogera?

GAZARA asi Jesus kuna hingire koNdundu zoMauzwe kuna kutarurura ntembeli moJerusarema. Age kuna hingire kumwe novapositoli vendi vane, Peturusa naAndiliyasa naJakopo ntani Johanesa. Awo kuna kupurakena nawa kwaJesus ngomu ana kuvatantera uporofete kuhamena meho. Uporofete kwa horwere eyi ngano ngayi horoka pomazuva gopouhura gouzuni ou woudona age Jesus kuna kupangera moUhompa waKarunga. Jesus kwa va tanterere asi “mukareli gokulimburukwa gonondunge” nga mu karera po apa pevhu ntani nga pa vasikuli vendi nondya dopampepo posiruwo sado.—Mateusa 24:45-47.

 ² Mouporofete woowo, Jesus kwa simwitilire sifanekeso sovakadona murongo. (Resa Mateusa 25:1-13.) Mosirongwa esi, tatu ka zogera mapuro aga: (1) Yisinke sitambo sosifanekeso? (2) Ngapi vagwavekwa va sikisa mo epukururo lyomosifanekeso esi, ntani yitundwamo musinke? (3) Ngapi natuvenye natu gwanena mo uwa mosifanekeso saJesus?

3. Ngapi yimbapiratjangwa yetu ya fatwilire sifanekeso sovakadona murongo, ntani noyitundwamo musinke?

³ Mosirongwa sa ka pita, ose twa lirongere asi monomvhura edi dantani, mukareli gokulimburukwa ga tura po ewapukururo monkedi omu ana kufaturura yihorokwa yimwe yomoBibeli. Mukareli gokulimburukwa ngesi kapi ana kudemenena kweyi aga tanta mauporofete nye unene po kweyi natu lirongera ko. Pasihonena, tu konakoneni sifanekeso savakadona murongo. Yimbapiratjangwa yetu ngayi uyunga asi noramba nomawoli ntani noyipako yomawoli kwa fanekesa yuma. Kuvhura tu zumbanese sitambo sosifanekeso morwa kuzogera mauzera ogo gomanunu ntani goureru ndi? Elimbururo kepuro olyo mulyo.

4. Mosifanekeso, (a) yilye mukwali? (b) wolye vakadona?

⁴ Tu konakoneni sitambo sosifanekeso saJesus. Pomuhowo, gazara kuhamena ava va hamenene mosifanekeso sovakadona murongo. Yilye mukwali? Jesus. Morwasinke? Morwa Jesus kwa litumbwire mwene asi mukwali. (Rukasa 5:34, 35) Wolye vakadona? Awo kuna kara “mbungagona” zovagwavekwa. Ngapi twa yi diva eyi? Mosifanekeso, vakadona va hepere kuwapaika noramba dawo komeho a wize mukwali. Koneka eyi ga tanterere Jesus vasikuli vendi wovagwavekwa asi: “Mangeni makwamo geni monombunda deni, ano noramba deni di hwame. Kareni ngwendi vantu vana kundindira hekurwawo ana kutunda kekwareko.” (Rukasa 12:32, 35, 36) Mupositoli Paurusa ntani nomupositoli Peturusa kwa hetakanesere vasikuli wovagwavekwa kovakadona wokukuhuka. (2 Vakolinte 11:2; Ehororo 14:4) Eyi kulikida asi epukururo nerondoro lyomwaMateusa 25:1-13, kwa tamba kovasikuli vaJesus wovagwavekwa.

5. Siruwo musinke ngali sikilira mo epukururo lyaJesus?

⁵ Siruwo musinke ngali sikilira mo epukururo lyaJesus? Eyi ga uyungire Jesus kehagero lyosifanekeso sendi kutuvatera tu dive siruwo. Age kwa tente asi: “Mukwali ta wiza.” (Mateusa 25:10) MoRuhungu 15 Pembankuru 2013, twa lirongere asi uporofete waJesus womoMateusa egaununo 24 ntani 25 kwa tumbwire ‘ewizo’ lyendi yikando ntantatu. Apa Jesus ga tumbwire ‘ewizo’  lyendi, age kwa tembe posiruwo soudigu wounene apa nga wiza a ya pangure nokuyazonagura po uzuni ou woudona. Ayo ya wapa kutanta asi sifanekeso esi saJesus kwa tamba pomazuva gopouhura ntani apa nga “wiza” posiruwo soudigu wounene.

6. Yisinke sitambo sosifanekeso esi?

⁶ Yisinke natu lirongera ko kosifanekeso esi? Tu diworokeni yikaramo yosihorokwa esi somoBibeli. MwaMateusa egaununo 24, Jesus kwa uyungire kuhamena “mukareli gokulimburukwa gonondunge.” Mukareli ogo nga ka kara kambunga kovagwavekwa aka nga ka pitisira vasikuli vaKristusa pomazuva gopouhura. Jesus kwa rondwere vagara owo asi va hepa kukara valimburukwi. Megaununo lyokukwama ko, Jesus kwa ruganesere sifanekeso sovakadona mokupukurura vasikuli vendi navenye wovagwavekwa womomazuva gopouhura. Sitambo kwa kere ‘sokurungarara’ yipo va dire kuzumbanesa mfeto zawo zemeguru. (Mateusa 25:13) Ngesi tatu ka konakona sifanekeso esi yipo tu ka dimburure omu vagwavekwa va sikisa mo epukururo eli.

7, 8. (a) Morwasinke vakadona wonondunge va karerere nendindiro? (b) Ngapi vagwavekwa va liwapaikira?

⁷ Mosifanekeso, Jesus kwa nkondopekere asi vakadona wonondunge kwa kere nendindiro apa ga wizire mukwali, kapisi ngwendi vakadona womagova. Morwasinke? Morwa awo kwa liwapaikilire nokuvangarara. Vakadona navenye murongo va hepere kuvangarara ntani nokuninka noramba dawo di paime masiku. Vakadona vena wonondunge kwa liwapaikilire morwa va kere noyipako yomawoli kumwe nonoramba dawo. Ngapi vagwavekwa wovalimburukwi va liwapaikira ewizo lyaJesus?

⁸ Vagwavekwa va liwapaikira kusikisa mo situmbukira sawo dogoro uhura wouzuni. Awo va diva asi mokusikisa mo sirugana sawo va hepa kunyokera po yininke youzuni waSatana. Awo kwa tokomena kukarera Jehova noulimburukwi, kapisi morwa uhura pepi nye morwa va mu hara naMunwendi. Awo kukwaterera koulimburukwi wawo nokudira kupulisira edowo lyemona nononkareso dokunyata nomfudu yi va donganese. Ngwendi vakadona murongo wonondunge va kere nonoramba dawo, vagwavekwa kutwikira kupaima pokundindira mukwali nelididimiko.—Vafilipi 2:15.

9. (a) Erondoro musinke ga geve Jesus kuhamena kurara? (b) Ngapi vagwavekwa va tambura ezigiro eli asi: “Mukwali gogo ana kuwiza”? (Tara hena nonkango dokonhi.)

⁹ Vakadona wonondunge kwa ndindilire ewizo lyomukwali morwa awo kwa vangararere. Nye mosifanekeso  kwa tanta asi siruwo esi ga liranga-rangere mukwali kuwiza, vakadona navenye “tava kumauka, tava rara.” Kuvhura Vakriste wovagwavekwa va ‘rare’ ndi yi va donganese yapeke siruwo esi vana kundindira ewizo lyaKristusa ndi? Nhi. Jesus ga yi divire asi nampili muntu ogu ga kara neharo lyokundindira kuvhura yi mu donganese yininke yapeke. Eyi yiyo vagwavekwa wovalimburukwi ava kondjere mokukara vana vangarara. Monkedi musinke? Mosifanekeso, vakadona navenye murongo kwa pindukire apa ezwi lya zigilire asi: “Mukwali gogo ana kuwiza!” Nye wonondunge tupu yiwo va vangararere. (Mateusa 25:5, 6; 26:41) Mokulifana, pomazuva aga gopouhura vagwavekwa kwa pinduka kezigiro eli asi: “Mukwali gogo ana kuwiza!” Awo va yi tambura asi Jesus kuna kuwiza, ntani kuna kundindira ewizo lyendi. * Tu konakoneni nonkango dokuhulilira mosifanekeso saJesus edi da demenena kosiruwo.

10. Nzogera musinke za kere pokatji kovakadona wovanandunge nava womagova?

¹⁰ Pepi nehagero lyosifanekeso, vakadona womagova kwa hundilire wovanandunge asi va va pe ko mawoli va ture monoramba dawo. Nye wovanandunge va nyokere kuvatera womagova. (Resa Mateusa 25:8, 9.) Siruwoke vagwavekwa wovalimburukwi ngava nyoka kuvatera ava vana hepa ekwafo? Koneka siruwo esi va tumbura mosifanekeso. Jesus, Mukwali, nga wiza a ya pangure pepi nehagero lyoudigu wounene. Nzogera ezi za kere pokatji kovakadona kwa tamba kweyi ngayi horoka komeho tupu zehagero lyoudigu wounene. Ngapi tuna yi diva? Morwa posiruwo oso, vagwavekwa ngava gwana sinongweneso sawo sokuhulilira.

11. (a) Yisinke ngayi horoka komeho udigu wounene u tameke? (b) Yisinke vakadona wovanandunge va tembe pokutantera womagova va ze va ka rande mawoli gavene?

¹¹ Yipo nye, komeho udigu wounene u tameke, vagwavekwa navenye wovalimburukwi ngava va tura sinongweneso sokuhulilira. (Ehororo 7:1-4) Kutunda opo, makura awo ngava za meguru. Nye gazara siruwo esi ngasi twaredesa koudigu wounene. Yisinke ngayi horokera vagwavekwa ava ngava dira kuvangarara nokulimburukwa? Awo kapi ngava va tura sinongweneso sokuhulilira. Posiruwo oso, Vakriste vamwe wovalimburukwi ngava va gwaveka. Apa tupu ngau tameka udigu wounene, vagwavekwa wokudira kuvangarara ngava tukuka pokumona omu vana kuzonagura po Babironi zonene. Opo yipo ngava yi dimbwilira asi kapi va liwapaikilire ewizo lyaJesus. Posiruwo oso, yisinke ngayi horoka nsene ngava pura evatero? Elimbururo kuligwana mosifanekeso. Vakadona wovanandunge  kwa nyokere kugava mawoli gawo kovakadona womagova nokuvatantera va ka rande gavene. Mokumona asi kwa kere “pokatji komasiku,” kwato ogu ga vhulire kuvarandesa mawoli. Awo kwa hulilire!

12. (a) Posiruwo soudigu wounene, yisinke ngayi horokera vagwavekwa wokudira kulimburukwa? (b) Yisinke ngayi horokera ava va fana vakadona womagova?

¹² Posiruwo soudigu wounene, vagwavekwa wovalimburukwi kapi ngava vatera nkenye ogu nga dira kulimburukwa. Yisinke ngayi horokera wokudira kulimburukwa? Koneka eyi ya horokerere vakadona womagova ava va zire va ka rande mawoli. “Ha va za mokukaranda, mukwali ta wiza. Ano ava va liwapaikire, tava hwilire nendi monzugo zosipito sononkwara, makura evero tava li zedire.” Apa Jesus nga wiza mouyerere wendi pepi nehagero lyoudigu wounene, nga ya pongaika vagwavekwa wovalimbukwi va ze meguru. (Mateusa 24:31; 25:10; Johanesa 14:1-3; 1 Vatesaronika 4:17) Jesus nga nyoka wokudira kulimburukwa. Ngwendi vakadona womagova, awo ngava zigira asi: “Ani hompa, hompa, tu zegurura ko!” Nye Jesus ngapi nga va limburura? Age nga va limburura asi: “Ame one ha na kara, ni mu dive.”—Mateusa 7:21-23; 25:11, 12.

13. (a) Jesus kwa tembe asi sinzi sovagwavekwa kapi ngava limburukwa ndi? (b) Morwasinke natu uyungira asi sifanekeso saJesus kulikida asi ga huguvara vagwavekwa? (Tara efano pepenuno 9.)

¹³ Ngoso Jesus kwa tembe asi sinzi sovagwavekwa kapi ngava limburukwa ntani ngava va pinganesera po ndi? Hawe. Mateusa 24, tatu resa asi Jesus kwa rondwere mukareli gokulimburukwa gonondunge asi ga ha kara mukareli gomudona. Age kapi ga tembe asi ngapa kara mukareli gomudona. Mokulifana, sifanekeso sovakadona murongo kuna kara erondoro. Ngamoomu tupu vakadona vatano womagova ano vatano wonondunge, nkenye mugwavekwa ga hepa kutokora kuliwapaikira nokuvangarara. Nsene kapisi ngoso, kuvhura nga kare mugova ntani gokudira kulimburukwa. Paurusa nage kwa geve erondoro lyokulifana kovagwavekwa vakwawo. (Resa Vahebeli 6:4-9; hetakanesa Deuteronomium 30:19.) Age kwa geve erondoro lyokuvyukilira, nye ga kere hena nehuguvaro asi ngava ka gwana mfeto zawo. Erondoro lyomosifanekeso sovakadona murongo kulikida asi Jesus ga huguvara vagwavekwa. Ga yi diva asi nkenye mugwavekwa kuvhura kutwikira kulimburukwa dogoro a ka gwane mfeto zendi!

14. Morwasinke ‘nonzwi dapeke’ nado nadi gwanenena mo uwa mosifanekeso sovakadona murongo?

¹⁴ Sifanekeso saJesus kwa tembe kovagwavekwa. Nye ‘nonzwi dapeke’  nado kuvhura kugwanena mo uwa ndi? (Johanesa 10:16) Nhi! Sitambo sosifanekeso kuna kara asi: “Vangarareni!” Jesus kwa tente asi: “Eyi nina kumutantera, kuna kuyitantera navenye asi, vangarareni!” (Marukusa 13:37) Jesus kuna harere varongwa vendi navenye va liwapaikire nokuvangarara. Ntani Vakriste navenye kuvhura kukwama sihonena sosiwa sovagwavekwa, ava va tura sirugana sokuzuvhisa muhowo meparu lyawo. Diworoka asi vakadona womagova kwa hundilire wonondunge va va pe ko mawoli gamwe. Ehundiro lyawo kapi va li tambwire. Ayo kutudiworokesa asi alyo etokoro lyankenye gumwe gwetu mokutwikira kulimburukwa Karunga nokuliwapaikira ntani nokuvangarara. Kwato ogu na vhura kuyituruganena po. Natuvenye ngatu ka yi zeresera Mupanguli gwetu, Jesus Kristusa, ogu ana kuwiza. Yiyo twa hepera kuliwapaikira!

15. Morwasinke ekwareko lyaKristusa nomufuko gwendi ngali retera ruhafo Vakriste wousili?

¹⁵ Vakriste navenye kuna kundindira nononkondo ekwareko lyomosifanekeso saJesus. Konyima zoyita yaHarumagedoni, vagwavekwa ngava kara mufuko gwaKristusa. (Ehororo 19:7-9) Navenye vepevhu ngava ka gwanena mo uwa mekwareko olyo lyemeguru. Morwasinke? Morwa epangero lyokusikilira mo ngali ka pangera vantu navenye. Yi kare asi kwa kara nehuguvaro lyepevhu ndi lyemeguru, tu tokomeneni kuliwapaikira nokuvangarara. Nsene tu yi rugana, ngatu hafera meho zongwa ezi ga tu wapaikira Jehova!