1, 2. (a) Yesu o dzumbulula mini nga ha maḓuvha a vhufhelo? (b) Ndi mbudziso dzifhio dzine ra ḓo dzi haseledza?

EDZANI u humbula Yesu o dzula Thavhani ya Miṱwari o lavhelesa thembele ya Yerusalema. E na vhaapostola vhawe vhaṋa, Petro, Andrea, Yakobo na Yohane. Vho thetshelesa Yesu nga vhuronwane musi a tshi khou vha vhudza nga ha vhuporofita vhu takadzaho ha vhumatshelo. Honoho vhuporofita vhu dzumbulula zwine zwa ḓo itea maḓuvhani a vhufhelo a ḽino shango ḽivhi musi Yesu a tshi vhusa Muvhusoni wa Mudzimu. Yesu u vha vhudza uri zwifhingani zwenezwo zwi takadzaho, “mulanda [wawe] a fulufhedzeaho na wa vhuṱali” u ḓo mu imela kha ḽifhasi nahone u ḓo ṋea vhatevheli vhawe zwiḽiwa nga tshifhinga tsho teaho.—Mateo 24:45-47.

² Kha honoho vhuporofita, Yesu u dovha a amba nga  ha tshifanyiso tsha vhasidzana vha fumi. (Vhalani Mateo 25:1-13.) Kha ino thero ri ḓo haseledza mbudziso dzi tevhelaho: (1) Ndi ufhio mulaedza wa ndeme wa tshifanyiso? (2) Vhaḓodzwa vha fulufhedzeaho vho shumisa hani nyeletshedzo ya tshifanyiso, nahone hu vha na mvelelo dzifhio? (3) Muṅwe na muṅwe washu a nga vhuyelwa hani nga tshifanyiso tsha Yesu tshifhingani tshashu?

3. Tshifhingani tsho fhiraho, khandiso dzashu dzo vha dzi tshi ṱalutshedza hani tshifanyiso tsha vhasidzana vha fumi, ho vha na mvelelo dzifhio?

³ Kha thero yo fhiraho, ro guda uri miṅwahani ya zwenezwino, mulanda a fulufhedzeaho o shandula nḓila ine maṅwe mafhungo a Bivhili a ṱalutshedzwa ngayo. Zwino mulanda a fulufhedzeaho u livhisa ṱhogomelo yo engedzeaho kha ngudo dzi shumaho nahone hu si nga maanḓa kha zwine zwa khou lingedza u ambiwa kha tshifanyiso kana vhuporofita. Sa tsumbo, kha ri ṱhogomele tshifanyiso tsha Yesu tsha vhasidzana vha fumi. Khandiso dzashu dzo vha dzi tshi anzela u amba uri mbone, mapfura na midzio zwi fanyisela tshiṅwe tshithu kana muṅwe muthu. Musi ri tshi livhisa ṱhogomelo kha zwidodombedzwa zwiṱuku, zwo leluwaho, naa zwi a konadzea uri mulaedza wo ṱavhanyiswaho wa tshenetsho tshifanyiso u si pfesesee? Phindulo ya yeneyo mbudziso ndi ya ndeme.

4. Kha tshifanyiso, ri zwi ḓivha hani uri (a) mukwasha ndi nnyi? (b) vhasidzana ndi vhonnyi?

⁴ Kha ri ṱolisise mulaedza wa ndeme u re kha tshifanyiso tsha Yesu. Tsha u thoma, humbulani nga ha vhabvumbedzwa vha re kha tshifanyiso tsha vhasidzana vha fumi. Mukwasha ndi nnyi? Ndi Yesu. Zwenezwi ri a zwi ḓivha ngauri mathomoni Yesu o ḓivhidza mukwasha. (Luka 5:34, 35) Vhasidzana ndi vhonnyi? Ndi “sambi ḽiṱuku” ḽa Vhakriste vho ḓodzwaho. Ri zwi ḓivha hani? Kha tshifanyiso, vhasidzana vho vha vha tshi fanela u dzula vho funga mbone dzavho musi mukwasha a tshi swika. Ṱhogomelani zwe Yesu a zwi vhudza vhatevheli vhawe vho ḓodzwaho: “Ambarani ni ḓilugise nahone ni funge mbone dzaṋu, ni fane na vhanna vho lindelaho muṋe wavho uri a vhuye mbinganoni.” (Luka 12:32, 35, 36) Zwiṅwe hafhu, muapostola Paulo na muapostola Yohane vho vhambedza vhatevheli vha Kristo vho ḓodzwaho na vhasidzana vho kunaho. (2 Vhakorinta 11:2; Nzumbululo 14:4) Nga zwenezwo, ri a kona u pfesesa uri nyeletshedzo na tsevho i wanalaho kha Mateo 25:1-13 yo livhiswa kha vhatevheli vha Yesu vho ḓodzwaho.

5. Yesu o dzumbulula hani tshifhinga tshine tshifanyiso tshawe tsha ḓo shuma ngatsho?

⁵ Nyeletshedzo ya Yesu i shuma tshifhingani tshifhio? Zwe Yesu a zwi amba musi tshifanyiso tshi tsini na u fhela, zwi ri thusa uri ri kone u ḓivha. O ri: “Mukwasha a swika.” (Mateo 25:10) Kha Tshiingamo tsha  ḽa 15 July, 2013, ro guda uri vhuporofita ha Yesu vhu re kha Mateo ndima ya 24 na 25 vhu amba lwa malo nga ha u “swika” ha Yesu. Musi Yesu a tshi amba nga ha u “swika” hawe, o vha a tshi khou ambela kha tshifhinga tsha maṱungu mahulu musi a tshi ḓa u haṱula na u fhelisa ḽino shango ḽivhi. Nga zwenezwo, ri nga phetha nga ḽa uri tshifanyiso tsha Yesu tshi shuma maḓuvhani a vhufhelo, fhedzi u ḓo “swika” tshifhingani tsha maṱungu mahulu.

6. Ndi ufhio mulaedza wa ndeme u re kha tshifanyiso?

⁶ Ndi ufhio mulaedza wa ndeme une ra u guda kha tshenetshi tshifanyiso? Humbulani nga ha vhubvo ha eneo mafhungo a Bivhili. Kha Mateo ndima ya 24, Yesu o amba nga ha “mulanda a fulufhedzeaho na wa vhuṱali.” Onoyo mulanda u ḓo vha tshigwada tshiṱuku tsha vhanna vho ḓodzwaho tshine tsha ḓo ranga phanḓa vhatevheli vha Kristo maḓuvhani a vhufhelo. Yesu o sevha vhenevho vhanna uri vha fanela u dzula vha tshi fulufhedzea. Kha ndima i tevhelaho, Yesu o shumisa tshifanyiso tsha vhasidzana vha fumi u itela u eletshedza vhatevheli vhawe vhoṱhe vho ḓodzwaho maḓuvhani a vhufhelo. Mulaedza wo vha u wa uri vha ‘dzule vho fhaṱuwa’ u itela uri vha si xelelwe nga malamba avho a u tshila ṱaḓulu. (Mateo 25:13) Zwino kha ri ṱolisise tshifanyiso nahone ri ṱhogomele nḓila ye vhaḓodzwa vha shumisa ngayo yeneyo nyeletshedzo.

7, 8. (a) Ndi ngani vhasidzana vho ṱalifhaho vho vha vho lindela? (b) Vhaḓodzwa vho ḓiimisela u ita mini?

⁷ Kha tshifanyiso, Yesu o ombedzela uri vhasidzana vho ṱalifhaho vho vha vho fhambana na vhasidzana vha matsilu ngauri vho vha vho lindela musi mukwasha a tshi swika. Ndi ngani? Ngauri vho vha vho ḓilugisela nahone vho fhaṱuwa. Vhasidzana vhoṱhe vha fumi vho vha vha tshi fanela u dzula vho fhaṱuwa na u dzula vho funga mbone dzavho vhusiku hoṱhe. Vhasidzana vhaṱanu vho ṱalifhaho vho vha vha sa fani na vhasidzana vha matsilu, vho vha vho ḓilugisela ngauri vho ḓa na mbone dzavho na mapfura manzhi. Vhakriste vho ḓodzwaho vha fulufhedzeaho vho lugiselela hani u swika ha Yesu?

⁸ Vhaḓodzwa vho ḓiimisela u khunyeledza mushumo wavho u swika vhufheloni. Vha ṱhogomela uri u shumela havho Mudzimu zwi ḓo ṱoḓa uri vha ḓidzime zwithu zwi vhonalaho zwine zwa wanala shangoni ḽa Sathane, fhedzi vho ḓiimisela u ita nga u ralo. Vho ḓiimisela u shumela Yehova nga u fulufhedzea, hu si nga nṱhani ha uri vhufhelo vhu tsini, fhedzi ngauri vha a mu funa nahone vha funa na Murwa wawe. Vha dzula vha tshi fulufhedzea nahone a vha tendeli zwithu zwi vhonalaho zwa ḽino shango zwi tshi vha thithisa, zwi nga ho vhuḓifari vhu si havhuḓi na tseḓa. U fana na vhasidzana vho ṱalifhaho vhe vha vha vho lindela na mbone dzavho, vhaḓodzwa vha bvela phanḓa vha tshi vhonetshela, vho lindela u swika ha Mukwasha vha sa fheli mbilu naho zwi tshi  vhonala u nga u khou lenga.—Vhafilipi 2:15.

9. (a) Ndi tsevho ifhio ye Yesu a i ṋea nga ha u kumedza? (b) Vhaḓodzwa vho aravha hani musi hu tshi ṱavhiwa mukosi: “Mukwasha o swika”? (Sedzani ṱhaluso i re magumoni a siaṱari.)

⁹ Vhasidzana vho ṱalifhaho na vhone vho vha vho lindela u swika ha mukwasha ngauri vho vha vho fhaṱuwa. Fhedzi kha tshifanyiso, vhasidzana vhoṱhe vha fumi vho “thoma u kumedza vha eḓela” musi vho lindela mukwasha we a vha a tshi vhonala u nga u khou lenga. Nga zwenezwo, naa zwi a konadzea uri Vhakriste vha musalauno vho ḓodzwaho “vha eḓele,” zwine zwa amba u thithisea musi vho lindela u swika ha Kristo? Ee. Yesu o vha a tshi zwi ḓivha uri na muthu o ḓiimiselaho na ane a fhisea, a nga kulea nungo na u thithisea musi o lindela u swika hawe. Nga zwenezwo, Vhakriste vha fulufhedzeaho vho ḓodzwaho vho shuma nga nungo dzoṱhe u itela u dzula vho fhaṱuwa. Nga nḓila-ḓe? Kha tshifanyiso, vhasidzana vhoṱhe vha fumi, vho pfa hu tshi ṱavhiwa mukosi: “Mukwasha o swika!” Fhedzi ndi vhasidzana vho ṱalifhaho vhe vha dzula vho fhaṱuwa. (Mateo 25:5, 6; 26:41) Nga hu fanaho, maḓuvhani a vhufhelo, Vhakriste vho ḓodzwaho vho aravha musi hu tshi ṱavhiwa mukosi: “Mukwasha o swika!” Vho ṱanganedza vhuṱanzi ho khwaṱhaho ha uri Yesu u khou swika nahone vho lindela u swika hawe. * (Sedzani ṱhaluso i re magumoni a siaṱari.) Zwino kha ri ṱolisise magumo a tshenetsho tshifanyiso tsha Yesu, tshine tsha livhisa ṱhogomelo kha tshifhinga tsho livhaho.

10. Ndi mini zwine ra nga zwi guda nga ha nyambedzano ye ya vha hone vhukati ha vhasidzana vho ṱalifhaho na vha matsilu?

¹⁰ Musi tshifanyiso tshi tsini na u fhela, vhasidzana vha matsilu vho humbela vhasidzana vho ṱalifhaho mapfura a u shela kha mbone dzavho. Fhedzi vhasidzana vho ṱalifhaho vha hana u vha thusa. (Vhalani Mateo 25:8, 9.) Fhedzi ndi lini he Vhakriste vha fulufhedzeaho vho ḓodzwaho vha hana u thusa ane a ṱoḓa thuso? Ni songo hangwa tshifhinga tshine tshenetsho tshifanyiso tsha ambela khatsho. Yesu ane a vha mukwasha u swika u itela u haṱula musi maṱungu mahulu e tsini na u fhela. Nga zwenezwo, khamusi eneo mafhungo a ambela kha zwine zwa ḓo itea musi maṱungu mahulu a sa athu u fhela. Ndi ngani ri tshi ralo? Ngauri nga tshenetsho tshifhinga, vhaḓodzwa vha ḓo vha vho no wana luswayo lwavho lwa u fhedzisela.

11. (a) Hu ḓo itea mini musi maṱungu mahulu a sa athu u thoma? (b) Vhasidzana vho ṱalifhaho vho vha vha tshi khou amba mini musi vha tshi vhudza vhasidzana vha matsilu uri vha ye u ḓirengela mapfura?

¹¹ Nga zwenezwo, musi maṱungu mahulu a sa athu u thoma, vhaḓodzwa vhoṱhe vha fulufhedzeaho vha re kha ḽifhasi vha ḓo vha vho no wana luswayo lwavho lwa u fhedza. (Nzumbululo 7:1-4) Nga murahu ha zwenezwo, zwi khagala uri vha ḓo ya ṱaḓulu. Fhedzi humbulani nga ha miṅwaha ine maṱungu mahulu a ḓo vha a sa athu u swika. Hu ḓo itea mini kha vhaḓodzwa vhe vha si dzule vho fhaṱuwa nahone vha si fulufhedzee? A vha nga wani luswayo lwa u fhedza. Nga tshenetsho tshifhinga, vhaṅwe Vhakriste vha fulufhedzeaho vha ḓo vha vhaḓodzwa. Musi maṱungu mahulu a  tshi thoma, vha matsilu vha ḓo tshuwa musi Babele Ḽihulu ḽi tshi fheliswa. Ndi hone vha tshi ḓo ṱhogomela uri vho vha vha songo ḓilugisela u swika ha Yesu. Nga tshenetsho tshifhinga, hu ḓo itea mini arali vha humbela thuso? Phindulo i wanala kha tshifanyiso. Vhasidzana vho ṱalifhaho vho hana u ṋea vhasidzana vha matsilu mapfura avho nahone vha vha vhudza uri vha ye u renga avho. Samusi ho vha hu “vhukati ha vhusiku,” ho vha hu si na muthu ane a nga vha rengisela mapfura. Ho vha hu si tsheena tshifhinga!

12. (a) Tshifhingani tsha maṱungu mahulu hu ḓo itea mini kha vhaḓodzwa vhe vha si fulufhedzee musi hu sa athu u swaiwa lwa u fhedza? (b) Hu ḓo itea mini kha vhane vha fana na vhasidzana vha matsilu?

¹² Tshifhingani tsha maṱungu mahulu, vhaḓodzwa vha fulufhedzeaho a vha nga ḓo thusa muthu naho e ufhio we a si fulufhedzee. Hu ḓo vha hu si tsheena tshifhinga. Nga zwenezwo, hu ḓo itea mini kha vhe vha si fulufhedzee? Ṱhogomelani zwe zwa itea kha vhasidzana vha matsilu vhe vha ya u renga mapfura: “Mukwasha a swika nahone vhasidzana vhe vha vha vho ḓilugisa vha dzhena nae munyanyani wa mbingano, vothi ḽa valiwa.” Musi Yesu a tshi swika e kha vhugala hawe musi maṱungu mahulu e tsini na u fhela, u ḓo kuvhanganyela vhaḓodzwa vha fulufhedzeaho ṱaḓulu. (Mateo 24:31; 25:10; Yohane 14:1-3; 1 Vhathesalonika 4:17) Naho zwo ralo, Yesu u ḓo landula vhe vha si fulufhedzee. U fana na vhasidzana vha matsilu, vha nga amba uri: “Mukwasha, mukwasha, ri vulele!” Fhedzi Yesu u ḓo aravha hani? Zwi ṱungufhadzaho ndi uri u ḓo vha fhindula nga nḓila ine a ḓo fhindula ngayo vhane vha fana na mbudzi, a ri: “Ngoho ndi a ni vhudza, a thi ni ḓivhi.”—Mateo 7:21-23; 25:11, 12.

13. (a) Ndi ngani hu si na ṱhoḓea ya u phetha nga ḽa uri vhatevheli vha Kristo vho ḓodzwaho a vha nga fulufhedzei? (b) Ndi ngani ri tshi nga amba uri tshifanyiso tsha Yesu tshi dzumbulula fulufhelo ḽine a vha naḽo kha Vhakriste vhawe vho ḓodzwaho? (Sedzani tshifanyiso tsha u thoma.)

¹³ Naa Yesu o vha a tshi khou amba uri vhaḓodzwa vhanzhi a vha nga ḓo fulufhedzea nahone vha fanela u dzhielwa vhudzulo nga vhaṅwe? Hai. Kha Mateo ndima ya 24, ri vhala uri Yesu o sevha mulanda a fulufhedzeaho na wa vhuṱali uri a si vhe mulanda muvhi. Zwenezwo zwo vha zwi sa ambi uri o vha a tshi lavhelela uri zwenezwi zwi ḓo itea. Nga hu fanaho, tshifanyiso tsha vhasidzana vha fumi tshi shuma sa tsevho. Samusi vhasidzana vhaṱanu vho vha vhe matsilu nahone vhaṱanu vho ṱalifha, muḓodzwa muṅwe na muṅwe wa Mukriste u fanela u khetha u dzula o ḓilugiselela na u fhaṱuwa. Zwa sa ralo, u ḓo vha tsilu kana a si fulufhedzee. Paulo o ṋea tsevho i fanaho kha vhahawe vha tshinnani na vha tshisadzini vho ḓodzwaho. (Vhalani Vhaheberu 6:4-9; vhambedzani Doiteronomio 30:19.) Tsevho yawe yo vha yo livha, fhedzi o vha a tshi fulufhela uri vhahawe vha tshinnani na vha tshisadzini vha ḓo wana malamba avho. Tsevho i re kha tshifanyiso tsha vhasidzana vha fumi, i dzumbulula uri Yesu o vha a tshi fulufhela vhaḓodzwa nga nḓila i fanaho. U a zwi ḓivha uri muḓodzwa muṅwe na muṅwe ane a vha mushumeli  wawe, a nga dzula a tshi fulufhedzea nahone a wana malamba avhuḓi!

14. Ndi ngani tshifanyiso tsha vhasidzana vha fumi tshi tshi nga vhuyedza na vha “dziṅwe nngu”?

¹⁴ Tshifanyiso tsha Yesu tsho vha tsho livhiswa kha Vhakriste vho ḓodzwaho. Fhedzi naa vha “dziṅwe nngu” vha nga vhuyelwa nga tshifanyiso tsha Yesu? (Yohane 10:16) Ee! Mulaedza wa tshenetsho tshifanyiso wo leluwa, u ri: “Dzulani no fhaṱuwa.” Yesu o vhuya a amba uri: “Zwine nda vhudza inwi, ndi vhudza vhoṱhe ndi ri: Dzulani no fhaṱuwa.” (Marko 13:37) Yesu u ṱoḓa uri vhafunziwa vhawe vhoṱhe vha ḓilugiselele nahone vha fhaṱuwe. Vhakriste vhoṱhe vha nga edzisa tsumbo yavhuḓi ya vhaḓodzwa, vhane vha vhea vhuḓinḓa u thoma vhutshiloni havho. Ni songo hangwa uri vhasidzana vha matsilu vho humbela vhasidzana vho ṱalifhaho mapfura. Khumbelo yavho a yo ngo ṱanganedzwa. Zwenezwo zwi ri humbudza uri ndi vhuḓifhinduleli hashu u dzula ri tshi fulufhedzea kha Mudzimu, u ḓilugiselela na u dzula ro fhaṱuwa. A si vhuḓifhinduleli ha muṅwe muthu. Muṅwe na muṅwe washu u ḓo ḓifhindulela kha Yesu Kristo, Muhaṱuli o lugaho ane a ḓo swika hu si kale. Nga zwenezwo, ri fanela u dzula ro lindela!

15. Ndi ngani mbingano ya Kristo na muselwa wawe i tshi takadza Vhakriste vhoṱhe vha ngoho?

¹⁵ Vhakriste vhoṱhe vha takadzwa nga mbingano ye ha ambiwa nga hayo kha tshifanyiso tsha Yesu. Tshifhingani tshi ḓaho, nga murahu ha nndwa ya Haramagedo, Vhakriste vho ḓodzwaho vha ḓo vha muselwa wa Kristo. (Nzumbululo 19:7-9) Muṅwe na muṅwe a re kha ḽifhasi u ḓo vhuyelwa nga mbingano ya ṱaḓulu. Ndi ngani? Ngauri i khwaṱhisedza muvhuso wo fhelelaho wa vhathu vhoṱhe. Hu sa londwi uri ri na fulufhelo ḽa u tshila tshoṱhe ṱaḓulu kana kha ḽifhasi, kha ri dzule ro ḓiimisela u lindela na u dzula ro fhaṱuwa. Arali ra ita nga u ralo, ri nga ḓiphina nga vhumatshelo havhuḓi he Yehova a ri lugiselela hone!