JULIAN nih a fapa Jehovah Tehte a si ti lo ti an thanh lioah a intuarmi kha aa cinken rih. Julian nih hitin a chim: “Ka caah vawlei pumpi a rawh dih bantuk a si. Anih cu ka fale lakah upa bik a si i kan i daw tuk. Amah he zei paoh kan ṭuanṭi ti awk tluk a si. Fapa fimte a rak si ko nain a hnuah aa thleng i thil ṭhalo a hun tuah. Ka nupi cu a ṭap lengmang i zeitindah ka hnemh lai ti kha ka hngal lo. Nulepa sining kan tlinh lo caah maw a si hnga tiah kan i hal.”

Mi pakhatkhat buchung chuah a sinak a ruang he aa tlaiin Baibal nih zeitindah a chim? Buchung chuahnak nih kan lung a fahter tuk ko nain mah cu dawtnak langhternak a si tiah zeicah kan chim khawh?

Tipil a ing cangmi Jehovah Tehte pakhat nih sualnak ngan a tuah i aa ngaihchih lo ahcun buchung in chuah a si lai.

Jehovah nih kan sinin tlinnak kha aa ruahchan lo. Asinain a nawlbia zulh awk le thiang tein um awkah aa ruahchan. Tahchunhnak ah, Jehovah nih a salle kha ziaza rawhralnak, siasal biaknak, firnak, mi thil chuhnak, lainawnnak le khuachia thiamnak ti bantuk sualnak ngan hna kha hrial awkah nawl a pek hna.—1 Kor. 6:9, 10; Biat. 21:8.

Jehovah nih kan sinin aa ruahchanmi cu a tlarimi a si i a kan kilvengtu zong a si. Tahchunhnak ah, kan dihlak in a daimi, upat awk a tlakmi le a dingfelmi hna lakah um kan duh. Thlaraulei unau hna lakah cutin um khawh a si. Zeicahtiah annih cu Jehovah sinah aa pumpemi le Baibal phunglam ningin nun awkah bia aa kammi an si caah a si.

Asinain tipil a ing cangmi Khrihfa pakhat nih minung derthawmnak ruangah sualnak ngan a tuah ah tah zeitin? Hlanlio Jehovah salle cheukhat cu cutin an rak si. Asinain Jehovah nih a hlaw taktak hna lo. Tahchunhnak ah, Siangpahrang David nih  nupa sualnak a tuah i mi a that ko nain profet Nathan nih Jehovah nih na sualnak aan ngaihthiam tiah a ti.—2 Sam. 12:13.

Zeicah Jehovah nih David kha a ngaihthiam? Aa ngaihchih taktak kha Jehovah nih a hmuh caah a si. (Salm 32:1-5) Tuchan zongah sualnak a tuahtu pakhat cu aa ngaihchih taktak i thil ṭhalo tuah kha a ngol ahcun ngaihthiam a si lai. (Lam. 3:19; 26:20) Asinain biaceihtu kawmiṭi i Khrihfa upa nih aa ngaichih taktak lo ti kha an hmuh ahcun buchung in chuah a si men lai.

Na chungkhar asiloah na hawikom pakhatkhat buchung in chuah a si ahcun mah kha cohlan awkah naa harh kho. Cun na lung zong a fak tuk ko lai. Asinain buchung chuahnak cu dawtnak langhternak a si tiah Baibal nih fiang tein a chim.

“Fimnak cu a theitlai nih khan a hmaan tiah a langhter ko” tiah Jesuh nih a ti. (Matt. 11:19) Aa ngaichih lomi pakhat buchung in chuah cu zeicah fim a si timi a ruang pathum kha i ruah hna u sih.

Buchung chuahnak nih Jehovah min thangchiat a si nakhnga lo a kilven. Kannih cu Jehovah min aa lakmi a Tehte kan si caah kan tuahsernak nih Jehovah min thang a ṭhatter khawh asiloah a chiatter khawh. (Isa. 43:10) Fale tuahsernak nih nulepa min a ṭhatter khawh asiloah a chiatter khawh bantukin Jehovah salle tuahsernak nih Jehovah min a ṭhatter khawh asiloah a chiatter khawh. Ezekiel chan ah miphun dang hna nih Judah mi kha Jehovah min in an hngalh hna. (Ezek. 36:19-23) Tuchan zongah Jehovah Tehte Hna cu Jehovah min in hngalh an si. Cucaah Jehovah nawlbia kan zulh ahcun Jehovah min thang kan ṭhatter lai.

Lamkaltu Piter nih Khrihfa hna kha hitin ralrin a pek hna: “Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh. Nannih aan kotu hna Pathian cu a thian bantukin nannih zong thiang tein nung ve u. Cathiang nih ‘Keimah ka thian caah nannih zong nan thian ve awk a si’ a ti.” (1 Pit. 1:14-16) Tahchunhnak ah, kan ziaza a rawhral ahcun Jehovah min kan chiatter lai. Asinain kan tuahsernak a thian ahcun Jehovah min thang kan ṭhatter lai.

Jehovah Tehte pakhat nih thil ṭhalo a tuah ahcun amah a hngalmi hna nih a tuahmi kha an hngalh men ko lai. Cucaah anih cu Jehovah Tehte a si ti lo ti an hngalh tikah Jehovah Tehte Hna cu Baibal phunglam an zul i Khrihfabu a thian zungzal nakhnga an tuah ti kha an hung hngalh lai. Tahchunhnak ah, Switzerland ah mipa pakhat cu pumhnak ah a ra i Khrihfabu chungmi pakhat si ka duh ve tiah a ti. A naunu cu nupa sualnak a tuah ruangah buchung in chuah a si. “A ṭha lomi ziaza kha zei rel loin a um lo i tuah a awnh lomi” bu ah i tel ka duh ve tiah a chim.

Buchung in chuahnak nih Khrihfabu a thianter. Aa ngaichih lomi sualnak a tuahtu Khrihfabu chungah umnak nawl awnh cu ṭih a nung tiah lamkaltu Paul nih Korin Khrihfa hna kha ralrin a pek hna. Mah sualnak a tuahtu hna i a ṭha lomi huham kha thilnu he a tahchunh. Paul nih “thilnu tlawmte nih chang nawnmi cu a ningpi in a thawhter” tiah a ti. Cun “nan buchung in miṭhalo kha va chuah u” tiah ralrin a pek hna.—1 Kor. 5:6, 11-13.

Mah “miṭhalo” cu ningzahnak ngei loin nupa sualnak a tuahmi a si. Khrihfabu chung i mi cheukhat nih a tuahsernak kha an silhnalhpiak. (1 Kor. 5:1, 2) Mah bantuk  sualnak ngan zei rel loin um cu ṭih a nung. Zeicahtiah Korin mi nih an tuah tawnmi ziaza rawkralhnak kha Khrihfabu chung i unau dang zong nih an hun tuah khawh ve caah a si. Tuchan zongah sualnak ngan kha Khrihfabu nih zei rel loin a um ahcun unau cheukhat nih Jehovah phunglam cu a biapi lo tiah an hun hmuh khawh. (Pct. 8:11) ‘Ti chungah a ummi lung’ nih tilawng a hrawh khawh bantukin aa ngaichih lomi sualnak a tuahtu hna nih unau dang an zumhnak kha an hrawh khawh ve.—Judas 4, 12, NW.

Buchung in chuahnak nih sualnak a tuahtu kha a palhnak a hngalhter. A pa inn kaltak in a ro vialte kha ziaza rawhralhnak caah a sawksammi mino pa pakhat kong bianabia kha Jesuh nih a chim. A hnuah mah mino pa nih a pa inn he aa hlatnak ah khuasak cu zei sullam hmanh a ngeih lo kha a hun hngalhthiam. Cucaah aa ngaichih i a chungkhar sin kir ṭhan awkah bia a khiah. A lungput aa thlenmi kha a pa nih a hmuh tikah aa lawm tuk i a inn ah a umter ṭhan. (Luka 15:11-24) Mah bianabia nih mi pakhat aa ngaihchih tikah Jehovah zeitindah a um ti hngalhthiam awkah a kan bawmh. Jehovah nih hitin a chim: “Miṭhalo mi an thih cu ka duhmi a si lo. Miṭhalo mi nih an ziaza kha an ṭhinh i an nun kha ka duh deuh.”—Ezek. 33:11.

Khrihfabu cu thlaraulei kan innchungkhar a si. Cucaah unau pakhat buchung in chuah a si tikah kan innchungkhar mi a si ti lo. A ṭha lomi a tuahsernak ruangah a chuakmi thil a ton tikah a palhnak kha a hun hngalh men lai. Cun Jehovah le Khrihfabu he a ṭhami pehtlaihnak a rak ngeih lioah zeitluk in dah aa nuamh kha aa cinken men lai. Mah nih thlaraulei innchungkhar i rak kir ṭhan awkah a forh men lai.

Buchung in chuahmi pakhat Khrihfabu chung a kir ṭhan khawh nakhnga bawmh awkah fek tein um le dawtnak langhter a hau. Tahchunhnak ah, a kik tukmi ni ah lam a tlaumi tlangkaimi pahnih nih anmah a rak khamh hngami hna kha an hngak hna. A kih tuk caah pakhat cu a ba tuk i a mit a ku. Asinain hawrha lakah aa hngilh ahcun a thi kho. Cucaah a hawipa nih a mitkuh a fim nakhnga a hmaiah fak ngaiin a bengh. Cutin bengh cu a fak ko lai nain mah nih a nunnak a khamh khawh. David nih cu bantuk phun in hitin a chim: “Miṭha nih cun dawtnak in ka si hna sehlaw dan ka tat ko hna seh.” (Salm 141:5) David nih chimhhrinhnak cu in awkah har hmanh sehlaw mah nih a ka bawmh lai ti kha a hngalh.

Bengh bantukin sualnak a tuahtu Jehovah sin kir ṭhan awkah buchung chuahnak cu a herh tawn. Hi capar a thawknak ah langhtermi Julian fapa cu buchung in chuah a si kumhra hnuah a nunning aa thleng i Khrihfabu ah a kir ṭhan. Atu cu Khrihfa upa a si cang. Hitin a chim: “Buchung chuah ka simi nih ka tuahsernak ruangah a chuakmi thil kha a ka tonter. Cu bantuk chimhhrinhnak phun kha ka herh.—Heb. 12:7-11.

Unau pakhat buchung in chuah a si tikah ngaihchiat awk ngai a si. Asinain Jehovah sinah zeitikhmanh ah a kir ṭhan kho ti lo tinak cu a si lo. Kan zapi in buchung chuahnak he aa tlaimi phunglam zulh cu a biapi. Zeitindah kan zulh khawh?

Khrihfa upa nih Jehovah langhtermi dawtnak i zohchunh awkah an i zuam zungzal, a hleiin mi pakhatkhat kha Jehovah Tehte na si ti lo tiah an chimh tikah an i zuam. Cun Jehovah sin le Khrihfabu i kir  ṭhan awkah tuah a herhmi kha nem tein le fiang tein an chimh. Buchung chuah a simi nih Khrihfabu chung kir ṭhan a duh kha a langhter ahcun a sinah Khrihfa upa pawl cu atu le atu an leng lai i Jehovah sin kir ṭhan awkah zeidah tuah awk a si ti kha an hngalhter ṭhan khawh. *

Chungkhar mi nih Khrihfa upa biakhiahnak an cohlannak thawngin Khrihfabu le buchung chuahmi cungah dawtnak an langhter khawh. Julian nih hitin a chim: “Anih cu ka fapa a si rih ko, asinain a nunning cu kan karlak ah dawntu a si.”

Khrihfabu chungmi dihlak nih buchung chuah a simi he pehtlaihnak tuah lo le chawnhbiak lonak thawngin dawtnak taktak an langhter khawh. (1 Kor. 5:11; 2 Johan 10, 11) Cuticun Khrihfa upa hmangin Jehovah chimhhrinhnak an cohlan kha an langhter khawh. Mah lengah buchung chuahmi i a chungkhar kha a hleiin in dawtnak langhter khawh a si i bawmhnak zong pek khawh a si. Mah caan cu chungkhar caah a har tukmi caan a si. Khrihfabu in hlawt kan si tiah zeitikhmanh ah kan ruahter hna awk a si lo.—Rom 12:13, 15.

Julian nih hitin a chim: “Buchung in chuahnak cu a herhmi timhtuahnak a si. Mah nih Jehovah phunglam ningin nun awkah a kan bawm khawh. Chikkhat cu in awkah a har ko nain mah nih ṭhatnak a chuahter. Ka fapa i a ṭha lomi a tuahsernak hna kha zei rel loin ka um ahcun zeitikhmanh ah aa thleng lai lo.”