MAARA ia Julian i tona taitaia maata te akarongo anga ki te tuatua akakite e kua akaateaia tana tamaiti mei roto i te putuputuanga. “Kare roa au i kite e ka akapeea au,” i nana ai. “Koia taku tamaiti mua, e pirianga meitaki tikai to maua; maata te au mea e rave kapiti ana maua.” Akakite mai a Julian e e tamaiti meitaki ua aia, inara kua taui takiri tona tu e kua akamata i te rave i te au mea kino. Aue ua te vaine a Julian e kare aia i kite e ka akapeea aia i te akapumaana anga i tona tokorua. Karanga a Julian e, “E ui ua ana maua kia maua rai e me e ngai tetai i tarevake i te utuutu anga iaia.”

Eaa te au mea ta te Pipiria e akakite maira no te akaatea i tetai tangata mei roto i te putuputuanga? I te mea e maata te mamae ngakau ta te reira e akatupu ana, eaa ra i reira tatou ka karanga ai e e akaataanga tera no to Iehova aroa ia tatou?

Me rave tetai Kite o Iehova tei papetitoia i tetai ara kino e kare e tataraara, ka akaateaia aia mei roto i te putuputuanga.

Kare a Iehova e tapapa mai te tu apa kore mei ia tatou, mari ra kia akarongo tona au tavini i tana au ture e kia vai viivii kore ua. Ei akaraanga, akaue a Iehova i tona au tavini kia kopae i te au ara kino mei te moeaana koia oki, te au peu viivii o te ainga, akamori itoro, te keikeia, te aru, te tā tangata, e te angaanga purepure.​—1 Korinetia 6:9, 10; Apokalupo 21:8.

Te tau ua ra ta Iehova e tapapa maira mei ia tatou, no te mea ka paruru te reira ia tatou. Ei akaraanga, inangaro tatou i te noo i rotopu i te au tangata akamoeau, meitaki, e te tuatua tika, e ko ta tatou ïa e kite nei i rotopu i to tatou au taeake e te au tuaine Kerititiano. Eaa  te tumu i pera ai ratou? No te mea kua akatapu ratou ia ratou uaorai kia Iehova e kua tia kia akarotai i to ratou oraanga ki tana e akakite maira i roto i te Pipiria.

Akapeea ra me rave tetai Kerititiano tei papetitoia i tetai ara kino? Kua tupu teia ki tetai au tavini o Iehova i mua ana, inara kare a Iehova i kopae takiri ana ia ratou. Ei akaraanga, noatu kua akaturi te Ariki a Davida e kua tā i tetai tangata, kua akakite te peroveta a Natana kia Davida e kua akakore a Iehova i tana ara.​—2 Samuela 12:13.

No teaa ra a Iehova i akakore ei i te ara a Davida? No te mea te kite ra a Iehova e kua tataraara tikai a Davida i roto i tona ngakau. (Salamo 32:1-5) Mei tera katoa i teia tuatau, me ara tetai tangata, ka akakoreia mai tana ara me tataraara tikai aia i roto i tona ngakau e me akamutu aia i te rave i te kino. (Angaanga 3:19; 26:20) Me te kite ra te aronga pakari e kare te tangata ara i tataraara ma te ngakau tae, ka akaateaia aia mei roto i te putuputuanga.

Me kua akaateaia tetai i roto i toou ngutuare me kore tetai oa piri mou mei roto i te putuputuanga, penei ka ngata ia koe i te āriki i te tukuanga tika a te aronga pakari e ka manako e e tangi kore tikai ratou. Inara te akaari tika maira te Tuatua a Iehova e e akaateaanga tera no to Iehova aroa ia tatou.

Akakite a Iesu e ka rauka te pakari me rave i te tuatua tika. (Mataio 11:19) Ka akara ana tatou e toru tumu tau no te akaatea i tetai tangata kare e tataraara.

Paruru i te ingoa o Iehova kia kore e taviiviiia. Ka riro ta tatou ka rave ei akangateitei me kore ei taviivii i te ingoa o Iehova, no te mea e au Kite tatou nona e te apai nei tatou i tona ingoa. (Isaia 43:10) Mei te tu rai o tetai tamaiti te ka akangateitei me kore ka taviivii i te ingoa o tona metua, ka riro katoa rai te tu o te au tavini o Iehova ei akangateitei me kore ei taviivii i te ingoa o Iehova. I te tuatau o Ezekiela, e akapiri ana te tangata i te ngati Iuda ki te ingoa o Iehova. (Ezekiela 36:19-23) Mei tera katoa i teia tuatau, e akapiri ana te tangata i te Au Kite o Iehova ki te ingoa o Iehova. No reira me akarongo tatou ki ta Iehova au ture, ka apai mai te reira i te akangateitei kiaia.

Kua ako te apotetoro ko Petero i te au Kerititiano e: “Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra; Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’” (1 Petero 1:14-16) Ei akaraanga, me rave matau tatou i te moeaana koia oki, i te au peu viivii o te ainga, ka taviivii tatou i te ingoa o te Atua. Inara me vai viivii kore ua tatou, ka riro tera ei akangateitei ia Iehova.

Me rave matau tetai Kite o Iehova i te kino, ka kite ua te aronga tei matau iaia e e tarevake tana e rave ra. No reira me kite ratou e kare aia i te Kite akaou no Iehova, ka kite ïa ratou e e iti tangata akarongo te Au Kite o Iehova i te ako a te Pipiria e ka akapapu e kia vai viivii kore ua te putuputuanga. Ei akaraanga, kua aere mai tetai tangata ki te uipaanga i Switzerland, akakite aia e ka inangaro aia kia riro ei mema no te putuputuanga. Kua akaateaia tona tuaine mei te putuputuanga no te rave matau i te au peu viivii o te ainga e kua inangaro aia i te piri ki tetai akaaerenga “kare e āriki ana i te au peu kino.”

Vai viivii kore te putuputuanga Kerititiano. Kua akamatakite te apotetoro ko Paulo i to Korinetia i te kino te ka tupu me akatikaia tetai tangata rave ara kia noo rai i roto i te putuputuanga. Kua akaaite aia i te akakeuanga kino a te aronga ara ki te opue i roto i te varaoa. Akakite a Paulo e ka “opue te putunga katoa i te akaopue mea ngiti.” I reira kua ako aia ia ratou kia “akataka ke atu kotou  i taua tangata tuatua kino i roto ia kotou na.”​—1 Korinetia 5:6, 11-13.

E angaanga matau na tera “tangata tuatua kino” te rave i te peu moeaana ma te akamā kore. Kua akamata katoa tetai aronga i tona putuputuanga i te maani kotoeanga no tana au peu viivii. (1 Korinetia 5:1, 2) E mea kino teia no te mea kua riro teia tu oraanga tei matauia i Korenetia ei akakeuanga kino ki runga i te au Kerititiano. Mei tera katoa i teia tuatau, me ka āriki te putuputuanga i teia tu ara kino, ka manako tetai aronga e kare e puapinga o to Iehova au turanga. (Koheleta 8:11) Mei te toka rai i raro i te moana te ka akaparari i te paʼi, mei te reira katoa te aronga rave ara kare e tataraara, ka akaparuparu ratou i te akarongo o etai ke i roto i te putuputuanga.​—Iuda 4, 12

Ka tauturu i te tangata rave ara kia kite i tona tarevake. Kua akakite a Iesu i tetai parapore no runga i tetai tamaiti tei akaruke i te ngutuare o tona metua, kua kaimoumou i tona apinga, e kua noo i te oraanga akono kore i te Atua. Kua tataraara aia e kua manako i te oki ki tona ngutuare. Rekareka maata to te metua tane te kite anga e kua taui te tu o tana tamaiti, e kua āriki maira iaia ki te ngutuare. (Luka 15:11-24) Tauturu teia parapore ia tatou kia mārama e mei teaa to Iehova manako me tataraara tetai. Te na ko maira aia e: “Kare rava oku e mareka anga i te mate o te tangata kino ra; kia ariu maira te tangata kino i tona aerenga kia ora.”​—Ezekiela 33:11.

Ko te putuputuanga Kerititiano to tatou kopu tangata i roto i te akamorianga a Iehova. Me akaateaia tetai tangata, kare aia i te mema akaou no tera kopu tangata. Me kite aia i te kino no tana i rave, ka āriki aia i reira e kua tarevake aia e ka maara iaia te mataora maata tana i kite i te tuatau e vai ra tona pirianga meitaki kia Iehova e te putuputuanga. Penei ka akamaroiroi teia iaia kia oki akaou ki tona kopu tangata i roto i te akamorianga a Iehova.

Ei tauturu i tetai tangata tei akaateaia kia oki mai ki te putuputuanga, kia ngaueue kore tatou auraka e piri atu kiaia. Ei akaraanga, e akamanako ana i tetai nga tangata koka e tiaki tauturu ra i tetai rā anu. No te pakari o te anu, roiroi tetai ia raua e kua inangaro i te moe. Inara me ka varea aia e te moe i roto i te kiona, ka mate aia. Ei tauturu iaia kia ara ua, kua papaki atu tona oa i tona mata. Noatu te mamae ra aia, ka riro teia ei akaora iaia. Mei tera katoa to Davida manako tona akakite anga e: “Ka pāpā mai te tangata tuatua-tika ra iaku, e mea takinga-meitaki ra ïa.” (Salamo 141:5) Kua kite a Davida e noatu ka mamae aia me akoia, ka tauturu ra te reira iaia.

Noatu ka mamae, ka riro te akaateaanga i tetai ei tauturu iaia kia oki akaou mai kia Iehova. Kua taui te oraanga o te tamaiti a Julian, tei taikuia i te akamataanga o teia atikara, e kua oki akaou mai aia ki te putuputuanga e tai ngauru mataiti i muri ake i tona akaateaangaia. Teianei kua riro aia ei tangata pakari i roto i te putuputuanga. Akakite aia e: “Toku akaateaangaia, kua riro te reira ei tauturu iaku kia kite i te openga kino o toku tu oraanga. Kua tau rai kia akaateaia au.”​—Ebera 12:7-11.

E mea tumatetenga tikai me akaateaia tetai tangata mei te putuputuanga. Kare ra mei te mea e kare rava e rauka iaia kia oki akaou mai kia Iehova. E mea puapinga kia tatou pouroa kia tuku i tetai taime no te ako kia angaanga. Akapeea tatou i te rave anga i te reira?

Kia aru ua rai i te akaraanga o to Iehova aroa me akakite te aronga pakari ki tetai e kare ratou i te Kite akaou no Iehova. Ka akamārama marie ratou ma te takinga meitaki eaa te ka anoanoia kia rave aia kia rauka i te oki akaou mai kia Iehova e kia riro akaou ei mema no te putuputuanga. Me ka akaari mai  tetai tei akaateaia e ka inangaro aia i te oki akaou mai ki te putuputuanga, kia atoro te aronga pakari iaia mei tera taime ki tera taime i te akamaara atu e eaa tana ka rave kia oki akaou mai kia Iehova. *​—Akara i te tataanga rikiriki i raro.

Me turu te kopu tangata i te tukuanga tika a te aronga pakari, te akaari ra ratou i to ratou aroa no te putuputuanga e te tangata tei akaateaia. Akamārama mai a Julian e, “Noatu e tamaiti aia naku, kareka ra te tu o tona oraanga kua riro tera ei arai i rotopu ia maua.”

Pouroa te au taeake i roto i te putuputuanga te akaari ra i to ratou aroa no te tangata tei akaateaia me turu ratou i te ako ta Iehova i oronga mai na roto i te aronga pakari. Tera te aiteanga, kare ratou e kapiti atu me kore e tuatua atu kiaia. (1 Korinetia 5:11; 2 Ioane 10, 11) Kia akaari katoa te putuputuanga i to ratou aroa e ta ratou turuturu no te ngutuare tangata o tei akaateaia. E tuatau ngata tikai teia no te ngutuare tangata. Auraka tatou kia kopae ia ratou mei roto i te putuputuanga.​—Roma 12:13, 15

“Ka anoanoia te akanoonooanga no te akaatea i te tangata rave ara mei roto i te putuputuanga, ka tauturu te reira ia tatou kia akaāu i to tatou oraanga ki to Iehova au turanga” i akakite ei a Julian. “Noatu te mamae ngakau, e openga meitaki ra ta te reira i akatupu. Naringa au i āriki ua i te tu tarevake o taku tamaiti, kare rava aia e oki akaou mai kia Iehova.”