JULIAN, chatum xtatayana Jehová wan pi lu tlan xtalalin xkgawasa chu lhuwa tuku akxtum xtlawakgo. Pero xkgawasa tanu tsukulh likatsi chu tsukulh tlawa tuku nitlan. Akxni wanka xlakatin putum congregación pi xkgawasa nialh xtatayana Jehová xlitaxtu, Julian lu nitlan makgkatsilh. Xpuskat lhuwa tasalh chu ni xkatsi la xmakgoxomixilh. Julian wan: «Xaklilakpuwanaw komo wi tuku ni liwana xaktlawanitaw».

Chuna la wan Biblia, ¿tuku xlakata wi tiku maxtukan kcongregación? Chu xlakata uma lu makgalipuwanan, ¿tuku xlakata wanaw pi akxni wi tiku maxtukan limasiyakan pi paxkikan? Kʼuma artículo nakakgalhtiyaw umakgolh takgalhskinin.

Komo chatum xtatayana Jehová tiku tamununita tlawa akgtum lanka talakgalhin chu ni makgxtakga, maxtukan kcongregación.

Xlikana pi Jehová ni kinkaskiniyan pi putum tlan tuku natlawayaw chu ni tuku naliʼakgtsankgayaw. Pero kinkaskiniyan nakgalhakgaxmataw xlimapakgsin. La uma: kinkawaniyan pi ni natlawayaw talakgxtumit nema ni xlitatlawat, ni nakakninaniyaw ídolos, ni nakgalhananaw, ni namakgninanaw chu ni natlawayaw tuku xla taskuwan (1 Cor. 6:9, 10; Apocalipsis [Revelación] 21:8).

Jehová ni kinkaskiniyan tuku nila tlawayaw chu tuku kinkaskiniyan kaj xlakata kilitlankan. Akgtum liʼakxilhtit, kcongregación tlan limakgkatsiyaw xlakata putum lu tlan likatsikgo, tlan linkgo xtayatkan chu ni kgalhanankgo. ¿Tuku xlakata chuna likatsiyaw? Xlakata akxni tamunuw waniw Jehová pi nakgalhakgaxmataw xlimapakgsin.

Pero ¿tuku la komo chatum xtatayana Jehová tiku tamununit tlawa akgtum lanka talakgalhin? Makgasa makgapitsi xlakskujnin Jehová tlawakgolh laklanka talakgalhin, pero xla ni kalakgmakgalh. Akgtum liʼakxilhtit, mapakgsina David tlawalh talakgxtumit nema ni xlitatlawat chu makgnilh chatum  chixku. Maski chuna, Dios tapatilh (2 Sam. 12:13).

¿Tuku xlakata tapatilh? Xlakata David xlikana nitlan limakgkatsilh xtalakgalhin (Sal. 32:1-5). La uku nachuna. Komo chatum tala tlawa akgtum lanka talakgalhin chu makgxtakga tuku nitlan tlawama, ni tamakxtukan kcongregación. (Hech. 3:19; 26:20). Pero komo lakgkgolotsin tiku makgalhapalikgo akxilhkgo pi ni xlikana makgxtakgputun tuku nitlan tlawama, maxtukgo kcongregación.

Komo natamakxtukan tiku xalak kifamiliajkan o kiʼamigokan, max tuwa namakgkatsiyaw. Asta max nalakpuwanaw pi ni lakgalhamanka. Pero Biblia wan pi akxni wi tiku tamakxtukan limasiyanimaka pi paxkikan. ¿Tuku xlakata?

Jesús wa pi xlakata nakatsikan komo tlan tuku laksakka natatlawa, kiliʼakxilhatkan la nakitaxtu (Mat. 11:19). ¿Tuku tlan kitaxtu akxni tamakxtukan tiku ni makgxtakga tuku nitlan tlawama? Kaʼakxilhwi.

Akxni wi tiku tamakxtukan, tlan talichuwinan xtukuwani Jehová. Akgtum liʼakxilhtit. Akxni chatum aktsu kgawasa tlan likatsi, tlan lichuwinankan xnatlatni. Pero komo nitlan likatsi, nitlan lichuwinankan xnatlatni. Na chuna la xlakata Jehová. Kxkilhtamaku Ezequiel akxni xkalichuwinankan judíos xtakatsi pi wa xDioskan xwanit (Ezeq. 36:19-23). La uku, latamanin katsikgo pi akinin xTatayananin Jehová chu wa kiDioskan (Is. 43:10). Komo nakgalhakgaxmataw Dios, tlan nalichuwinankan. Pero komo ni nakgalhakgaxmataw, nitlan nalichuwinankan.

Akgtum liʼakxilhtit komo chatum xtatayana Jehová natlawa talakgxtumit nema ni xlitatlawat, nitlan nalichuwinankan Jehová. Pero komo nakgalhakgaxmataw xlimapakgsin xlakata la kilinatkan kilatamatkan, tlan nalichuwinankan. Wa xlakata, apóstol Pedro wa pi kilikgalhakgaxmatatkan chu ni natlawaputunaw talakgalhin. Na wa pi santos kiliwanatkan, uma wamputun nitu nalixkajwananaw, xlakata Dios xasanto (1 Ped. 1:14-16).

Komo chatum xtatayana Jehová tlawa tuku nitlan, amakgapitsi nakatsikgo chu nitlan nakalichuwinankan xtatayananin Jehová. Pero komo nakatsikgo pi tamakxtuka chu nialh xtatayana Jehová, nakatsikgo pi xtatayananin Jehová wa Biblia lipulalinaw kilatamatkan chu ni maxkajwaniyaw congregación. Anta kSuiza, chatum chixku kilalh kpukgalhtawakga chu wa pi anta xtapakgsiputun kcongregación. ¿Tuku xlakata? Xlakata xtala tsumat xtlawanit talakgalhin chu tamakxtuka kcongregación. Lu kaks malakawanilh chixku xlakata katsilh pi xtatayananin Jehová ni mastakgo talakaskin wi tiku natlawa tuku ni xlilat.

Akxni wi tiku maxtukan tlawa pi ni natamaxkajwani congregación. Apóstol Pablo kawanilh natalan xalak Corinto pi xtamakxtukgolh kcongregación chixku tiku ni xmakgxtakga lanka talakgalhin. ¿Tuku xlakata? Xlakata uma chixku xtlawalh pi amakgapitsi kstalaninanin Cristo na xtsukukgolh tlawakgo tuku nitlan. Pablo tamalakxtumilh tuku nitlan xtlawa uma lakgalhina la tsinu levadura nema tlawa pi naxkutan harina nema litlawakan kaxtalanchu. Wa xlakata kawanilh natalan pi xmaxtukgolh kcongregación (1 Cor. 5:6, 11-13).

Uma chixku tlawalh talakgxtumit nema ni xlitatlawat chu nipara tsinu xlimaxanan. Chu makgapitsi tiku xalak xcongregación tsukukgolh wankgo pi uma ni lanka talakgalhin (1 Cor. 5:1, 2). Uma lu kalipekua xwili congregación xlakata uma xtlawalh pi amakgapitsi natalan na xtlawakgolh laklanka  talakgalhin nema xtlawakgo tiku xalak Corinto. La uku nachuna la. Komo wi tiku ni namakgxtakga tuku nitlan tlawama chu ni natamakxtukan kcongregación, makgapitsi max nalakpuwankgo pi ni lu xlakaskinka nakgalhakgaxmatkan xlimapakgsin Jehová (Ecl. 8:11). Biblia wan pi lakgalhinanin tiku ni makgxtakgkgo tuku nitlan tlawamakgolh litaxtukgo la laklanka chiwix nema wilakgolh kchuchut chu tlawakgo pi barcos natsankgakgo (Jud. 4, 12). Umakgolh lakgalhinanin tlan masputukgo xtakanajlakan amakgapitsi natalan xalak kcongregación.

Akxni maxtukan tiku tlawanit talakgalhin max natlawa nataspita. Jesús lichuwinalh chatum kgawasa tiku taxtulh kxchik chu laktlawamilh putum tumin nema xmaxkikanit chu tlawalh lhuwa talakgalhin. Titaxtulh kilhtamaku, akxilhli la nitlan xwi xlatamat xlakata xtamakgatlininit xfamilia. Wa xlakata makgxtakgli tuku nitlan xtlawama chu taspitli. Akxni xtlat akxilhli pi xlakgpalinit xlatamat, lu lipaxuwalh chu makgamakglhtinampa (Luc. 15:11-24). Uma liʼakxilhtit kinkamakgtayayan naʼakgatekgsaw tuku makgkatsi Jehová akxni wi tiku makgxtakga tuku nitlan xtlawama. Biblia wan pi Dios ni lakgati pi tiku nitlan likatsikgo nanikgo. Xla lakaskin kalakgpalikgolh xlatamatkan chu kalatamakgolh (Ezeq. 33:11).

Congregación xtachuna la akgtum familia. Akxni wi tiku maxtukan, nialh tapakgsi kʼuma familia. Akxni akxilha tuku nitlan kitaxtuni xlakata xtalakgalhin, max nakatsi pi nitlan tuku tlawanit. Max nalakapastaka la lu xpaxuwa akxni lu tlan xtalalin Jehová chu congregación. Chu namakgxtakga tuku nitlan tlawama chu nataspitpara.

¿La tlan nakamakgtayayaw tiku maxtukanit nataspitpara kcongregación? Talakaskin tliwakga nawanaw chu nalakgachixkuwinanaw akxni nawankan pi lakkaxwilika namaxtukan. Chuna nalimasiyaniyaw pi paxkiyaw. Xlakata naʼakgatekgsaw, kawiliw akgtum liʼakxilhtit. Kalakpuwaw pi chatiy akgtsankgakgonit kkasipijni chu lhuwa lonkgnan xlakata taktanit miki o lonkgni chu kgalhkgalhimakgolh nakamaxtukan. Komo chatum tsuku lhtata, achatum max nalakalasa. ¿Tuku xlakata? Xlakata katsi pi komo xcompañero nalhtata naniy. Akxni nalakalasa nakatsani, pero nalakgmaxtu xlatamat. David na xtachuna tuku lichuwinalh akxni wa: «Akxni chatum xaʼakgstitum chixku xkimaxkilh tapatin xakakxilhli la akgtum litlan» (Sal. 141:5). David xkatsi pi katsan akxni kinkastakyawakanan pero lakgmaxtu kilatamatkan.

Akxni wi tiku maxtukan kcongregación xtachuna la akxni tiku tsankganit kkasipijni lakalaskan xlakata ni nalhtata. Max tlan nakamakgtaya tiku tlawamakgolh talakgalhin namakgxtakgkgo tuku nitlan tlawamakgolh chu nataspitniparakgo Jehová. Chuna akgspulalh xkgawasa Julian, tiku lichuwinaw niku tsuku uma artículo. Xla lakgpalilh xlatamat chu taspitli congregación akxni xtitaxtunit akgkaw kata. La uku kgolotsin xalak congregación. Xla wan pi xlakata maxtuka makgtayalh xlakata naʼakxilha tuku nitlan kitaxtu akxni ni kgalhakgaxmatnikan Jehová. Wa xlakata wa: «Xtalakaskin nakistakyawakan» (Heb. 12:7-11).

Lu nitlan akxni wi tiku maxtukan kcongregación. Pero kalakapastakwi pi tlan nalakgtaspitpara Jehová. Chu kimputumkan tlan namakgtayananaw tlan nakitaxtu xlakata stakyawaka. ¿Tuku tlan natlawayaw?

Lakgkgolotsin xlipaxkinatkan la Jehová, tlakg chuna xlikatsitkan akxni wi tiku  nawanikgo pi nialh xtatayana Jehová nawan. Lakatanks nawanikgo chu nawanikgot tuku xlitlawat xlakata nataspitpara kcongregación. Akxni natitaxtu kilhtamaku chu lakgkgolotsin akxilhkgo pi tiku maxtukanit lakgpalima xlatamat, nalakgapaxialhnankgo chu nawanikgo tuku natlawa xlakata tlan xtatayana Jehová nawampara. * (Kaʼakxilhti nota.)

Xfamilia xlikgalhakgaxmatatkan tuku nalakkaxwilikgo lakgkgolotsin. Chuna limasiyakgo pi paxkikgo tiku maxtukanit chu congregación. Julian wan: «Putum kilhtamaku kpaxkilh kinkgawasa, pero chuna la xlin xtayat kitaxtulh la akgtum patsaps nema xkinkamapitsiyan».

Natalan xalak congregación natatayakgo Jehová xlakata uma tastakyaw. Chuna limasiyakgo pi paxkikgo tiku maxtukanit. Wa xlakata ni talalinkgo nipara tachuwinankgo (1 Cor. 5:11; 2 Juan 10, 11). Pero talakaskin pi natalan lu nakapaxkikgo xfamilia tiku tamakxtukanit. Xlakan lu patinamakgolh, wa xlakata ni xlilat nakalikatsinikan xtachuna la na katamakxtukanit kcongregación (Rom. 12:13, 15).

Julian wan pi min kilhtamaku talakaskin wi tiku namaxtukan kcongregación xlakata kinkamalakapastakayan pi talakaskin nakgalhakgaxmataw Jehová. Na wan: «Maski lu katsan, alistalh lu tlan kitaxtu. Komo akit xaktimakgxtakli kinkgawasa xtlawalh tuku xlakaskilh, liwana kkatsi pi nikxni xtitaspitli».