1. (a) Satan doh cu zeicah atu ah a biapit khun? (b) Satan kha kan doh khawh i kan tei khawh ti kha zeitindah kan hngalh?

SATAN nih vawleicung ah a tang rihmi chiti thuhmi hna le “tuu dang” kha a doh hna. (Johan 10:16) Caan tawite lawng a ngeih cang caah Khuachia nih Jehovah salle i an zumhnak kha hrawh awkah a si khawh chungin aa zuam. (Biathlam 12:9, 12 rel.) Asinain Satan kha kan doh khawh i kan tei khawh ko. “Khuachia kha doh u law an zaamtak ko hna lai” tiah Baibal nih a ti.—Jeim 4:7.

2, 3. (a) Satan hi a um taktakmi a si lo tiah Satan nih mi kha zeicah zumhter a duh hna? (b) Satan cu a um taktakmi a si ti kha zeitindah kan hngalh?

² Satan a um taktak timi cu mi tampi caah nihchuak a si. An caah Satan le a khuachia hna cu cauk, ṭih a nungmi baisakup le video game lawngah a ummi an si. Cu bantuk mi hna nih mifim nih cun a ṭha lomi khuachia pawl an um ti kha an zumh awk a si lo tiah an ruah. Satan le a khuachia pawl an um taktak lo tiah mi nih an zumhmi cu Satan caah dawntu a si maw? A si lo. A um taktak ti a zum lomi hna kha Satan nih fawi tein a hlen khawh hna. (2 Kor. 4:4) A tak ti ah cun Satan  nih mi kha cutin zumhter a duh hna, mah lawngah a hlen khawh hna lai.

³ Jehovah salle a simi kannih cu hlen khawh kan si lo. Khuachia cu a um taktakmi a si kha kan hngalh. Zeitindah kan hngalh? Satan nih rul hmangin Evi a chawnh tiah Baibal nih a ti. (Gen. 3:1-5) Jehovah kha a chawnh i Job kong he aa tlaiin biahalnak a rak tuah. (Job 1:9-12) Satan nih Jesuh zong kha a rak tukforh. (Matt. 4:1-10) 1914 ah Jesuh Siangpahrang a si hnuah Satan nih vawleicung ah a tang rihmi chiti thuhmi hna kha a hun “doh” hna. (Biat. 12:17) Mah dohnak cu atu tiang a um rih. Satan nih chiti thuhmi le tuu dang i an zumhnak kha hrawh awkah aa zuam peng. Mah raldohnak ah teinak kan hmuh nakhnga Satan kha kan doh a herh i kan zumhnak a ṭhawn nakhnga kan i zuam a herh. Cutin tuah khawhning lam pathum kha atu capar ah kan i ruah hna lai.

4. Satan cu porhlawtnak ah zeitindah tluktu ngeilo a si?

⁴ Satan cu aa porhlaw tukmi a si. Jehovah nih uknak nawl a ngeihmi hmanh kha a zuamcawh i Jehovah si loin amah tu mi nih an biak nakhnga aa zuam. Satan cu porhlawtnak le ruamkainak ah tluktu ngeilo a si. Cucaah Satan kan doh khawhnak lamkhat cu porhlawtnak kha hrial in kan i toidornak thawngin a si.—1 Piter 5:5 rel.

5, 6. (a) Zei bantuk porhlawtnak dah a palh lo? Fianter. (b) Zei bantuk porhlawtnak dah ṭih a nun? Baibal tahchunhnak cheukhat kha chim.

⁵ Dictionary pakhat nih porhlawtnak timi cu “mahle mah i zumh le i upat, kanmah asiloah kan theihhngalhmi hna i thil ti khawhnak le ngeihmi ruangah lungsinak” kha a si tiah a ti. Cu bantuk lungput ngeih cu a palh lo. Lamkaltu Paul nih Thesalonika khua i unau pawl kha hitin a ti hna: “Pathian Khrihfabu hna sinah nanmah kong cu kan i porhlaw i hremnak le temhnak nan inmi vialte chungah fel tein nan um i nan zumhnak a dorh lo caah kan in thangṭhat hna.” (2 Thes. 1:4) Cucaah midang le kanmah thil ti khawhnak ruangah kan i nuam kho i kan i uangthlar kho. Kan chungkhar, kan nungphung asiloah kan ṭhannak hmun kha kan zahpi awk a si lo.—Lam. 21:39.

⁶ Asinain i uanthlarnak in kan hun i porhlaw kho. Mah nih Jehovah he kan i pehtlaihnak kha a hrawh khawh. Aa porhlawmi cu ruahnak cheuh a si tikah a thin a hung kho. Mah tikah ruahnak cheuhnak kha toidor tein cohlang loin a al hmanh a al khawh men. (Salm 141:5) Cu bantuk porhlawtnak cu “mahle mah biapi tuk ah i chiah, midang nakin ka ṭha deuh tiin i ruah” kha a si. Mah bantuk porhlawtnak kha Jehovah nih a huat. (Ezek. 33:28; Amos 6:8) Asinain Satan nih amah bantukin anmahle anmah i uangthlar in aa porhlawmi hna kha a dawt hna. Nimrod, Faraoh le Absalom nih i uangthlar in an i porhlawtmi a hmuh tikah Satan zeitluk in dah aa nuamh lai khi ruathmanh. (Gen. 10:8, 9; Exo. 5:1, 2; 2 Sam. 15:4-6) Kain zong porhlawtnak lungput ruangah Pathian he an i pehtlaihnak a rak rawk. Jehovah theng nih ralrin a pek ko nain aa porhlaw tuk i a ngai lo. A lung a khong i Pathian ralrin peknak kha zei ah a rel lo. Cucaah Kain nih sualnak a rak tuah.—Gen. 4:6-8.

7, 8. (a) Miphun ṭanhnak timi cu zeidah a si, mah cu porhlawtnak he zeitindah aa pehtlaih? (b) Porhlawtnak nih Khrihfabu daihnak zeitindah a hrawh khawh ti kha fianter.

⁷ Tuchan ah mi nih porhlawtnak kha  ṭih a nungmi lam tampi in an langhter. Porhlawtnak cu a caan ah miphun ṭanhnak he aa pehtlai. Dictionary pakhat nih miphun ṭanhnak timi cu mah he miphun aa lo lomi hna kha thleidan in pehtlaih kha a si tiah a ti. Cun “miphun kip nih thiamnak le thil ti khawhnak an ngei cio ko nain miphun cheukhat cu an sang deuh asiloah an niam deuh timi zumhnak ngeih zong a si” tiah a ti. Miphun ṭanhnak nih i dohnak, raltuknak le mi tampi thahnak tiang a chuahter.

⁸ Khrihfabu ah cun cutin a si awk a si lo. Asinain porhlawtnak nih unau karlak ah lung i khah lonak a chuahter khawh i tawnghtham khawh lo tiangin a siter khawh. Kumzabu pakhatnak i Khrihfa cheukhat cu cutin an rak si. Cucaah Jeim nih hitin a rak hal hna: “Nan i siknak le nan i velhnak vialte hi khuazei in dah an rat?” (Jeim 4:1) Midang kha kan huat hna i anmah nakin kan ṭha deuh timi ruahnak kan ngeih ahcun an lung a fahtermi bia kan chim khawh, kan tuah khawh. (Ptb. 12:18) Porhlawtnak nih Khrihfabu daihnak a hrawh khawh ti cu a fiang ko.

9. Miphun ṭanhnak le aa tlak lomi porhlawtnak vialte hrial awkah Baibal nih zeitindah a kan bawmh? (A hramthawknak hmanthlak zoh.)

⁹ Midang nakin ka ṭha deuh timi ruahnak kan ngeih ahcun “miruamkai cu BAWIPA caah fihnung an si” ti kha kan i cinken a hau. (Ptb. 16:5) Mah lengah kan lungthin kha i check in hitin kan i hal awk a si: ‘Miphun, ram asiloah nunphung aa dangmi hna nakin ka ṭha deuh tiah kaa ruat maw?’ Cutin kan ruah ahcun Pathian nih “minung pakhat chungin miphun vialte kha a ser hna” timi zei i kan rel lo a si lai. (Lam. 17:26) Kan dihlak in Adam tefa kan si caah miphun pakhat kan si. Pathian nih miphun cheukhat kha a dang miphun nakin a ṭha deuh in a ser hna ti zumh cu hruh a si. Cutin kan zumh ahcun Khrihfa dawtnak le lungrualnak hrawh awkah Satan kan awnh bantuk a si lai. (Johan 13:35) Satan kan doh i kan tei khawh nakhnga aa tlak lomi porhlawtnak vialte kan hrial awk a si.—Ptb. 16:18.

10, 11. (a) Vawlei kha zeicah fawi tein hun dawt khawh a si? (b) Demas nih vawlei a dawt ruangah zeidah a cang?

¹⁰ Satan cu “hi vawlei uktu” a si. (Johan 12:31; 1 Johan 5:19) Hi vawlei nih a hlorhmi thil tampi cu Baibal phunglam hna he aa ralkah. Vawleicung thil dihlak hi a ṭha lomi cu an si dih lo. Asinain kan lung duhnak kha hmangin sualnak tuahter awkah hi vawlei hi Satan nih a hman lai ti cu a fiang ko. Cun vawlei dawt awk le Jehovah he kan i pehtlaihnak zei i rel lo awkah Satan nih a kan tukforh ko lai.—1 Johan 2:15, 16 rel.

¹¹ Kumzabu pakhatnak i Khrihfa cheukhat nih vawlei kha an rak dawt. Tahchunhnak ah, Paul nih hitin a ṭial: “Demas cu tuchan vawlei he an i duh i a ka zaamtak.” (2 Tim. 4:10) Demas nih hi vawlei i zei kha dah a duh i Paul kha a kaltak ti cu Baibal nih a dikthliar in a chim lo. Jehovah rian ṭuan nakin thilri chawva kha a hun duh deuhmi a si kho men.  Cucaah lungthawh awk ngai a simi Pathian rianṭuannak tinvo sung hna kha a rak sung. Mah cu a phu maw? A phu lo. Zumhawktlak tein a um ahcun Demas cu Paul bawmtu a si kho rih hnga. Jehovah pekmi nakin a ṭha deuhmi thil kha vawlei nih zeitikhmanh ah a pe kho lo.—Ptb. 10:22.

12. Satan nih “chaw le va duhnak” kha hmangin zeitindah a kan tukforh khawh?

¹² Tuchan zongah cutin kan si kho ve. Khrihfa a simi nih kanmah le kan innchungkhar zohkhenh kan duhmi cu a phung a si ko. (1 Tim. 5:8) Jehovah nih i nuam hna seh ti a kan duh. Mah kha Adam le Evi aa dawh tukmi paradis ah a umtermi hna in kan hngalh khawh. (Gen. 2:9) Asinain Satan nih “chaw le va duhnak” kha hmangin a kan tukforh khawh. (Matt. 13:22) Tangka le thilri chawva nih aa nuammi le hlawh a tlingmi a kan siter khawh tiah mi tampi nih an ruah. Cutin kan ruah ahcun kan ngeihmi lakah a sung bikmi Jehovah he kan i pehtlaihnak kha kan sung kho. Jesuh nih hitin ralrin a kan pek: “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo.” (Matt. 6:24) Thilri chawva sal kan si ahcun Jehovah rian kan ṭuan kho ti lai lo. Mah cu Satan duhmi a si. Cucaah Jehovah he kan i pehtlaihnak nakin tangka asiloah tangka nih a cawk khawhmi thil kha biapi deuh ah a chiami zeitikhmanh ah si hna hlah u sih. Satan doh awk le tei awkah thilri chawva cungah a tlarimi lungput kan ngeih a hau.—1 Timote 6:6-10 rel.

13. Vawlei nih ṭhitumnak le nupa umṭinak kha a hmaan loin hmuh awkah zeitindah a hlorh?

¹³ Satan nih a hmanmi a dang rap pakhat cu ziaza rawhralnak a si. Mi tampi nih nupi, va le innchungkhar cung i zumhawktlak tein um cu chan nih a kaltak cangmi le zalonnak a khengkhammi a si tiah an ruah. Tahchunhnak ah, Fidi pakhat nih hitin a chim: “Mi pakhat cungah zumhawktlak tein um cu a si kho lo. Zumhawktlak tein a ummi le zumhawktlak tein um a duhmi ahohmanh ka hmu bal hna lo.” Fitlaw pakhat nih hitin a chim: “Mi pakhat cungah zumhawktlak tein um zungzal ding timi hi minung phung a si hnga ma tiah ka lung a hring.” A min a thangmi hna nih Pathian pekmi laksawng ṭhitumnak kha an soi tikah Satan cu aa nuam tuk lai. Khuachia nih ṭhitumnak kha tha a pe lo i aa nuammi chungkhar siter a duh lo. Cucaah Satan doh awk le tei awkah ṭhitumnak he aa tlaiin Pathian hmuhning kan ngeih ve awk a si.

14, 15. Ziaza rawhral awkah lemsoi na si ahcun zeidah na tuah khawh?

¹⁴ Innchunghawi a ngeimi kan si ah, kan si lo zongah ziaza rawhralnak he aa tlaimi vialte kha fakpi in kan hrial  awk a si. Mah cu a fawi maw? A fawi hrimhrim lo. Tahchunhnak ah, mino na si ahcun sianginn na kaiṭi hawile nih a duhmi paoh he nupa sualnak an tuahnak kong uangthlar ngaiin an chimmi kha na theih ko lai. Cun sexting kong an chimmi zong na theih ko lai, mah cu phone in nupa sualnak he aa tlaimi kong ca i kuat asiloah hmanthlak i kuat kha a si. Cun a thurhnawmmi ngakchia hmanthlak i kuat zong a si. Baibal nih hitin a ti: “Nu le pa sualnak a tuahmi nih cun amah pum cung hrimhrim ah khan sualnak a tuah a si.” (1 Kor. 6:18) Nupa sualnak an tuah caah a chuakmi zawtnak ruangah mi tampi cu fahnak an in i an thi. I ṭhitum hlanah nupa sualnak a tuahmi mino tampi nih an tuahmi kha kan i ngaichih tiah an chim. Nuamhsaihnak hna nih Pathian nawlbia buar zongah zeihmanh a poi lo tiah zumhter a kan duh. Cu bantuk hlennak hna kha kan zumh ahcun ‘sualnak nih a kan hlen’ khawh lai.—Heb. 3:13.

¹⁵ Ziaza rawhral awkah lemsoi na si ahcun zeidah na tuah khawh? Derthawmnak na ngeih kha cohlang. (Rom 7:22, 23) Thazaang ngeih awkah Pathian sinah thla cam. (Fil. 4:6, 7, 13) Ziaza rawhralnak aan tuahter khotu thil sining kha hrial. (Ptb. 22:3) Tukforh na si tikah al colh.—Gen. 39:12.

16. Jesuh nih Satan tukforhnak kha zeitindah a lehrulh, mah in zeidah kan i cawn khawh?

 ¹⁶ Jesuh cu kan caah zuhchunh awk ṭha bik a si. Satan biakammi kha zei ah a rel lo. Chikkhat te hmanh a ruat ta lo. Mah canah, ‘Cathiang nih a ti’ tiah Satan kha a leh colh. (Matthai 4:4-10 rel.) Jesuh nih Baibal kha ṭha tein a hngalh caah Satan nih a tukforh tikah Baibal kha a cherhchan khawh colh. Satan doh awk le tei awkah ziaza rawhralnak a chuahter khomi thil sining hna kha hrial a hau.

17, 18. (a) Satan nih a dang zei rap dah a hman, mah dohnak kha zeicah kan i ruahchan? (b) Satan nih zeidah a ton lai, mah nih inkhawh awkah zeitindah thazaang aan pek?

¹⁷ Porhlawtnak, thilri chawva duhtuknak le ziaza rawhralnak cu Satan hmanmi rap lakah pathum lawng a si. A dang tampi a um rih. Tahchunhnak ah, Khrihfa cheukhat cu chungkhar dohnak an tong asiloah sianginn kaiṭi hawi nih capo ah an saih hna. Cheukhat cu phungchim rian khenkham a sinak ram ah an um. Kannih zong cu bantuk harnak ton awkah kan i ruahchan khawh. Jesuh nih hitin ralrin a kan pek: “Mikip nih nannih cu keimah ruangah an in huat hna lai, sihmanhsehlaw a dongh tiangin aa tlaih pengmi cu khamhnak an hmu lai.”—Matt. 10:22.

¹⁸ Satan kha zeitindah kan doh khawh i kan tei khawh? Jesuh nih hitin a ti: “Zeitikhmanh ah nan lung dong hlah u, zeicahtiah hitihin pei nan nunnak cu nan khamh lai cu.” (Luka 21:19) Zei bantuk minung hmanh nih harnak a kan pe kho zungzal lai lo. Cun kan awnh hna lo ahcun Pathian he kan i pehtlaihnak kha ahohmanh nih an hrawk kho lai lo. (Rom 8:38, 39) Zumhfekmi Jehovah salle an thih tik hmanhah Satan nih a tei hna tinak a si lo. Jehovah nih a thawhter ṭhan hna lai. (Johan 5:28, 29) Satan cu hmailei ruahchannak a ngei lo. Hi vawlei ṭhalo hrawh a si hnuah Satan cu kum 1,000 chung dongh hngal lo khor chungah thlak a si lai. (Biat. 20:1-3) Khrih kum thongkhat uknak a dih hnuah “Satan cu thong chung khan chuah a si lai i” a tlingmi minung kha hmanung bik a hlen ṭhan hna lai. Mah hnuah anih cu hrawh a si lai. (Biat. 20:7-10) Khuachia cu hmailei ruahchannak a ngei lo nain kannih cu kan ngei. Cucaah Satan kha do zungzal law na zumhnak kha fehter zungzal. Satan kha na doh khawh i na tei khawh ko.