1. (a) Saide meke nownow a de moo taanga fanowdu fu feti anga Saatan? (b) Fa u du sabi taki u poi wini a feti di wi e feti anga Saatan?

SAATAN e feti anga den salufu Kelesten di de a goontapu ete anga den „taa sikapu” (Yohanisi 10:16). Aini a satu ten di a abi, a wani gaanse sama di e dini Yehofa daai baka gi En. (Leisi Openbaring 12:9, 12.) Ma u poi wini a feti di wi e feti anga Saatan. Beibel e taki: „Toto futu gi Saatan, da a o lon gwe.”​—Yakowbesi 4:7.

2, 3. (a) Fu saide Saatan wani sama biibi taki a á de tuutuu? (b) Fa i du sabi taki Saatan de tuutuu?

² A omen sama e lafu te yu e taigi den taki Saatan de tuutuu. Den e si enke den toli di sama e gi fu Saatan anga ogii yeye a sani di de aini buku, supuku felon anga game. Den e si enke sama anga bunbun fusutan ná o biibi den sowtu toli de. Ai hati Saatan te sama nái biibi taki en anga den ogii yeye de tuutuu? Nono. Ai moo makiliki gi en fu koli den sowtu sama de  (2 Korentesama 4:4). Saatan e meke sama biibi den sowtu sani ya fu a sa fende den koli.

³ Wi di e dini Yehofa nái meke Saatan koli u. U sabi taki Didibii de tuutuu. Fa u du sabi a sani ya? Bika Beibel e soi u taki Saatan be koboloiki wan sineki fu taki anga Efa (Genesesi 3:1-5). A be taki anga Yehofa, di a be e taki ogii fu Yopu (Yopu 1:9-12). Saatan be puubei fu koli Yesesi (Mateyesi 4:1-10). Baka di Yesesi toon Kownu aini a yali 1914, neen Saatan bigin feti anga den salufu Kelesten di de a goontapu ete (Openbaring 12:17). A feti ya á kaba ete, bika Saatan de namonamo fu meke den salufu Kelesten anga den taa sikapu daai baka gi Yehofa. Efu u wani wini a feti ya, da u mu taampu gingin. U mu meke moiti fu taanga a biibi fu u tu. A artikel ya o taki fu dii sani anga san u mu luku bun.

4. Saide meke Saatan abi heimembee moo iniiwan taa sama?

⁴ Saatan e fii enseefi. A ogii-ati engel ya abi ati fu taki Gadu nái tii bun. Ai du ala san a poi fu sama dini en, bika a á wani den dini Yehofa. A abi heimembee tuutuu. Neen meke wan fasi fa u sa feti anga Saatan a te u ná abi heimembee, ma u mu abi sakafasi.​—Leisi 1 Peitilisi 5:5.

5, 6. (a) A fowtu te wi e fii bun fu wan sani di u du? (b) Sowtu toli di de aini Beibel e soi taki u mu luku bun anga heimembee?

⁵ A á fowtu te wi e fii bun fu wan sani di u du efuso te wi e lesipeki useefi. Te wan sama di u sabi efuso useefi du wan bun sani, da wi e fii bun. A apostel Pawlesi be taigi den baala aini Tesalonika taki: „Wi e gafa u aini den kemeente fu Gadu, fu di wi e holidoo anga fu di wi á lasi biibi, winsi fa sama e tesi u efuso e pina u” (2 Tesalonikasama 1:4). Neen meke a á fowtu te wi e fii bun fu a peesi pe u kiya, den gwenti fu u efuso u famii.​—Toli 21:39.

⁶ Ma te wan sama abi heimembee, da en anga taawan sa poli. A sa meke wan sama anga Yehofa poli tu. Wan sama di abi heimembee ati e boon gawgaw te sama e soi en san a mu du, bika a nái teke taki. Fu di a abi heimembee, meke a nái teke san taawan taigi en (Psalm 141:5). Den sowtu sama ya e si enke den bun moo taawan. Yehofa á lobi sama di abi heimembee (Eseikiyeli 33:28; Amos 6:8). Ma Saatan lobi te sama e tyai denseefi enke en. Ai switi gi en te sama e meke bigi fu di den e fii denseefi. Pakisei fa a be e fii di a be si fa Nimlotu, Farao anga Absalom be abi heimembee (Genesesi 10:8, 9; Ekisodesi 5:1, 2; 2 Samuweli 15:4-6). A di Kain be abi heimembee meke en anga Yehofa á be de mati moo. Aladi Yehofa seefi be taigi en san a mu du fu den toon mati baka, tokuso a á be aliki. A be abi taangayesi, neen meke a á du san Yehofa taki. A so a sondu.​—Genesesi 4:6-8.

7, 8. (a) Saide wan sama abi heimembee te a si enke a bun moo taa nasi sama? (b) Fa heimembee sa meke baala anga sisa puu taki aini a kemeente?

 ⁷ A omen fasi i sa si a wan sama taki a abi heimembee. Wan sama di abi heimembee e buuse taa nasi sama, fu di den sama de kiya a wan taa peesi efuso fu di den sikin buba abi wan taa kololu. Den e si enke den bun moo den sama de. Ma a den sowtu denki ya e tyai feti anga oloku.

⁸ Den sowtu sani ya á mu pasa aini a Kelesten kemeente. Tokuso heimembee e meke baala anga sisa kisi toobi fu lawlaw sani. Na a sani de be pasa anga wantu Kelesten aini a ten fu den apostel. Neen meke Yakowbesi be akisi den taki: „San meke wi e feti efuso e sitee anga useefi?” (Yakowbesi 4:1). Efu wi e buuse taa sama efuso e si enke u bun moo den, da wi o taki efuso du sani di sa hati den (Odo 12:18). A sani ya e soi taki heimembee sa meke baala anga sisa puu taki aini a kemeente.

9. Fa Beibel e yeepi u fu feti anga a fii di sama e fii enke den bun moo taawan? (Luku a fowtow na a bigin.)

⁹ Efu wi e fii enke u bun moo taa sama, da a bun fu holi a pakisei taki „Yehofa e buuse den sama di e fii denseefi” (Odo 16:5). U mu ondoosuku useefi luku, da u akisi useefi taki: ’Mi e si enke mi bun moo taa nasi sama efuso sama di abi taa gwenti?’ Efu a so wi e pakisei, da wi e feegete taki a „wan sama” Gadu teke fu meke ala sowtu nasi sama (Toli 17:26). Te i luku en bun, ala u na a wan nasi sama, bika Adan na a afo fu ala sama. A wan don sani fu denki taki Gadu meke son nasi sama bun moo taawan. Efu wi e denki so, da wi e gi Saatan okasi fu poli a lobi di wi abi gi makandaa, anga a libi di wi e libi bun anga makandaa (Yohanisi 13:35). Efu u wani wini a feti di wi e feti anga Saatan, da u mu luku bun anga iniiwan fasi fu heimembee.​—Odo 16:18.

10, 11. (a) Saide a makiliki fu lobi goontapu? (b) Fa sani be waka anga Deimasi fu di a be lobi goontapu?

¹⁰ A Saatan na „a tiiman fu a goontapu ya”. Den sama aini a goontapu e du san a wani (Yohanisi 12:31; 1 Yohanisi 5:19). Beibel e kuutu somen fu den sani di sama aini a goontapu ya e feti fu abi. A tuu taki a ná ala sani fu a goontapu ogii. Ma Saatan o koboloiki a goontapu fi en namo fu tesi u. A wani u sondu. A wani u lobi den sani fu a goontapu, da u fika a dini di wi e dini Yehofa.​—Leisi 1 Yohanisi 2:15, 16.

 ¹¹ Wantu fu den fosi Kelesten be lobi a goontapu. Pawlesi be sikiifi taki: „Deimasi gwe fika mi fu di a lobi a goontapu ya” (2 Timotiyesi 4:10). Beibel nái taki sowtu sani fu goontapu Deimasi be lobi te a gwe fika Pawlesi. Kande a be bigin lobi gudu moo a dini di a be e dini Yehofa. Efu na so, da Deimasi lasi wantu moin gaandi di a be sa fende aini a diniwooko fu Gadu. Deimasi be fende wini fu a sani di a du ya? Nono. Deimasi be sa tan yeepi Pawlesi. Noiti a goontapu be sa gi en wan sani di bun moo san Yehofa be sa gi en!​—Odo 10:22.

12. Fa Saatan sa tesi u anga „a koli di gudu e koli sama”?

¹² Aseefi sani sa miti wi aini a ten ya tu. A ná wan fowtu sani efu wan Kelesten e meke moiti fu solugu enseefi anga en osufamii (1 Timotiyesi 5:8). Yehofa wani u abi wan bun libi di e gi u piisii, bika a be poti Adan anga Efa aini wan moin Paladeisi (Genesesi 2:9). Ma fu di Saatan sabi taki u wani abi wan bun libi, da ai koboloiki „a koli di gudu e koli sama” fu tesi u (Mateyesi 13:22). A omen sama e si enke moni anga gudu o meke den abi wan bun libi. Efu a so wi e denki, da wi o lasi a moo pelensipali sani di wi abi. Dati na a de di wi anga Yehofa de mati. Yesesi be wasikoi u taki: „Nawan sama poi dini tu Masaa. Bika a o buuse wan fu den, da a lobi a taawan, efuso a o holibaka gi wan fu den, da a wisiwasi a taawan. Yu á poi dini Gadu anga gudu na aseefi yuu” (Mateyesi 6:24). Efu wi e wooko fu di wi e feti a gudu baka, da u ná o dini Yehofa moo. Na a sani de Saatan wani. Neen ede meke noiti u mu meke moni efuso den sani di u sa bai anga moni pelensipali gi u moo a de di wi anga Yehofa de mati. Efu u wani wini a feti di wi e feti anga Saatan, da gudu á mu de a moo pelensipali sani aini u libi.​—Leisi 1 Timotiyesi 6:6-10.

13. Fa den sama fu a goontapu e pakisei fu a toowlibi efuso a waka di man anga uman e waka gi denseefi?

¹³ Hulu a wan taa fasi fa Saatan e tesi sama. A omen sama aini a ten ya nái si en fu wan gaan sani te wan man efuso wan uman e waka gi a taawan. Den e taki a toowlibi a ná fu a ten ya moo, bika ai tapu den fu du san den wani. Wan uman di abi balinen be taki: „Sama á de di poi libi anga wan man efuso wan uman namo.” A taki tu taki: „Mi á sabi nawan sama di nái waka gi en man efuso en uman. Mi á sabi sama tu di wani de anga wan kodo man efuso  wan kodo uman.” Wan man di abi balinen be taki: „Mi á denki taki libisama meke fu libi anga wan sama namo den hii libi langa.” A musu e switi gi Saatan te sama di abi balinen e si a toowlibi di Gadu seeka enke wan lawlaw sani. Didibii nái holibaka gi a toowlibi, a á wani u toowlibi waka bun. Neen meke efu u wani wini a feti di wi e feti anga Saatan, da u mu si a toowlibi enke fa Gadu e si en.

14, 15. San i mu du te yu e fii fu didon anga wan sama di yu á toow anga en?

¹⁴ Winsi u toow efuso wi á toow, ala u mu luku bun anga sani di sa meke u hulu. A sani ya makiliki? Nono! Efu yu a wan yonkuuwan, da kande i yee fa den pikin a sikoo e gafa taki den e didon anga sama den wani. Kande i yee fa den e gafa tu taki den e sikiifi tawgii sani gi taawan a telefon efuso e sende fowtow gi den pe sama de anga soso sikin. Aini son kondee, da gaanlanti taki a sani ya na aseefi enke te sama be o sende felon efuso fowtow gi taawan pe sama e didon anga pikinengee. Beibel e taki: „A sama di e hulu e du wan sondu anga en sikin” (1 Korentesama 6:18). Hululibi tyai siki anga dede gi somen sama. A hati somen  yonkuu sama tu di siibi anga taawan sondee fu den toow. Somen felon anga buku fu a ten ya e meke sama biibi taki sani ná o miti den efu den nái libi enke fa Gadu wani. Efu wi e biibi den lei de, da u meke sondu „fende u koli”.​—Hebrewsama 3:13.

¹⁵ San i mu du te yu e fii fu didon anga wan sama di yu á toow anga en? Yu á mu du enke i nái si taki i swaki na a pisi de (Romesama 7:22, 23). Begi Gadu fu a gii kaakiti (Filipisama 4:6, 7, 13). Luku bun anga sani di sa meke i hulu (Odo 22:3). Te den tesi de e miti i, da i mu koti pasi gi en wantenwanten.​—Genesesi 39:12.

16. San Yesesi taki di Saatan be e tesi en? San a sani ya e leli u?

¹⁶ Yesesi be soi u san u mu du te tesi e miti u. A á be meke Saatan koli en anga den sani di a be paamisi en. A á go sidon denki den sani de tu. Ma wantenwanten a taigi en taki: „Gadu Buku taki.” (Leisi Mateyesi 4:4-10.) Yesesi be sabi san sikiifi aini a Wowtu fu Gadu. Neen meke a be sabi san fu taigi Saatan, di a be kon tesi en. Efu u wani wini a feti di wi e feti anga Saatan, da u mu luku bun anga sani di sa meke u hulu.​—1 Korentesama 6:9, 10.

17, 18. (a) Sowtu taa sani Saatan e koboloiki fu tesi u? Saide a á mu foondoo wi taki den sani ya sa miti u? (b) San o pasa anga Saatan? Fa a sani ya e gi i taanga-sikin fu holidoo?

¹⁷ Heimembee, a lobi di sama lobi gudu anga hulu, a dii fu den sani di Saatan e koboloiki fu tesi u. Ma somen taa sani de ete. A omen Kelesten abi famii di e tesi den efuso sikoo mati di e soso den. Taawan e tan aini kondee pe gaanlanti tapu a peleikiwooko. Den sani ya á mu foondoo wi, bika Yesesi be wasikoi u taki: „Sama o buuse u fu mi nen ede. Ma a den sama di holidoo te na a kaba o fende libi.”​—Mateyesi 10:22.

¹⁸ Fa u sa wini a feti di wi e feti anga Saatan? Yesesi be taki: „Efu u holidoo, wi o fende libi” (Lukasi 21:19). Ala den ogii di sama e du anga u, a fu wan pisi ten namo. Sama á de di poi poli wi anga Yehofa, boiti efu wiseefi gi den a okasi (Romesama 8:38, 39). Winsi son sama di e dini Gadu dede, toku dati á wani taki Saatan wini, bika Yehofa o meke den sama de kon a libi baka (Yohanisi 5:28, 29). Sani ná o waka bun gi Saatan. Baka te a ogii goontapu ya poli, da Yesesi o fiingi Saatan go aini wan gaan dipi olo. Na ape a o de 1000 yali (Openbaring 20:1-3). Baka a dunsu yali tii fu Yesesi, da „den o losi Saatan puu a sitaafu”. A o puubei wan lasiti leisi fu koli den sama di ná abi sondu moo. Baka dati den o kii en puu (Openbaring 20:7-10). Saatan o dede fu teego, ma yu abi a okasi fu libi fu teego. Taampu gingin te ai kon tesi i, i biibi mu taanga. Da yu o poi wini a feti di yu e feti anga en!