1. (a) Sooq maan­na Saatanimut akiuun­ner­put taama pingaaruteqar­tigaa? (b) Qanoq nalun­ngilar­put Saatanimut akiuun­nermi ajugaasin­naal­luta?

SAATANIP tanitat nunarsuarmi kingulerut­tut ‘saval­lu al­lat’ akior­pai. (Joh 10:16) Diaavulup pif­fis­sakis­sutsi nalun­ngin­namiuk sapin­ngisamik Jehovap kif­faasa amerlaner­paat up­perun­naarsin­niar­pai. (Saqqummersitat 12:9, 12 atuakkit). Saatanimul­li akiuun­nermi ajugaasin­naavugut. Biibilimi ima al­las­simavoq: “[Diaavulu] akiorsiuk, taava ilis­sin­nit qimaas­saaq.” — Jaak 4:7, NW.

2, 3. (a) Sooq Saatanip inuit piun­ngin­nerminik up­perin­nilersin­niar­tar­pai? (b) Saatanip piviusuunera qanoq nalun­ngilar­put?

² Saatanip piunera oqaatigineqaraangat inup­pas­suit quiasut­tar­put. Isumaqar­put Saatani anersaapiluil­lu atuak­kani, filmini qiiaam­mer­nar­tuni qarasaasiak­kul­lu pin­nguaatini taamaal­laat ilaatin­neqar­tar­tut. Taama oqar­tar­tut isumaqar­put inuit silas­soris­sut anersaapiluit piuneran­nik up­perin­nin­neq ajor­tut. Saatanip inuit piunerminik anersaapiluil­lu piuneran­nik up­perin­nin­ngin­nerat ajor­tutut isigaa? Naamik. Inuit piunerminik qularin­nit­tut sal­loqit­tar­nis­saat Saatanip ajor­nan­ngin­nerutit­tar­paa. (2 Kor 4:4) Saatanip inuit tam­mar­tis­sin­naajumal­lugit piun­ngin­nerminik up­perin­nilersin­niar­tar­pai.

 ³ Jehovamut kif­faagat­ta tam­mar­titaan­ngilagut. Nalunngilarput Diaavulu piviusuusoq. Taman­na qanoq nalun­ngin­natsigu? Biibilimi paasitin­neqar­pugut Saatanip pulateriaarsuk aq­qutigalugu Eva oqaluuk­kaa. (1 Mos 3:1-5) Saatanip Jehova oqaloqatigigamiuk Jobip pis­sutiginiagaa apeq­quser­paa. (Job 1:9-12) Taas­suma Jiisusi us­seriaraluar­paa. (Matt 4:1-10) Jiisusilu 1914-imi kun­ngin­ngormat Saatanip tanitat nunarsuarmi kingulerut­tut “sorsuf­figiler­pai”. (Saqq 12:17) Diaavulup tanitat saval­lu al­lat up­perun­naarsin­niarlugit saas­sut­tuar­pai. Sorsun­nermi tamatumani ajugaajumal­luta Saatani akior­tuar­tariaqarlugulu up­per­nik­kut nukit­tusariaqar­pugut. Al­laaserisami matumani pingasutigut qanoq taamaaliorsin­naasugut sam­mineqar­poq.

4. Sooq Saatani makitanermut tun­ngatil­lugu as­sersuutis­saal­luar­pa?

⁴ Saatani makitasoorujus­suuvoq. In­ngilip taas­suma ajor­tup sapiiserluni Guutip naalak­kersuisin­naatitaanera unam­mil­lerlugulu al­lat Jehovamik tunus­sitil­lugit im­minik pal­lorfigin­nilerseriaraluar­pai. Taman­na pis­sutigalugu makitanermut pingaakujun­nermul­lu tun­ngatil­lugu as­sersuutis­saal­luar­poq. Taamaat­tumik makitanaveersaar­neq maniguun­nerlu Saatanimik akiueriaatitsin­nut ilaap­put. — 1 Petrusi 5:5 atuaruk.

5, 6. (a) Tul­luusimaar­nerup makitanerul­lu as­sigiin­ngis­sutaat nas­suiaruk. (b) Sooq naleq­qutin­ngitsumik tul­luusimaar­neq ulorianar­pa, tamatumun­ngalu tun­ngatil­lugu Biibilimi oqalut­tuat suut eq­qaaneqarsin­naap­pat?

⁵ Tul­luusimaar­nerli pis­sutigalugu usorsisimaar­neq ajor­tuun­ngilaq, as­sersuutigalugu apustili Paulusip qatan­ngutit Thes­salonikamiit­tut ima al­laf­figai: “Usorsisimaarutigisin­naavas­si Guutip ilagiis­saani al­lani, nikal­lujuik­kas­si up­persuseqaras­silu qinugineqar­nis­sin­ni an­nikil­liuutinilu ator­tariaqak­kas­sin­ni tamani.” (2 Th 1:4) Taamaat­tumik al­lat suliaan­nik nuan­naarutigin­nin­neq al­laal­lu im­minut tul­luusimaarutigineq im­minul­luun­niit tatigineq iluaqutigisin­naavavut. Ilaqut­tavut, kulturer­put peroriar­torfip­pul­luun­niit kan­ngusuutigisariaqan­ngilavut. — ApS 21:39.

⁶ Taamaat­torli naleq­qutin­ngitsumik tul­luusimaar­neq makitanin­nguut­toq ikin­ngutigiin­nermik, ingam­mik Jehovamik ikin­nguteqar­nitsin­nik, aseruisin­naavoq. Taamatut makitagut­ta siun­nersor­neqar­ner­put narrujuum­mis­sutigisin­naavar­put. Al­laat taman­na pis­sutigalugu aalajangersin­naavugut maniguun­nata siun­nersuut maleruar­niar­nagu. (Tuss 141:5) Oqaatsinik qinerlerfis­siat ilaan­ni taamatut naleq­qutin­ngitsumik tul­luusimaar­neq im­minut eq­qarsaatigival­laar­ner­tut imaluun­niit “inuit, amerlaner­tigut tun­ngavis­saqan­ngitsumik, al­lanit pitsaanerusutut im­minut isigalutik makitanerat­tut” al­laatigineqar­tar­poq. Jehovap pingaakujul­luni makitaneq uumigaa. (Ez 33:28; Am 6:8) Saatanip inuit usorsisimaar­nermik­kut pingaakujun­nerminik ilaarsisut takul­lugit nuan­narisar­paa. Takorlooruk Nimrodi, Farao Absalomilu usorsisimaar­nermik­kut naleq­qutin­ngitsumik tul­luusimaar­nermin­nik ersersitsisut takul­lugit Saatanip qanoq nuan­naarutigitigisimas­sagaa! (1 Mos 10:8, 9; 2 Mos 5:1, 2; 2 Sam 15:4-6) Aam­ma Kainip makitanini pis­sutigalugu Guuti ikin­ngutigiun­naar­paa. Kaini makitanermik Jehovap siun­nersuutaanut tusar­naarusun­ngilaq. Uteriitsuul­lunilu Guutip mianersoq­qus­sutaanik sumigin­naal­lunilu Jehovamut ajor­tulior­nis­sani nangaas­sutigin­ngilaa. — 1 Mos 4:6-8.

7, 8. (a) Al­lamik nagguilim­mik uumis­suinermut suna ilaava, makitanermul­lu qanoq at­tuumas­suteqar­pa? (b) Makitaneq ilagiit eq­qis­sineran­nut qanoq ajoqutaasin­naasoq nas­suiaruk.

 ⁷ Ul­lumik­kut inuit makitaner­tik as­sigiin­ngitsutigut al­lanut ajoqutaasumik ersersit­tar­paat. Makitaneq ilaan­nik­kut al­lamik nagguilim­mik uumis­suinik­kut erser­tar­poq. Oqaatsinik qinerlerfis­siaq naaper­torlugu al­lamik nagguilim­mik uumis­suineq tas­saavoq inuit al­lat pil­lugit eq­qun­ngitsumik isum­mius­sereer­neq. Aam­ma tas­saavoq “inuit aalajangersimasunik nagguil­lit aalajangersimasunik pis­suseqar­tar­neran­nik pigin­naaneqar­tar­neran­nil­lu kiisalu naggueqatigiit ilaat inun­nguuserisamin­nik pingaar­neruneran­nik pingaan­ngin­neruneran­nil­luun­niit isum­mer­neq”. Naggueqatigiin­nik al­lanik uumis­suineq akersuun­nermik, sorsun­nermik al­laal­lu toqoraanermik kinguneqar­tar­poq.

⁸ Soorunami ilagiin­niit­tut taamatut pis­suseqar­tus­saan­ngil­lat. Taamaat­torli qatan­ngutit isumaqatigiin­ngis­sutaat makitanermik aal­laaveqar­tut as­sor­tuun­nin­nguus­sin­naap­put. Kristumiut siul­liit ilaan­nut taama pisoqarmat Jaakup toq­qaan­nar­tumik ima aperai: “Sooq akor­nas­sin­ni sorsun­neqalersar­pa saqitsaan­ne­qalersarlunilu?” (Jaak 4:1) Al­lat uumigigutsigit al­lanil­lu pik­korin­nerusutut misigigut­ta inoqatit­ta ajual­laatigingaas­sutigisaan­nik oqaaseqarlutalu iliuuseqarsin­naavugut. (Uss 12:18) Makitanerup ilagiit eq­qis­sineran­nut ajoqutaasin­naanera ersarip­poq.

9. Al­lamik nagguilin­nik uumis­suinaveersaar­nis­satsin­nut makitaler­naveersaar­nis­satsin­nul­lu Biibili qanoq iluaqutigaar­put? (Al­laaserisap aal­laq­qaataani as­seq takuuk).

⁹ Al­lanit pik­korin­nerusutut misigeq­qajaasarut­ta Jehovap “makitasuut tamaasa” uumigigai eq­qaamasariaqar­par­put. (Uss 16:5) Aam­ma im­mitsin­nut ima aperinik­kut uum­mam­miuvut misis­sor­tariaqar­pavut: ‘Naggueqatigiin­nit, inuian­nit kulturinil­luun­niit al­lanit tamanit pik­korin­nerusutut misigisar­punga?’ Taama misigisarut­ta Guutip ‘inuiaat tamarmik inum­mit ataatsimit pin­ngor­tik­kai’ puiorsimas­savar­put. (ApS 17:26) Oqar­toqarsin­naavoq Adamip kinguaarim­matigut tamat­ta naggueqatigiit­tugut. Taamaat­tumik eq­qarsarut­ta Guutip naggueqatigiit aalajangersimasut al­lanit pitsaanerutil­lugit pin­ngor­tik­kai sianiil­liorujus­suas­saagut. Taamatut eq­qarsarut­ta Saatanip uagut aq­qutigaluta kristumiut asaqatigiin­neran­nik ataasioqatigiin­neran­nil­lu ajoqusiinis­saa akueris­savar­put. (Joh 13:35) Saatani akiorumal­lugu ajugaajumal­lutalu makitaler­naveersaar­tariaqar­pugut. — Us­s 16:18.

10, 11. (a) Sooq silarsuup asaler­nis­saa taama ajor­nan­ngitsigaa? (b) Demasip silarsuarmik nuan­narin­niler­nera qanoq kinguneqar­pa?

¹⁰ Saatani ‘silarsuarmut matumun­nga naalagaal­lunilu’ pis­saaneqar­poq. (Joh 12:31; 1 Joh 5:19) Silarsuarmi matumani kajumis­saarutigineqar­tar­tut amerlanersaat najoq­qutas­sianut Biibilimiit­tunut akerliup­put. Soorunami silarsuarmi pisut ilaat ajor­tuun­ngil­lat. Taamaat­torli Saatanip silarsuani atorlugu pilerigisavut ator­nerlun­nias­sal­lugil­lu  ajor­tulior­tin­nias­sagaatigut qularin­ngis­sin­naavar­put. Imaluun­niit Jehovamik pal­lorfigin­nin­nitsin­nik sumigin­naanias­sagat­ta silarsuarmik nuan­narin­nilersin­niarsin­naavaatigut. — 1 Johannesi 2:15, 16 atuakkit.

¹¹ Kristumiut siul­liit ilaasa silarsuaq asaler­paat. As­sersuutigalugu Paulusi ima al­lap­poq: “Demasip silarsuaq man­na nuan­narinerulerlugu [qimap­paanga].” (2 Tim 4:10) Demasip silarsuarmi nuan­narisaa, Paulusimik qimatsineranut pis­sutaasoq, sunar­piaanersoq Biibilimi eq­qaaneqan­ngilaq. Imaas­sin­naavoq Demasip pigisat Jehovamut kif­far­tor­nermit nuan­narinerulerai. Taamaap­pat Demasip Guutimut kif­far­tor­nermi im­mik­kut pisin­naatitaaf­feqar­neruler­nis­sani an­naavaa. Taman­na im­minut akilersin­naava? Naamik. Demasi Paulusimut ikior­titut kif­far­tor­tuarsimasin­naagaluar­poq. Silarsuup neqeroorutigisin­naasai Jehovap neqeroorutigisin­naasaanit pitsaanerun­ngisaan­nar­put! — Us­s 10:22.

12. Saatanip ‘pisuus­sutit nakutitsisar­neri’ atorlugit pilerigisavut qanoq ator­nerlus­sin­naavai?

¹² Ul­lumik­kut uagutsin­nut aam­ma taamatut pisoqarsin­naavoq. Kristumiutut im­minut pilersorusut­tar­ner­put ilaqut­tatsin­nil­lu pilersuerusut­tar­ner­put pis­susis­samisuugin­nar­poq. (1 Tim 5:8) Jehovap inuunitsin­nik nuan­naarutigin­nin­nis­sar­put kis­saatigigaa. Adami Evalu paratiisimik alianaatsumik tunim­magit taman­na nalun­ngilar­put. (1 Mos 2:9) Saatanil­li ‘pisuus­sutit nakutitsisar­neri’ atorlugit pilerigisavut ator­nerlus­sin­naavai. (Matt 13:22) Inup­pas­suit isumaqar­put aningaasat pigisal­lu pis­sutigalugit pil­lualis­sal­lutil­luun­niit iluatsil­luas­sal­lutik. Taamatut eq­qarsarut­ta inuunermi pingaar­ner­paaq, Jehovamik ikin­nguteqar­ner­put, an­naasin­naavar­put. Jiisusi ima mianersoq­qusivoq: “Naalak­kanut marlun­nut kif­far­torsin­naasoqan­ngilaq. Aap­paa uumigiguniuk aap­paa asas­savaa, aap­paa tulaavigiguniuk aap­paa asigin­nas­savaa. Guutilu Mam­monilu [pisuus­sutil­lu, 1936] tamaasa kif­far­torfigisin­naan­ngilasi.” (Matt 6:24) Pisuus­sutit kif­far­torfigilerutsigit Jehova kif­far­torfigiun­naas­savar­put. Taamator­piaq ilior­nis­sar­put Saatanip kis­saatigaa. Qanor­toq aningaasat pigisal­luun­niit Jehovamik ikin­nguteqar­nitsin­nit pingaar­nerutilin­ngisaan­naritigit. Saatani akiorumal­lugu ajugaajumal­lutalu pigisat eq­qor­tumik isigin­nit­taaseqarfigisariaqar­pavut. — 1 Timotheusi 6:6-10 atuakkit.

13. Aap­pariin­nermut atoqatigiin­nermul­lu eq­qun­ngitsumik isigin­nit­taaseqar­neq silarsuarmi qanoq nalingin­naalersin­niar­neqar­tar­pa?

¹³ Kinguaas­siuutitigut inuunerlun­neq Saatanip napiaaniutaasa ilagaat. Inup­pas­suit isumaqar­put aap­parisamut aap­pariin­nermul­lu ilumoorfigin­nin­neq itsar­nisaaval­laarlunilu kif­faan­ngis­susermut kil­liliisoq. As­sersuutigalugu ar­nap filmiliaritit­tar­tup inum­mut ataatsimut ilumoorfigin­nin­neq ajor­narluin­nar­nerar­paa. Ima oqar­poq: “Ilumoorfigin­nit­tumik ilumoorfigin­nik­kusut­tumil­luun­niit ilisarisimasaqan­ngilanga.” Angut filmiliaritit­tar­toq ima oqar­poq: “Naluara inuuner­put naal­lugu inum­mut ataatsimut ilumoorfigin­nin­nis­sar­put pis­susis­samisoor­nersoq.” Inuit tusaamasat Guutip aap­pariin­nermik tunis­sutaanik isor­nar­torsiuigaangata Saatani nuan­naangaar­tarsimas­saaq. Diaavulup aap­pariin­nermik aaq­qis­suus­saq tapersersor­nagulu aap­pariit pil­luar­nis­saat kis­saatigin­ngilaa. Taamaat­tumik Saatani akiorumal­lugu ajugaajumal­lutalu  aap­pariin­nermut tun­ngatil­lugu Guutitut isigin­nit­taaseqar­tariaqar­pugut.

14, 15. Kinguaas­siuutitigut inuunerlun­nis­samut us­ser­nar­torsior­taruit susin­naavit?

¹⁴ Aap­paqarut­ta aap­paqan­ngik­kaluarut­taluun­niit kinguaas­siuutitigut inuunerloriaatsit suul­luun­niit akior­niarlugit tamaviaar­tariaqar­pugut. Taman­na ajor­nan­ngila? Naamerluin­naq! As­sersuutigalugu inuusut­tuuguit im­maqa atuaqatitit kimil­luun­niit atoqateqarsin­naanermin­nik usorsisimaarutigin­nit­tut tusaasar­patit. Aam­ma atoqatigiin­nermut tun­ngatil­lugu mobilik­kut al­laqatigiin­neq as­sinil­lu nas­sius­sisar­neq usorsisimaarutigisin­naavaat. Al­laat nunat ilaan­ni taamaalior­neq meeq­qanut por­nografiimik nas­sius­siner­tut isigineqar­tar­poq. Biibilimi ima al­las­simavoq: “[Kinguaas­siuutitigut] inuunerlut­toq nam­mineq timiminut ajor­tulior­tar­poq.” (1 Kor 6:18) Nap­paatit atoqatigiin­nik­kut tuniluut­tar­tut naal­liungaar­nermik toqumil­lu kinguneqar­tar­put. Inuusut­tut amerlanerit katis­simanatik atoqateqarsimasut oqar­put iliuuserisamin­nik peq­qis­simis­sutigin­nil­lutik. Inuit aliik­kusersuinermik suliaqar­tut isumaqalersin­niar­tar­paatigut Guutip inatsisaanik unioq­qutitsineq ajor­tumik kinguneqar­navian­ngitsoq. Sal­luliuutit taamaat­tut up­perigutsigit ‘ajor­tip sal­loqit­taaneranit’ tam­mar­tin­neqarsin­naavugut. — Hebr 3:13.

 ¹⁵ Kinguaas­siuutitigut inuunerlun­nis­samut us­ser­nar­torsior­taruit susin­naavit? San­ngiis­suteqarlutit nas­suerutigiuk. (Rom 7:22, 23) Nukis­samik tuneq­qul­lutit Guuti qin­nuigiuk. (Fil 4:6, 7, 13) Kinguaas­siuutitigut inuunerlulis­sutigisin­naasatit ingalas­simaniak­kit. (Uss 22:3) Us­ser­nar­torsior­nitit ingerlaan­naq akiuk­kit. — 1 Mos 39:12.

16. Jiisusi Saatanimit us­ser­niar­neqarami qanoq oqar­pa, maligas­siaalu qanoq ilin­niarfigisin­naavar­put?

¹⁶ Jiisusi maligas­siuil­luar­poq. Saatanip neriorsuutaanit sal­loqit­tar­neqan­ngilaq. Neriorsuutai eq­qarsaatigerusun­ngilaaluun­niit. Saatanili ingerlaan­naq ima akivaa: “Al­las­simavoq.” (Matthæusi 4:4-10 atuakkit). Guutip oqaasia Jiisusip ilisimal­luaramiuk Saatanimit us­ser­niar­neqarami al­las­simaf­fiit ingerlaan­naq is­suarsin­naavai. Saatani akiorumal­lugu ajugaajumal­lutalu kinguaas­siuutitigut inuunerlun­nis­samut us­ser­neqar­nis­sar­put akuerin­ngisaan­nar­tariaqar­par­put. — 1 Kor 6:9, 10.

17, 18. (a) Saatanip napiaaniutit al­lat suut ator­tar­pai, aam­ma sooq taamaalior­nis­saa ilimagiin­narsin­naavar­put? (b) Saatani qanoq pineqas­sava, taman­nalu piner­tusaar­nis­san­nut qanoq nakus­satsis­sutigaajuk?

¹⁷ Makitaneq, pigisalerituneq kinguaas­siuutitigul­lu inuunerlun­neq Saatanip napiaaniutaasa ilaan­naraat. Napiaaniutai suli amerlanerujus­suup­put. As­sersuutigalugu kristumiut ilaat ilaqut­tamin­nit akerlilersor­neqar­tarlutil­luun­niit atuaqatimin­nit il­laruaatigineqar­tar­put. Al­lat nunamin­ni oqar­tus­saasunit oqaluus­seq­quneqar­neq ajor­put. Taamatut erloqinar­torsior­tar­nis­sar­put ilimagereer­par­put. Jiisusip nam­mineq ima mianersoq­quaatigut: “Atera pil­lugu tamanit uumis­sor­neqas­saasi. Naggatis­samul­li nikal­lujuitsuusoq taan­na an­naan­neqas­saaq.” — Matt 10:22.

¹⁸ Qanoq Saatani akiorsin­naal­lugulu ajugaasin­naavugut? Jiisusi ima oqar­poq: “Piner­tusaar­nis­sigut inuunersi pigit­tuin­nas­savarsi.” (Luk 21:19) Inuit ajoquser­niarluta iliuuserisin­naasaat suul­luun­niit ataavar­tuusin­naan­ngil­lat. Kial­luun­niit Guutimik ikin­nguteqar­ner­put kipitis­sin­naan­ngilaa, uagut nam­mineq apeq­qutaagin­nar­pugut. (Rom 8:38, 39) Imaan­ngilaq Jehovap kif­faasa aalajaatsut ilaat toqutaap­pat Saatani ajugaasoq. Jehovam­mi makitik­kumaar­pai. (Joh 5:28, 29) Saatanili siunis­saqan­ngilaq. Silarsuaa ajor­toq suujun­naarsin­neqareer­pat ukiuni 1000-ni itinersuarmi par­naarus­saaq­qas­saaq. (Saqq 20:1-3) Kristusilu ukiuni 1000-ni naalak­kersuereer­pat ‘Saatani par­naarus­saaf­fim­minit iperar­neqaruni’ inuiaat naam­mal­luin­nar­tut naggam­mik tam­mar­tin­niarsaris­savai. Tamatuma kingor­na suujun­naarsin­neqas­saaq. (Saqq 20:7-10) Diaavulu siunis­saqan­ngilaq, il­lil­li siunis­saqar­putit! Saatani akior­tuaruk up­per­nik­kul­lu nukit­tujuarlutit. Saatani akiorsinnaavat ajugaallutillu!