1. а) Чьрʹа илаһи ньһа фәрз ә ԝәки мьԛабьли Шәйтʹан рʹабьн? б) Әм жь кʹӧ заньн ԝәки дькарьн сәркʹәвьн чахе мьԛабьли Шәйтʹан дәрен?

 ШӘЙТʹАН мьԛабьли рʹункьрийед кӧ сәр әʹрде манә у «пәзед дьн» дьчә (Йуһʹәнна 10:16). Жь бо ԝе йәке кӧ ԝәʹде Шәйтʹан һьндьк майә, әԝ дьхԝазә баԝәрийа гәләк ԛӧльхкʹаред Йаһоԝа кʹӧта кә. (Бьхунә Әʹйанти 12:9, 12.) Ле әм дькарьн сәркʹәвьн, чахе мьԛабьли ԝи дәрен. Кʹьтеба Пироз дьбежә: «Мьԛабьли Мирещьн бьсәкьньн у әԝе жь ԝә бьрʹәвә» (Аԛуб 4:7).

2, 3. а) Чьрʹа Шәйтʹан дьхԝазә ԝәки мәрьв баԝәр кьн кӧ әԝ тʹӧнә йә? б) Һун жь кʹӧ заньн ԝәки Шәйтʹан һәйә?

² Гәләк мәрьв дькʹәньн чахе дьбьһен кӧ Шәйтʹан һәйә. Бона ԝан, Шәйтʹан у щьн тʹәне дь сәрһатийада, филмед бь тьрсда, у дь листькед видеойеда һәнә. Мәрьвед ӧса, дьшьрмиш дьбьн кӧ кʹе ԝан рʹӧһʹе хьраб баԝәр дькьн, әԝана бефәʹм ьн. Ле гәло Шәйтʹан бәрхԝәдькʹәвә, чахе мәрьв баԝәр накьн кӧ әԝ у щьнед ԝи реали нә? На. Бона Шәйтʹан гәләк һеса йә, ԝәки ԝан мәрийа бьхапинә кʹе дӧдьли дьбә кӧ әԝ һәйә (2 Корьнтʹи 4:4). Шәйтʹан рʹасти жи дьхәбьтә ԝәки әԝ фькьр бәла бә, чьмки бь ԝе йәке әԝ дькарә мәрийа бьхальфинә.

³ Ле чаԝа щьмәʹта Йаһоԝа, әм хапийайи ниньн. Әм заньн кӧ Мире-щьн кәсе реали йә. Ле әм жь кʹӧ заньн? Кʹьтеба Пироз мәрʹа  гьли дькә, кӧ Шәйтʹан бь мәʹр тʹәви Һеԝайе хәбәрда (Дәстпебун 3:1-5). Әԝи тʹәви Йаһоԝа хәбәрдьда, дәрһәԛа Ибо (Ибо 1:9-12). Шәйтʹан дьхԝаст ԝәки Иса бьщерʹьбинә (Мәтта 4:1-10). Чахе Иса сала 1914 бу Пʹадша, паши ԝе йәке Шәйтʹан дәстпекьр «шәрʹе хԝә» тʹәви рʹункьрийед сәр әʹрде (Әʹйанти 12:17). Әԝ шәрʹ бәрдәԝан дьбә, чьмки Мире-щьна дьхәбьтә ԝәки баԝәрийа рʹункьрийа у «пәзед дьн» кʹӧта кә. Сәва әм дь ви шәрʹида сәркʹәвьн, гәрәке әм мьԛабьли Шәйтʹан һәрʹьн у тʹьме баԝәрийа хԝә ԛәԝи хԝәй кьн. Дь ве тʹемайеда әме пебьһʹәсьн чаԝа бь се рʹейа әм дькарьн әԝе йәке бькьн.

4. Чьрʹа Шәйтʹан мәсәла ԛӧрʹәбунейә мәзьн ә?

⁴ Шәйтʹан гәләк ԛӧрʹә у бабах ә. Әԝ һәла һе нәтьрсийа жи бькә бьн шьке, изьна Хԝәде кӧ сәрԝертийе бькә. У әԝ дьхәбьти кӧ ӧса бькә ԝәки йед дьн ԝи бьһʹәбиньн дәԝса Йаһоԝа. Ләма жи әԝ мәсәла мәзьн ә ԛӧрʹәбун у бабахбунеда. Чахе әм хԝә жь бабахийе у ԛӧрʹәбуне дур дьгьрьн у шкәсти нә, бь ԝи щурʹәйи әм мьԛабьли Шәйтʹан дәрдькʹәвьн. (Бьхунә 1 Пәтрус 5:5.) Ле чь йә ԛӧрʹәбун? Гәло ԛӧрʹәбун һәртʹьм хьраб ә?

5, 6. а) Ԛӧрʹәбуна чь щурʹәйи хьраб ә? Шьровәкьн. б) Кʹижан щурʹә ԛӧрʹәбун хоф ә, у чь һьнә мәсәлә дь Кʹьтеба Пирозда һәнә дәрһәԛа ԝе ԛӧрʹәбуне?

⁵ Фәрһәнгәк дьбежә, ԝәки ԛӧрʹәбун әԝ һәст ә чахе мәрьв хԝәда гӧман ә у ԛәдьре хԝә занә. Әԝ ӧса жи «әԝ һәст ә чахе мәрьв хԝә рʹази йә жь бо ве йәке, кӧ әԝ йан жи мәрьвед ԝийи незик, тьштәки баш кьрьнә йан жи тьштед ԝанә баш һәнә». Ве йәкеда тьштәки хьраб тʹӧнә йә. Паԝлосе шанди бьред жь Тʹесалоникерʹа ньвиси: «Әм хԝәха жи нава щьвинед Хԝәдеда пе ԝә дьфьрʹьн [ԛӧрʹә дьбьн, ДТʹ], бона сәбьр у баԝәрийа ԝә, чьмки һун ԝан һʹәму зерандьн у тәнгасийа дькʹьшиньн, йед кӧ тенә сәре ԝә» (2 Тʹесалоники 1:4). Демәк чахе әм кьре кәсәкирʹа ша дьбьн, у чахе нав мәда һьнәки ԛӧрʹәбун һәйә, әв бь тʹәбийәти йә. Нә лазьм ә кӧ жь бо малбәта хԝә, култура хԝә, йан жи жь бо щийе кӧ әм мәзьн бунә шәрм кьн (Кʹаред Шандийа 21:39).

⁶ Ле һәйә щурʹәк ԛӧрʹәбун кӧ дькарә һәләԛәтийе хьраб кә, илаһи һәләԛәтийа мә тʹәви Йаһоԝа. Ԛӧрʹәбуна ԝи щурʹәйи, дькарә бьбә мәʹнийа бәрхԝәкʹәтьне чахе ширәта дьдьнә мә. Әԝ һәла дькарә нәһелә жи кӧ әм ширәте һьлдьн, дәԝса кӧ бь мьлукти ԛәбул кьн (Зәбур 141:5). Ԛӧрʹәбуна ԝи щурʹәйи әԝ ә, чахе мәрьв дәрһәԛа хԝә дьһа зәʹф дьшьрмиш дьбә, йан жи чахе мәрьв хԝә сәр йед дьнрʹа дьгьрә у баԝәр дькә кӧ әԝ һе баш ә нә кӧ йед дьн, ле гәләк щар әԝ йәк нә ӧса нә. Йаһоԝа мәрьве ԛӧрʹә у бабах нәфрʹәт дькә (Һәзәԛел 33:28; Амос 6:8). Ле гәләк дьле Шәйтʹан хԝәш те, чахе мәрьв бь пәсндайина хԝә чʹәʹв дьдьнә ԛӧрʹәбуна ԝи. Бьдә бәр чʹәʹве хԝә кӧ Шәйтʹан чьԛас ша дьбу чахе Нәмруд, Фьрәԝьн у Абшалом ԛӧрʹәбуна нәбаш нишан кьрьн, бь пәсндайина хԝә! (Дәстпебун 10:8, 9; Дәркʹәтьн 5:1, 2; 2 Самуйел 15:4-6) Ԛӧрʹәбун ӧса жи бу мәʹни кӧ Ԛайин һәләԛәтийа хԝә тʹәви Йаһоԝа ӧнда кьр. Йаһоԝа хԝәха ширәт да ԝи, ле әԝ һаԛас зәʹф ԛӧрʹә бу кӧ гӧһ нәдайе. Әԝ беаԛьл бу, ширәта Хԝәде ԛәбул нәкьр, у ԛә һʹьше ԝирʹа дәрбаз нәдьбу ԝәки ԝе бәр Йаһоԝа гӧнә бькә (Дәстпебун 4:6-8).

7, 8. а) Ча фьрԛийа ортʹа мьләта йан рʹәнге мәрьва гьредайи йә тʹәви ԛӧрʹәбуне? б) Шьровәкьн кӧ чаԝа ԛӧрʹәбун дькарә дь щьватеда әʹдьлайе бьдә һьлдане.

⁷ Иро мәрьв гәләк щурʹә ԛӧрʹәбуна хьраб нишан дькьн. Әԝ ԛӧрʹәбунәкә ԝи щурʹәйи йә, кӧ мәрьв нәфрʹәт дькә мәрьвед майин, жь бо рʹәнге ԝан йан жи жь бо кӧ әԝана жь кʹидәре нә. Ле чьрʹа ԝан мәрьва нәфрʹәт дькьн? Чьмки әԝ мәрьв дьшьрмиш дьбьн, кӧ мәрьвед бь рʹәнге ԝан у жь щийе ԝан, жь йед майин  баштьр ьн. Ахьрийа ньһерʹадьна ӧса шәрʹ ьн, дәʹԝ ьн, у ӧса жи гәләк кӧштьн.

⁸ Рʹаст ә, тьште ӧса дь щьватеда гәрәке нәԛәԝьмьн. Ле жь бо ԛӧрʹәбуне хушк у бьра дькарьн һәв фәʹм нәкьн, у ортʹа ԝан ӧса һәвкʹәвә, кӧ нькарьбьн хԝә контрол кьн. Әԝ йәк тʹәви һьнә Мәсиһийед бәре ԛәԝьми, кʹижанарʹа Аԛуб пьрсәкә ԛәԝи да: «Жь кʹӧ нә әԝ шәрʹ у дәʹԝе нава ԝәда?» (Аԛуб 4:1) Һәрге әм кәсәки нәфрʹәт дькьн у дьшьрмиш дьбьн кӧ әм жь ԝана баштьр ьн, әм дькарьн ԝанрʹа тьштәки ӧса бежьн йан бькьн, кӧ дьле ԝан бешиньн (Мәтʹәлок 12:18). Рʹасти жи, ԛӧрʹәбун дькарә зийане бьдә әʹдьлайа щьвате.

9. Кʹьтеба Пироз ча али мә дькә, ԝәки әм фьрԛийе нәкьнә ортʹа мьләта у ԛӧрʹәбуне нәдьнә кʹьфше? (Бьньһерʹьн шькьле әʹԝльн.)

⁹ Һәрге әм дьшьрмиш дьбьн кӧ әм жь йед дьн баштьр ьн, әм гәрәке бир нәкьн кӧ Йаһоԝа нәфрʹәт дькә ԝан, йед кӧ дьле хԝәда ԛӧрʹә нә (Мәтʹәлок 16:5). Мәрʹа ӧса жи лазьм ә, ԝәки хԝә бьщерʹьбиньн у жь хԝә бьпьрсьн: «Гәло әз дьшьрмиш дьбьм ԝәки әз һе баш ьм, нә кӧ мәрьвед жь щурʹә-щурʹә мьләта, рʹәнга, йан жи култура?» Һәрге ӧса нә, әм гәрәке бир нәкьн, кӧ Хԝәде жь мәрьвәки «һʹәму мьләтед дьнйайе әʹфьрандьн» (Кʹаред Шандийа 17:26). Демәк, әм гьшк жи жь мьләтәки нә, чьмки һәр кәс жь Адәм пешда һатийә. У әԝ беаԛьлайи йә, һәрге әм дьшьрмиш бьн кӧ Хԝәде һьнә мьләт һе рʹьнд чекьрьнә, нә кӧ йед дьн. Ле һәрге әм ӧса дьшьрмиш дьбьн, әм изьне дьдьнә Шәйтʹан кӧ һʹьзкьрьн у тʹьфаԛийа ортʹа Мәсиһийа кʹӧта кә (Йуһʹәнна 13:35). Һәрге әм дьхԝазьн мьԛабьли Шәйтʹан дәрен у сәркʹәвьн, әм гәрәке жь һʹәму щурʹә ԛӧрʹәбуна нәрʹаст бьрʹәвьн (Мәтʹәлок 16:18).

10, 11. а) Чьрʹа әм дькарьн һеса ве дьне һʹьз кьн? б) Ахьрийа Димас ча бу, кӧ әԝи дьнйа һʹьз кьр?

¹⁰  Шәйтʹан «сәрԝере ве дьнйайе» йә, демәк әԝ һʹӧкӧм дькә сәр ве дьнйайе (Йуһʹәнна 12:31; 1 Йуһʹәнна 5:19). Гәләк тьшт дь ве дьнйайеда мьԛабьли принсипед Кʹьтеба Пироз ьн. Раст ә ве дьнйайеда һʹәму тьшт хьраб нинә. Ле, әм заньн кӧ Шәйтʹан әԝе дьнйайе дьдә хәбате, ԝәки һʹӧкӧм кә сәр хԝәстьнед мә сәва әм гӧнә бькьн. У ӧса жи әԝ дьхԝазә ԝәки әм әве дьне һʹьз кьн у ԛӧльхкьрьна хԝә Йаһоԝарʹа бьдьнә сәкьнандьне. (Бьхунә 1 Йуһʹәнна 2:15, 16.)

¹¹ Һьнә мәсиһийед бәре дьнйа һʹьз кьрьн. Мәсәлә, Паԝлос ньвиси: «Димас кӧ дьнйа һʹьз кьр әз һьштьм» (2 Тимотʹейо 4:10). Кʹьтеба Пироз набежә ԝәки Димас ве дьнйайеда чь һʹьз кьр, кӧ бу мәʹни Паԝлос бьһелә. Дьбәк әԝи тьштед материали һе зәʹф һʹьз кьр, нә кӧ ԛӧльхкьрьна хԝә Йаһоԝарʹа. Һәрге бь рʹастийе ӧса бу, әԝи ӧнда кьр әԝ ԛәдьр кӧ Хԝәдерʹа ԛӧльх бькә. Ле гәло әԝ йәк һежа бу? Һьлбәт на. Димас дькарьбу бьма ча аликʹарчийе Паԝлос. Чьмки әԝе дьнйайе тʹӧ щар ԝе нькарьбуйа Йаһоԝа зедәтьр тьштед баш бьда ԝи! (Мәтʹәлок 10:22)

12. Шәйтʹан ча дькарә һʹӧкӧм кә сәр хԝәстьна мә бь «дәрәԝед дәԝләтийе»?

¹² Тʹәви мә жи дькарә ӧса бьԛәԝьмә ча тʹәви Димас. Тʹәбийәти йә кӧ чаԝа мәсиһи, әм дьхԝазьн хԝә у малбәта хԝә хԝәй кьн (1 Тимотʹейо 5:8). Йаһоԝа дьхԝазә кӧ әм жь әʹмьр шабуне бьстиньн. Әм әԝе йәке заньн, чьмки Йаһоԝа бахче бәдәԝ да Адәм у Һеԝайе, ԝәки әԝана теда бьжин (Дәстпебун 2:9). Ле Шәйтʹан дькарә һʹӧкӧм кә сәр хԝәстьна мә бь «дәрәԝед дәԝләтийе» (Мәтта 13:22). Гәләк мәрьв дьшьрмиш дьбьн, кӧ пʹәрә у тьштед материали дькарьн ԝана бәхтәԝар кьн у пешда бьвьн. Һәрге әм жи ӧса дьшьрмиш дьбьн, әм дькарьн тьштәки гәләк фәрз ӧнда кьн. Әԝ һәйә һәләԛәтийа мә тʹәви Йаһоԝа. Иса пешда гот: «Тʹӧ кәс нькарә дӧ ахарʹа хӧламтийе бькә, чьмки йан ԝе һʹиле ԝи жь йәки һәрʹә у йе дьне һʹьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʹа, һьн жи һәбукерʹа хӧламтийе бькьн» (Мәтта 6:24). Һәрге әм һʹәму ԛәԝат у ԝәʹде хԝә дьдьн бона тьштед  материали, әме нькарьбьн Йаһоԝарʹа ԛӧльх бькьн. Шәйтʹан жи һәма әԝе йәке бона мә дьхԝазә. Ԝәрә әм изьне нәдьн кӧ пʹәрә у тьштед материали тенә кʹьрʹине, бона мә һе фәрз бьн, нә кӧ һәләԛәтийа мә тʹәви Йаһоԝа. Һәрге әм дьхԝазьн мьԛабьли Шәйтʹан дәрен у сәркʹәвьн, гәрәке ньһерʹандьна мә рʹаст бә һьндава тьштед материали. (Бьхунә 1 Тимотʹейо 6:6-10.)

13. Әва дьнйа ча ньһерʹандьна нә рʹаст дәрһәԛа зәԝаще у сексе бәла дькә?

¹³ Тʹәлькәкә Шәйтʹанә дьн әԝ һәйә бенамуси. Гәләк дьшьрмиш дьбьн ԝәки мер йан жьнерʹа амьн бьн, ӧса жи зәԝащера, нә модерн ә у азабуна ԝана синор дькә. Мәсәлә, артистәке гот кӧ наԛәԝьмә ԝәки мәрьвәкирʹа амьн бьмини. Әԝе зедә кьр: «Әз тʹӧ кәси нас накьм кӧ амьн ә йан жи дьхԝазә амьн бә». Артистәки дьн жи гот: «Әз баԝәр накьм ԝәки әм ӧса һатьнә чекьрьне, кӧ тʹәви йәке бьжин һʹәта хьлазийа әʹмьре хԝә». Шәйтʹан гәләк ша дьбә, чахе мәрьвед нав у дәнг ԛьсуре дьвиньн пʹешкʹеша Хԝәде зәԝащеда. Мире-щьна пьштгьрийа сазкьрьна зәԝаще накә, у нә жи дьхԝазә зәԝащ бәхтәԝар бә. Демәк, сәва кӧ мьԛабьли Шәйтʹан дәрен у сәркʹәвьн, әм гәрәке бь ньһерʹандьна Йаһоԝа сәр зәԝаще бьньһерʹьн.

14, 15. Тӧ чь дькари бьки һәрге алийе бенамусийеда тейи щерʹьбандьне?

¹⁴ Фьрԛи тʹӧнә әм зәԝащеда ньн йан азәп ьн, әм гәрәке гәләки бьхәбьтьн сәва кӧ мьԛабьли һʹәму щурʹә бенамусийе һәрʹьн. Ле гәло әԝ йәк һеса йә? На! Мәсәлә, һәрге тӧ щаһьл и, тӧ дьбәкә бьбьһейи ча һәвалед тәйә дәрсхане пʹайе хԝә дьдьн, кӧ тʹәви кʹе жи бьхԝазьн бенамусийе дькьн. Әԝана ӧса жи дькарьн пʹайе хԝә бьдьн дәрһәԛа секстинге, демәк, шандьна нәʹмәк йан шькьлед бенамуси бь тʹелефона. Дь һьнә ԝәлатада, секстинге һʹәсаб дькьн тьштәки ӧса хьраб, ча бәлакьрьна порнографиа зарʹа. Кʹьтеба Пироз дьбежә: «Ле әԝе кӧ ԛавийе дькә, мьԛабьли бәдәна хԝә гӧна дькә» (1 Корьнтʹи 6:18). Бь һәләԛәтийа сексуали нәхԝәшийед гьран бәла дьбьн, у ахьрийа ԝе йәке гәләк щәфа у мьрьн ә. У һʹәчʹи зәʹф жь ԝан щаһьла, йед кӧ пешийа зәԝаще бенамуси кьрьнә, дьбежьн кӧ әԝана гәләк пʹошман бунә. Әва дьнйа рʹьһʹәтиһʹьз, дьхԝазә мә бьдә баԝәркьрьне, кӧ ԝе ԛә тьштәк жи нәбә, һәрге әм ԛануна Хԝәде нәԛәдиньн. Дьшьрмишбуна ӧса, дькарә мә бьхальфинә у бәрбь гӧнәкьрьне бьбә (Ибрани 3:13).

¹⁵ Һәрге тӧ бенамусийеда тейи щерʹьбандьне, тӧ чь дькари бьки? Бира нәкә бона сьстбуна хԝә (Рʹомайи 7:22, 23). Йаһоԝарʹа дӧа бькә сәва ԛәԝате бьстини (Филипи 4:6, 7, 13). Бьрʹәвә жь ԝан дәрәща, йед кӧ дькарьн тә бькьнә нава бенамусийе (Мәтʹәлок 22:3). У чахе тӧ рʹасти щерʹьбандьне бейи, дәрберʹа же бьрʹәвә (Дәстпебун 39:12).

16. Иса чь гот чахе Шәйтʹан әԝ дьщерʹьбанд, у әм чь дькарьн жь ве йәке һин бьн?

¹⁶ Иса мәсәла ԛәԝи мәрʹа һишт. Әԝ  нәһатә хапандьне бь ԝан созед кӧ Шәйтʹан дьда ԝи. Әԝ һәла ԛә нәфькьри жи дәрһәԛа ԝан соза. Дәԝсе, әԝи дәрберʹа щаба Шәйтʹан да у гот: «Ньвисар ә». (Бьхунә Мәтта 4:4-10.) Иса Хәбәра Хԝәде рʹьнд заньбу. Ләма жи чахе Шәйтʹан әԝ дьщерʹьбанд, ԝирʹа һеса бу дәрберʹа рʹезед жь Хәбәра Хԝәде әзбәри бежә. Һәрге әм дьхԝазьн мьԛабьли Шәйтʹан дәрен у сәркʹәвьн, әм гәрәке мьԛати хԝә бьн ԝәки нәкʹәвьнә нава бенамусийе (1 Корьнтʹи 6:9, 10).

17, 18. а) Шәйтʹан диса кʹижан тʹәлька дьдә хәбате, у әм кʹӧра заньн кӧ чәтьнайед ӧса ԝе һәбьн? б) Чь ԝе бьԛәԝьмә тʹәви Шәйтʹан, у ча әԝ йәк тә дьлгәрм дькә ԝәки сәбьр ки?

¹⁷ Ԛӧрʹәбун, материализм у бенамуси әԝ тʹәне се тʹәлькед Шәйтʹан ьн. Ле диса гәләк тʹәлькед ԝи һәнә. Мәсәлә, нәфәред мала һьнәк мәсиһийа мьԛабьли ԝан дьчьн, йан жи һәвалед дәрсхане сәр ԝан дькʹәньн. Һьнәк дьжин ԝан ԝәлатада, кʹидәре кӧ сәрԝер дьхәбьтьн ԝәки шьхӧле даннасинкьрьне бьдьнә сәкьнандьне. Әм заньн кӧ чәтьнайед ӧса ԝе һәбьн. Иса мәрʹа пешда гот: «Бона наве мьн һуне бәр чʹәʹве һʹәмуйа рʹәш бьн. Ле кʹи кӧ һʹәта хьлазийе сәбьр кә әԝе хьлаз бә» (Мәтта 10:22).

¹⁸ Ча әм дькарьн мьԛабьли Шәйтʹан дәрен у сәркʹәвьн? Иса гот: «Бь сәбьра хԝә һуне рʹӧһʹе хԝә хьлаз кьн» (Луԛа 21:19). Һʹәму тьштед кӧ мәрьв дькарьн бь ԝан зийане бьдьнә мә, ԝәʹдәлу нә. Тʹӧ кәс нькарә һәләԛәтийа мә тʹәви Йаһоԝа хьраб кә, һәрге әм хԝәха хьраб нәкьн (Рʹомайи 8:38, 39). Чахе кәсәк жь ԛӧльхкʹаре Йаһоԝа дьмьрә, әԝ найе һʹәсабе ԝәки Шәйтʹан сәркʹәт. Чьмки Йаһоԝа ԝе ԝана сах кә (Йуһʹәнна 5:28, 29). Ле ахьрийа Шәйтʹан бош-бәтал ә. Паши кʹӧтабуна ве дьнйа зӧлм, әԝ ԝе сәр 1 000 сала бе авитьне ль гәлийе һәй-ԝайе (Әʹйанти 20:1-3). Хьлазийа Һʹәзарсалийа пʹадшатийа Иса, Шәйтʹан ԝе «жь зьндана хԝә бе бәрʹдане» у бьхәбьтә ԝәки щара пашьн мәрьвед ԛәданди бьхапинә. Паши ве йәке әԝ ԝе бе кʹӧтакьрьне (Әʹйанти 20:7-10). Рʹаст ә ахьрийа Шәйтʹан бош-бәтал ә, ле йа тә на! Бәрдәԝан кә мьԛабьли Мире-щьн дәре у баԝәрийа хԝә ԛәԝи хԝәй кә. Баԝәр бә, кӧ тӧ дькари мьԛабьли Шәйтʹан дәрей у сәркʹәви!