1. a) ¿Tiquʼn mas nim toklen toj ambʼil jaʼlo tuʼn qweʼxix twitz Satanás? b) ¿Tiquʼn in xi qqʼamaʼn qa jaku kubʼ tiʼj Satanás quʼn?

IN QʼOJIN Satanás kyiʼj qeju okslal skʼoʼn maj ateʼx twitz Txʼotxʼ ex kyiʼj «txqantl» ẍneʼl (Juan 10:16). Tuʼnju oʼkx chʼintl ambʼil atx te, tajbʼil tuʼn tkubʼ tnajsaʼn qʼuqbʼil kykʼuʼj nimku tmajen Jehová (kjawil uʼjit Apocalipsis 12:9, 12). Noqtzun tuʼnj, jaku qo kambʼan tiʼj Satanás. In tzaj tqʼamaʼn Tyol Dios jlu: «Che weʼxixe twitz tajaw il, ex kʼeleltzun oq kywitze» (Santiago 4:7).

2, 3. a) ¿Tiquʼn tajbʼil Satanás tuʼn tkubʼ kyximen xjal qa mintiʼ te? b) ¿Tiquʼn jaku txi tqʼamaʼn teya qa ax tok at Satanás?

² At nim xjal in che tzeʼn tiʼj ximbʼetz qa at Satanás. In kubʼ kyximen qa aju Satanás ex qeju taqʼunal oʼkx jaku che kanet kyuʼn kyoj uʼj, kyoj película ex kyoj saqchbʼil te videojuego. Ex in kyqʼamaʼn qa oʼkx qeju mintiʼ kynabʼil in kubʼ kyximen qa at Satanás. Bʼaʼn in nel toj twitz Satanás tuʼn tkubʼ kyximen xjal qa mintiʼ te ex qa mintiʼ qe t-anjel, tuʼnju mas nya kwest in nela toj twitz tuʼn t-sbʼun kyiʼj (2 Corintios 4:4) In nok tilil tuʼn, tuʼn tten kyximbʼetz xjal ik tzeʼn jlu toj ambʼil jaʼlo.

³ Tuʼnju tmajen Jehová qoʼ, mintiʼ in qo kubʼ t-sbʼuʼn ximbʼetz lu. Ojtzqiʼn quʼn qa ax tok at Satanás. ¿Tiquʼn in xi qqʼamaʼn jlu? Tuʼnju in tzaj tqʼamaʼn Tyol Dios qa yolin Satanás tukʼil Eva tej tajbʼen jun kan  tuʼn (Génesis 3:1-5). Ex yolin tukʼil Jehová tej ttzaj tqʼamaʼn qa mintiʼ in najbʼen Job tuʼn kʼujlabʼil (Job 1:9-12). Ax ikx ok tilel tuʼn, tuʼn tkubʼ tbʼinchaʼn Jesús jun nya bʼaʼn (Mateo 4:1-10). Nya oʼkxju, ax ikx tej otoqxi tzʼok Jesús te aj Kawil toj 1914, «xiʼ qʼojlel kyiʼj» okslal skʼoʼn maj aqeju ateʼx twitz Txʼotxʼ (Apocalipsis 12:17). Aju qʼoj lu kukx in nok tuʼn Tajaw il tuʼnju tajbʼil tuʼn tkubʼ tnajsaʼn qʼuqbʼil kykʼuʼj okslal skʼoʼn maj ex qeju txqantl ẍneʼl. Tuʼn miʼn qkubʼ tuʼn, il tiʼj tuʼn qweʼxix twitz ex tuʼn qtenxix kyuw toj qokslabʼil. Toj xnaqʼtzbʼil lu, qo xnaqʼtzal tiʼj oxe tumel tuʼn tbʼant jlu quʼn.

4. ¿Tiquʼn in xi qqʼamaʼn qa mas in jaw tnimsan tibʼ Satanás twitz alkyexku juntl?

⁴ A Satanás mas in jaw tnimsan tibʼ twitz alkyexku juntl, tuʼnju tqʼama qa nya bʼaʼn aju Tkawbʼil Jehová ex ok tilil tuʼn, tuʼn kykʼulen xjal twitz ex nya twitz Jehová. Noqtzun tuʼnj, jaku qo kambʼan tiʼj qa mintiʼ xjaw qnimsan qibʼ ex qa ma kubʼ qin qibʼ (kjawil uʼjit 1 Pedro 5:5). ¿Tiʼtzun in bʼant tuʼn jun xjal in jaw tnimsan tibʼ? ¿Tkyaqilpe maj nya bʼaʼn aju nimsabʼil?

5, 6. a) ¿Tkyaqilpe maj nya bʼaʼn aju nimsabʼil? b) ¿Alkye aju nimsabʼil nya bʼaʼn, ex alkye junjun techel in yolin Tyol Dios tiʼj?

⁵ At jun pujbʼil yol in tqʼamaʼn qa aju nimsabʼil in yolin tiʼj qʼuqbʼil qkʼuʼj qiʼx ex tiʼj qa in qnaʼn qa at qoklen. Ax ikx in yolin tiʼj «tzalajbʼil in qnaʼn tuʼnju ma bʼant jun tiʼ quʼn moqa tuʼn juntl xjal ex moqa tuʼnju at jun tbʼanel tiʼ qe moqa te juntl». Bʼaʼn aju qa in qnaʼn jlu. Tqʼama apóstol Pablo jlu kye okslal te Tesalónica: «Ax qoʼye in qo tzalaje kyiʼje, ex in xi qmaʼne kye mastl okslal etzan tuʼn Dios tuj junjun tnam tzaʼn kytene, porque kukx tqeʼ kykʼuʼje tiʼj Dios tuj tkyaqil kybʼise ex yajbʼil kyeye» (2 Tesalonicenses 1:4). Qa toj tumel in qo tzalaj tiʼjju in bʼant kyuʼn txqantl ex tiʼjju in bʼant quʼn, jaku tzaj tiʼn tbʼanil qe. Mintiʼ tiquʼn tuʼn qtzaj chʼixwi kyiʼj toj qja, tiʼj alkye tten xqo tzaj chʼiy moqa tiʼj jatumel xqo jaw chʼiy (Hechos 21:39).

⁶ Noqtzun tuʼnj, at juntl tten nimsabʼil aju jaku txi tnajsaʼn qamiwbʼil kyukʼil txqantl, ex mas tukʼil Jehová. Aju nimsabʼil lu in yolin tiʼj qa ma tzaj qqʼoj aj qtzaj kawin. Axpe ikx tuʼn jlu, jaku tzʼel qikʼun kawbʼil tuʼnju mintiʼ in kubʼ qin qibʼ tuʼn ttzaj qkʼamoʼn (Salmo 141:5). Aju nimsabʼil lu in yolin kyiʼj xjal in kubʼ kyximen qa nimxix kyoklen, moqa «in kubʼ kyyekʼun tukʼil kymod qa mas nim kyoklen kywitz txqantl ex mintiʼ jun tiquʼn tuʼn tkubʼ kyximen ikju». In nel tikʼun Jehová aju nimsabʼil lu (Ezequiel 33:28; Amós 6:8). Atzunte Satanás in tzalaj qa in nel kykanoʼn xjal tmod aj tjaw kynimsaʼn kyibʼ kyiʼjx. ¡Olo tzalaj Satanás tej tjaw tnimsan tibʼ Nemrod, Faraón ex Absalón! (Génesis 10:8, 9; Éxodo 5:1, 2; 2 Samuel 15:4-6.) Tuʼnju nimsabʼil lu xi tnajsaʼn Caín tamiwbʼil tukʼil Jehová. Aku Jehová xi kawinte, noqtzun tuʼnj, tuʼnju jaw tnimsan tibʼ, mintiʼ xi tbʼiʼn kawbʼil. Jun rat naj kubʼ tbʼinchaʼn il twitz Jehová ex mintiʼ tzaj tbʼis tuʼn (Génesis 4:6-8).

7, 8. a) ¿Tiʼ in bʼant tuʼn ikʼbʼil tiʼj kyyajil txqantl xjal, ex tiʼ toklen tukʼil aju nimsabʼil kyibʼ xjal? b) ¿Alkye tten jaku naj mujbʼabʼil toj ttnam Dios qa ma jaw kynimsan kyibʼ erman?

⁷ Nim tten in jaw kynimsan kyibʼ xjal toj ambʼil jaʼlo. Aju nimsabʼil kyibʼ xjal at toklen tukʼil aju aj tel kyikʼun kyyajil, moqa kyiyjil, txqantl xjal. In tzaj tqʼamaʼn jun pujbʼil yol qa aju ikʼbʼil tiʼj tyajil juntl xjal in tzaj tiʼn nim nya bʼaʼn. Ax ikx tuʼn jlu «in kubʼ kyximen xjal qa at junjun kyyajil xjal mas nim toklen twitz juntl tuʼnju junxtl kyyajil moqa tuʼnju in bʼant junjuntl tiʼchaq kyuʼn». Tuʼnju ikʼbʼil tiʼj kyyajil xjal, o tzʼok qʼoj, axpe ikx o che kyim nim xjal.

⁸ Ax tok, mintiʼ tuʼn tikʼ jlu toj ttnam Jehová. Noqtzun tuʼnj, qa mintiʼ in mojeʼ kyyol erman jaku jaw kynimsan kyibʼ ex jaku tzaj nya bʼaʼn  kyxol. Ik bʼajju kyxol okslal toj tnejel syent abʼqʼi ex tuʼntzun jlu xi tqanin Santiago jlu kye: «¿Tiquʼn at qʼoj kyxole ex in che qʼojle?» (Santiago 4:1). Qa in qnaʼn ikʼbʼil kyiʼj txqantl ex qa in qnaʼn qa mas tbʼanel qoʼ kywitz, jaku txi qqʼamaʼn moqa jaku kubʼ qbʼinchaʼn jun tiʼ aju jaku tzʼok tbʼinchaʼn nya bʼaʼn kyiʼj (Proverbios 12:18). Ax tok, qa ma jaw qnimsan qibʼ, jaku kubʼ naj mujbʼabʼil toj jun Ja te Chmabʼil tuʼn.

9. ¿Alkye tten in qo tzaj tonin Tyol Dios tuʼn miʼn tel qikʼun kyyajil txqantl xjal ex tuʼn miʼn tjaw qnimsan qibʼ? (Qʼonka twitza tiʼj tnejel tilbʼilal.)

⁹ Qa in kubʼ qximen qa mas nim qoklen kywitz txqantl, il tiʼj tuʼn ttzaj qnaʼn qa «ikʼun tuʼn Qman qe xjal in jaw kyniman kyibʼ» (Proverbios 16:5). Ax ikx il tiʼj tuʼn tok qqʼoʼn qanmi toj malbʼil tukʼil xjel lu: «¿In kubʼpe nximene qa mas tbʼanel qine kywitz xjal te junxitl kyyajil moqa te junxitl kytnam?» Qa ik qxim ik tzeʼn jlu, ma tzʼel naj tiʼj qkʼuʼj qa «junx xjal tbʼincha Dios te kyiyjil kykyaqil xjal» (Hechos 17:26). Qkyaqilx atz xqo tzaj tiʼj Adán. Mintiʼx qnabʼil qa in kubʼ qximen qa ma che kubʼ tbʼinchaʼn Dios kyyajil junjun xjal mas bʼaʼn kywitz txqantl. Qa in kubʼ qximen jlu, in xi qqʼoʼn ambʼil te Satanás tuʼn tkubʼ tnajsaʼn kʼujlabʼil ex mujbʼabʼil kyxol erman (Juan 13:35). Tuʼn qkambʼan tiʼj Satanás, mintiʼ tuʼn tjaw qnimsan qibʼ (Proverbios 16:18).

10, 11. a) ¿Tiquʼn nya kwest jaku tzʼok qkʼujlaʼn aju at twitz Txʼotxʼ? b) ¿Tiʼ bʼant tuʼn Demas tuʼnju ok tkʼujlaʼn twitz Txʼotxʼ?

¹⁰ A Satanás «nejenel at twitz txʼotxʼ» ex a in kawin tibʼaj (Juan 12:31; 1 Juan 5:19). At nim tiʼchaq te twitz txʼotxʼ aju nya bʼaʼn toj twitz Dios. Ax tok, at junjun tiʼchaq te twitz Txʼotxʼ bʼaʼn qe. Noqtzun tuʼnj, ax ikx jaku tzʼajbʼen tuʼn Satanás aju qajbʼil tuʼn tten tiʼchaq qe tuʼntzun tkubʼ qbʼinchaʼn il. Ex jaku tzʼok tilil tuʼn, tuʼn tok qkʼujlaʼn aju te twitz Txʼotxʼ ex tuʼn miʼn tok tilil quʼn toj qajbʼebʼil te Jehová (kjawil uʼjit 1 Juan 2:15, 16).

¹¹ At junjun okslal toj tnejel syent abʼqʼi ok kykʼujlaʼn aju at twitz Txʼotxʼ. Jun techel, tqʼama apóstol Pablo jlu: «Ma chin kyaj koline tuʼn Demas tuʼnju ma tzʼok tqʼoʼn tkʼuʼj tiʼj ju te twitz txʼotxʼ» (2 Timoteo 4:10). Mintiʼ in tzaj tqʼamaʼn Tyol Dios tiʼxix ok tkʼujlaʼn Demas, noqtzun tuʼnj, tuʼn jlu kyaj tzaqpiʼn Pablo tuʼn. Bʼajlo jlu tuʼnju mas ok tkʼujlaʼn Demas qʼinumabʼil twitz tajbʼebʼil te Jehová. ¿Okpe te tbʼanel aju bʼant tuʼn? Mintiʼ. Xi tnajsaʼn tbʼanel toklen toj tajbʼebʼil te Dios. Kukxwitlo onin tiʼj Pablo. Mlayxtoq txi tqʼoʼn aju te twitz Txʼotxʼ te aju jakutoq t-xi tqʼoʼn Jehová te (Proverbios 10:22).

12. ¿Alkye tten in najbʼen «qʼinumabʼl» tuʼn Satanás tuʼn qkubʼ t-sbʼuʼn?

¹² Axju jaku bʼaj toj ambʼil jaʼlo. Tuʼnju okslal qoʼ, qajbʼil-lo tuʼn tten aju at tajbʼen qe ex kye toj qja (1 Timoteo 5:8). Ojtzqiʼn quʼn qa tajbʼil Jehová tuʼn qtzalaj tiʼj qanqʼibʼil tuʼnju xi tqʼoʼn jun tbʼanel kynajbʼil Adán tukʼil Eva (Génesis 2:9). Noqtzun tuʼnj, jaku tzʼajbʼen qajbʼil lu tuʼn Satanás ex jaku tzʼajbʼen «qʼinumabʼl» tuʼn, tuʼn qkubʼ t-sbʼuʼn (Mateo 13:22). At nim xjal in kubʼ kyximen qa aju pwaq in tzaj tiʼn tzalajbʼil qe ex qa tbʼanel in nok tkyaqil tuʼn. Qa ma ten qximbʼetz ik tzeʼn jlu, jaku txi qnajsaʼn aju mas nim toklen at qe, aju qamiwbʼil tukʼil Jehová. Tqʼama Jesús jlu: «Mi jun xjal jaku bʼant tuʼn tajbʼen te kabʼe patrón: porque kʼelel tikʼun jun, atzun juntl ok tkʼujlaʼ, ex qa oʼkx ok kʼajbʼel te jun patrón, atzun juntl mintiʼ taj tiʼj. Mlayx bʼant tuʼn kyajbʼene te Dios ex te qʼinumabʼl» (Mateo 6:24). Qa ma qo ok te tmajen qe tiʼchaq te twitz Txʼotxʼ, ya mlay qo ajbʼentl te Jehová. Atzun tajbʼil Satanás. Miʼn txi qqʼoʼn ambʼil tuʼn tok pwaq moqa junjuntl tiʼchaq te mas nim toklen twitz qamiwbʼil tukʼil Jehová. Tuʼn qweʼixix  twitz Satanás ex tuʼn qkambʼan tiʼj, il tiʼj tuʼn tten qximbʼetz toj tumel tiʼj qʼinumabʼil (kjawil uʼjit 1 Timoteo 6:6-10).

13. ¿Alkye nya bʼaʼn kyximbʼetz xjal at tiʼj mejebʼleʼn?

¹³ Aju juntl ttramp Satanás aju yaẍbʼil. At nim xjal in kyqʼamaʼn qa toj ambʼil jaʼlo ya mintiʼtl tajbʼen aju qa noq junx t-xuʼjil jun xjal moqa noq junx tchmil jun xjal xten, ex in kynaʼn qa jtzʼoʼn qe tuʼn jlu. At jun xinaq ex jun xuʼj kyxol qeju in che etz kyoj película kyqʼama qa mlayx bʼant tuʼn tten junx t-xuʼjil jun xinaq moqa junx tchmil jun xuʼj. Tqʼama xuʼj: «Mintiʼ ojtzqiʼn jun xjal wuʼne aju tajbʼil tuʼn tten oʼkx jun t-xuʼjil moqa oʼkx jun tchmil». Ex tqʼama ichan jlu: «Mintiʼxix qʼuqli nkʼuʼje qa o qo kubʼ bʼinchaʼn tuʼn qten tukʼil junx xjal toj tkyaqil qanqʼibʼil». In jaw tzalajxix Satanás qa ateʼ xjal nim kyoklen in kyqʼamaʼn qa mintiʼx tajbʼen aju oyaj o tzaj tqʼoʼn Dios, aju mejebʼleʼn. Nya tajbʼil Tajaw il tuʼn tel bʼaʼn kymojbʼabʼil kyibʼ kabʼe xjal. Tuʼn qweʼxix twitz Satanás ex tuʼn qkambʼan tiʼj, il tiʼj tuʼn tten qximbʼetz tiʼj mejebʼleʼn ik tzeʼn te Dios.

14, 15. Qa in tnaʼn teya qa chʼix tkubʼ tzʼaqa toj yaẍbʼil, ¿tiʼ jaku bʼant tuʼna?

¹⁴ Qa o qo kubʼ mojeʼ moqa naʼmx, il tiʼj tuʼn tok tilil quʼn tuʼn tel qikʼun alkyexku tten yaẍbʼil. Kwest tuʼn tbʼant jlu. Jun techel, aqeju tzma txin qe moqa tzma qʼa qe, in che oklo kybʼiʼn kyukʼil toj tja xnaqʼtzbʼil aj kyyolin tiʼj qa in che kubʼ ten tukʼil alkyexku kyajbʼil ex tiʼj alkye tten in xi kysamaʼn mensaje aju in yolin tiʼj yaẍbʼil ex qe kyilbʼilal xjal mintiʼ kyxbʼalun tok toj kyyolbʼil qe  txqantl kyukʼil. Kyoj junjun tnam, aqeju mensaje lu in nok ik tzeʼn aj t-xi kysamaʼn xjal kyilbʼilal kʼwaʼl mintiʼ kyxbʼalun tok. In tzaj tqʼamaʼn Tyol Dios jlu: «Alkyeju in bʼinchan aj pajil, in bʼinchan il tiʼjx t-ximlal» (1 Corintios 6:18). Tuʼnju in che yaẍin xjal, o tzaj kyiqen nim yabʼil, ex tuʼn jlu, at nim qe in tzaj nim kʼixkʼoj kyiʼj ex in che kyim tuʼn. Ax ikx at nim txin ex qʼa, aqeju in che kubʼ kuẍeʼ ex naʼmx kykubʼ mojeʼ, in kyqʼamaʼn qa in tzaj kybʼis tiʼjju bʼant kyuʼn. At nim uʼj, película ex qe bʼitz in che etz, kyajbʼil tuʼn tkubʼ qximen qa mintiʼx jun nya bʼaʼn in tzaj qa mintiʼ ẍex qbʼiʼn qe tkawbʼil Dios. Qa in xi qqʼoʼn qwiʼ tiʼj sbʼubʼil lu, in xi qqʼoʼn ambʼil tuʼn qkubʼ «tuʼn t-sbʼubʼl il» (Hebreos 3:13).

¹⁵ Qa in tnaʼn teya qa chʼix tkubʼ tzʼaqa toj yaẍbʼil, ¿tiʼ jaku bʼant tuʼna? Bʼaʼn tuʼn tel tnikʼa tiʼj qa at jun il aju kʼokel t-xqʼuqin tibʼa tiʼj (Romanos 7:22, 23). Naʼna Dios te Jehová ex qaninxa tipumala te (Filipenses 4:6, 7, 13). Miʼn kubʼ tena atz jatumel jaku kubʼ tzʼaqa toj il (Proverbios 22:3). Ex qa ma tzʼok weʼya twitz il lu, ikʼumel naja (Génesis 39:12).

16. a) ¿Tiʼ bʼant tuʼn Jesús tej tajbʼiltoq Satanás tuʼn tkubʼ tbʼinchaʼn il? b) ¿Tiʼ in tzaj tyekʼun qe aju techel tiʼj Jesús?

¹⁶ ¿Tiʼ bʼant tuʼn Jesús tej tajbʼiltoq Satanás tuʼn tkubʼ tbʼinchaʼn il? Mintiʼ xi tqʼoʼn ambʼil tuʼn tkubʼ sbʼuʼn tuʼnju xi ttziyen Satanás te. Mintiʼ ok ten ximel tiʼj jlu. Jurat naj xi tqʼamaʼn jlu: «At jun yol in tmaʼn tuj Tuʼjil» (kjawil uʼjit Mateo 4:4-10). ¿Tiʼ in tzaj tyekʼun jlu qe? Ojtzqiʼnxixtoq Tyol Dios tuʼn Jesús. Tuʼntzunju, tej tok toj nya bʼaʼn tuʼn Satanás, jurat naj e ul qe taqikʼ Tyol Dios toj twiʼ. Qa qajbʼil tuʼn tkubʼ tiʼj Satanás quʼn, il tiʼj tuʼn tel qikʼun tkyaqilju at toklen tukʼil yaẍbʼil (1 Corintios 6:9, 10).

17, 18. a) ¿Alkye junjuntl tramp in najbʼen tuʼn Satanás? b) ¿Tiquʼn in qo ayon tuʼn tikʼ junjun nya bʼaʼn qiʼj tuʼn Satanás? c) ¿Tiʼ kbʼajel tiʼj Satanás? d) ¿Tiquʼn in tzaj tqʼuqbʼaʼn qkʼuʼj aju qa mlay kyaj anqʼin Satanás?

¹⁷ Aju oxe ttramp Satanás aju nimsabʼil, aju kʼujlabʼil tiʼj qʼinumabʼil, ex aju yaẍbʼil. Noqtzun tuʼnj, atx mastl ttramp Satanás. Ik tzeʼn ikʼbʼil kyuʼn toj kyja junjun erman nya testigos de Jehová. Ik tzeʼn xmaybʼil kyuʼn kyukʼil qeju ateʼ toj tja xnaqʼtzbʼil. Ex ik tzeʼn qe ley in tzaj qʼamaʼn toj junjun tnam tuʼn miʼn kypakbʼan qerman. In qo ayon tuʼn tikʼ jlu tuʼnju tqʼama Jesús: «Che elel ikʼune kyuʼn kykyaqil xjal tuʼn tlaj okslal qeye wiʼje; pero alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mateo 10:22).

¹⁸ ¿Tzeʼn jaku kubʼ tiʼj Satanás quʼn? Tqʼama Jesús qa ok qo kjel anqʼin qa ma tzikʼx quʼn (Lucas 21:19). Mi jun xjal jaku tzʼok tbʼinchaʼn jun nya bʼaʼn qiʼj te jumajx. Qa kukx xqo ajbʼen te Dios, mi jun jaku qo el tpaʼn tiʼj tamiwbʼil Dios (Romanos 8:38, 39). Ex qa ma qo kyim tuʼnju in qo ajbʼen te Dios, mlay tzaj tyekʼun jlu qa ma qo kubʼ tuʼn Satanás. Ok qo jawil anqʼin tuʼn Jehová (Juan 5:28, 29). Yajtzun Satanás, ¿tiʼ kbʼajel tiʼj? Aj tkubʼ tnajsaʼn Dios tkyaqil nya bʼaʼn, kbʼelex lamoʼn Satanás tuʼn Jesucristo toj mil abʼqʼi atz jatumel mlay bʼinchaʼntl nya bʼaʼn (Apocalipsis 20:1-3). Aj tbʼaj jlu, kʼeletz tzaqpiʼn juntl maj Satanás ex kʼokel tilil juntl maj tuʼn, tuʼn t-sbʼuʼn kyiʼj xjal. Ex kbʼeltzun najsaʼn (Apocalipsis 20:7-10). Mlay tzʼanqʼin Satanás. ¡Atzun teya jaku! Kyjuʼtzun, kukx weʼxixa twitz Tajaw il, ex kukx kyuwsama qʼuqbʼil tkʼuʼja. ¡Jaku kambʼana tiʼj Satanás!