1. 1) ¿Kenke tlauel moneki ma timoteuijtokaj iuaya Satanás? 2) ¿Kenke tijmatij uelis tijtlanisej?

SATANÁS kejuak kinteuijtok Jehová itekipanojkauaj. Kinteuijtok katli motemachiaj yasej iluikak uan nopa “sekinok tlakamej” katli itstosej ipan Tlaltipaktli (Juan 10:16). Kineki ayokmo kuali ma tlaneltokakaj, pampa kimati nechka kitsontlamiltisej (xijpoua Apocalipsis [Revelación] 12:9 uan 12). Yeka, moneki ma timoteuikaj iuaya. Uan nelia uelis tijtlanisej pampa Biblia kiijtoua: “Ximoketsakaj keja intemachmej iixpa Axkualtlakatl [...], uan yajaya inmechtlalkauis” (Sant. 4:7).

2, 3. 1) ¿Kenke kipaktiskia Satanás ma kineltokakaj ya amo nelia itstok? 2) ¿Kenke tijmatij Satanás kena itstok?

² Miakej moiljuiaj Satanás uan amo kuali ajakamej amo nelia itstokej, uan san nesi inintoka ipan amochtli, películas kampa nesij tlen temajmatiaj o ipan videojuegos. Yeka, katli kineltokaj itstokej kiniljuiaj uiuitikej. Satanás kipaktiskia ma kineltokakaj amo nelia itstok, pampa kiampa ueliskia kinkajkayauas (2 Cor. 4:4). Ya kichiua miakej kej nopa ma moiljuikaj.

³ Jehová itekipanojkauaj kimatij Satanás kena itstok, pampa kema kinojnotski Eva kitekiuik se kouatl (Gén. 3:1-5). Nojkia kiiljuik Jehová  nopa Job kitekipanoyaya san pampa kimakayaya nochi (Job 1:9-12). Nojkia kinojnotski Jesús kema kiyejyekok (Mat. 4:1-10). Uan kema Jesús kitekitlalijkej ipan 1914, Satanás pejki kintlaijiyouiltia katli yasej iluikak uan nojua itstoyaj ipan Tlaltipaktli (Apoc. 12:17). Nama Diablo nojkia kintlaijiyouiltijtok toTeotsij itekipanojkauaj. Tlaj tijnekij tijtlanisej, moneki tijteuisej uan kuali titlaneltokatosej. Yeka tikitasej tlake techpaleuis amo tijchiuasej eyi tlamantli tlen Satanás kineki.

4. ¿Kenke tikijtouaj Satanás yaya katli tlauel moueyimati?

⁴ Satanás yaya katli tlauel moueyimati pampa kiijtok Jehová amo kinamiki technauatis. Uan kinejki yaya ma kiueyichiuakaj uan amo Jehová. Ni kinextia Satanás tlauel moueyimati. Tlaj tijnekij tijtlanisej moneki amo timoueyimatisej (xijpoua 1 Pedro 5:5). Uajka, ¿kiijtosneki amo kinamiki kuali tijyolmatisej kema tijchiuasej kuali se tlenijki?

5, 6. 1) Xikixtoma kenke amo kenijki tlaj kemantika kuali tiyolmatisej. 2) ¿Tlake ueliskia panos tlaj timoueyimatiskiaj? 3) Xikijto ajkia inijuantij moueyimatkej.

⁵ Kemantika tlauel kuali tijyolmatij kema se akajya kichiua se tlamantli kuali. Se tonali apóstol Pablo kiijtok tlauel yolpakiyaya pampa toikniuaj tlen Tesalónica amo kitlauelkajkej toTeotsij maske kipixkej kuesoli uan kintlaijiyouiltijkej (2 Tes. 1:4). Tlaj tlauel kuali tijyolmatisej kema tijpiasej se kuali tlamantli o pampa kuali tijchiuasej se tlenijki, amo kenijki. Amo kinamiki tipinauasej ma techitakaj ika tochampoyouaj, ma kimatikaj tlake timomajtokej tijchiuaj o kanke titlakatkej (Hech. 21:39).

⁶ Tlaj timoueyimatisej amo kuali timouikasej iuaya Jehová uan sekinok, kichiuas amo ma techpakti o amo ma tijnekikaj ma techtlajtolmakakaj (Sal. 141:5). Timoiljuiskiaj tlauel topati uan san tojuantij kena kuali tijchiuaj nochi. Jehová kinkualankaita katli moueyimatij (Ezeq. 33:28; Amós 6:8). Uan Satanás tlauel kipaktia ma moueyimatikaj. Yeka yolpajki kema moueyimatkej Nimrod, faraón uan Absalón (Gén. 10:8, 9; Éx. 5:1, 2; 2 Sam. 15:4-6). Caín nojkia moueyimatki. Kema Jehová kitlajtolmakak amo kineltokak. Nochipa kichijki tlen amo kuali uan amo kenijki kiitak kema kiixpanok. Yeka ayokmo mouampojchijki iuaya (Gén. 4:6-8).

7, 8. 1) ¿Tlake kichiua se katli techikoita? 2) ¿Kenke miakej techikoitaj? 3) ¿Kenke tlauel amo kuali ma timoueyimatikaj ipan tlanechikoli?

⁷ Kema se akajya moueyimati uelis kinchiuilis sekinok tlen amo kuali. Miakej kinkualankaitaj katli chipaktikej, moiljuiaj inijuantij tlauel ininpati uan sekinok amo o kiijtouaj tlen euaj ipan se altepetl nochi sanse kichiuaj uan nochi sanse mokuapolouaj. Miakej techikoitaj pampa moueyimatij, uan moiljuiaj inijuantij kena tlauel pankisaj. Yeka moteuiaj uan miakej momiktiaj ipan uejueyi tlauilankayotl.

⁸ Ipan tlanechikoli amo kinamiki timoueyimatisej, pampa ueliskia timokualankanojnotsasej uan ueliskia tijpiasej uejueyi kuesoli. Se keskij toikniuaj kinpanok nopa, yeka apóstol Santiago kiniljuik: “Inmonajnankiliaj uan inmoteuiaj se ika seyok, pero ¿para tlen keja nopa? ¿Ika tlachke peua?” (Sant. 4:1). Tlaj tikinkualankaitasej sekinok uan timoiljuisej san tojuantij topati, uelis tlauel tikinyolkokosej (Prov. 12:18). Uajka, tlaj timoueyimatisej amo tiitstosej ika tlayolseuilistli ipan tlanechikoli.

9. ¿Kenijkatsa techpaleuia Biblia amo timoueyimatisej yon timoiljuisej san tojuantij tlauel topati? (Xikita nopa achtoui tlaixkopinkayotl.)

 ⁹ Biblia kiijtoua amo ma timoueyimatikaj yon amo ma timoiljuikaj san tojuantij tlauel topati. Proverbios 16:5 kiijtoua Jehová kinkualankaita “tlen moueyimatij”. Uan Hechos 17:26 kiijtoua toTeotsij kitekiuik san Adán tlen ika techchijki nochi. Uajka, nochi maseualmej sanse pampa nochi Adán inintata. Nelia amo kinamiki timoiljuisej sekij tlauel ininpati uan sekij amo. Yeka ma timotlajtlanikaj: “¿Nimoiljuia na kena tlauel nopati uan katli chipaktikej o katli euaj ipan sekinok altepemej amo?”. Tlaj kiampa timoiljuiskiaj, Satanás kichiuaskia ayokmo ma timoiknelikaj yon ma timosentikapaleuikaj (Juan 13:35). Tlaj tijnekij tijtlanisej Satanás, moneki amo timoueyimatisej (Prov. 16:18).

10, 11. 1) ¿Kenijkatsa kitemolia Satanás san ma tijnekikaj tlen onka ipan Tlaltipaktli? 2) ¿Tlake kipanok Demas pampa tlauel kinejki tlen onkayaya ipan Tlaltipaktli?

¹⁰ Satanás tlanauatia kampa tiitstokej (Juan 12:31; 1 Juan 5:19). Miak tlamantli tlen onka amo kuali. Maske amo nochi amo kuali, Satanás kitemolia techyoltilanas ika nopa uan kineki amo ma tijneltokakaj toTeotsij. Kitemolis tlauel ma tijnekikaj tlen onka ipan Tlaltipaktli uan ayokmo ma tijchiuakaj kampeka tijneltokasej Jehová (xijpoua 1 Juan 2:15 uan 16).

¹¹ Ya nopa kinpanok se keskij, kej Demas katli kipaleuiyaya Pablo. Ya kiijtok Demas kitlauelkajki pampa tlauel kinejki tlen onkayaya ipan Tlaltipaktli (2 Tim. 4:10). ¿Tlake tlauel kinejki? Biblia amo kiijtoua. Uelis tlauel kinejki tlatominpias uan amo kitekipanos Jehová. Yeka, ayokmo uelki kuali kitekipanok Jehová. ¿Uan kena kipixki tlen tlauel ipati? Amo. Tlen onka ipan Tlaltipaktli amo kema kichiuaskia ma kipia tlen Jehová kimakayaya (Prov. 10:22).

12. ¿Kenijkatsa kitemolia Satanás techyoltilanas ika tlen tijnekij?

¹² Pampa tijtekipanouaj toTeotsij, tijnekij tijtlanisej tomij uan kiampa kuali tikinmokuitlauisej tochampoyouaj (1 Tim. 5:8). Jehová kineki ma tiyolpakikaj, yeka kema kinchijki Adán uan Eva kintlalik ipan se yejyektsi xochimili (Gén. 2:9). Satanás ueliskia techchiuilis kej kichijki ika Demas uan kinekis techyoltilanas ika tlen tijnekij. Uelis kichiuas ma ‘tijnekikaj tijpiasej miak tomij’ (Mat. 13:22). Kineki ma timoiljuikaj tlaj tijtlanisej miak tomij uan titlakojkouasej miak, tlauel tiyolpakisej. Tlaj tijneltokaskiaj, amo kuali timouikaskiaj iuaya Jehová. Yeka Jesús kiijtok: “Axaka uelis kintekipanos omej itekojuaj, pampa kikokolis se uan kiiknelis ne se. Uan ika se elis temachtli, pero ne seyok kitlauelkauas. Iuikal eli, axueli inkitekipanosej toTeko intla inkikauiliaj ma inmechyoltilana tomij” (Mat. 6:24). Tlaj tijnekiskiaj san titlatominpiasej, san nopa timosentlaliskiaj tijchijtosej uan amo tijtekipanoskiaj Jehová. Satanás ya nopa kineki. Tlaj tijnekij tijtlanisej, amo ma timoiljuikaj tlauel moneki san tijtlanisej tomij o titlakojkouasej miak, uan amo timouampojchiuasej iuaya Jehová (xijpoua 1 Timoteo 6:6-10).

13. ¿Tlake moiljuiaj miakej maseualmej ipan ni tonali?

¹³ Satanás kineki ma timomekatikaj uan kiampa  ma titlaixpanokaj. Miakej moiljuiaj amo moneki mosenkauasej iuaya se akajya uan amo kema kikajkayauasej, pampa ayokmo ueliskia kichiuasej tlen inijuantij kinekij. Ipan televisión, se siuatl kiijtok: “Amo aka uelis itstos san iuaya se uan amo kema kikajkayauas. Nochi kikajkayauaj ininsiua o ininueue uan amo kinekij itstosej san iuaya se”. Uan se tlakatl kiijtok: “Amo kinamiki se itstos nochipa san iuaya se”. Satanás tlauel yolpaki kema sekij kiijtouaj amo kinamiki timosenkauasej. Ni kichijtok Jehová. Uan Satanás kineki amo kuali ma itstokaj katli mosenkajtokej. Tlaj tijnekij tijtlanisej, moneki tikinitasej katli mosenkauaj kej Jehová kinita.

14, 15. ¿Tlake uelis tijchiuas tlaj tijnekis timomekatis?

¹⁴ Katli itstokej ininselti uan katli mosenkajtokej moneki mosentlalisej amo kema momekatisej. Ni ouij pampa miakej telpokamej kikakij sekij kiijtouaj motekaj ika katli inijuantij kinekij, o ipan ininteléfono kintlajkuiljuiliaj o kintitlaniliaj kampa nesi momekatiaj. Sekij kiijtouaj ni eliskia sanse kej kema kititlanij tlaixkopinkayomej kampa nesij konemej xolomej. Biblia kiijtoua katli momekatia “kitlanauia itlakayo” (1 Cor. 6:18). Miakej miktokej o tlauel tlaijiyouijtokej pampa kinmajkej ika se kokolistli kema motejkej iuaya se akajya. Miakej telpokamej katli motejkej iuaya se akajya, teipa kiijtojkej amo kema kichijtoskiaj nopa. Ipan miak amochtli, películas uan uikatl kichiuaj ma tijneltokakaj amo tleno techpanos tlaj amo tijneltokasej toTeotsij. Nopa san se istlakatili. Tlaj amo timomokuitlauiskiaj ueliskia ‘titlajtlakolchiuasej’ (Heb. 3:13).

 ¹⁵ Tlaj mitsyoltilanas timomekatis, xijmajto uelis kichiuas xitlaixpano (Rom. 7:22, 23). Ximomaijto uan xikiljui Jehová ma mitsmaka chikaualistli (Filip. 4:6, 7, 13). Amo xijchiua tlen ika titlajtlakolchiuaskia (Prov. 22:3). Kema mitsyoltilanas nopa, ximosentlali amo tijchiuas (Gén. 39:12).

16. 1) ¿Tlake kichijki Jesús kema Satanás kinejki kiyejyekos? 2) ¿Tlake techmachtia tlen Jesús kichijki?

¹⁶ ¿Tlake kichijki Jesús kema Satanás kiyejyekok? Amo kikajki ma kikajkayaua ika tlen kimakaskia. Ya mosentlalik amo kichiuaskia, yeka kiiljuik: “Ijkuilijtok” (xijpoua Mateo 4:4-10). ¿Tlake techmachtia ni? Jesús kuali kiixmatiyaya Biblia. Yeka, kema kiyejyekojkej, nimantsi kiilnamijki tlen kiijtoua Biblia. Tlaj tijnekij tijtlanisej Satanás, moneki timosentlalisej amo tijnekisej timomekatisej (1 Cor. 6:9, 10).

17, 18. 1) ¿Tlake sekinok tlamantli kineki Satanás ma tijchiuakaj? 2) ¿Kenke tijmatij tlake kitekiuia Satanás tlen ika tekajkayaua? 3) ¿Tlake kipanos Satanás? 4) ¿Kenke techyolchikaua kema tijmatij Satanás amo itstos nochipa?

¹⁷ Tikitakej eyi tlamantli tlen Satanás kineki ma tijchiuakaj: ma timoueyimatikaj, ma titlatominpiakaj, ma tijnekikaj nochi tlen onka, ma timomekatikaj, uan sekinok tlamantli tlen kitekiuia. Sekij amo kinkauaj ma kitekipanokaj Jehová. Sekinok kinpinaualtiaj katli momachtiaj ininuaya. Uan sekij itstokej kampa tlanauatianij amo kinkauaj ma tlajtolmoyauakaj. Ni tijmajtoyaj panoskia pampa Jesús kiijtok: “Nochi tlakamej [inmechkualankaitasej] pampa innechneltokaj, pero toTeko kinmanauis nochi tlen kiijiyouisej hasta itlamia ni tlamantli” (Mat. 10:22).

¹⁸ Jesús kiijtok tlaj tikijiyouiskiaj ueliskia timomanauisej uan tijtlanisej Satanás (Luc. 21:19). Amo aka uelis nochipa techtlaijiyouiltijtos. Tlaj amo kema tijtlauelkauasej Jehová, amo aka uelis kichiuas ma tijtlauelkauakaj (Rom. 8:38, 39). Tlaj timikisej uan amo kema tijtlauelkajkej, tijnextisej Satanás amo techtlanki, uan Jehová techyolkuis (Juan 5:28, 29). ¿Tlake kipanos Satanás? Kema toTeotsij ya kitsontlamiltijtos nochi, Cristo kitsakuas Satanás 1,000 xiuitl uan kiampa ayokmo uelis tetlaijiyouiltis (Apoc. 20:1-3). Teipa, kimajkauasej, kitemolis tekajkayauas uan teipa kitsontlamiltisej (Apoc. 20:7-10). Uajka Satanás amo nochipa itstos. ¡Uan ta kena! Yeka ximoyolchikaua, nojua ximoteuijto iuaya Diablo uan kuali xitlaneltokato. Uan kiampa temachtli uelis tijtlanis Satanás.