1. (a) Eaa ra i puapinga tikai no tatou kia patoi atu ia Satani i teia tuatau? (e) Akapeea tatou e kite ei e ka rauka ia tatou i te patoi atu ia Satani e kia autu?

TE TAMAKI nei a Satani i te aronga akatainuia e toe nei i te enua e te “mamoe ke atu.” (Ioane 10:16) I te mea e tuatau poto ua tona e toe nei, ka inangaro te Tiaporo i te takore atu i te akarongo o te au tavini o Iehova. (E tatau ia Apokalupo 12:9, 12) Inara ka rauka ia tatou i te patoi atu ia Satani e kia autu. Te karanga ra te Pipiria e: “E patoi atu i te diabolo, e nana e rere ke atu.”​—Iakobo 4:7.

2, 3. (a) Eaa ra a Satani i inangaro ei i te tangata kia irinaki e kare aia e vai ua nei? (e) Akapeea koe e kite ei e e tika tikai a Satani?

² E maata te tangata te aviri nei i te manako e te vai ua nei a Satani. Manako ratou ia Satani e te au temoni e, e aronga tei roto ua i te au puka, te au teata kino, e te au vitio kangakanga. Irinaki ratou e me e tangata kite koe, kare koe e irinaki e te vai ua nei te au angera kino. Te manamanata ra ainei a Satani e kare te tangata e irinaki ana e te vai ua nei aia e tana au temoni? Kare. E māmā ake no Satani i te akavare i te aronga tei ekoko e te vai ua  nei aia. (2 Korinetia 4:4) Ko te tika, te akatotoa nei a Satani i teia au tu manako ei arataki ke i te tangata.

³ Ei au tavini no Iehova, kare tatou i arataki keʼia. Kua kite tatou e te vai ua nei te Tiaporo. Akapeea tatou e kite ei? Te akakite maira te Pipiria e kua tuatua a Satani kia Eva na roto i te ovi. (Genese 3:1-5) Kua tuatua aia kia Iehova, i te akaapa anga ia Iobu. (Iobu 1:9-12) Kua tauta a Satani i te timata ia Iesu. (Mataio 4:1-10) E i te riro anga mai a Iesu ei Ariki i te 1914, kua akamata a Satani i te “tamaki atu” i te toenga o te aronga akatainuia i te enua nei. (Apokalupo 12:17) Te tupu nei rai teia tamaki ia Satani e tauta nei i te takore i te akarongo o te aronga akatainuia e te mamoe ke atu. Kia autu i teia tamaki anga, ka anoanoia tatou kia tamaki atu ia Satani e kia akono pakari i to tatou akarongo. I teia atikara, ka uriuriia e toru mataara kia rave.

4. Akapeea a Satani i riro ei ei akaraanga maata no te tu parau?

⁴ E tu parau kino to Satani. Kua tae roa teia angera kino i te akaao atu i to te Atua tikaanga kia tutara, e kua tauta aia i te akakeu i etai ke kia akamori iaia, kare ia Iehova. Koia te akaraanga tikai no te tu parau e te akatietie. No reira, tetai mataara e rauka ai ia tatou i te patoi atu ia Satani, ko te kopae anga i te tu parau e te akatupu anga i te tu akaaka. (E tatau ia 1 Petero 5:5.) Eaa i reira te aiteanga o te tu parau? E mea kino ainei te reira?

5, 6. (a) E mea kino ainei te tu parau? Akamārama mai. (e) Eaa te tu parau kino, e eaa tetai au akaraanga Pipiria no teia?

⁵ Kia tau ki tetai tikinari, te akataka maira te tu parau i te manako papu e te akangateitei anga ia tatou uaorai. Pera katoa “e tu merengo te ka rauka mai no te mea kua rave koe me kore tetai taeake noou i te angaanga meitaki me kore tei ia ratou tetai apinga meitaki.” Kare i te mea tarevake no tatou kia manako akapera. Akakite te apotetoro ko Paulo ki te au taeake i Tesalonia e: “Ko matou uaorai oki te paapaa ia kotou i te au ekalesia o te Atua, i to kotou akakoromaki, e te akarongo, i to kotou takinga-kino angaia mai, e te au mate oki tei tupu ia kotou na.” (2 Tesalonia 1:4) No reira e tau rai kia mataora tatou no te angaanga a etai ke e ka ngakau parau tatou ia tatou uaorai ei puapinga kia tatou. Kare tatou e anoanoia kia akamā no to tatou ngutuare, ta tatou peu, me kore te ngai i utuutuia ai tatou.​—Angaanga 21:39.

⁶ Inara, te vai ra te tu parau te ka takinokino i to tatou pirianga ki etai ke e kia Iehova. Na teia tu parau e akariro ia tatou kia riri me akoia mai tatou. Ka akariro katoa ia tatou kia kopae i te ako e kia kore e āriki akaaka i te reira. (Salamo 141:5) Te akatakaia ra teia tu parau ko te manako maata roa ia tatou uaorai me kore ei “tu akatietie tei akaariia e te aronga tei manako e e meitaki atu ratou i etai ke.” E rikarika ana a Iehova i te tu parau e te akatietie. (Ezekiela 33:28; Amosa 6:8) Inara e reka ana a Satani me aru te tangata i tona tu akatietie na te akapaapaa anga ia ratou uaorai. Akamanako ana mei teaa to Satani tu rekareka i te kite atu ia Nimeroda, Pharao, e Abasaloma i te akaari anga i te tu parau na ta ratou tuatua nengonengo! (Genese 10:8, 9; Exodo 5:1, 2; 2 Samuela 15:4-6) Ko te tu parau tetai tumu i ngere ei a Kaina i tona pirianga meitaki ki te Atua. Na Iehova tikai i ako ia Kaina, inara kua akaparau a Kaina e kare aia i akarongo. E tu marokiakia tona, kua kopae aia i te akamatakite anga a te Atua, e kua viviki aia i te ara ia Iehova.​—Genese 4:6-8.

7, 8. (a) Eaa te tu iriiri tangata, e akapeea te reira i aite ei ki te tu parau? (e) Akamārama mai e akapeea te tu parau i te takore anga i te tu au i roto i te putuputuanga.

 ⁷ I teia tuatau, te akaari nei te tangata i te tu parau na roto i te au mataara kino e manganui. Tetai taime, te piri ra te tu parau ki te tu iriiri tangata. Kia tau ki tetai tikinari, te akataka maira te tu iriiri tangata i te tu papakitai i te au tangata mei tetai enua ke. Te akataka katoa ra “i te irinakianga e e tuke te au tu e te au tu karape o te aronga mei te au enua ke, e e meitaki atu me kore e meangiti mai te meitaki o tetai au katiri tangata ki tetai.” Tei tupu mai mei te tu iriiri tangata ko te au tamaki, te tā, e te tamate anga maata.

⁸ E tika, kare teia au angaanga i raveia ana i roto i te putuputuanga Kerititiano. Noatu ra, penei ka akamata te tauetono i rotopu i te au taeake e te au tuaine no te tu parau e ka taki atu ki te au manamanata. Kua tupu teia ki tetai au Kerititiano i te anere mataiti mua, e ko te tumu teia i ui ei a Iakobo i te uianga pakari: “NOEA te tamaki e te tauetono maata i roto ia kotou na?” (Iakobo 4:1) Me tupu te riri no etai ke e me manako tatou e e meitaki atu tatou ia ratou, penei ka tuatua me kore ka rave tatou i tetai angaanga te ka tamamae ia ratou. (Maseli 12:18) Te taka ua ra e, ka riro te tu parau ei takinokino i te tu au i rotopu i te putuputuanga.

9. Akapeea te Pipiria te tauturu anga ia tatou kia patoi atu i te tu iriiri tangata e te tu parau? (Akara i te tutu mua o teia atikara.)

⁹ Me manako tatou e e meitaki atu tatou i etai ke, kia akamaara tatou e “te rikarika rā Iehova i te aronga katoa i parau te ngakau.” (Maseli 16:5) Ka tau tatou kia akara eaa to roto i to tatou ngakau e kia ui kia tatou uaorai e, ‘Te manako ra ainei au e e meitaki atu au i tetai tangata mei tetai pa enua, iti tangata, me kore peu ke?’ Me koia ïa, te ngaropoina nei ia tatou e na te Atua “i anga i te tangata i te pa enua katoa nei i te toto okotai.” (Angaanga 17:26) Tera te aiteanga, e okotai ua iti tangata no te mea no roto mai te katoatoa ia Adamu. E mea neneva tikai me manako tatou e kua anga te Atua i tetai au iti tangata kia meitaki atu i etai atu. Me te manako akapera nei tatou, te akatika nei tatou ia Satani kia takore i to tatou aroa e te taokotaianga Kerititiano. (Ioane 13:35) Ei patoi atu ia Satani e kia autu, ka anoanoia tatou kia kopae takiri i te tu parau.​—Maseli 16:18.

10, 11 (a) No teaa ra ka māmā ai i te anoano i teianei ao? (e) Eaa tei tupu mai kia Dema te anoano anga aia i teianei ao?

¹⁰ Ko Satani “te ariki o teianei ao,” e nana e akatere ra i te reira. (Ioane 12:31; 1 Ioane 5:19) E manganui te au mea ta to teianei ao e akateiaa ra kare e tau ana ki te au turanga o te Pipiria. E tika, kare te au mea ravarai i roto i teianei ao i te mea kino. Inara, ka papu ia tatou e ka taangaanga a Satani i teianei ao ei timata ia tatou kia akatupu i te au anoano tika kore e kia rave i te ara. Me kore ka tauta aia i te akakeu ia tatou kia inangaro i teianei ao e kia akangaropoina i ta tatou akamori anga kia Iehova.​—E tatau ia 1 Ioane 2:15, 16

¹¹ I tetai au Kerititiano o te anere mataiti mua, kua inangaro i teianei ao. Ei akaraanga, kua tata a Paulo e: “Kua akaruke mai oki a Dema iaku, kua anoano maata ki teianei ao.”  (2 Timoteo 4:10) Kare te Pipiria i akakite mai eaa tikai ta Dema i anoano i roto i teianei ao tei akakeu iaia kia akaruke ia Paulo. Penei e maata atu to Dema anoano i te au apinga materia i to te tavini anga ia Iehova. Me koia ïa, kua ngere a Dema i te au akameitakianga mataora i te tavini anga i te Atua. Kua paʼuna ainei te taime? Kare. Naringa kare, ka vai rai a Dema ei tauturu no Paulo. Kare rava e rauka i teianei ao i te oronga i tetai apinga tei meitaki atu i ta Iehova ka oronga!​—Maseli 10:22.

12. Akapeea a Satani me akatupu i te anoano tika kore i roto ia tatou na roto i “te pikikaa o te apinga”?

¹² Ka tupu rai teia kia tatou i teia tuatau. Ei au Kerititiano, e mea matauia kia inangaro i te akono ia tatou uaorai e to tatou ngutuare tangata. (1 Timoteo 5:8) Te inangaro nei a Iehova ia tatou kia mataora. Kua kite tatou i teia no te mea kua oronga aia i tetai parataito manea kia Adamu raua ko Eva kia akono. (Genese 2:9) Tera ra ka rauka ia Satani i te akatupu i te anoano tika kore i roto ia tatou na roto i “te pikikaa o te apinga.” (Mataio 13:22) E maata te tangata e manako ra e na te moni e te au apinga materia e mataora ai ratou me kore e puapinga ai. Me manako akapera tatou, penei ka ngere tatou i te mea puapinga roa atu, ko to tatou pirianga oa kia Iehova. Kua akamatakite a Iesu e: “Kare e tika i te tangata kia akono i nga pu e toko rua: ka riro aia i te riri atu ki tetai, e te anoano atu ki tetai; e kare ra, ka riro i te tau atu ki tetai, e te akaviivii atu ki tetai. Ko kotou nei oki, kare e tika kia akono atu i te Atua e te Mamona.” (Mataio 6:24) Me akono tatou i te au apinga materia, ka akamutu tatou i te tavini atu ia Iehova. Ko teia tikai ta Satani i inangaro ia tatou kia rave. Auraka rava tatou e tuku i te moni me kore te au apinga ta tatou ka oko mai kia riro ei mea puapinga atu i to tatou pirianga oa kia Iehova. Kia patoi atu ia Satani e kia autu, ka anoanoia tatou kia akatupu i te manako tau no runga i te au apinga materia.​—E tatau ia 1 Timoteo 6:6-10.

13. Akapeea teianei ao te akatotoa anga i te manako tarevake no runga i te oraanga akaipoipo e te ainga?

¹³ Tetai atu ereere a Satani, ko te ainga tau kore. E maata te tangata e manako ra e na te vai tiratiratu anga ki tetai tokorua tane me kore tokorua vaine, e i roto tikai i te oraanga akaipoipo, e mea taito ïa e ka kotingaia to ratou tu rangatira. Tetai akaraanga, kua akakite tetai vaine akatutu teata e kare e rauka kia vai tiratiratu ki tetai tokorua okotai. Karanga katoa aia e, “Kare au i kite i tetai ua atu tei vai tiratiratu me kore tei inangaro kia vai tiratiratu.” Akakite tetai tane akatutu teata e, “Kare i papu iaku e ka rauka i tetai ua atu i te noo kapiti ua ki tona tokorua e tuatau ua atu.” Papu e e rekareka maata to Satani me akaapa te aronga rongonui i teia apinga aroa no ko mai i te Atua, koia oki ko te oraanga akaipoipo. Kare te Tiaporo e turuturu ana i te akanoonooanga akaipoipo, e kare aia e inangaro kia puapinga te oraanga akaipoipo. Kia patoi atu ia Satani e kia autu, ka anoanoia tatou kia  rauka to Iehova manako no runga i te oraanga akaipoipo.

14, 15 Eaa taau ka rauka i te rave me timataia koe kia rave i te ainga tau kore?

¹⁴ Me kua akaipoipo tatou e me e takaua, ka anoanoia tatou kia patoi pakari atu i te au tu ainga tau kore ravarai. E mea māmā ainei teia? Kare rava! Ei akaraanga, me e mapu koe, penei ka rongo atu koe i toou au oa apii e tuatua akaparau ra no runga i te rave ainga ki tetai ua atu ta ratou ka inangaro. Penei ka tuatua akaparau katoa ratou i te tuku atu i te karere ainga e te au tutu ainga na runga i ta ratou tereponi apaipai. Ko te tika, i tetai au enua kua māramaia e te aiteite ra te tuku anga karere ainga ki te tuku anga i te tutu peu viivii no te tamariki. Te akakite maira te Pipiria e: “Ko te tangata ra i akaturi ra, kua takinga-kino ïa i tona uaorai kopapa.” (1 Korinetia 6:18) Kua tupu maata te mamae e te mate na roto i te au maki tei totoa na te ravenga ainga. E te maataanga o te au mapu tei rave i te ainga ma te kore i akaipoipo, kua karanga ratou e kua tataraara ratou i ta ratou i rave. Te inangaro nei to teianei ao tamataora anga ia tatou kia irinaki e kare te kino e tupu me aati tatou i te au ture a te Atua. Me irinaki tatou i teia au pikikaa, penei ka akavareia tatou e “te pikikaa o te ara.”​—Ebera 3:13.

¹⁵ Me te timataia ra koe kia rave i te ainga tau kore, eaa taau ka rauka i te rave? E āriki i toou tu paruparu. (Roma 7:22, 23) E pure ki te  Atua no te maroiroi. (Philipi 4:6, 7, 13) E kopae i te au turanga te ka taki atu ia koe kia rave i te ainga tau kore. (Maseli 22:3) E me rokoia koe e te timataanga, e patoi viviki atu i te reira.​—Genese 39:12.

16. Eaa ta Iesu i tuatua te tauta anga a Satani i te timata iaia, e eaa ta tatou ka mou mai mei tona akaraanga?

¹⁶ Kua akanoo a Iesu i te akaraanga tau tikai no tatou. Kare aia i vare i te au taputou a Satani. Kare katoa aia i tāpu i te akamanako i te reira. Mari ra, kua akakite viviki aia kia Satani e: “Kua tataia.” (E tatau ia Mataio 4:4-10.) Kua kite a Iesu i te Tuatua a te Atua, no reira i nakiro ei iaia i te taiku viviki i te au irava te tauta anga a Satani i te timata iaia. Kia patoi atu ia Satani e kia autu, auraka rava tatou e akatika ia tatou uaorai kia timataia kia rave i te ainga tau kore.​—1 Korinetia 6:9, 10

17, 18 (a) Eaa atu tetai au ereere a Satani, e eaa te tumu ka tapapa atu tatou i te reira? (e) Eaa te ka tupu kia Satani, e akapeea teia i te akamaroiroi anga ia koe kia akakoromaki?

¹⁷ Ko te tu parau, te au apinga materia, e te ainga tau kore, e toru ïa ereere na Satani. E manganui atu te vaira. Ei akaraanga, tetai au Kerititiano e patoi ana to ratou ngutuare tangata ia ratou me kore e aviri ana te au oa apii ia ratou. E noo ana tetai pae i te au enua tei araiia e te kavamani kia kore ratou e tutu aere. Ka tapapa rai tatou i te aro atu i teia au turanga ngata. Kua akamatakite a Iesu ia tatou: “E e makitakitaia kotou e te tangata katoatoa i toku nei ingoa; ko te tāpu marie ra e kia tae ki te openga, koia te ka ora.”​—Mataio 10:22.

¹⁸ Akapeea tatou me patoi atu ia Satani e kia autu? Kua na ko a Iesu e: “E ora ra kotou kia mou tamou marie.” (Luka 21:19) Kare rava e rauka i tetai ua atu tangata i te takino takiri ia tatou. Kare tetai ua atu tangata e rauka i te apai ke i to tatou pirianga ki te Atua, mari ra ko tatou anake. (Roma 8:38, 39) Noatu e ka mate tetai au tavini akarongo o Iehova, kare te aiteanga e kua autu a Satani. Ka akatu akaou mai a Iehova ia ratou. (Ioane 5:28, 29) Kare ra o Satani manakonakoanga no te tuatau ki mua. I muri ake ka takoreia ai teianei ao kino, ka peiia aia ki roto i te vaarua takere kore no te 1,000 mataiti. (Apokalupo 20:1-3) Kia ope te tauatini mataiti o ta Iesu tutara, “e tukuiā Satani i reira i tana tapeka anga” e ka tauta akaou aia i te arataki ke i te aronga apa kore. Muri ake i teia, ka takoreia aia. (Apokalupo 20:7-10) Kare o te Tiaporo manakonako anga ki mua, e manakonako anga ra, toou! E patoi ua atu rai ia Satani, e kia akono pakari i toou akarongo. Ka rauka rai ia koe i te patoi atu ia Satani e kia autu!