1. a) Ndíjkha rí gíʼdoo numuu muʼni gajmiúlú má xúʼko̱ Satanás rí mbiʼi xúgi̱ rá. b) Xú káʼnii eʼyáá rí maʼngulú muʼni gajmiúlú xá.

RÍ MBIʼI xúgi̱, Satanás naxmínaʼ gajmíi̱n xúgínʼ bi̱ nuni ñajunʼ Jeobá. Naxmínaʼ gajmíi̱n cristianos bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ mangiin náa “iʼhuinʼ mugu” (Juan 10:16). Numuu rí ndaʼyoo rí naguanúu nguáthá mbiʼi, nandoo maʼni gámbóo fe rí guáʼdáá xúgínʼ xa̱bi̱i̱ Jeobá (atraxnuu Revelación 12:9, 12). Ikha jngó gíʼdoo wéñuʼ numuu rí muʼni gajmiúlú má xúʼko̱. Mú, lá maʼngulú muʼni gajmiúlú xáʼ. Xúʼko̱, numuu rí náa Biblia naʼthí: “Guguajún jti̱i̱n Gixa̱a̱, ga̱jma̱a̱ ikhaa gátsingunʼ náa ikháanʼ” (Sant. 4:7).

2, 3. a) Náa numuu rí Satanás nandoo rí xa̱bu̱ makumún rí ikhaa na̱nguá xtáa xá. b) Náa numuu eʼyáá rí Satanás xtáa rá.

² Mbaʼin xa̱bu̱ nakumún rí Satanás na̱nguá xtáa. Nakumún rí Satanás gajmíi̱n xa̱bu̱ wéñiʼ i̱ndó nakujmiin náa libros, náa películas rí migamíi ga̱jma̱a̱ náa videojuegos. Ga̱jma̱a̱ nuthi rí i̱ndó xa̱bu̱ skágunʼ nunimbu̱ún rí kuwa espíritus bi̱ ra̱míjínʼ. Mú, Satanás nambáyúu rí xa̱bu̱ makumún rí ikhaa na̱nguá xtáa. Náa numuu rá. Numuu rí xúʼko̱ itháan ra̱mingíjyúuʼ maʼni nduwiinʼ (2 Cor. 4:4). Ikha jngó ikhaa naʼni mámbá mbiʼi rí itháán xa̱bu̱ makumún xúʼko̱ kaʼnii.

 ³ Mú bi̱ ni̱ndxu̱lú xa̱bi̱i̱ Jeobá nduʼyáá rí Satanás xtáa. Náa numuu rá. Numuu rí náa Biblia naʼthí rí Satanás nijmiuu mbáa a̱bu̱nʼ mu maʼtamíjná ga̱jma̱a̱ Eva (Gén. 3:1-5). Ma̱ngaa niʼtámijna ga̱jma̱a̱ Jeobá índo̱ niʼthúu̱n rí Job naʼni ñajuunʼ numuu rí ikhaa naxnúu rí gíʼdoo (Job 1:9-12). Ma̱ngaa, niʼtamíjna ga̱jma̱a̱ Jesús índo̱ nigruiga̱ tsáʼkhá inuu (Mat. 4:1-10). Ga̱jma̱a̱ índo̱ Jesús ninindxu̱u̱ Rey nákha tsiguʼ 1914, ikhú Satanás nigíʼdu̱u̱ niʼni gíníin bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ (Rev. 12:17). Rí mbiʼi xúgi̱, Gixa̱a̱ xóó naʼni gínáanʼ bi̱ nuʼni ñajunʼ Dios. Mu maʼngulú muʼni gajmiúlú, ndayóoʼ maguaʼdáá mbá fe gujkhuʼ. Náa artículo rígi̱ gajmañúlúʼ xú káʼnii guʼni gaʼduunʼ tsáʼkhá ndrígóo Satanás.

4. Náa numuu nuʼthá rí Satanás nindxu̱u̱ bi̱ itháan naʼni mbamínáʼ rá.

⁴ Satanás nindxu̱u̱ bi̱ itháan naʼni mbamínáʼ. Náa numuu nuʼthá xúʼko̱ kaʼnii rá. Numuu rí niʼthí rí Jeobá rakáʼyoo maʼtáñajunlú. Ma̱ngaa, nigíʼ rí xa̱bu̱ mbuyamajkuíí ikhaa raʼkháa Jeobá. Xó má eʼyáá, Satanás niʼnimbamínáʼ wéñuʼ. Ikha jngó, á mu nandulúʼ maʼngulú muʼni gajmiúlú ndayóoʼ rí xúʼni̱ mbaʼumíjna̱ (atraxnuu 1 Pedro 5:5). Mú, ndiéjunʼ nindxu̱u̱ rí matani mbamínáʼ rá. Lá nindxu̱u̱ ra̱májánʼ ráʼ.

5, 6. a) Arathá náa numuu rí nguáná nindxu̱u̱ májánʼ rí matani mbamínáʼ. b) Ndiéjunʼ gárígá á mu nuʼni mbaʼumíjna̱ rá. c) Arathá xkri̱da ndrígu̱ún xa̱bu̱ bi̱ nini mbaʼumíjna̱.

⁵ Rí matani mbamínáʼ nguáná nindxu̱u̱ májánʼ. Mbá xkri̱da, nindxu̱u̱ májánʼ á mu natani mbamínáʼ ga̱jma̱a̱ numuu rí eni iʼwíínʼ. Xúʼko̱ má nikumu̱u̱ Pablo mbá miʼtsú. Niʼthí rí niʼni mbamínáʼ ga̱jma̱a̱ numún a̱ngiu̱lú bi̱ nikuwa náa Tesalónica, numuu rí niguájun jmbu maski ajndu niraʼníí xkujndu ga̱jma̱a̱ nixkúún (2 Tes. 1:4). Ma̱ngaa na̱nguá má raʼkhí rí mbáa maʼni mbamínáʼ ga̱jma̱a̱ numuu mbá rí gíʼdoo o niʼni. Mbá xkri̱da, ragíʼmaa mati̱yu̱lú ga̱jma̱a̱ numún bi̱ kuwa náa guʼwúlú, rí naguʼunlu nuʼni o náa xuajen rí nigumáanʼ (Hech. 21:39).

⁶ Mú á mu nuʼni mbaʼumíjna̱ maʼni rí xambáxulú gajmiúlú bi̱ nuni rí májánʼ, mú itháan gajmiúlú Jeobá. Rí muʼni mbaʼumíjna̱ maʼni rí xánigulúʼ rí mudrigú xtágabu ga̱jma̱a̱ rí muʼni gaʼduunʼ (Sal. 141:5). Xa̱bu̱ bi̱ nuni mbaʼumíjna̱ nduyáá rí guáʼdáá wéñuʼ numún ga̱jma̱a̱ itháan ki xóo iʼwíínʼ. Jeobá tsíyoo gáʼñun xa̱bu̱ bi̱ ni̱ndxu̱ún xúʼko̱ kaʼnii (Eze. 33:28; Amós 6:8). Mú Satanás naniguʼ rí xa̱bu̱ munimbaʼumi̱jna̱ xóo ikhaa. Ikhaa nidxuu wéñuʼ índo̱ Nemrod, rey bi̱ xtáa náa Egipto ga̱jma̱a̱ Absalón nijñekún ga̱jma̱a̱ nixuximi̱jna̱ wéñuʼ (Gén. 10:8, 9; Éx. 5:1, 2; 2 Sam. 15:4-6). Caín ma̱ngaa niʼnimbamínáʼ. Mbá miʼtsú Jeobá niʼthúu̱n rí maʼni, mú ikhaa táʼnimbo̱o̱. Caín táʼdxuun nditháan ga̱jma̱a̱ taxmiéjunʼ rí makieʼkhúun náa Jeobá. Ikha jngó nánguá nimbáxu̱u̱ ga̱jma̱a̱ (Gén. 4:6-8).

7, 8. a) Ndiéjunʼ rí ekumún tikhun xa̱bu̱ rá. b) Náa numuu rí mbaʼin xa̱bu̱ nawiñunʼ kuyamijná rá. c) Ndíjkha rí migamíi wéñuʼ rí muʼni mbaʼumíjna̱ náa awúu̱n congregación rá.

⁷ Rí muni mbaʼumíjna̱ ma̱ndoo maʼni rí xa̱bu̱ munigawúnmíjná. Mbá xkri̱da, mbaʼin xa̱bu̱ nuni mbaʼumíjna̱ numuu dí ikhiin nakumún dí itháan májánʼ raza ndrígu̱ún. Nawiñunʼ kuñún bi̱ raʼkháa raza ndrígu̱ún o rí xa̱bu̱ bi̱ naguwáʼ náa i̱ʼwáʼ raza rí mbríguu ni̱ndxu̱ún ga̱jma̱a̱ nagumiin mu muni ñajúnʼ eʼwíínʼ. Náa numuu rí xa̱bu̱ nawiñunʼ kuñún eʼwíínʼ rá. Numuu rí nunimbaʼumíjna̱ naʼni makumún rí itháan guáʼdáá numún. Rígi̱ naʼni rí muxmijná mbaʼin xa̱bu̱, muradímíjná náa guerras o muradíin mbaʼin xa̱bu̱.

 ⁸ Náa congregación ragíʼmaa marigá xúʼko̱ kaʼnii. Mú ga̱jma̱a̱ numuu dí nuʼni mbaʼumíjna̱ ma̱ndoo marigá xkujndu gakhii wéñuʼ. Rúʼko̱ niguaʼnii tikhun cristianos nákha siglo timbá. Ikha jngó apóstol Santiago niraxu̱u̱n: “¿Naʼla eʼca ri guerra, ga naʼ eʼca ri naguiʼduʼla naʼ icanʼla-ra?” (Sant. 4:1.) Á mu tsíyulú gúʼñún eʼwíínʼ ga̱jma̱a̱ nakumulú rí itháan kuaʼdáá numulúʼ ki xó ikhiin, mbá asndu muʼniu̱u̱n o muʼthá mbá rí maʼni gawúunʼ wéñuʼ (Prov. 12:18). Rí muʼni mbaʼumíjna nasngájma rí xárígá rí tsímáá náa congregación.

9. Xú káʼnii embáyuluʼ Biblia rí xúʼni̱ mbaʼumíjna̱ ga̱jma̱a̱ makumulúʼ rí itháan kuaʼdáá numulúʼ ki xóo eʼwíínʼ rá. (Atayáá timbá xtiʼkhu.)

⁹ Náa Biblia ejmañuluʼ rí xúʼni̱ mbaʼumíjna̱ ga̱jma̱a̱ rí xákumulu rí itháan kuaʼdáá numulúʼ ki xó eʼwíínʼ. Mbá xkri̱da, náa Proverbios 16:5 naʼthí rí Jeobá ‹nawiyuʼ kaʼyoo bi̱ naʼni mbamína wéñuʼ›. Ga̱jma̱a̱ Hechos 17:26 naʼthí rí Dios niʼni rí xúgíʼ raza ma̱ʼkha̱ náa mbáa xa̱biya̱. Ikha jngó nandoo nuʼthá rí xúgiáanʼ ni̱ndxu̱lú mbá raza numuu rí xúgiáanʼ naguwáʼ náa Adán. Raʼkhí rí mundxaʼwáá edxu̱lúʼ rí Dios niʼni tikhu raza itháán májánʼ ki xóó i̱ʼwáʼ. Ikha jngó guraximíjna̱: “Lá naku̱mu̱ʼ rí itháan gúʼdoo numuʼ ki xóo i̱ʼwáʼ raza o náa i̱ʼwáʼ xuajen mba̱ʼu̱ ráʼ.” Á mu nundxa̱ʼwa̱míjna̱ xúʼko̱ kaʼnii, muniʼñáaʼ rí Satanás mambóo rí nandulúʼ kuʼyamíjna̱ ga̱jma̱a̱ rí mambáxulúʼ náa congregación (Juan 13:35). Mú á mu nandulúʼ muʼni gajmiúlú Satanás, gíʼmaa muʼni mbá tsiakii mu xúʼni̱ mbaʼumíjna̱ (Prov. 16:18).

10, 11. a) Ndiéjunʼ eʼni Satanás mu manigulúʼ kuʼyáá numbaaʼ rá. b) Ndiéjunʼ nigíʼnuu Demas numuu rí niniguʼ kaʼyoo itháan numbaaʼ rá.

¹⁰ Satanás xtáa raʼtáñajunʼ náa numbaaʼ náa kuwaanʼ (Juan 12:31; 1 Juan 5:19). Mbaʼa rí naxnáraʼa numbaaʼ rígi̱ ra̱májánʼ nindxu̱u̱. Mú raʼkháa xúgíʼ. Satanás magíʼ majmuu xúgíʼ rí naxná numbaaʼ mu muʼni rí nandulúʼ ga̱jma̱a̱ xúʼko̱ xúʼnimbulúʼ náa Dios. Maʼni rí manigulúʼ itháan numbaaʼ ga̱jma̱a̱ rí ní xúʼgimíjná muʼnimbulúʼ kuʼyáá Jeobá (atraxnuu 1 Juan 2:15, 16).

¹¹ Rúʼko̱ niguaʼnii timbíi̱n cristianos. Mbá xkri̱da, nixtáa mbáa cristiano bi̱ nigumbiʼyuu Demas bi̱ nimbáyúu Pablo. Mú Pablo niʼthí rí Demas niniñuʼ numuu rí niniguʼ kaʼyoo numbaaʼ (2 Tim. 4:10). Ndiéjunʼ phú niniguʼ Demas rá. Náa Biblia tséʼthi. Mbáa itháan niniguʼ kaʼyoo mbújkha̱a̱ ki xó maʼni ñajunʼ Jeobá. Ga̱jma̱a̱ numuu rúʼko̱, Demas nindáti̱go̱o̱ rí maʼni ñajunʼ Jeobá májánʼ wéñuʼ. Nigiʼdoo numuu rígi̱ ráʼ. Na̱nguá. Náa numbaaʼ xaxna mbá rí itháan májánʼ ki xóo rí naxná Jeobá (Prov. 10:22).

12. Xú káʼnii eʼni Satanás mu muʼni rí nanigulúʼ rá.

¹² Numuu rí ni̱ndxu̱lú cristianos, nandulúʼ muʼdaaʼ mbújkha̱a̱ mu muñawu̱u̱n májánʼ bi̱ kuwa náa guʼwúlú (1 Tim. 5:8). Ga̱jma̱a̱ Jeobá nandoo rí makuwaanʼ tsímáá. Nduʼyáá numuu rí niʼnii Adán ga̱jma̱a̱ Eva náa mbá ku̱ba̱ʼ mitsaan (Gén. 2:9). Mú Satanás ma̱ndoo maʼni ikhaa má kayuʼ xó má niʼni ga̱jma̱a̱ Demas ma̱ngaa ma̱ndoo majmuu rí nanigulúʼ. Xú káʼnii rá. Najmuu ‹mbújkha̱a̱› mu maʼni nduwaanʼ (Mat. 13:22). Ikhaa nandoo muʼnimbulúʼ rí á mu nuʼdaaʼ wéñuʼ mbújkha̱a̱ ga̱jma̱a̱ nuʼtsi mbaʼa wéñuʼ itháan tsímáá gakuwaanʼ. Mú á mu nuʼnimbulúʼ rúʼko̱, mandátigulú rí gíʼdoo itháan numuu rí nambáxulúʼ májánʼ gajmiúlú Jeobá. Jesús niʼthí: “Nimba xabo maxaxo majma naʼ inu ajmi xabo ri mbo miʼtsu, numu ri mba maxaxo gaʼyo, imba tsi maʼne akuinjaʼyo, o maʼnemajanmineʼ inu  mba, imba tsi maxaxo gaʼyo. Maxaxo gajmaʼla naʼ inu Dios xi maguihuanʼ-güeño akianʼla-juya riqueza” (Mat. 6:24). Á mu ikháanʼ nduʼyáá rí gíʼdoo wéñuʼ numuu mbújkha̱a̱, ikhú manindxu̱lúʼ ñumbáá ndrígóo. Xúʼko̱ ní xándoo muʼni ñajunʼ Jeobá. Ga̱jma̱a̱ rúʼko̱ rí nandoo Satanás. Á mu nandulúʼ muʼni gajmiúlú, xúndxaʼwamíjná rí itháan gíʼdoo numuu muʼdaaʼ mbújkha̱a̱ o mu̱ʼtsi̱ i̱ʼwáʼ rí nandulúʼ ki xóo rí mambáxulu gajmiúlú Jeobá (atraxnuu 1 Timoteo 6:6-10).

13. Ndiéjunʼ ekumún mbaʼin xa̱bu̱ rí mbiʼi xúgi̱ rá.

¹³ Imbo̱o̱ tsáʼkhá rí nagíʼ Satanás nindxu̱u̱ rí xa̱bu̱ maʼndún mubúnʼ gajmiún mbáa. Rí mbiʼi xúgi̱ mbaʼin xa̱bu̱ nakumún rí makuwíin gajmiún mbáwíi xa̱bu̱ o rí munigu̱nʼ nánguá erígá rúʼko̱ ga̱jma̱a̱ nánguá muni xó má eñún ikhiin. Mbá xkri̱da, mbáa actriz niʼthí rí ní xándoo maraxtaa ga̱jma̱ʼ mbáwíi xa̱bu̱ ma̱ngaa rí tsíniniiʼ nimbáa bi̱ nandoo maxtáa ga̱jma̱a̱ mbáwíi xa̱bu̱ bi̱ ndiyáa. Ga̱jma̱a̱ mbáa actor niʼthí rí na̱nguá eʼyoo májánʼ rí maxtáa ga̱jma̱a̱ mbáwíi xa̱bu̱. Satanás nadxuu wéñuʼ índo̱ xa̱bu̱ bi̱ ra̱ʼkhá tháán ejmaʼnunʼ nuthi dí raʼkhí rí xa̱bu̱ mudamijná, numuu dí rígi̱ nindxu̱u̱ mbá regalo ndrígóo Dios. Satanás nandoo rí xúgínʼ bi̱ nidamijná muniñami̱jna̱a̱. Á mu nandulúʼ muʼni gajmiúlú, gíʼmaa mbuʼyáá xóo eʼyoo Jeobá rí mudamijná.

14, 15. Á mu ikháánʼ naku̱ma̱ʼ rí nandaʼ mataxuʼdáminaʼ aʼkhá, ndiéjunʼ gándoo matani rá.

¹⁴ Cristianos bi̱ ndajkuíin ga̱jma̱a̱ bi̱ nidamijná gíʼmaa muni mbá tsiakii mu xuxudami̱jna̱  aʼkhá. Mú mingíjyúuʼ nindxu̱u̱ rígi̱. Mbá xkri̱da, jiáma nudxawíín rí nuthi a̱ngiu̱ún náa nagún gúnigajmaa rí nubúnʼ gajmiún asndu tsáa. Ma̱ngaa nudxawíín nuthi dí nuxuʼma mensajes ga̱jma̱a̱ xtiʼkhu náa timii xa̱bu̱ tsaʼtsinʼ náa teléfonos. Náa tikhuu xuajen mba̱ʼu̱ rí mataxuʼmá mensajes mbríguu nindxu̱u̱ xóo mataxuʼmá xtiʼkhu náa naguwáʼ e̱ji̱n tsaʼtsinʼ. Ma̱ngaa, náa Biblia naʼthí rí bi̱ nabóoʼ ga̱jma̱a̱ mbáa xa̱bu̱ nakudaminaʼ aʼkhá ‹náa xuyuʼ› (1 Cor. 6:18). Mbaʼin xa̱bu̱ nakháñun o numíniʼ ga̱jma̱a̱ numuu i̱ʼwáʼ nandii rí na̱ʼkha̱ índo̱ nubúnʼ gajmiún iʼwíínʼ. Ga̱jma̱a̱ mbaʼin jiáma bi̱ nuxuda̱mi̱jna̱ aʼkhá nákha xóó tsedamijná nda̱wa̱á nagáwiinʼ a̱jkiu̱ún. Mbaʼa libros, películas ga̱jma̱a̱ ajmúú naʼni mbuʼyáá rí nda̱a̱ dí gárígá á mu tséʼnimbulúʼ xtángoo ndrígóo Dios. Mú rúʼko̱ nindxu̱u̱ minduwaʼ. Á mu tseñawanmíjna̱lú, ma̱ndoo majngutíguáanʼ náa ‹tsiakii rí gíʼdoo aʼkhá› (Heb. 3:13).

¹⁵ Á mu ikháánʼ naku̱ma̱ʼ rí nandaʼ mataxuʼdáminaʼ aʼkhá, ndiéjunʼ gándoo matani rá. Atayáá dí rúʼko̱ maʼni majngatíguiin (Rom. 7:22, 23). Aratájkáan náa Jeobá ga̱jma̱a̱ atanda̱ʼa̱a̱ tsiakii (Filip. 4:6, 7, 13). Xáraxtaa náa maʼni mataxuʼdáminaʼ aʼkhá rúʼko̱ (Prov. 22:3). Ga̱jma̱a̱ índo̱ gátraʼníí tsáʼkhá atani gaʼduunʼ nacha̱ (Gén. 39:12).

16. a) Ndiéjunʼ niʼni Jesús índo̱ Satanás nigruiga̱ tsáʼkhá inuu rá. b) Ndiéjunʼ ejmañuluʼ náa xkri̱da ndrígóo Jesús rá.

¹⁶ Ndiéjunʼ niʼni Jesús índo̱ Satanás nigruiga̱ tsáʼkhá inuu rá. Na̱nguá niniñuʼ rí Satanás maʼninduwaaʼ. Asndu nditháan tándxaʼóo edxu̱u̱ rúʼko̱. Rí phú niʼni, nacha̱ niʼthúu̱n rí naʼthí náa Escrituras, ikhaa niʼthí: ‹Kiʼniraʼmáʼ› (atraxnuu Mateo 4:4-10). Ndiéjunʼ ejmañuluʼ náa xkri̱da ndrígóo Jesús rá. Ikhaa nininuuʼ májánʼ Ajngá rawunʼ Dios. Ikha jngó, índo̱ Satanás nigíʼ tsáʼkhá inu, nacha̱ ni̱ʼkha̱ náa edxu̱u̱ rí na̱ʼkha̱ raʼthí náa Escrituras. Á mu nandulúʼ maʼngulú muʼni gajmiúlú Satanás, ndayóoʼ muʼni gaʼduunʼ xúgíʼ rí maʼni muxuʼdámíjná aʼkhá (1 Cor. 6:9, 10).

17, 18. a) Ndiéjunʼ i̱ʼwáʼ tsáʼkhá ejmuu Satanás rá. b) Náa numuu rí tséʼniulú tsiánguá tsáʼkhá ndrígóo xá. c) Ndiéjunʼ gágíʼnuu Satanás rá. d) Náa numuu rí naxnúlú tsiakii mbuʼyáá rí Satanás nda̱a̱ rí gíʼthu̱u̱n nda̱wa̱á rá.

¹⁷ Náa artículo rígi̱ ndiʼyáá ajtsú tsáʼkhá ndrígóo Satanás: Rí nuni mbaʼumíjna̱, rí nanigu̱nʼ kuyáá numbaaʼ ga̱jma̱a̱ mbújkha̱a̱, ga̱jma̱a̱ rí nubúnʼ gajmiún iʼwíínʼ. Mú rígá i̱ʼwáʼ tsáʼkhá. Mbá xkri̱da, tikhun xa̱bi̱i̱ Jeobá guáʼdiin a̱ngiu̱ún bi̱ tsíñún rí ikhiin muni ñajunʼ Jeobá. Iʼwíínʼ guáʼdiin a̱ngiu̱ún náa escuela bi̱ nutsijmin. Ga̱jma̱a̱ iʼwíínʼ kuwa náa xuajen mba̱ʼu̱ náa Xa̱bu̱ Ñajunʼ tséniñunʼ mutaraʼa. Mú rígi̱ tséʼniulú tsiánguá, numuu rí Jesús niʼtúlú rí maguaʼnii rígi̱. Ikhaa niʼthí: “Mba xuguinʼ xabo maxaxun guyaʼla numu mbiʼyuʼ, indo tsi maʼngo maʼnegakeminaʼ asjndo mamba numba, tsuʼkue tsi majriyaʼ” (Mat. 10:22).

¹⁸ Xú káʼnii gáʼngulú muʼni gajmiúlú Satanás rá. Jesús niʼthí rí á mu naʼngulú, maʼngulú makáwáanʼ (Luc. 21:19). Nimbáa xa̱bu̱ xáʼngo̱o̱ gáʼnimbátigáanʼ mbá kayuʼ. Á mu ni̱ndxu̱lú xa̱bu̱ jmbii, nimbáa xáʼngo̱o̱ gaʼni rí muniʼñáaʼ rambáxulú gajmiúlú Dios (Rom. 8:38, 39). Ga̱jma̱a̱ á mu nani̱ndxu̱lú xa̱bu̱ jmbii índo̱ gakháñulú, Satanás xáʼngo̱o̱ maʼni gajmiúlú numuu rí Jeobá maʼni rí mbuʼya mbu̱júu̱ (Juan 5:28, 29). Mú, ndiéjunʼ gágíʼnuu Satanás rá. Nda̱wa̱á rí Dios gáʼni gámbóo numbaaʼ rígi̱, Cristo maruguaraʼaa Satanás mbá mil tsiguʼ mu xáʼni gawúunʼ nimbáa (Rev. 20:1-3). Nda̱wa̱á, Satanás magajnáa ga̱jma̱a̱ imbóó miʼtsú maʼni nduwiinʼ xa̱bu̱ numbaaʼ. Ga̱jma̱a̱ ikhú maguma gámbáa (Rev. 20:7-10). Xóo eʼyáá, Satanás nda̱a̱ dí gíʼthu̱u̱n nda̱wa̱á. ¡Mú ikháánʼ rígá rí xtaʼti̱i̱n! Ikha jngó, araʼdáá tsiakii, ataxmínaʼ má xúʼko̱ ga̱jma̱ʼ Gixa̱a̱ ma̱ngaa gaʼni gujkhuʼ fe ndrígáʼ. Ikháánʼ maʼngaaʼ matani ga̱jma̱ʼ Satanás.