1, 2. Hebru Baibal i “ke chiahnak” timi biafang nih zeidah a chim duhmi a si?

JEHOVAH PATHIAN nih hitin a ti: “Van hi ka ṭhutnak a si i vawlei hi ka ke chiahnak a si.” (Isa. 66:1) Pathian nih a “ke chiahnak” he aa tlaiin hitin a chim: ‘Ka ke chiahnak hmun kha ka hlorh lai.’ (Isa. 60:13, NW) Jehovah nih a ke chiahnak hmun cu zeitindah a hlorh lai asiloah a dawhter lai? Mah cu a ke chiahnak hmun a simi vawlei i a ummi hna caah zei sullam dah a ngeih?

² “Ke chiahnak” timi biafang nih vawlei lawng hi a chim duhmi a si lo. Hebru Baibal i mah biafang nih hlanlio Israel ram i biakinn zong kha a chim duhmi a si. (1 Chan. 28:2; Salm 132:7) Biakinn cu a hmaanmi biaknak caah a biapi bikmi hmun a si i Jehovah caah aa dawh tuk. Cucaah biakinn a ummi nih Jehovah ke chiahnak kha a dawhter.

3. Tuchan i a hmaanmi biaknak caah a biapi bikmi hmun cu zeidah a si, zeitik in dah aa thawk?

 ³ Tuchan i a hmaanmi biaknak caah a biapi bikmi hmun cu zeidah a si? Hlanlio biakinn bantukin inn pakhat a si lo. Mah cu thlaraulei biakinn a si i zeibantuk inn nakhmanh in Jehovah thang a ṭhatter deuh. Cu a si ah thlaraulei biakinn timi cu zeidah a si? Minung kha Pathian hawi sinak nawl le biaknak nawl a hmuhtermi Pathian timhtuahnak a si. Mah timhtuahnak cu Jesuh tlanhnak man lawngin a tlam a tling kho. Jesuh tipil a ing i thlaraulei biakinn ah Tlangbawi Ngan in chiti thuh a si caan, AD 29 ah mah timhtuahnak cu thawk a si.—Heb. 9:11, 12.

4, 5. (a) Salm 99 ningin Jehovah a bia taktakmi hna nih zei tuah dah an duh? (b) Zei bia dah kan i hal awk a si?

⁴ Thlaraulei biakinn kha Pathian nih a kan timhtuahpiak caah kan i lawm tuk. Jehovah min le tlanhnak man laksawng kong midang sin kan chimnak thawngin kan i lawmhnak kha kan langhter. Nifate Jehovah a thangṭhatmi a hmaanmi Khrihfa nuai riat leng an ummi cu lungthawh awk ngai a si. Mi tampi nih an thih hnuah van ah Pathian kan thangṭhat lai tiah a hmaan loin an ruah. Asinain Jehovah miphun nih cun hi vawlei ah atu in Pathian thangṭhat cu zeitluk in dah a biapit ti kha an hngalh.

⁵ Jehovah kan thangṭhat tikah Salm 99:1-3, 5 ah an kong ṭialmi zumhfekmi Pathian salle kan i zohchunhmi hna a si. (Rel.) Hlanlio ah a hmaanmi biaknak ca i Pathian timhtuahnak kha Moses, Aaron le Samuel ti bantuk zumhfekmi pa hna nih lungthin dihlak in an bawmh. (Salm 99:6, 7) Tuchan zongah chiti thuhmi hna cu Jesuh he tlangbawi rian ṭuan awkah van i an kai hlanah vawlei lei thlaraulei biakinn ah zumhfek tein Jehovah rian an ṭuan. “Tuu dang” zong nih zumhfek tein an bawmh hna. (Johan 10:16) An phuhnih in lungrual tein Jehovah an biak. Asinain hitin kan i hal awk a si: ‘A hmaanmi biaknak caah Jehovah timhtuahnak kha lungthin dihlak in ka bawm maw?’

6, 7. A hmasa Khrihfabu ah zeidah a chuak, 1919 a phanh tikah zeidah a cang?

⁶ Khrihfabu dirh a si hnu kum 100 hrawngah chimchung a rak si bantukin zumhpialmi pawl an hung chuak. (Lam. 20:28-30; 2 Thes. 2:3, 4) Mah caan thawkin a hmaanmi Khrihfa hna cu thleidan an har thluahmah. Asinain kumzabu tampi hnuah Jehovah nih thlaraulei biakinn ah rian a ṭuan taktakmi cu ahote dah an si ti langhter awkah Jesuh kha a hman.

⁷ 1919 a phanh tikah Pathian mithmai ṭha a hmumi le thlaraulei biakinn ah rian a ṭuanmi hna cu fiang tein an hung  lang. An biaknak kha Jehovah nih a cohlan nakhnga thlennak an tuah. (Isa. 4:2, 3; Mal. 3:1-4) Cucaah a luancia kum tampi lioah lamkaltu Paul nih a hmuhmi langhnak cu a hung tling.

8, 9. Paul nih langhnak ah a hmuhmi “paradis” cu zeidah a si?

⁸ Paul hmuhmi langhnak cu 2 Korin 12:1-4 ah aa ṭial. (Rel.) Mah langhnak ah Jehovah nih hmailei ah a cang hngami kong kha Paul sinah a langhter. Paul nih a hmuhmi “paradis” cu zeidah a si? Pakhatnak ah, vawleicung ah a rauhhlan i a um hngami Paradis taktak kha a langhtermi a si kho men. (Luka 23:43) Pahnihnak ah, vawlei thar i thlaraulei paradis kha a langhtermi a si kho men. Pathumnak ah, “Pathian Dum” kha a langhtermi a si kho men, mah cu vancung i a ṭha tukmi thil sining kha a si.—Biat. 2:7.

⁹ “Bia in chim khawh lomi kha a theih hna, minung hmur nih chimthiam lomi thil kha a theih hna” tiah zeicah Paul nih a chim? Langhnak ah a hmuhmi khuaruahhar thil hna kha a dikthliar in fianter awkah a caan a si rih lo caah a si. Asinain tuchan tu cu Jehovah miphun nih an hmuhmi thluachuah kong midang sinah chimnak caan a si.

10. Thlaraulei paradis le thlaraulei biakinn cu zeicah an i lawh lo?

¹⁰ Thlaraulei paradis kong kha kan chim tawn, mah cu zeidah a si? Pathian nih a miphun pawl a pekmi hna daihnak a si. Cucaah thlaraulei paradis le thlaraulei biakinn cu aa lo lo. Thlaraulei biakinn cu a hmaanmi biaknak caah Pathian timhtuahnak a si. Thlaraulei paradis nih Pathian mithmai ṭha a hmumi le thlaraulei biakinn ah Pathian a biami kha fiang tein a langhter hna.—Mal. 3:18.

11. Zei tinvo sung dah kan ngeih?

¹¹ 1919 thawkin Jehovah nih a tlinglomi minung kha thlaraulei paradis zohkhenh awk le ṭhanchoter awkah nawl a pekmi hngalh cu lungthawh tuk awk a si. Nangtah mah rian kha na bawm maw? Vawlei ah Jehovah thang a ṭhatter hngami a sunglawi tukmi rian kha na sunsak maw?

12. Isaiah 60:17 i chimchungbia a tlin kha zeitindah kan hngalh? (A hramthawknak hmanthlak zoh.)

¹² Profet Isaiah nih vawlei lei Pathian bupi ah thlennak le remhnak tampi a um lai tiah a chimchung. (Isaiah 60:17 rel.) Mino asiloah Khrihfa a hung si kami hna cu mah thlennak kong hna kha a rel lawngin an rel asiloah a theih lawngin an theih. Asinain mah thlennak hna a tongmi unau tampi an um.  Pathian nih a bupi lamhruai awk le cawnpiak awkah Siangpahrang Jesuh a hman ti kha mah zumhfekmi salle nih an zumh. Mah unau hna an hmuhtonnak kong kan theih tikah Jehovah kan zumhnak le kan i bochannak cu a fek chin lai.

13. Salm 48:12-14 ningin zeidah kan tuah awk a si?

¹³ A hmaanmi Khrihfa diklak nih Jehovah bupi kong kha midang sinah kan chim awk a si. Satan vawlei ṭhalo ah kan um ko nain daihnak le lungrualnak in a khatmi vawleicung pumpi unaurual kan ngeihmi cu khuaruahhar a si. Jehovah bupi kong le thlaraulei paradis kong kha lunglawm tein kan “tefa” hna sinah kan chim lai.—Salm 48:12-14 rel.

14, 15. 1970 hnuah zei thlennak dah tuah a si, bupi cu zeitindah ṭhatnak a hmuh?

¹⁴ Kum upa unau tampi cu vawlei lei Jehovah bupi aa dawh chin nakhnga thlennak tuahmi a tongmi an si. Khrihfabu hna ah Khrihfa upa phu pakhat canah Khrihfabu rianṭuantu pakhat lawng a ummi, ram hna ah Zung ṭengnge Kawmiṭi canah zung ṭengnge zohkhenhtu pakhat lawng a ummi le vawleicung pumpi ah Jehovah Tehte Hna i Uktu Bu canah Vennak Innsang Bu hruaitu pakhat nih lam a hruaimi hna kha an i cinken. Mah unaupa hna cu zumhfek tein bawmh an si ko nain Khrihfabu ah, zung ṭengnge ah le vawleicung pumpi zungpi ah unau pakhat lawng nih a bik in biakhiahnak a  tuah. 1970 hnuah pakhat lawng nih biakhiahnak tuah ti loin Khrihfa upa phu nih tuah awkah thlennak an tuah.

¹⁵ Mah thlennak hna ruangah bupi cu zeicah ṭhatnak a hmuh? Baibal ṭha deuh in hngalhthiamnak cungah hram aa bunh caah a si. Mi pakhat nih biakhiahnak vialte tuah dih a si ti lo caah Jehovah pekmi ‘minung laksawng’ a simi Khrihfa upa dihlak i an sining ṭha hna in bupi cu ṭhatnak a hmu.—Efe. 4:8; Ptb. 24:6.

16, 17. Nai ah tuahmi zei thlennak nih dah na lung aan suk, zeicah?

¹⁶ Kan cauk hna he aa tlaiin nai ah tuahmi thlennak cheukhat kha ruathmanh. Phungchimnak ah a kan bawmmi le lungthin a lami cauk pawl mi kan pek hna caah kan i lawm tuk. Thawngṭha chimnak ah jw.org website ti bantuk chanthar thilri pawl zeitindah kan hman ti zong kha ruathmanh. Cu bantuk lam hna in mi tampi nih an herh taktakmi bawmhnak kha an hmuh. Jehovah nih mi pawl a siaherh hna i a dawt hna ti kha mah thlennak hna nih a langhter.

¹⁷ Pumhnak he aa tlaiin thlennak an tuah caah chungkhar pumhnak le pumpak hlathlainak tuahnak caan kan ngei i kan i lawm tuk. Cun civui he aa tlaiin thlennak tuah a si ca zongah kan i lawm. Kumkhat hnu kumkhat a ṭha chin thluahmah. Baibal tinṭan hna in cawnpiaknak kan hmuh ca zongah kan i lawm tuk. Mah thlennak vialte nih Jehovah nih a bupi  lam a hruai i thlaraulei paradis dawhter chin awkah a tuah ti kha fiang tein a langhter.

18, 19. Thlaraulei paradis dawhter chin awkah zeitindah kan bawmh khawh?

¹⁸ Jehovah nih thlaraulei paradis dawhter chin awkah bawmh khawhnak tinvo a kan pek. Zeitindah kan bawmh khawh? Pennak kong thawngṭha chimnak le zultu siternak rian ah lungtho tein kan i telnak thawngin kan bawmh khawh. Mi pakhat kha Pathian sal si awk kan bawmh fatinte thlaraulei paradis ṭhancho awkah kan bawmh a si.

¹⁹ Khrihfa ziaza ṭhancho awk kan i zuamnak thawng zongin thlaraulei paradis dawhter chin awkah kan bawmh. Cuticun thlaraulei paradis nih midang kha an lung a lak khawh hna lai. Baibal kan hngalhnak ruang lawngah si loin a thiangmi le a daimi kan ziaza ruangah bupi sinah le Jehovah le Jesuh sinah mi kha a hnuh hna.

20. Phungthlukbia 14:35 bia ningin zeidah kan duh awk a si?

²⁰ Jehovah le Jesuh nih tuchan i aa dawhmi thlaraulei paradis an hmuh tikah an i lawm tuk lai. Thlaraulei paradis dawhter chin awk tuahnak in atu ah hmuhmi lawmhnak cu hmailei ah vawlei kha paradis taktak in ser tikah hmuh laimi lawmhnak tehnak sawhsawh men a si. Phungthlukbia 14:35 i mah bia hi kan i cinken awk a si: “Siangpahrang nih a felmi rianṭuantu kha an lawmh hna.” Thlaraulei paradis dawhternak rian ah kan i zuamnak thawngin a fimmi si hna u sih.