1, 2. ¿Chucoch miʼ cʼʌjñel yaʼ ti Tsʼijbujel Hebreo jiñi tʼan i tʼuchlib ocʌl?

AN I tajol mi laj qʼuel cheʼ bʌ buchul juntiquil, an chuqui miʼ yʌcʼ tiʼ tʼejl chaʼan i cʼʌclib i yoc. Ti Isaías 66:1, Jehová miʼ yʌl chaʼan i buchlib jiñʌch jiñi panchan, i jiñi i cʼʌclib i yoc jiñʌch ili Pañimil. Yaʼ ti Isaías 60:13 tsiʼ yʌlʌ: «Mi caj c ñuqʼuesan yaʼ baqui mij cʌcʼ jiñi coc». ¿Bajcheʼ miʼ ñumen weñʼesan i cʼʌclib i yoc Jehová? ¿Chuqui yom i yʌl chaʼañonla jiñi?

² Yaʼ ti Tsʼijbujel Hebreo, jiñi tʼan i tʼuchlib ocʌl miʼ cʼʌjñel chaʼan miʼ tajtʌl ti tʼan i «chumlib Dios [«tabernáculo», TNM]», yom i yʌl, jiñi templo am bʌ yaʼ ti Israel ti wajali (Salmo 132:7; 1 Crónicas 28:2, TNM). Wen utsʼatax jiñi templo tiʼ tojlel Jehová come miʼ yʌcʼ chaʼan jiñi i wiñicob miʼ mejlel i chʼujutesañob yicʼot miʼ yʌqʼueñob i ñuclel.

3. a) ¿Chuqui miʼ coltañonla chaʼan mi lac chʼujutesan Dios ti ili ora? b) ¿Baqui ora tsaʼ tejchi jiñi templo i chaʼan bʌ Dios?

³ ¿Chuqui miʼ coltañonla chaʼan mi lac chʼujutesan Dios ti ili ora? Jiñʌch jiñi muʼ bʌ i wen aqʼuen i ñuclel Jehová muʼ bʌ i subentel bajcheʼ «templo i chaʼan bʌ Dios», mach jumpʼejlic colem templo melbil bʌ. ¿Chuquiyes jiñi templo i chaʼan bʌ Dios? Jiñʌch tsaʼ bʌ i  chajpa Dios chaʼan jiñi wiñicob xʼixicob (quixtañujob) miʼ mejlelob ti sujtel tiʼ yamigojob yicʼot miʼ mejlel i chʼujutesañob. Iliyi miʼ mejlel come Jesús tsaʼ chʌmi chaʼan miʼ locʼsañonla ti mulil. ¿Baqui ora tsaʼ tejchi jiñi templo i chaʼan bʌ Dios? Jiñʌch ti jabil 29 cheʼ bʌ Jesús tsiʼ chaʼle chʼʌmjaʼ i tsaʼ waʼchoconti bajcheʼ ñuc bʌ motomaj ti jiñi i templo Jehová (Hebreos 9:11, 12).

4, 5. a) Cheʼ bajcheʼ miʼ yʌl Salmo 99, ¿chuqui yom miʼ mel jiñi i wiñicob Jehová? b) ¿Chuqui jiñi yom bʌ mi laj cʼajtiben lac bʌ?

⁴ Mi la cʌqʼuen wocolix i yʌlʌ Jehová chaʼan jiñi tsaʼ bʌ i chajpa chaʼan miʼ mejlel lac chʼujutesan. ¿Bajcheʼ? Jiñʌch cheʼ mi lac tsictesʌben quixtañujob chaʼan i cʼabaʼ Dios jiñʌch Jehová yicʼot chaʼan tsiʼ choco tilel chaʼan miʼ chʌmel Jesús ti laj caj. Miʼ yʌqʼueñonla lac tijicñʌyel cheʼ la cujil cheʼ ñumen ti 8 millón Testigojob woli (choncol) i ñuqʼuesañob Jehová ti jujumpʼejl qʼuin. An cabʌl muʼ bʌ i ñaʼtañob chaʼan mi caj i majlelob ti panchan cheʼ miʼ chʌmelob i chaʼan yaʼʌch mi caj i yʌqʼueñob i ñuclel Jehová. Pero la cujil chaʼan mach isujmic jiñi. La cujil chaʼan jin ili ora yom mi lac ñuqʼuesan.

⁵ Cheʼ mi lac ñuqʼuesan Jehová woli (yʌquel) lac sajcan i ejemplo jiñi xucʼul bʌ i wiñicob ti wajali (pejcan Salmo 99:1-3, 5-7). An cabʌl tsaʼ bʌ i chʼʌmʌyob ti ñuc cheʼ bajcheʼ tsiʼ chajpa Dios chaʼan yom miʼ chʼujutesʌntel, bajcheʼ Moisés, Aarón yicʼot Samuel. Ili ora an chaʼmojt temel bʌ woliʼ chʼujutesañob Jehová. Junmojt jiñʌch jiñi bombiloʼ bʌ woli bʌ i melbeñob i yeʼtel ti jiñi jumpʼejl parte am bʌ wʌʼ ti Pañimil tsaʼ bʌ i chajpa Dios, i cheʼ bʌ maxto majlemobic ti panchan chaʼan miʼ yochelob bajcheʼ motomaj yicʼot Jesús. Jiñi i chaʼmojtlel jiñʌch jiñi cabʌl millón ‹yambʌ tiñʌmeʼob› woli bʌ i coltañob tiʼ xucʼtʌlel jiñi bombiloʼ bʌ (Juan 10:16). Pero yom mi laj cʼajtiben lac bʌ ti jujuntiquil: «¿Woli ba c chʼʌm ti ñuc tsaʼ bʌ i chajpa Dios bajcheʼ yom miʼ chʼujutesʌntel?».

6, 7. a) ¿Chuqui tsaʼ caji ti ujtel cheʼ bʌ maxto wen jalic i tejchel jiñi congregación? b) ¿Chuqui tsaʼ ujti cheʼ ti jabil 1919?

⁶ Jiñi apóstol Pablo tsiʼ wʌn alʌ chaʼan an muʼ bʌ caj i sujtelob tiʼ contra jiñi isujm bʌ ñopbalʌl yicʼot mi caj i pʌsob lotiya tac yaʼ ti congregación (Hechos 20:28-30; 2 Tesalonicenses 2:3, 4). Cheʼ bʌ maxto i taja 100 jab i tejchel jiñi congregación ti ñaxam bʌ siglo, tsaʼ caji ti tsʼʌctiyel. Cheʼ jiñi, wocol tsaʼ cʼoti ti ñaʼtʌntel  majquiyob jiñi isujm bʌ xñoptʼañob. Pero cheʼ bʌ tsaʼix ñumi cabʌl jabil, Jehová tsiʼ cʼʌñʌ Jesús chaʼan miʼ tsictesan majquiyob jiñi woliyoʼ bʌ ti eʼtel ti jiñi templo i chaʼan bʌ Dios.

⁷ Ti 1919 tsaʼ tsictiyi majqui jiñi woliyoʼ bʌ ti eʼtel (troñel) ti jiñi templo. Tsaʼix i qʼuextayob i bʌ chaʼan miʼ chʼujutesañob Jehová cheʼ bajcheʼ miʼ mulan (Isaías 4:2, 3; Malaquías 3:1-4). Cheʼ jiñi, tsaʼ caji ti tsʼʌctiyel tsaʼ bʌ i qʼuele Pablo tiʼ ñajal. Laʼ laj qʼuel chuqui jiñi tsaʼ bʌ i qʼuele.

8, 9. ¿Chuquiyes jiñi «paraíso» tsaʼ bʌ i qʼuele tiʼ ñajal Pablo?

⁸ Jehová tsiʼ cʼʌñʌ i pʼʌtʌlel chaʼan Pablo miʼ qʼuel muʼ bʌ i cajel ti talto bʌ qʼuin (pejcan 2 Corintios 12:1-4). Pablo miʼ yʌl chaʼan tsiʼ qʼuele jiñi «paraíso». ¿Chuquiyes jiñi paraíso? Tajol an uxchajp i sujmlel. Ñaxam bʌ, jiñi yoque Paraíso muʼ bʌ caj laj qʼuel wʌʼ ti Pañimil ti mach jalix (Lucas 23:43). I chaʼchajplel, jiñʌch jiñi ñʌchʼtʌlel muʼ bʌ caj la cubin ti jiñi tsijiʼ bʌ pañimil baqui maʼañix mulil. I yuxchajplel, jiñi «i paraíso Dios», yom i yʌl, jiñi bendición cheʼ an majqui mi caj i yajñelob yicʼot Jehová yaʼ ti panchan (Apocalipsis 2:7).

⁹ ¿Chucoch tsiʼ yʌlʌ Pablo chaʼan an tsaʼ bʌ i yubi maʼañic bʌ miʼ mejlel i yʌl? Come maxto i yorajlelic chaʼan miʼ tsictesan tiʼ pejtelel chuqui wen ñuc tac bʌ tsiʼ qʼuele. Pero ili ora, i wiñiconbʌla Jehová mucʼʌch i mejlel lac suben yañoʼ bʌ chuqui wen tac bʌ woli lac taj ti jiñi i tejclum.

10. ¿Chuqui jiñi paraíso baqui an i tejclum Dios ili ora, i chuqui yom i yʌl jiñi templo i chaʼan bʌ Dios?

¹⁰ Yaʼ ti lac jun tac loqʼuem bʌ ti Biblia ti bele ora miʼ yʌl chaʼan jiñi i tejclum Dios an ti jumpʼejl paraíso. ¿Chucoch? Jiñʌch chaʼan jiñi ñʌchʼtʌlel muʼ bʌ i yʌqʼuen i tejclum Jehová. Iliyi wen tsiquil come jiñobʌch woliʼ bʌ i chʼujutesañob Jehová ti jiñi i templo. ¿Chuqui yom i yʌl jiñi templo? Bajcheʼ tsaʼix laj qʼuele, jiñʌch jiñi chʼujutesa muʼ bʌ la cʌqʼuen tiʼ tojlel i cuxtʌlel Jesús (Malaquías 3:18).

11. ¿Chuqui ñuc bʌ majtan an lac chaʼan ili ora?

¹¹ Wen tijicñajax cheʼ la cujil chaʼan cʼʌlʌl ti 1919 Jehová tsiʼ yʌcʼʌ chaʼan wiñicob xmuliloʼ bʌ miʼ cʌntañob jiñi ñʌchʼtʌlel am bʌ tiʼ tejclum chaʼan miʼ ñumen pʼʌtʼesañob yicʼot miʼ ñuqʼuesañob. ¿Woli baʼ chaʼlen coltaya tiʼ melol jiñi? ¿Muʼ baʼ qʼuel ti ñuc jiñi eʼtel a wicʼot Jehová chaʼan maʼ wʌqʼuen i ñuclel wʌʼ ti Pañimil?

12. ¿Chucoch miʼ mejlel la cʌl chaʼan woliyʌch i tsʼʌctiyel muʼ bʌ i yʌl Isaías 60:17? (Qʼuele jiñi foto am bʌ tiʼ tejchibal.)

¹² Ti jiñi jabil ñumeñix bʌ an cabʌl chuqui qʼuextʌyem yicʼot weñʼesʌbil ti jiñi jumpʼejl parte i yorganización Dios am bʌ wʌʼ ti Pañimil. Cheʼʌch tsiʼ wʌn alʌ jiñi xʼaltʼan Isaías (pejcan Isaías 60:17). Jiñi xcolelob Testigojoʼ bʌ yicʼot jiñi tsijiʼob to bʌ, tajol yujilob chuqui jiñi qʼuextʌyem tac bʌ come an jax majqui tsiʼ subeyob o chaʼan tsiʼ pejcayob ti jiñi jun tac loqʼuem bʌ ti Biblia. Pero an hermanojob cabʌlix bʌ i jabilelob tsaʼ bʌ i qʼueleyob bajcheʼ tsaʼ ujti tac jiñi. Wen yujilob tiʼ pusicʼal chaʼan Dios woliʼ cʼʌn Jesucristo chaʼan miʼ tojʼesan i yorganización. Mi mucʼʌch lac ñʌchʼtan chuqui miʼ tsictesʌbeñoñobla ili hermanojob, mi caj lac ñumen ñop Jehová.

13. Cheʼ bajcheʼ miʼ yʌl Salmo 48:12-14, ¿chuqui yom mi lac mel?

¹³ Ti lac pejtelel yom mi lac suben yañoʼ bʌ chaʼan jiñi organización am bʌ i chaʼan Jehová. Jiñʌch jumpʼejl milagro cheʼ mi laj qʼuel jiñi hermanojob tiʼ pejtelel pañimil chaʼan añob ti jiñi ñʌchʼtilel ti ili jontol jax bʌ pañimil. Jin chaʼan yom mi lac suben jiñi ‹laj calobilob›, yom i yʌl xcolelob yicʼot jiñi tsijiʼob to bʌ, chaʼan bʌ i yorganización Dios yicʼot jiñi paraíso (pejcan Salmo 48:12-14).

14, 15. a) ¿Chuqui tsaʼ qʼuextʌyi cheʼ ti 1970? b) ¿Chucoch weñʌch cheʼ tsaʼ mejli bajcheʼ jiñi?

¹⁴ Cabʌl Testigojob añobix bʌ i jabilel an i qʼueleyob bajcheʼ jiñi qʼuextʌyem tac bʌ an i ñumen  weñʼesa jiñi jumpʼejl parte i yorganización Dios am bʌ wʌʼ ti Pañimil. Jumpʼejl ejemplo, ti wajali jujumpʼejl congregación an waʼchocobil juntiquil anciano am bʌ tiʼ wenta, ti jujumpʼejl sucursal an juntiquil anciano am bʌ tiʼ wenta, i jiñi central mundial an tiʼ wenta jiñi presidente i chaʼan jiñi Sociedad Watch Tower. Anquese añobʌch i yaj coltaya jiñi hermanojob, pero juntiquil jach muʼ bʌ i yʌcʼ i tʼan cheʼ an chuqui miʼ mejlel ti jujumpʼejl congregación, ti jujumpʼejl sucursal yicʼot yaʼ ti central mundial. Pero cheʼ ti 1970 majlel, tsaʼ ajli chaʼan jiñʌch junmojt ancianojob muʼ bʌ caj i yʌcʼob i tʼan ti chuqui yom miʼ mejlel. Ili ora, an junmojt ancianojob ti jujumpʼejl congregación, ti jujumpʼejl sucursal an jumpʼejl Comité i chaʼan Sucursal yicʼot an Junmojt muʼ bʌ i pʌsob bij ancianojob bombiloʼ bʌ añoʼ bʌ tiʼ wenta jiñi i testigojob.

¹⁵ Wen utsʼatʌch tiʼ tojlel i yorganización Jehová cheʼ tsaʼ mejli bajcheʼ jiñi. ¿Chucoch? Come wʌle muqʼuix i ñumen chʼʌmbentel isujm jiñi Biblia. Miʼ ñumen taj i wenlel ili organización come mach juntiquil jax muʼ bʌ i yʌcʼ i tʼan ti chuqui yom miʼ mejlel. Tiʼ pejtelel jiñi ancianojob tsaʼ bʌ i yʌqʼueyonla Jehová muqʼuix i mejlel i cʼʌñob chuqui yujiloʼ bʌ (Proverbios 24:6; Efesios 4:8).

16, 17. ¿Chuqui muʼ bʌ a ñumen mulan ti jiñi qʼuextʌyem tac bʌ, chucoch?

¹⁶ Laʼ lac tsʼitaʼ al chuqui qʼuextʌyem tac ti jiñi jabil tac maxto bʌ jalic ñumen. Ili ora, jiñi lac jun tac loqʼuem bʌ ti Biblia wen utsʼatax ti cʼʌñol yicʼot cheʼ bajcheʼ yilal melbil. Muqʼuix laj cʼʌn ti subtʼan chuqui tac tsijib melbil i chaʼan jiñi tecnología. Ñumen cabʌlix woli bʌ i chʼʌmob i coltʌntel yaʼ ti página jw.org. Tiʼ pejtelel iliyi miʼ pʌs chaʼan Jehová miʼ cʼuxbin jiñi quixtañujob yicʼot miʼ chʼʌmob ti ñuc.

¹⁷ Mi laj qʼuel ti ñuc jaʼel chuqui tac qʼuextʌyem ti jiñi tempa bʌ come miʼ ñumen aqʼueñonla i yorajlel chaʼan mi lac chajpan lac bʌ ti lac  bajñelil o yicʼot lac familia. Cheʼ jaʼel mi laj qʼuel ti ñuc chuqui tac qʼuextʌyem ti laj colem tempa bʌ tac. ¡Ti jujumpʼejl jab woliʼ ñumen tojʼan majlel! Miʼ yʌqʼueñonla lac tijicñʌyel jaʼel chaʼan tiʼ pejtelel chuqui mi laj cʌn yaʼ ti cʌntesʌntel tac chaʼan bʌ jiñi Biblia. Iliyi miʼ pʌs chaʼan Jehová woliʼ tojʼesan majlel i yorganización yicʼot woliʼ ñumen weñʼesan jiñi paraíso.

18, 19. ¿Bajcheʼ miʼ mejlel la cʌcʼ laj coltaya chaʼan miʼ ñumen weñʼan jiñi paraíso?

¹⁸ Jehová miʼ cʌy chaʼan joñonla mi lac ñumen weñʼesan jiñi lac paraíso. ¿Bajcheʼ miʼ mejlel lac mel? Junchajp jiñʌch cheʼ mi lac chaʼlen subtʼan yicʼot cʌntesa chaʼan bʌ jiñi Biblia ti lac chʼejlel. Cheʼ bʌ an majqui mi laj coltan chaʼan miʼ sujtel tiʼ testigo Jehová, choncol lac ñumen ñuqʼuesan jiñi paraíso (Isaías 26:15; 54:2).

¹⁹ Yambʌ bajcheʼ miʼ mejlel lac mel jiñʌch cheʼ mi lac chaʼlen wersa lac ñumen tojʼesan jiñi lac melbal bajcheʼ xñoptʼan. Cheʼʌch mi caj lac ñumen weñʼesan jiñi paraíso tiʼ tojlel yañoʼ bʌ. ¿Chuqui miʼ ñijcʌben i pusicʼal jiñi quixtañujob chaʼan miʼ tilelob ti jiñi organización, i chaʼan miʼ cʌñob Jehová yicʼot Jesús? Jiñʌch jiñi wem bʌ lac melbal i mach cojach chuqui la cujil.

20. Cheʼ bajcheʼ miʼ yʌl Proverbios 14:35, ¿chuqui yom mi lac mel?

²⁰ Jehová yicʼot Jesús miʼ wen tajob i tijicñʌyel cheʼ miʼ qʼuelob chaʼan wen utsʼatax lac paraíso. Miʼ wen aqʼueñonla lac tijicñʌyel jaʼel cheʼ woliyonla ti coltaya chaʼan utsʼat miʼ qʼuejlel. Pero ñumen tijicña mi caj la cubin cheʼ bʌ mi caj lac sujtesan ili Pañimil ti jumpʼejl paraíso muʼ bʌ caj i mejlel laj qʼuel. Ti Proverbios 14:35 miʼ yʌl chaʼan tijicña miʼ yubin juntiquil rey cheʼ bʌ an juntiquil i wiñic am bʌ i ñaʼtʌbal. Jin chaʼan, laʼ lac pʌs lac ñaʼtʌbal yicʼot laʼ lac chaʼlen wersa chaʼan mi lac ñumen weñʼesan jiñi paraíso.