1, 2. ¿Kasa wayuu tü süpülajanakat nuuʼui Maleiwa saashin tü Pütchi Ashajuushikat süka Hebreo?

ANUU nünüiki Jeʼwaa: «Tü sirumatuʼukat müsü aka saaʼin tü einasee eere joyotuin taya sünain aluwatawaa jee tü mmakat müsü aka saaʼin tü süpülajanakat tooʼui» (Is. 66:1, TNM). Akaʼaya suluʼu Isaías 60:13, müshi Jeʼwaa: «Anashaateerü maʼin tatuma tü süpülajanakat tooʼui». ¿Kasa naaʼinraka Jeʼwaa süpüla anashaatainjatüin maʼin nutuma tü süpülajanakat nuuʼui? ¿Kasakaʼa waaʼinrüinjatüin wayakana yaakana kepiain yaa Mmapaʼa?

² Tü aʼwaajüleekat Maleiwa chajatka Israel sümaiwa paala, shiyaakuayaasü tü süpülajanakat nuuʼui Maleiwa. Kojuyatua aküjünüin tia suluʼu tü Pütchi Ashajuushikat süka Hebreo (1 Crón. 28:2; Sal. 132:7). Anapuʼusü maʼin nümüin Jeʼwaa tia aʼwaajüleekat süka noʼunapuʼuin chamüin na wayuu aʼyataashiikana nümüin süpüla naʼwaajüin nia.

3. (1) ¿Kasa naainjaka Jeʼwaa süpüla waʼwaajüinjachin nia maaʼulu yaa? (2) ¿Kasoʼulajatü nukumajüin Jeʼwaa sukuwaʼipa tü aainjünajatkat süpüla nuʼwaajünüinjachin?

³ Maaʼulu yaa, nnojotsü eein wanee piichi aʼwaajülee Jeʼwaa maʼaka saaʼin tü eejatkat sümaiwa paala. Waneejatüitpa sukuwaʼipa tia. Tü  aʼwaajülee eekat maaʼulu, nnojotsü piichin, shia tü akuwaʼipaa niʼitaakat Jeʼwaa süpüla sürütkaainjatüin wayuu süpüshuaʼa nünainmüin süpüla suʼwaajüin nia. Eeichipa süpüla waʼwaajüin Maleiwa sümaa warütkaain nünainmüin süka naapajiraashinkain nikii Jesuu waaʼu. Soʼujeʼereʼeya juyakat 29 wanaa sümaa woutiisain Jesuu, nukumajüin Jeʼwaa sukuwaʼipa tü aainjünajatkat süpüla nuʼwaajünüinjachin. Soʼu tia, aneekünaleeshia Jesuu süpüla niainjachin «chi sacerdote müloʼushikai» (Heb. 9:11, 12).

4, 5. (1) ¿Kasa naaʼinrajatka na aʼyataashiikana nümüin Jeʼwaa saashin Salmo 99? (2) ¿Kasa wasakireʼerüinjatka waaʼin?

⁴ Talatashaanashii maʼin waya sutuma nukumajüin Jeʼwaa sukuwaʼipa süpüla waʼwaajüinjachin nia. Shiasaʼa sutuma müin waya talatüin waaʼin, waküjüin sümüin wayuu Jeʼwaain nünülia Maleiwa jee waküjüin sümüin wayuu nüjütüin Jesuu yaa mmapaʼamüin süpüla naapajiraain nikii waaʼu. Talatüsü maʼin waaʼin sutuma nalatüin suulia oocho miyoone na aʼwaajakana Jeʼwaa weinshi. Watta naalii wayuu aʼwaajeenakana Maleiwa ouktapa naya naashin jee noʼunapa chaa iipünaamüin. Akanasaʼa wayakana, watüjaa aaʼu waʼwaajüinjachin Maleiwa maaʼulu yaa.

⁵ Waʼwaajüin Jeʼwaa maʼaka naainjapuʼuin shia na aʼwaajakana nia sümaiwa paala (paashajeʼera Salmo 99:1-3, 5-7). Noʼutku naya wayuukana nia Moisés, Aarón otta müshia Samuel, kojutüsü maʼin namüin tü sukuwaʼipakat nutuma Maleiwa süpüla nuʼwaajünüinjachin. Maaʼulu yaa, piamasü neʼipapaʼa na aʼwaajakana Maleiwa sümaa paaʼinwain naya. Tü palajatkat neʼipapaʼa, naya na anoujashii chainjanakana chaa iipünaa otta naya oʼunirakana sukuwaʼipa tü aainjünajatkat süpüla nuʼwaajünüinjachin Jeʼwaa yaa Mmapaʼa. Tü wanee neʼipapaʼakat, naya na anoujashii yaainjanakana kepiain yaa mmapaʼa aʼyanaajiraakana namaa na chainjanakana chaa iipünaa (Juan 10:16). Müsüjeseʼe anain wasakireʼerüle waaʼin waneʼewai wakua: «¿Kojutüsüche tamüin sukuwaʼipa tü aainjünajatkat süpüla nuʼwaajünüinjachin Jeʼwaa?».

6, 7. (1) ¿Kasa pütchi ekeraajaka sümaiwa paala? (2) ¿Kasa alataka soʼu juyakat 1919?

⁶ «Ojuʼiraajeerü juʼuluku sünain ekirajaa saʼalain shiiʼiree noushikajaainjanain na anoujashiikana süchiirua», müshi chi aluwataaushikai Pablo (Aluw. 20:28-30; 2 Tes. 2:3, 4). Ekeraajüsü tia pütchikat sümaa nnojoluin sülatayaain 100 juya süchikijee nuʼunüin Jesuu chaa iipünaamüin. Müsüjeseʼe kapüleeitpain joo ayaawataa saaʼu jaraliin na anoujashii shiimainshiikana. Kakalia maʼin süchikijee tia, niiʼiyatüin Jeʼwaa nükajee Jesuu jaraliin na anoujashii aʼwaajakana nia suluʼu tü aʼwaajülee eekat maaʼulu.

⁷ Ayaawatüna aaʼu jaraliin naya soʼu juyaka 1919. Nanoukteʼerüin nakuwaʼipa naya anoujashiikana süpüla naʼwaajüinjachin Jeʼwaa (Is. 4:2, 3; Mal. 3:1-4). Shiasaʼa soʼujee tia, ekeraajüsü «tü kasa anasü niiʼiyatakat chi Senyotkai»  nümüin Pablo. Wekirajaa sünain kasain wayuu tü niʼrakat Pablo.

8, 9. ¿Kasa wayuu tü paʼaraiisü niʼrakat Pablo?

⁸ Niiʼiyatüinka Jeʼwaa nümüin Pablo tü alatajatkat mapeena (paashajeʼera 2 Corinto 12:1-4, TNM). Naashin Pablo, niʼrüin tü «paʼaraiisükat». ¿Kasache maʼin tü paʼaraiisü niʼrakat Pablo? Eesüjaʼa apünüinsüle sukuwaʼipa tia. Palajana, eesü shiale niʼrüin tü Mmakat Paʼaraiisüpa shia (Luc. 23:43, TNM). Eesüjaʼa shiale niʼrüin Pablo tü wayuukalüirua süpüshuaʼa sünain anajiraain jee paaʼinwajiraain naya suluʼu tü mma jeketkat. Jee müsia tü wanee, eesü shiale niʼrüin Pablo tü paʼaraiisü anashaatasü chakat iipünaa (Alat. Map. 2:7, TNM).

⁹ ¿Jamüsü nnojotka nüküjüin Pablo süchiki tü kasa aküjünakat nümüin? Shia süka nnojoyüliain kettaain sükalia süpüla nüküjüinjatüin sümüin wayuu tü kasa anashaatasü niʼrakat. Aluʼujasaʼa maaʼulu yaa, eeitpa süpüla waküjüin sümüin wayuu tü kasa anashaatasü eekat suluʼu nupueulose Maleiwa.

10. ¿Wanaawasüche tü paʼaraiisü eekat maaʼulu sümaa tü aʼwaajülee eekat maaʼulu?

¹⁰ Ashajünawaisü süchiki tü paʼaraiisü eekat maaʼulu suluʼu tü karalouktairua weitajakat. Tü aʼwaajülee eekat maaʼulu, ¿shiachejeʼeya neʼe tü paʼaraiisü eekat maaʼulu? Nnojo, naata sümüin. Tü aʼwaajülee eekat maaʼulu, nnojotsü piichin, shia tü akuwaʼipaa niʼitaakat Jeʼwaa süpüla sürütkaainjatüin wayuu süpüshuaʼa nünainmüin süpüla suʼwaajüin nia. Eekajasaʼa tü paʼaraiisü eekat maaʼulu shia tü nakuwaʼipakat na aʼyataashiikana nümüin Jeʼwaa suluʼu anain naya nutuma jee paaʼinwain naya. Sutuma tia, atüjaana aaʼu jaraliin na aʼyataakana suluʼu tü aʼwaajülee eekat maaʼulu (Mal. 3:18).

11. Sutuma suluʼuin waya tü paʼaraiisü eekat maaʼulu, ¿kasa aʼyatawaa waaʼinrajatka?

¹¹ Soʼujee juyakat 1919, niʼitaain Jeʼwaa najapuluʼu waneeinnua wayuu tü paʼaraiisü eekat maaʼulu süpüla naaʼinmajüinjatüin shia, kooʼomüinjatü shia natuma sümaa anaʼleeinjatüin shia. Anashaatasü maʼin tia aʼyatawaakat. ¿Aʼyataashi pia süchiirua tia? ¿Kojutüsü pümüin aʼyatawaa nümaa Jeʼwaa? Müle shia putuma, kojuteechi nia sümüin wayuu.

12. ¿Jamüsü watüjaaka saaʼu shikeraajüin tü sümakat Isaías 60:17? (Piirakaa sümüin tü ayaakuaa suluʼukat süpana 11.)

¹² Wainmairü kasa anoukteʼennaka suluʼu nupueulose Maleiwa yaa Mmapaʼa. Shiaʼaya maʼin tü nüküjakalü achiki Isaías tia (paashajeʼera Isaías 60:17). Watta naalii na atüjaakana saaʼu tü anoukteʼennakat suluʼu nupueulose Maleiwa sutuma süküjünüin namüin jee shiale sutuma naashajeʼerüin shia suluʼu tü karalouktairua eekat wamaʼana. Naʼaka naya wawalayuukana, eeshii jimaʼalii, majayünnüü otta na jekennuukana sünain anoujaa. Eepejeʼe wawalayuu kakaliainnaka sünain anoujaa otta eejana naya suʼunnaa tü anoukteʼennakat suluʼu nupueulose Maleiwa. Natüjaa aaʼu naya wawalayuukana niain Jesuu eʼitaanüin nutuma Maleiwa süpüla oʼuniraa sukuwaʼipa tü nupueulosekat. Jülüjüle waaʼin tü namakat naya wawalayuukana, weʼitaʼaleejeeria maʼin waaʼin nünain Jeʼwaa.

13. ¿Kasa waaʼinrajatka saashin Salmo 48:12-14?

¹³ Wayakana wapüshuaʼa, waküjüinjatü sümüin wayuu tü süchikikat nupueulose Maleiwa. Mayaapejeʼe mojuin tü mmapaʼakat, anashaatasü maʼin tü wakuwaʼipakat sutuma anain waya jee paaʼinwajiraain waya namaa na wawalayuukana sainküin mmakat süpüshuaʼa, süka jamüin, suluʼuin waya tü paʼaraiisü eekat maaʼulu. Waküjüinjatü namüin na jimaʼaliikana, na majayünnüükana süchiki nupueulose Maleiwa jee süchiki tü paʼaraiisü eekat maaʼulu. Otta müsia waküjüinjatü shia namüin na jekennuukana sünain anoujaa (paashajeʼera Salmo 48:12-14).

14, 15. (1) ¿Kasa anoukteʼennaka suluʼu nupueulose Maleiwa süchikijee juyakat 1970? (2) ¿Jamüsü anaka maʼin tia anoukteʼennakat?

¹⁴ Wattainna naalii wawalayuu eʼrakana tü  anoukteʼennakat suluʼu nupueulose Maleiwa yaa Mmapaʼa süpüla anaʼleeinjatüin shia. Jamüsüjaʼa sümaiwa paala, waneeshia neʼe chi laülaashi jülüjapuʼukai aaʼin na wawalayuukana suluʼu tü outkajaaleekat. Müsia neʼe suluʼu Weteet, waneeshia neʼe chi wawala jülüjapuʼukai aaʼin tü aʼyatawaa aainjünakat chayaa. Akaʼaya suluʼu tü Sociedad Watch Tower münakat, eepuʼushi wanee wawala shikiipuʼujanakai. Mayaapejeʼe eein na wawalayuu neʼipajanakana naya wawalayuukana, waneeshia neʼe chi wawala aneekapuʼukai tü aainjünakat suluʼu tü outkajaaleekat, suluʼu Weteet sainküinpünaa mmakat jee tü Weteet chakat Nueva York. Anoukteʼennapajaʼa sukuwaʼipa tia süchikijee juyakat 1970, kojuyainnapa na laülaashii jülüjakana aaʼin na wawalayuukana suluʼu tü outkajaaleekat, kojuyainnapa na Laülaashii Jülüjakana Aaʼin tü Aʼyatawaakat suluʼu Weteet jee müsia kojuyainnapa na Laülaashii Jülüjakana Aaʼin na Aküjüliikana Pütchi sainküin Mma.

¹⁵ Makaʼa sunoukteʼennüin tia shia süka nnojoluin pansaapuʼuin sümaa tü sümakat tü Wiwüliakat. Anapajaʼa sutuma müin sukuwaʼipa atumawaa. Anasü sukuwaʼipa naʼyataain na laülaashiikana süka kojuyainnapain naya sünain aaʼinraa tü aʼyatawaa eʼitaanakat najapuluʼu (Prov. 24:6; Éf. 4:8).

16, 17. Sünainjee tü kasa anoukteʼennakat suluʼu nupueulose Maleiwa, ¿jarat tü kamalainkat pümüin? ¿Jamüsü kamalainka shia pümüin?

¹⁶ Wekirajaa sünain waneeirua kasa anoukteʼennaka suluʼu nupueulose Maleiwa. Maaʼulu yaa, anashaataleeitpa shiyolojo tü karalouktairua weitajakat sümüin wayuu otta jalouisü shia namüin. Wanee kasa waküjaka aka pütchi shia tü serulaatkat, tableta jee waneeirua kasa kaluʼukat Internet. Wattainna naalii wayuu ekirajünaka sükajee jw.org. Sükajee tü kasa anoukteʼennakat suluʼu nupueulose Jeʼwaa, niiʼiyatüin sünain alin wayuu nüpüla sümaa jülüjüin naya naaʼin.

¹⁷ Wanee kasa anaka maʼin shia tü ai waʼwaajakalü oʼu Maleiwa wamüiwaʼa jee shiale sümaa  wapüshi. Akaʼaya tü outkajawaakat miyoʼu, anashaatasü maʼin süka wainmain tü kasa anoukteʼennakat sünain, ana ana müsü shiʼipaʼaya. Jee müsia, talatüshii maʼin waya sutuma wainmain ekirajawaa wapüla wayakana aʼyataashiikana nümüin Jeʼwaa. Sükajee tüü, niiʼiyatüin Jeʼwaa niain oʼunirüin sukuwaʼipa nupueulose sümaa anaʼleein shia nutuma.

18, 19. ¿Kasa waaʼinrajatka süpüla anaʼleeinjatüin tü paʼaraiisü eekat maaʼulu?

¹⁸ Nuuʼulaain waya Jeʼwaa sünain wakaaliinjain nia süpüla anaʼleeinjatüin tü paʼaraiisü eekat maaʼulu. ¿Kasa waaʼinrajatka süpüla wountüin tia? Aküjüinjana waya pütchi otta wekirajüinjatü wayuu sünain tü Wiwüliakat sümaa talatüin waaʼin. Wanaa sümaa woutiisain wanee wayuu wekirajaka sünain tü Wiwüliakat, akooʼomüinraashii watuma na wayuu suluʼukana tü paʼaraiisü eekat maaʼulu (Is. 26:15; 54:2).

¹⁹ Wanee kasa waaʼinrajatka süpüla anaʼleeinjatüin watuma tü paʼaraiisü eekat maaʼulu, shia wanoukteʼerawalinjatüin tü wakuwaʼipakat wanaapünaa sümaa tü nuchuntakat Maleiwa wamüin. Waainjüle tia, keeʼireejeerü saaʼin wayuu suluʼuin shia tü paʼaraiisü eekat maaʼulu. Wattainna naalii na wayuu ekirajaakana nünain Jeʼwaa jee nünain Jesuu sutuma neʼrüin anain tü wakuwaʼipakat.

20. ¿Kasa waaʼinrajatka saashin Proverbios 14:35?

²⁰ Talatüshi Jeʼwaa jee müshia Jesuu sutuma neʼrüin anain maʼin tü paʼaraiisü eekat maaʼulu. Akaʼaya wayakana, talatüshii maʼin waya sutuma waʼyataain süpüla anaʼleeinjatüin watuma tü paʼaraiisü eekat maaʼulu. Talataleejeetpajaʼa maʼin waaʼin waʼyataapa süpüla paʼaraiisüinjatüin tü Mmakat. Saashin Proverbios 14:35, talatüshi maʼin wanee aluwataai müleka kekiire maʼin wanee nüchepchia. Müshiijeseʼe kekiinjanain maʼin waya sümaa waʼyataainjanain maʼin süchiirua anaʼleeinjatüin tü paʼaraiisü eekat maaʼulu.